Abelusi Nezimvu EMbusweni Ongokwasezulwini
“UJehova ungumahluleli wethu, uJehova ungumenzi wemithetho yethu, uJehova uyinkosi yethu; uyakusisindisa.”—ISAYA 33:22.
1. Kungashiwo kanjani ukuthi amaKristu ekhulu lokuqala nawanamuhla awumbuso ongokwasezulwini?
UMBUSO ongokwasezulwini usho ukubusa kukaNkulunkulu. Uhilela ukwamukela igunya likaJehova nokulandela iziqondiso nemiyalo yakhe ezinqumweni ezinkulu nezincane esizenzayo ekuphileni. Ibandla lekhulu lokuqala laliwumbuso ongokwasezulwini isibili. AmaKristu ngalesosikhathi ayengase asho ngobuqotho: “UJehova ungumahluleli wethu, uJehova ungumenzi wemithetho yethu, uJehova uyinkosi yethu.” (Isaya 33:22) Inensali egcotshiwe njengomqondisi wayo, inhlangano kaJehova uNkulunkulu namuhla nayo iwumbuso wangempela ongokwasezulwini.
UMbuso Ongokwasezulwini Usibusa Ngaziphi Izindlela Namuhla?
2. Iyiphi enye indlela oFakazi BakaJehova abazithoba ngayo ekubuseni kukaJehova?
2 Singasho kanjani ukuthi inhlangano kaJehova yasemhlabeni iwumbuso ongokwasezulwini? Ngoba labo abayakhayo bayazithoba ngempela ekubuseni kukaJehova. Futhi balandela ukuhola kukaJesu Kristu, lowo uJehova ambeke esihlalweni sobukhosi njengeNkosi. Ngokwesibonelo, esikhathini sokuphela, lomyalo oqondile ovela kuMbusi OMkhulu Ongokwasezulwini udluliselwa kuJesu: “Faka isikela lakho, uvune, ngokuba kufikile isikhathi sokuvuna, ngokuba sekomile okuvunwayo komhlaba.” (IsAmbulo 14:15) UJesu uyalalela futhi uyavuna emhlabeni. AmaKristu asekela iNkosi yawo kulomsebenzi omkhulu ngokushumayela ngentshiseko izindaba ezinhle nokwenza abafundi. (Mathewu 28:19; Marku 13:10; IzEnzo 1:8) Ngokwenza kanjalo, nabo bayizisebenzi ezikanye noJehova, uMbusi OMkhulu Ongokwasezulwini.—1 Korinte 3:9.
3. AmaKristu azithoba kanjani embusweni ongokwasezulwini ezindabeni zokuziphatha?
3 Nangokuziphatha, amaKristu ayazithoba ekubuseni kukaNkulunkulu. UJesu wathi: “Owenza iqiniso uyeza ekukhanyeni, ukuze imisebenzi yakhe ibonakaliswe ukuthi yenziwe kuNkulunkulu.” (Johane 3:21) Namuhla, kunezimpikiswano ezingapheli ngezindinganiso zokuziphatha, kodwa lezizimpikiswano azinayo indawo phakathi kwamaKristu. Akubheka njengokubi lokho uJehova athi kubi, futhi akugwema njengesifo esibulalayo! Ayayinakekela futhi imikhaya yawo, alalela abazali bawo, futhi ayazithoba emagunyeni aphakeme. (Efesu 5:3-5, 22-33; 6:1-4; 1 Thimothewu 5:8; Thithu 3:1) Ngakho, enza ngendlela engokwasezulwini, ngokuvumelana noNkulunkulu.
4. Yisiphi isimo sengqondo esingalungile esaboniswa u-Adamu no-Eva noSawule, futhi amaKristu asibonisa kanjani isimo sengqondo esihlukile?
