Imifanekiso Evela Ezweni Lesithembiso

Yidla Ukudla—Yidla Isinkwa

NGESINYE isikhathi lapho uJesu nabafundi bakhe besendlini ethile, “ababe besaba-nathuba lokudla nasinkwa” ngenxa yesixuku. (Marku 3:20) Ngesinye isikhathi uJesu wangena endlini yomFarisi othile “ukuba adle ukudla.” (Luka 14:1) Yiluphi uhlobo lokudla olucabangayo?

Mhlawumbe amaIsrayeli asendulo ayengacabanga ngesinkwa ngoba amazwi esiHeberu nesiGreki asho “ukudla ukudla” ngokwezwi nezwi ayesho ‘ukudla isinkwa.’ Lokhu kunengqondo, njengoba isinkwa esenziwe ngokolweni noma ngebhali sasiyingxenye eyinhloko yokudla kwawo.

Abantu abaningi namuhla bacabanga ukuthi izinzalamizi zamaHeberu zazingabelusi nokuthi abafundi bakaJesu babengabadobi. Futhi abanye babewenza umsebenzi onjalo kodwa ngokuqinisekile hhayi bonke. Ukolweni wawubalulekile ekuphileni kwabaningi. Ngokusobala lokhu kwakunjalo ngoIsaka noJakobe ngezinye izikhathi, njengoba singabona kuGenesise 26:12; 27:37; no-37:7. Futhi njengoba ezolimo kwakungumsebenzi oyinhloko eGalile ngesikhathi sikaJesu, kungenzeka yini ukuthi abanye ababa abaphostoli babengabalimi bakakolweni?

Lokho kungenzeka, ngoba ukutshala ukolweni kwakuvamile eZweni Lesithembiso, futhi iBhayibheli libhekisela kaningi kulokho. (Duteronomi 8:7-9; 1 Samuweli 6:13) Yini eyayihilelekile?

Ngemva kokuba izimvula zokuqala ngo-October nangoNovember sezithambise inhlabathi, umlimi kakolweni wayehlakula bese etshala imbewu yakhe. Izimvula zakamuva zazisiza ekukhuliseni izitshalo zakhe bese kuthi, ngoApril nangoMay, zivuthwe zibe nsundu okusagolide ngaphambi kokushisa kwehlobo. Ukuvunwa kukakolweni kwakwaziwa kakhulu kangangokuthi ufunda ngakho njengokuphawula inkathi. (Genesise 30:14; AbAhluleli 15:1) Ungasho yini ukuthi umfanekiso ongakwesobunxele wathathwa ngasiphi isikhathi sonyaka?a Futhi kwakungasiphi isikhathi lapho abafundi bakaJesu bekha izikhwebu ezithile eziluhlaza?—Mathewu 12:1.

Ukuvuna ukolweni kwakusho umsebenzi omningi ngabalimi. Abavuni babesika iziqu ngesikela futhi bazibophe zibe izithungu, njengoba ubona ngezansi. Yebo, ezinye iziqu zingayekwa ngamabomu noma zingawela enhlabathini, okwenza uRuthe wakwazi ukukhothoza ngokuphumelelayo. (Ruthe 2:2, 7, 23; Marku 4:28, 29) Ngokulandelayo lezithungu zikakolweni zaziyiswa esibuyeni, esifana nesika-Arawuna. Yini eyayenzeka lapho? IBhayibheli likhuluma ‘ngezibhulo, nezinto zokubophela izinkabi.’ (2 Samuweli 24:18-22; 1 IziKronike 21:23) Izithungu zikakolweni zazendlalwa endaweni eyisicaba eyitshe noma umhlabathi ogxushiwe. Inkunzi noma esinye isilwane sasiyozungeza, sinyathela lokolweni. Lesilwane sasingadonsa isibhulo esasizosiza ekuqhekezeni uthi futhi kuphume izinhlamvu.—Isaya 41:15.

Khona-ke izinhlamvu zase zilungele ukuhlukaniswa namakhoba, okwakwenziwa ngokuziphonsa emoyeni ngehalavu noma ngemfoloko, njengoba kubonakala ngenhla. (Mathewu 3:12) Umlimi angahlukanisa izinhlamvu namakhoba kusihlwa lapho umoyana ungaphephetha amakhoba (amakhasi ezikhwebu) futhi ubekele izinti eceleni. Lapho izinhlamvu seziqoqiwe futhi zahlungwa ukuze kususwe noma yimaphi amatshana, zase zikulungele ukugcinwa—noma ukwenziwa lokho kudla okubaluleke kakhulu, isinkwa.—Mathewu 6:11.

Uma wawungumame wekhaya onalowomsebenzi, usuku ngalunye wawuyosebenzisa isigqulo nesigxisho ukuze ugaye izinhlamvu zibe impuphu, mhlawumbe impuphu kakolweni engagayisisiwe. Noma ungagaya ‘impuphu ecolekileyo,’ enjengeyasetshenziswa uSara ukwenzela izingelosi ezaziziguqule abantu “amaqebelengwane” noma leyo amaIsrayeli ayisebenzisa eminikelweni yempuphu eya kuJehova. (Genesise 18:6; Eksodusi 29:2; Levitikusi 2:1-5; Numeri 28:12) USara wathambisa impuphu kakolweni ngamanzi futhi wayixova yaba inhlama.

Ngezansi, ungabona inhlama eyindilinga nesinkwa esisodwa esiyisicaba sendlaliwe silindele ukuphekwa. Amaqebelengwane anjalo amakhulu, ayengase abhakwe ematsheni noma ezinsimbini zokosa, njengoba lona wesifazane enza. Ingabe lokhu kuyakusiza ukuba ubone ngeso lengqondo lokho uSara akwenzela izivakashi eziyizingelosi ngokulandelayo nalokho umkhaya kaLoti owakwenza kamuva? Siyafunda: “[Izingelosi] zaphambukela kuye, zangena endlini yakhe; wazilungisela idili, wenza isinkwa esingenamvubelo, zadla.”—Genesise 19:3.

[Umbhalo waphansi]

[Umthombo Wesithombe ekhasini 24]

Pictorial Archive (Near Eastern History) Est.

[Umthombo Wesithombe ekhasini 24]

Pictorial Archive (Near Eastern History) Est.

[Umthombo Wesithombe ekhasini 25]

Pictorial Archive (Near Eastern History) Est.

[Umthombo Wesithombe ekhasini 25]

Garo Nalbandian