‘Ukufumana Impumuzo Yemiphefumulo Yenu’
“Zanini kimi nina nonke enikhatheleyo nenisindwayo, . . . khona imiphefumulo yenu iyakufumana impumuzo.”—MATHEWU 11:28-30.
1, 2. Siye saba yini isimo somkhaya wesintu emakhulwini eminyaka, futhi lokhu kuphambene kanjani nalokho uNkulunkulu ayekujongile ekuqaleni?
“SIYAZI ukuthi konke okudaliweyo kuyabubula kanyekanye kunezinseka kuze kube-manje.” Yilokho indoda ethile eyakubhalela abangane bayo abaseRoma emakhulwini eminyaka adlule. (Roma 8:22) Kusukela kuleyominyaka, ukububula nezinhlungu zomkhaya wesintu uwonke kuye kwanda. Ubandlululo ubumpofu, ubudlova, nendlala kuye kwenzeka ngezinga elisabisayo yonke indawo. Isimo sezomnotho esingenakho ukulunga siphoqelela izigidi zezigidi ukuba ziphume emisebenzini ngisho nasemakhaya azo, nethonya lobuSathane lilulaza imizamo yokukhulisa abantwana ngendlela okufanele bahambe ngayo.
2 Kodwa mhlawumbe isigemegeme esikhulu senzeka lapho ukugula, isifo, noma ukuguga kwenza buthaka amandla abantu futhi kubaphuce isithunzi sabo njengoba beya bewohloka beba amagobolondo nje. Ubuhlungu obukhulu nokuhlupheka, ngokuvamile okuhlala amasonto, izinyanga, futhi ngezinye izikhathi ngisho neminyaka, kwenza izinhliziyo ziqaqambe futhi kubangele ukuba kugeleze imifula yezinyembezi. Yeka ukukhulumela okubuhlungu ngokuphila! Mayelana nokuhlupheka komuntu, inkosi ehlakaniphile yakudala yathi: “Zonke izinsuku zakhe zinobuhlungu, nomsebenzi wakhe ulusizi.” (UmShumayeli 2:23; 4:1) Ukuphila namuhla ngokuqinisekile akukhona lokho uNkulunkulu ayehlose ukuba kube yikho ekuqaleni!—Genesise 2:8, 9.
3. UNkulunkulu wadala umuntu enaliphi ikhono, futhi lisetshenziswa kanjani manje ngezinga elilinganiselwe?
3 UJehova uNkulunkulu wadala umuntu ephelele, enekhono lokukujabulela ngempela ukuphila. (Duteronomi 32:4, 5) Cabanga nje ngenjabulo yokunambitha ukudla okumnandi, ukuhogela umoya ohlanzekile ojabulisayo, noma ukubuka ukushona kwelanga okuhle! “Ngibonile umshikashika uNkulunkulu awunikile amadodana abantu ukuba awushikashike,” kuphawula yona lenkosi ehlakaniphile yakudala. “Wenzile konke kube-kuhle esikhathini sakho. . . . Ngiyazi ukuthi akukho okuhle kubo kunokuba bathokoze, bazenzele okumnandi besekhona. Kepha futhi ukuba abantu bonke badle, baphuze, babone okuhle kuwo wonke umshikashika wabo kuyisipho sikaNkulunkulu nalokho.”—UmShumayeli 3:10-13.
4. (a) Njengoba kuboniswe okuhlangenwe nakho kukaJesu, isiphi isimo esidabukisayo ngabaningi? (b) Isiphi isimemo esifudumeza inhliziyo uJesu asidlulisela, futhi lokhu kuphakamisa miphi imibuzo?