4 U-Adamu no-Eva balahlekelwa iPharadesi ngoba babefuna ukuzenzela izinqumo zabo ngalokho okulungile nokungalungile. UJesu wayefuna ukwenza okuphambene kakhulu nalokho. Wathi: ‘Angifuni eyami intando kepha intando yongithumileyo.’ AmaKristu afuna into efanayo. (Johane 5:30; Luka 22:42; Roma 12:2; Heberu 10:7) USawule, inkosi yokuqala yakwa-Israyeli, wamlalela uJehova—kodwa ngokwengxenye kuphela. Ngenxa yalokhu wenqatshwa. USamuweli wamtshela: “Ukulalela kuhle kunomhlatshelo, nokuqaphela kuhle kunamanoni ezinqama.” (1 Samuweli 15:22) Ingabe kuyindlela engokwasezulwini ukulandela intando kaJehova ngokwezinga elithile, mhlawumbe ngokuphuma njalo emsebenzini wokushumayela noma ngokuba khona njalo emihlanganweni, bese siyekethisa ezindabeni zokuziphatha noma ngezinye izindlela? Lutho neze! Silwela ‘ukwenza intando kaNkulunkulu ngomphefumulo wonke.’ (Efesu 6:6, NW; 1 Petru 4:1, 2) Ngokungafani noSawule, sizithoba ngokuphelele ekubuseni kukaNkulunkulu.
UMbuso Ongokwasezulwini Wosuku Lwanamuhla
5, 6. UJehova usebenzelana kanjani nesintu namuhla, futhi ukubambisana nalelilungiselelo kuphumelaphi?
5 Esikhathini esidlule, uJehova wabusa futhi wembula amaqiniso ngabantu, abanjengabaprofethi, amakhosi, nabaphostoli. Namuhla, akusenjalo; abekho abaprofethi noma abaphostoli abaphefumlelwe. Kunalokho, uJesu wathi phakathi nokuba khona kwakhe kobukhosi, wayeyoveza indikimba ethembekile yabalandeli, ‘inceku ethembekileyo neqondayo,’ futhi wayeyoyimisa phezu kwayo yonke impahla yakhe. (Mathewu 24:45-47; Isaya 43:10) Ngo-1919 leyonceku yabonakaliswa iyinsali yamaKristu agcotshiwe. Kusukela ngalesosikhathi, njengoba imelelwe iNdikimba Ebusayo yoFakazi BakaJehova, ibiyisisekelo sombuso ongokwasezulwini emhlabeni. Emhlabeni wonke, iNdikimba Ebusayo imelelwe AmaKomiti Egatsha, ababonisi abajikelezayo, nabadala bebandla.
6 Ukubambisana nenhlangano engokwasezulwini kuyingxenye ebalulekile yokuzithoba embusweni ongokwasezulwini. Ukubambisana okunjalo kuletha ubunye nokuhleleka emhlabeni wonke ‘kubazalwane bonke.’ (1 Petru 2:17, qhathanisa ne-NW.) Ngokomphumela, lokhu kujabulisa uJehova, ‘ongesiye uNkulunkulu wesiyaluyalu kepha ongowokuthula.’—1 Korinte 14:33.
Abadala EMbusweni Ongokwasezulwini
7. Kungani kungase kushiwo ukuthi abadala abangamaKristu bamiswa ngokwaphezulu?
7 Wonke amadoda amadala amisiwe, kungakhathaliseki ukuthi siyini isikhundla sawo segunya, agcwalisa izimfanelo ezihlelwe eBhayibhelini ngesikhundla sombonisi, noma indoda endala. (1 Thimothewu 3:1-7; Thithu 1:5-9) Ngaphezu kwalokho, amazwi kaPawulu kubadala base-Efesu asebenza kubo bonke abadala: “Ziqapheleni nina nomhlambi wonke anibeké kuwo uMoya oNgcwele ukuba nibe-ngababonisi bokwalusa ibandla likaNkulunkulu.” (IzEnzo 20:28) Yebo, abadala bamiswa umoya ongcwele, ovela kuJehova uNkulunkulu. (Johane 14:26) Ukumiswa kwabo kungokwasezulwini. Ngaphezu kwalokho, balusa umhlambi kaNkulunkulu. Umhlambi ungokaJehova, hhayi abadala. Ubuswa umbuso ongokwasezulwini.
8. Yimiphi imithwalo yemfanelo evamile yabadala namuhla?
8 Encwadini yakhe eya kwabase-Efesu, umphostoli uPawulu wahlela imithwalo yemfanelo evamile yabadala, ethi: “[Wanika] abanye ukuba babe-ngabaphostoli, abanye abaprofethi, abanye abavangeli, abanye abelusi nabafundisi, ukuze abangcwele bapheleliselwe umsebenzi wokukhonza, kwakhiwe umzimba kaKristu.” (Efesu 4:11, 12) Abaphostoli nabaprofethi baphela lapho “umzimba kaKristu” usafufusa. (Qhathanisa neyoku-1 Korinte 13:8.) Kodwa abadala basematasa kakhulu benza umsebenzi wobuvangeli, ukwalusa, nokufundisa.—2 Thimothewu 4:2; Thithu 1:9.
