Ukumenyezelwa Emhlabeni Wonke Kwezindaba Ezinhle
UMBUSO kaNkulunkulu uyabusa! Lezi izindaba ezingcono kunazo zonke. Yingakho ngo-1989 oFakazi BakaJehova abangaphezu kwezi-3 700 000 emhlabeni wonke beye bazimemezela ngentshiseko “izindaba ezinhle” uJesu aprofetha ngazo kanye ‘nezindaba ezijabulisayo’ ezamenyezelwa ingelosi embonweni kaJohane. (Mathewu 24:14, NW; IsAmbulo 14:6) Njengoba umphostoli uPawulu asho: “Izwi labo liphumele emhlabeni wonke, nokusho kwabo kuyé nasemikhawulweni yelakhiweyo.” (Roma 10:18) Futhi abantu bazo zonke izizwe nemindeni nezilimi nabantu basabela ngenjabulo obizweni lwabo ‘lokwesaba uNkulunkulu nokumnika inkazimulo.’—IsAmbulo 14:7.
Awusadingeki Umshwalense Wakho Konke Ukuphila
Omunye owayenjalo kwakuyindoda ethile eNgilandi eyayiziphilisa ngokungaqiniseki kokuphila. UKen wayengumthengisi womshwalense, futhi lapho efika emzini woFakazi BakaJehova, bambuza: “Ingabe ungathanda yini ukuphila ezweni lapho umshwalense wakho konke ukuphila uyobe ungasadingeki khona?” Babesho ukuthini? Ukuthi ngokweBhayibheli, ngaphansi koMbuso kaNkulunkulu izinto ezenza ukuphila kungaqiniseki manje, ezihlanganisa nokugula nokufa, azisayikuba khona.
Ingabe into enjalo ingenzeka? Yebo, uNkulunkulu ngokwakhe ukuthembisile. Ngokwesibonelo, iBhayibheli lithi: “Yena uNkulunkulu abe-nabo [isintu], azesule izinyembezi zonke emehlweni abo; ukufa akusayikuba-khona; nokudabuka, nokukhala, nobuhlungu akusayikuba-khona; ngokuba okokuqala kudlulile.” (IsAmbulo 21:3, 4) Yini eyoletha ushintsho olunjalo? UMbuso kaNkulunkulu. NgokweZwi likaNkulunkulu, ngokushesha “uyakuchoboza, uqede yonke lemibuso [yezombangazwe yosuku lwanamuhla], wona uqobo ume phakade.”—Daniyeli 2:44.
OFakazi BakaJehova benza ukuba imiBhalo enjengalena iqashelwe amakhulu ezinkulungwane zabantu phakathi nomkhankaso wabo wokushumayela emhlabeni wonke. Abaningi, njengoKen, baqaphela ukuthi lokhu akusona nje isifiso senhliziyo. Ubufakazi buqand’ ikhanda. Lezithembiso zaphezulu zinokwethenjelwa futhi zizogcwaliseka ngokushesha.
Uhlelo Lwezindinganiso Olushintshile
Labo ababalalelayo oFakazi BakaJehova njengoba benanela isimemezelo sengelosi esijabulisayo bayaqaphela ukuthi ukwesaba uNkulunkulu nokumnika inkazimulo kuhilela okungaphezu nje kokukholelwa ezithembisweni zeBhayibheli. Kuwuguqula wonke umbono wabo futhi kuqeda okuningi kokukhungatheka kokuphila.
URafael nomkakhe bakuthola kuyiqiniso lokhu. Bahlala eArgentina, futhi ngenkathi beshada eminyakeni engaphezu kwama-40 edlule, bakwenza umgomo wabo oyinhloko ukusebenza kanzima ukuze balondolozele ikusasa elilondekile. Nokho, eminyakeni engama-21 kamuva, okuwukuphela kwento ababenayo ngemva komsebenzi wabo onzima kwakuyindlwana yabo eyayidinga ukulungiswa njalo. Abazange besazizwa belondekile kunangesikhathi beshada.