4 Nokho, yeka ukuthi bambalwa kangakanani abakwaziyo ukujabulela izinto ezinhle esizihloselwe nguNkulunkulu! UJesu Kristu wasiqaphela isimo sesintu esibangela usizi, esidabukisayo. IBhayibheli lithi: “Kwase kusondela kuye izixuku eziningi zinezinyonga, nezimpumputhe, nezimungulu, nezilima, nabanye abaningi, zababeka ngasezinyaweni zakhe.” Yeka ukuthi uJesu wabahawukela kanjani labantu abaneshwa! (Mathewu 9:36; 15:30) Kwesinye isenzakalo, wadlulisela isimemo esifudumeza inhliziyo: “Zanini kimi nina nonke enikhatheleyo nenisindwayo, mina ngizakuniphumuza. Bekani ijoka lami phezu kwenu, nifunde kimi, ngokuba ngimnene, ngithobile ngenhliziyo; khona imiphefumulo yenu iyakufumana impumuzo.” (Mathewu 11:28, 29) Ngokuqinisekile, lawa amazwi anika ithemba! Kodwa iyiphi lempumuzo uJesu ayekhuluma ngayo? Futhi singayithola kanjani?
Iqiniso Eliphumuzayo
5. UJesu wayibonisa kanjani indlela yokukhululeka kweqiniso nempumuzo yemiphefumulo yethu?
5 Lapho uJesu eseMkhosini wamaDokodo cishe ezinyangeni eziyisithupha ngaphambi kokufa kwakhe, wabonisa indlela yokukhululeka futhi kanjalo sithole impumuzo yangempela. Ekhuluma nalabo ababekholelwa kuye, wathi: “Uma nimi ezwini lami, ningabafundi bami isibili; niyakulazi iqiniso, neqiniso liyakunikhulula.” (Johane 8:31, 32) Iliphi iqiniso uJesu ayekhuluma ngalo? Liyosikhulula kuphi? Izilaleli zakhe zaziyizigqila ngayiphi indlela?
6. (a) Ikuphi ukuphikisa abaphikisi benkolo abakuphakamisa, futhi ngani? (b) Kungayiphi indlela sonke siyizigqila?
6 Abaphikisi benkolo baphazamisa uJesu, begomela: “Siyinzalo ka-Abrahama thina, asibonange sibe-yizigqila zamuntu; wena usho kanjani ukuthi: Nizakuba-ngabakhululekileyo na?” Labo baphikisi abangamaJuda babeqhosha ngohlu lozalo lwabo. Ngisho nakuba kaningana lesizwe sasiye sabuswa imibuso yakwamanye amazwe, amaJuda enqaba ukubizwa ngokuthi ayizigqila. Kodwa uJesu wabonisa ukuthi ayeyizigqila ngayiphi indlela, ethi: “Ngiqinisile, ngiqinisile ngithi kini: Yilowo nalowo owenza isono uyisigqila sesono.” Yebo, zonke izilaleli zakhe ‘zazisenza isono,’ njengoba nje sonke sinjalo namuhla. Lokhu kungenxa yokuthi sonke sizuze isono kubazali bethu bokuqala. Kodwa uJesu wathembisa: “Uma iNdodana inikhulula, niyakuba-ngabakhululekileyo impela.”—Johane 8:33-36; Roma 5:12.
7. Inkululeko yeqiniso ingatholakala kanjani, futhi iliphi iqiniso elisikhululayo?
7 Kanjalo inkululeko yeqiniso ingatholakala kuphela ngeNdodana kaNkulunkulu, uJesu Kristu, eyanikela ngokuphila kwayo kobuntu okuphelele njengomhlatshelo wesihlengo. Yilomhlatshelo osikhulula esonweni esibulalayo futhi wenze kube nokwenzeka ngathi ukuba sijabulele ukuphila okuphakade empilweni ephelele nasenjabulweni ezweni elisha likaNkulunkulu lokulunga. (Johane 3:16; 1 Johane 4:10) Ngakho-ke, iqiniso elisikhululayo iqiniso eliphathelene noJesu Kristu nendima yakhe ekugcwalisekeni kwezinjongo zikaNkulunkulu. UMbuso, unoKristu njengeNkosi, yiwo oyofeza intando kaNkulunkulu ngomhlaba, futhi uJesu waqhubeka enikeza ubufakazi ngaleliqiniso.—Johane 18:37.