9. Abadala kufanele bazilungiselele kanjani ukumelela intando kaNkulunkulu ebandleni?
9 Njengoba umbuso ongokwasezulwini uwukubusa kukaNkulunkulu, abadala abaphumelelayo bajwayelene kakhulu nentando kaNkulunkulu. UJoshuwa wayalwa ukuba afunde uMthetho nsuku zonke. Abadala nabo badinga ukutadisha nokufunda imiBhalo njalo futhi bajwayelane kakhulu nezincwadi zeBhayibheli ezikhishwa inceku ethembekileyo neqondayo. (2 Thimothewu 3:14, 15) Lokhu kuhlanganisa omagazini INqabayokulinda ne-Phaphama! nezinye izincwadi ezibonisa indlela izimiso zeBhayibheli ezisebenza ngayo ezimweni ezithile.a Nokho, nakuba kubalulekile ngomdala ukuba azi futhi alandele iziqondiso ezikhishwa ezincwadini ze-Watch Tower Society, kufanele futhi ajwayelane kakhulu nezimiso ezingokomBhalo eziyisisekelo sazo. Khona-ke uyoba sesimweni sokusebenzisa iziqondiso ezingokomBhalo ngokuqonda nozwela.—Qhathanisa noMika 6:8.
Ukukhonza Ngomoya WobuKristu
10. Yisiphi isimo sengqondo esingalungile abadala okufanele bamelane naso, futhi kanjani?
10 Cishe ngonyaka ka-55 C.E., umphostoli uPawulu wabhalela ibandla laseKorinte incwadi yakhe yokuqala. Enye yezinkinga azisingatha yayiphathelene namadoda athile ayefuna ukuvelela ebandleni. UPawulu wabhala: “Senizé nasutha‚ senizé naceba‚ senabusa ngaphandle kwethu; yebo-ke sengathi ngabe niyabusa‚ ukuze nathi sibuse kanye nani.” (1 Korinte 4:8) Ekhulwini lokuqala C.E., wonke amaKristu ayenethemba lokubusa njengamakhosi nabapristi basezulwini kanye noJesu. (IsAmbulo 20:4, 6) Nokho, ngokusobala abanye eKorinte bakhohlwa ukuthi emhlabeni awekho amakhosi embusweni wamaKristu ongokwasezulwini. Kunokuba benze njengamakhosi alelizwe, abelusi abangamaKristu bahlakulela ukuzithoba, imfanelo ejabulisa uJehova.—IHubo 138:6; Luka 22:25-27.
11. (a) Yiziphi ezinye izibonelo ezivelele zokuthobeka? (b) Abadala nawo wonke amanye amaKristu kufanele babe namuphi umbono ngabo?
11 Ingabe ukuzithoba kuwubuthakathaka? Lutho neze! UJehova ngokwakhe uchazwa njengothobekile. (IHubo 18:35) Amakhosi akwa-Israyeli ayehola amabutho aya empini futhi abuse isizwe ngaphansi kukaJehova. Nokho, ngayinye kwakumelwe iqaphele ‘ukuba inhliziyo yayo ingaphakami ngaphezu kwabafowabo.’ (Duteronomi 17:20) UJesu ovusiwe uyiNkosi yasezulwini. Nokho, lapho esemhlabeni, wageza izinyawo zabafundi bakhe. Yeka ukuthobeka! Futhi ebonisa ukuthi wayefuna ukuba abaphostoli bakhe bathobeke ngokufanayo, wathi: “Uma-ke mina, iNkosi noMfundisi, ngigezé izinyawo zenu, nani-ke nifanele ukugezana izinyawo.” (Johane 13:14; Filipi 2:5-8) Yonke inkazimulo nodumo kufanele kuye kuJehova, hhayi kunoma yimuphi umuntu. (IsAmbulo 4:11) Kungakhathaliseki ukuthi angabadala noma cha, wonke amaKristu kufanele acabange ngawo ngokomongo wamazwi kaJesu: “Asizinceku zalutho; sikwenzile nje ebesifanele ukukwenza.” (Luka 17:10) Noma yimuphi omunye umbono awuwona ongokwasezulwini.