Base bezwa izindaba ezinhle koFakazi BakaJehova futhi bafunda ngomcebo ongcono nangohlobo olungcono lokulondeka. UJesu, eNtshumayelweni yakhe yaseNtabeni, wakhuluma ngalokhu lapho ethi: “Ningazibekeleli ingcebo emhlabeni, lapho kona inundu nokugqwala, nalapho amasela efohla khona, ebe. Kepha zibekeleleni ingcebo ezulwini lapho kungoni inundu nokugqwala, nalapho amasela engafohli khona, ebe.”—Mathewu 6:19, 20.
Nakuba iBhayibheli lingasifundisi ukuba singabi abangenzi lutho mayelana nengcebo yezinto ezibonakalayo, liyasinxusa ukuba singabeki ithemba lethu ezintweni ezinjalo. (UmShumayeli 7:12, NW) Kunalokho, kufanele sisebenzele ukuzuza ingcebo engokomoya ngokutadisha iBhayibheli, ngokufunda ngentando kaNkulunkulu, nangokwenza ukwenza leyontando kuze kuqala ekuphileni kwethu. (Mathewu 6:33) URafael nomkakhe baqala ukuqongelela lengcebo engokomoya, futhi manje bazizwa becebile ngempela, hhayi ngenxa yesimo sabo sezimali, kodwa ngenxa yobuhlobo babo noNkulunkulu. (IsAmbulo 3:17, 18) Isigijimi soMbuso sasiyizindaba ezinhle kakhulu kubo.
Umshado Owavuselelwa
Izindaba ezinhle zinamandla angokoqobo okufeza okuhle. Ngokwesibonelo, uJohn, ohlala eNgilandi, wayengenasithakazelo eBhayibhelini, kodwa umkakhe nabantwana babenaso. Ngakho baqala ukuba khona emihlanganweni yoFakazi BakaJehova kuyilapho uJohn eyophuza nabangane bakhe. Ngenxa yalokho, wahileleka ekuphuzeni ngokweqile, ekubhemeni, futhi, ekugcineni, ekuziphatheni okubi. Ekugcineni, wamshiya umkakhe wayohlala nomunye umfazi.
Kwaqala amalungiselelo esahlukaniso. Kodwa uJohn wamangala ngokubona ukuthi umkakhe—owayefunde ngokuziphatha kwamaKristu ekutadisheni kwakhe izindaba ezinhle—wayesamphatha ngokumcabangela. UJohn akazange asiqonde isizathu salokhu. Emasontweni amathathu ngaphambi kokuphuma kwesinqumo sesahlukaniso, ukuziphatha kobuKristu komkaJohn kwaba nomphumela wakho. Wezwakalisa ukuzisola okusuka enhliziyweni ngokuziphatha kwakhe, futhi amalungiselelo esahlukaniso ayekwa. UJohn manje wazihlolela yena izindaba ezinhle futhi watadisha iBhayibheli noFakazi BakaJehova. Manje naye usewumKristu, futhi ekanye nomkakhe, utshela abanye ngezindaba ezinhle zoMbuso.
Kulezinsuku zokuwohloka kwezindinganiso zomkhaya, abaningi badinga usizo olunikezwa yizindaba ezinhle ezisekelwe eBhayibhelini. Omunye woFakazi BakaJehova ePeru wayehleli eceleni kwesikhulu sezempi phakathi nohambo ngendiza. Baqala ingxoxo, lesikhulu sezempi saqala ukumthululela zonke izinkinga zomkhaya waso, kuhlanganise neqiniso lokuthi umkaso wayesewumlutha wezidakamizwa futhi wayesezosishiya ayohlala nendoda esentsha. UFakazi ngobuhlakani wasibonisa ukuthi iBhayibheli linikeza iseluleko esihle, nesiqinile ngezindaba zomkhaya nokuthi liye lamsiza naye ekuxazululeni izinkinga zomkhaya wakhe.—Efesu 5:21–6:4.
Lesikhulu sezempi sambonga uFakazi ngamazwi akhe enduduzo futhi senza isikhokhelo somagazini beNqabayokulinda nePhaphama! ukuze siqhubekisele phambili ulwazi lwaso lwezindaba ezinhle. Khona-ke, lapho uFakazi ehla endizeni, umbhangqwana osemusha weza kuye ugijima futhi wacela ukukhuluma naye. Wathi: “Besihleli phambi kwakho, futhi siyizwile ingxoxo yakho nalowamnumzane. Nathi siyathanda ukwenza isikhokhelo salabomagazini.” Nabo babefuna ukufunda izindaba ezinhle ezingathuthukisa ukuphila kwabo.