Indlela Iqiniso Eliphumuza Ngayo
8. Ingafaniswa nani indlela iqiniso elinikeza ngayo impumuzo?
8 Indlela iqiniso elinikeza ngayo impumuzo ingase ifaniswe nowesifazane otshelwe ukuthi unohlobo lomdlavuza olwanda ngokushesha. Umthwalo obangelwa yilokho kwazi umqeda amandla njengoba ecabanga ngemiphumela ebuhlungu, engase ibhubhise. Nokho, ngokuhamba kwesikhathi uthintana nomunye udokotela futhi ahlolwe ngokuqhubekayo. Lapho imiphumela yalokhu kuhlolwa yembula ukuthi umphumela wokuhlolwa kokuqala wawunephutha noma uye wasimama ngokuphawulekayo, ungase ucabange ngomuzwa wokukhululeka ojabulisayo aba nawo. Yeka ukuthi kuphumuza kangakanani emphefumlweni wakhe!
9. UJesu wayinikeza kanjani impumuzo ngokufundisa abantu iqiniso?
9 Ngokufanayo, lapho uJesu eza emhlabeni, abantu babesindwa izimiso zamasiko eziyize zangalesosikhathi. Ekhuluma ngababhali nabaFarisi ababenecala, uJesu wathi: “Babopha imithwalo enzima, bayibeke emahlombe abantu; kepha bona abavumi ukuyifukula ngomunwe wabo.” (Mathewu 23:4; Marku 7:2-5) Yeka ukukhululeka okwaba yikho lapho uJesu enikeza abantu iqiniso elabakhulula emasikweni anjalo agqilazayo! (Mathewu 15:1-9) Kusenjalo nanamuhla.
10. Abaningi baye bathwala miphi imithwalo eqeda injabulo, futhi umuntu angazizwa kanjani lapho eyethula ngemva kokufundisa iqiniso?
10 Mhlawumbe ungomunye obephila ngokwesaba ukuhlushwa esihogweni somlilo noma esihlanzweni ngemva kokufa ngenxa yemithwalo esindayo yezimfundiso zenkolo ezingamanga. Noma lapho othandekayo eshona, kungenzeka ukuthi waphela amandla lapho umfundisi ekutshela ukuthi uNkulunkulu uthathe ingane yakho ethandekayo ngoba edinga enye ingelosi—sengathi uNkulunkulu ubedinga ingane yakho ngaphezu kokuba wena uyidinga. Ngezinye izikhathi abefundisi futhi batshela abantu abagulayo ukuthi lokhu kuyisiqalekiso esivela kuNkulunkulu. Ingabe akuphumuzi yini ngempela ukufunda amaqiniso eBhayibheli akhulula umuntu kulawomanga angokwenkolo asindayo? Yeka umuzwa wokukhululeka lokhu okuwulethayo!—UmShumayeli 9:5, 10; Hezekeli 18:4; Johane 9:2, 3.
11. (a) Imuphi omunye wemithwalo emikhulu kakhulu, futhi ungathulwa kanjani? (b) Iyiphi impumuzo uJesu ayilethela izoni lapho esesemhlabeni?
11 Omunye wemithwalo emikhulu ukuba siyithwale yilowo wecala ngenxa yezono esiye sazenza. Kuyakhulula ukwazi ukuthi ngenxa yomhlatshelo wesihlengo kaKristu, lezizono zingasuswa. ‘Igazi likaJesu liyasihlambulula ezonweni zonke,’ kuqinisekisa iBhayibheli. (1 Johane 1:7) Naphezu kwanoma iziphi izinto ezimbi esiye sazenza, uma siye saphenduka ngempela futhi salungisa izindlela zethu, singajabulela ukukhululeka okuphumuzayo kukanembeza ohlanzekile nokuqiniseka ngokuthi uNkulunkulu akasayikuzikhumbula izono zethu. (IHubo 103:8-14; 1 Korinte 6:9-11; Heberu 10:21, 22) Yeka impumuzo uKristu ayilethela labo ababesindwa yizono, njengezifebe nabathelisi abanjengoZakewu! UJesu wabaduduza ngamaqiniso eBhayibheli ngesikhathi edla nabo.—Luka 5:27-32; 7:36-50; 19:1-10.
12. (a) UJesu waletha impumuzo kubantu abangaphansi kwaziphi izimo ezicindezelayo? (b) Ekhulwini lokuqala leminyaka, uJesu wakubonakalisa kobani ngendlela engumbukwane ukuthi ‘uyindlela neqiniso nokuphila’?
12 Abanye abantu abaningi bathwele imithwalo esindayo yokugula nezifo, ukucindezeleka okukhulu, nosizi olukhulu olubangelwa ukufa kothandekayo. Nokho, uJesu waletha impumuzo kubo bonke abanjalo ‘ababekhathele futhi besindwa.’ (Mathewu 4:24; 11:28, 29) Welapha owesifazane othile owayesefune usizo kodokotela iminyaka eyi-18 wehluleka. UJesu waphulukisa nendoda eyayisigule iminyaka engama-38, nomunye owayezalwe eyimpumputhe. Ungakucabanga yini ukukhululeka kwabo ngenkathi uJesu ebaphulukisa? (Luka 13:10-17; Johane 5:5-9; 9:1-7) Iqiniso liwukuthi bonke abeza kuJesu ngokholo beza emthonjeni weqiniso, empumuzweni yoqobo, nasekuphileni. Kumfelokazi owamukela indodana yakhe okwakuwukuphela kwayo ivela kwabafileyo nakubazali abandodakazi yabo eyayifile eneminyaka eyi-12 ubudala eyabuyiselwa kubo iphila, ngempela uJesu wakufakazela ngendlela ewumbukwane ukuthi ‘uyindlela, neqiniso, nokuphila.’—Johane 14:6; 17:3; Luka 7:11-17; 8:49-56.
13. UJesu wasifunda ukuba siphendukele kubani ukuze sithole usizo, futhi yini eyenzekayo uma sisisebenzisa iseluleko sakhe?
13 Ngokungangabazeki kukhona izikhathi lapho ubhekana khona nezinkinga ezinkulu kakhulu ukuba ungazisingatha wena siqu. UJesu wasifundisa ukuba siphendukele kuJehova sicele usizo, njengoba nje naye enza. (Luka 22:41-44; Heberu 5:7) Lapho siphendukela kuNkulunkulu njalo ngomthandazo, sihlanganyela imizwa yomhubi owabhala: “Mayibongwe iNkosi. Iyasithwala imihla ngemihla; uNkulunkulu uyinsindiso yethu.” (IHubo 55:22; 68:19) Yebo, ukwazi iqiniso kuyayiletha ngempela impumuzo. Kusisondeza eduze noJehova futhi kuyasisiza ukuba siqonde ukuthi ngosizo lwakhe kungenzeka ukuba sibhekane ngisho nanesimo esinzima ekuphileni kwethu ngempumelelo.
Ukuphunyuzwa Ithemba LoMbuso
14. Yini eyasekela uJesu ekulingweni kwakhe, futhi yini ebalulekile ukuze sithole impumuzo yemiphefumulo yethu?
14 Ukuze sithole impumuzo yangempela yemiphefumulo yethu, kumelwe sibe nethemba eliqinile. Yithemba elasekela uJesu. IBhayibheli lithi: “Owathi esikhundleni sentokozo ayibekelweyo wathwala isiphambano engalinaki ihlazo, wahlala ngakwesokunene sesihlalo sobukhosi sikaNkulunkulu.” (Heberu 12:2) Ithemba elijabulisayo elasekela uJesu kwakuyilelo lokuba nengxenye ekungcwelisweni kwegama likaYise ngokugcina ubuqotho, kanye nokuzibonakalisa ekufanelekele ukubusa njengeNkosi yoMbuso kaNkulunkulu. Ukulondoloza umbono ocacile wethemba lethu, njengabayobusa noJesu Kristu ezulwini noma njengezikhonzi zakhe eziphila emhlabeni oyiPharadesi, kuyosisekela futhi enkonzweni kaNkulunkulu. Ngempela, lelothemba libalulekile ukuze sithole impumuzo yemiphefumulo yethu.—Roma 12:12.
15. Ayini amathemba ethu okuphila ngaphandle kwethemba loMbuso?
15 Cabangela amathemba ethu okuphila ngaphandle kwethemba loMbuso. Ukuphila ngokuvamile kuthatha iminyaka engama-70 noma mhlawumbe engama-80. Futhi lezozinsuku zidlula ngokushesha, njengoba noma ubani ogugayo engakutshela! Yebo, iBhayibheli lisho liqinisile uma likhuluma ngezinsuku zokuphila: “Zidlula masinyane, thina siyandiza.” (IHubo 90:10) Nokho, sifuna izinsuku zethu ziqhubeke. Sifuna ukuphila. Kuningi kakhulu esingakwenza futhi sikujabulele.