Ukuphila Okushintshile
Ngaphezu kwalokho, izindaba ezinhle ezisekelwe eBhayibhelini zishintsha abantu. Njengoba umphostoli uPawulu asho: “Izwi likaNkulunkulu liphilile, linamandla.” (Heberu 4:12) Lokhu kwaba njalo endabeni yensizwa yaseMacedonia, eGreece. Yamangala ukuzwa ukuthi, ngokweBhayibheli, igama likaNkulunkulu uJehova. Ngakho yacela umngane wayo ukuba ayixhumanise noFakazi BakaJehova ngokushesha ngangokunokwenzeka. Kwahlelwa izikhathi ezimbili zengxoxo noFakazi, ngasinye esaba cishe amahora amane. Lensizwa yabe isiqalisa isifundo seBhayibheli sasikhathi sonke, esokuqala esaqhubeka kwaze kwashaya ihora lesibili ekuseni!
Kusukela ngalolosuku lwesifundo sokuqala, lensizwa ngokushesha yavumelanisa ukuphila kwayo nezindinganiso zeBhayibheli. Yaba khona emihlanganweni ukuze ihlanganyele ekukhulekeleni noFakazi BakaJehova futhi iye yamthanda kakhulu uMdali. Futhi ngenxa yalokho uJehova uye wayibusisa. Ngesonto lokuqala lokutadisha kwayo iBhayibheli, yagunda izinwele zayo ezinde. Ngesonto lesibili, yayeka ukuya emakhefi nasemadisco ukuze ithole abangane abajabulisayo. Ngesonto lesithathu, yalahla ugwayi wayo wokugcina. Ngemva kokufunda izinyanga ezimbili, yaqala ukuhlanganyela noFakazi ekutsheleni abanye ngezindaba ezinhle zoMbuso. Yebo, yajabula ngokuthi oFakazi BakaJehova baziletha izindaba ezinhle engxenyeni yomhlaba eyayikuyo.
Izindaba Ezinhle Ejele
Ngisho nemigoqo yasejele ayizivimbi izindaba ezinhle. ESpain insizwa ethiwa uJosé idonsa isigwebo eside ejele ngenxa yokuphanga ihlomile kanye nezinye izenzo zobugebengu. Nokho, oFakazi BakaJehova bakwazi ukuyitshela izindaba ezinhle, futhi isigijimi seBhayibheli sawushintsha ngokuphelele umbono wayo. UJehova ‘wayiqinisa.’—Filipi 4:13.
UJosé uthi angakuchitha nje konke ukuphila kwakhe esekulesisimiso sezinto ngaphakathi kwemigoqo ngenxa yenkambo yakhe yangaphambili. Kodwa usebhapathiziwe futhi usengumKristu. Umkakhe uyamsekela kakhulu, futhi uyazama ukukhulisa indodana yabo esencane ngendlela yobuKristu. Okwamanje, uJosé uhlanganyela izindaba ezinhle neziboshwa akanye nazo, abantu okunzima ngalabo abangaphandle kwezindonga zasejele ukuba babafinyelele. Manje lowo ahlala naye esitokisini naye usengumKristu obhapathiziwe.
Lokhu kumane nje kuyizibonelo zokubonisa imiphumela yomkhankaso woFakazi BakaJehova wokushumayela emhlabeni wonke. Ngempela, izindaba ezinhle ezimenyezelwa ingelosi engabonakali ziye zenanelwa oFakazi BakaJehova ‘njengezindaba ezijabulisayo eziya kubo bonke abahlala emhlabeni, nakuzo zonke izizwe nemindeni nezilimi nabantu.’
Ziyizindaba ezingcono kunazo zonke, futhi ziwukuphela kwethemba lesintu. Sikunxusa ukuba uzilalele. NjengoKen noJohn eNgilandi, njengoRafael nomkakhe eArgentina, njengoJosé eSpain, nanjengezinye izixuku zabanye, sihlanganyela nengelosi ekunxuseni bonke ukuba ‘besabe uNkulunkulu, bamnike inkazimulo, ngoba ihora lokwahlulela kwakhe selifikile; bakhuleke kuye owenza izulu nomhlaba nolwandle nemithombo yamanzi.’—IsAmbulo 14:7.