16. Ukuze sithole impumuzo yemiphefumulo yethu, yini okudingeka siyenze?
16 Ngakho-ke, yeka ukuthi kubaluleke kangakanani ukuza ngokholo ‘kuJesu Kristu ithemba lethu!’ (1 Thimothewu 1:1) Njengoba asho: “Lokhu kuyintando kaBaba ukuba yilowo nalowo obona iNdodana, akholwe yiyo, abe-nokuphila okuphakade.” (Johane 6:40, 51) Ingabe siyakukholelwa lokho? Ukuze sithole impumuzo yemiphefumulo yethu, nakanjani kumelwe sikukholelwe. Asinakuphila ngaphandle kwakho. Ngempela, kumelwe sifake “isigqoko sibe-yithemba lokusindiswa.” (1 Thesalonika 5:8; qhathanisa namaHeberu 6:19.) Lelothemba kumelwe livikele ingqondo yethu, ukucabanga kwethu. Ngaphandle kwalokho, siyosindwa imithwalo nayizinkathazo kangangokuthi sizoyeka futhi silahlekelwe ukuphila okuphakade. Ngakho-ke, ukuze ujabulele impumuzo yomphefumulo wakho qiniseka ngokuthi ugcina ithemba lakho loMbuso liqinile.
Impumuzo Ngokwenza Umsebenzi KaNkulunkulu
17. (a) Ukuze sithole impumuzo, yini efunekayo, futhi kungani lokhu kungengaphezu kwamandla ethu? (b) Ukwamukela ijoka likaKristu kuhilelani?
17 Kodwa ukuze sithole impumuzo, kudingeka okungaphezu kokumane nje size kuJesu. Wenezela: “Bekani ijoka lami phezu kwenu, [noma, “Ngenani ejokeni lami kanye nami”] nifunde kimi, ngokuba ngimnene, ngithobile ngenhliziyo; khona imiphefumulo yenu iyakufumana impumuzo. Ngokuba ijoka lami lihle, nomthwalo wami ulula.” (Mathewu 11:29, 30, New World Translation Reference Bible, umbhalo waphansi.) Ukuthwala ijoka kufanekisela umsebenzi. Kodwa phawula ukuthi uJesu akasiceli ukuba sibeke ijoka phezu kwethu bese senza wonke umsebenzi sisodwa. Kufanele singene ngaphansi kwejoka kanye naye. Kulendaba, ukwamukela ijoka uKristu alinikezayo kuhilela ukuzinikezela kuNkulunkulu, ukubonakalisa lokhu ngobhapathizo lwamanzi, bese sithatha umthwalo wemfanelo wokuba ngabafundi bakaKristu. Kodwa lelijoka lobufundi lingayiletha kanjani impumuzo?
18. (a) Kungani ukwamukela ijoka likaKristu kuletha impumuzo? (b) Umsebenzi wokushumayela usilethela kanjani injabulo nempumuzo?
18 Ukwamukela ijoka likaKristu kuletha impumuzo ngoba uJesu umnene futhi uthobile ngenhliziyo. Njengoba engeyena ongacabangeli, kuyimpumuzo ukusebenza naye ngaphansi kwejoka elifanayo. Uyakucabangela ukulinganiselwa kwethu nobuthakathaka bethu. Njengoba asho, “Ijoka lami lihle.” Yiqiniso, ijoka lobufundi lihilela umsebenzi, wona lowomsebenzi wokushumayela nokufundisa uJesu awenza nabaqeqeshela wona abalandeli bakhe bokuqala. (Mathewu 28:19, 20; IzEnzo 1:8) Nokho, yeka ukuthi kuwumsebenzi oqabula kanjani ukutshela abanye ngoNkulunkulu wethu onothando, ngeNdodana yakhe, nangoMbuso! Yeka ukuthi kuqabula kanjani ukutshela abantu ukuthi bangaphila kanjani phakade ePharadesi! Futhi lapho besabela kulesigijimi soMbuso esinikeza ukuphila futhi behlanganyela nathi ekukhonzeni uJehova uNkulunkulu, yeka ukuthi iba nkulu kangakanani injabulo yethu!—1 Thimothewu 4:16.
19. Kungani iseluleko somukhwe kaMose sifanelwe ukukhunjulwa abadala bamabandla namuhla?
19 Eminyakeni yamuva, izigidi ezidinga usizo ekwamukeleni ijoka likaKristu ziye zeza enhlanganweni kaJehova, futhi lokhu kwandisa umsebenzi wabamemezeli boMbuso nowalabo ababelusayo. Ngabelusi abanjalo abangokomoya, iseluleko umprofethi uMose asithola kumukhwe wakhe sifanelwe ukukhunjulwa. Wanikeza uMose leseluleko: “Lokhu okwenzayo akukuhle. Uyakudinwa nokudinwa, wena nalaba bantu abanawe, ngokuba lokhu kuyakusinda; awunakukwenza uwedwa.” Ngakho weluleka uMose ukuba akhethe amadoda afanelekayo azohlanganyela nawo emsebenzini wokwelusa abantu. Ukulandela leseluleko kwabonakala kuyimpumelelo. (Eksodusi 18:17-27) Namuhla, ukuqeqesha okuqhubekayo kuyokhiqiza amadoda amaningi anamakhono, “izipho ezingabantu,” abangahlanganyela ekwaluseni umhlambi ukuze abadala bebandla bangakhathali.—Efesu 4:8, 16, NW.
20. UJesu Kristu noYise bafunani kithi?
20 Nakuba uKristu ayala abalandeli bakhe ukuba bazikhandle ngenkuthalo, yena noma uYise abadingi ukuba noma ubani kithi enze okungaphezu kokudingekile. Ngesinye isikhathi, lapho abanye begxeka uMariya udadewabo kaLazaru ngenxa yemizamo yakhe ayenzela uJesu, wabathethisa, wathi: “Myekeni. . . . Wenzile abengakwenza.” (Marku 14:6-8; Luka 13:24) Futhi yilokho kuphela okulindelekile kithi—ukwenza esingakwenza. Umsebenzi onjalo wobuKristu awuwona umthwalo kodwa uyimpumuzo. Ngani? Ngenxa yokuthi uletha ukwaneliseka kweqiniso manje nethemba eliqinisekile lezinzuzo ezihlala njalo esikhathini esizayo.
21. (a) Uyini umthwalo kaKristu olula, futhi ngokuvamile yini ebangela ukuba umsebenzi wethu wokushumayela ube nzima? (b) Yini okufanele sizimisele yona ngokuqinile, naliphi ithemba eliqinisekile?
21 Yiqiniso, uSathane uyoqikelela ukuthi siyashushiswa, njengoba nje nalowo esithwele ijoka kanye naye, uJesu Kristu, ashushiswa. (Johane 15:20; 2 Thimothewu 3:12) Kodwa khumbula ukuthi akuwona umthwalo kaKristu olula osindayo. Kunalokho, kuwukuphikisa kukaSathane kanye nezinceku zakhe ngokuvamile okubangela ukuba umsebenzi wethu ube ngonzima kangaka. Umthwalo kaKristu uqukethe nje ukuphila ngokuvumelana nezimfuneko zikaNkulunkulu, futhi lezi azinzima. (1 Johane 5:3) Khona-ke, sengathi singaqhubeka singaphansi kwejoka likaJesu Kristu kanye naye, sizikhandla emsebenzini wokushumayela nokufundisa, njengoba nje naye enza. Ngokwenza kanjalo, njengoba athembisa, ‘siyothola impumuzo yemiphefumulo yethu.’
Ubungaphendula Kanjani?
◻ NgokwamaRoma 8:22, siye saba yini isimo sesintu?
◻ Ukwazi iqiniso kuletha impumuzo ngaziphi izindlela?
◻ Kungani ithemba loMbuso liphumuza kangaka?
◻ Liyini ijoka likaJesu, futhi kungani lilihle?
◻ Ukuthwala muphi umthwalo okuyosilethela impumuzo?