12. Kungani uthando luyimfanelo ebalulekile kubadala abangamaKristu ukuba bayihlakulele?
12 Kanye nokuthobeka, abadala abangamaKristu bahlakulela uthando. Umphostoli uJohane wabonisa ukubaluleka kothando lapho ethi: “Ongathandiyo akamazi uNkulunkulu, ngokuba uNkulunkulu uluthando.” (1 Johane 4:8) Abantu abangenalo uthando ababona abangokwasezulwini. Abamazi uJehova. Ngokuphathelene neNdodana kaNkulunkulu, iBhayibheli lithi: “UJesu . . . ebathandile abakhe abasezweni wabathanda kwaze kwaba-sekupheleni.” (Johane 13:1) Ekhuluma namadoda angu-11 ayezoba ingxenye yendikimba ebusayo ebandleni lobuKristu, uJesu wathi: “Yiló umyalo wami wokuba nithandane, njengalokho nginithandile.” (Johane 15:12) Uthando luwuphawu oluhlukanisayo lobuKristu beqiniso. Lukhanga abadumele, abakhalayo, nabathunjwa abangokomoya abalangazelela inkululeko. (Isaya 61:1, 2; Johane 13:35) Abadala kumelwe babeke isibonelo ekuluboniseni.
13. Nakuba izinkinga zingase zibe nzima namuhla, umdala angaba kanjani ithonya lokuhle ezimweni zonke?
13 Namuhla, abadala bavame ukucelwa ukuba basingathe izinkinga eziyinkimbinkimbi. Izinkinga zomshado zingase zibe ezigxilile neziphikelelayo. Intsha inezinkinga abantu abadala abangase bakuthole kunzima ukuziqonda. Ukugula okungokomzwelo ngokuvamile kunzima ukukuqonda. Umdala obhekene nezinto ezinjalo angase angaqiniseki ngokuthi yini okumelwe ayenze. Kodwa angaqiniseka ngokuthi uma encika ekuhlakanipheni kukaJehova ngomthandazo, uma enza ukucwaninga eBhayibhelini nasekwazisweni okukhishwa yinceku ethembekileyo neqondayo, uma esebenzelana nezimvu ngokuthobeka nangothando, uyoba ithonya lokuhle ngisho nasesimweni esinzima kakhulu.
14, 15. Yikuphi okunye ukukhulumela okubonisa ukuthi uJehova uye wabusisa abantu bakhe ngabadala abaningi abakahle?
14 UJehova uye wayibusisa ngokucebile inhlangano yakhe ‘ngezipho ezingabantu.’ (Efesu 4:8, qhathanisa ne-NW.) Ngezikhathi ezithile, i-Watch Tower Society yamukela izincwadi ezifudumeza inhliziyo ezifakazela uthando oluboniswa abadala abathobekile abelusa umhlambi kaNkulunkulu ngozwela. Ngokwesibonelo, umdala webandla uyabhala: “Angikukhumbuli ukuvakashela kombonisi wesifunda okwangithinta ngaphezu kwalokhu noma okusakhulunywa ngakho ebandleni. Umbonisi wesifunda wangisiza ukuba ngibone ukubaluleka kwesimo sengqondo esiqondile ekusebenzelaneni nabazalwane, egcizelela ukubatusa.”
15 Udade okwakufanele ukuba aye esibhedlela esikude ukuze athole ukwelashwa wabhala: “Yeka indlela okwakuqinisekisa ngayo ukukwazi ukuhlangana nomdala ngalobobusuku bokuqala bokukhathazeka esibhedlela esikude kangaka nasekhaya! Yena nabanye abazalwane bachitha isikhathi esiningi benami. Ngisho nabantu ezweni ababejwayelene nalokho engangibhekene nakho baba nomuzwa wokuthi ngangingenakusinda ngaphandle kwenduduzo, ukukhathalela, nemithandazo yalabo bazalwane abanothando nabazinikele.” Omunye udade uyabhala: “Ngiyaphila namuhla ngoba indikimba yabadala yangiqondisa ngesineke ekulwisaneni kwami nokucindezeleka okukhulu. . . . Omunye umzalwane nomkakhe babengazi ukuthi bathini kimi. . . . Kodwa okwangithinta kakhulu kwakuwukuthi ngisho nakuba babengakuqondi ngokuphelele engangibhekene nakho, bangikhathalela ngothando.”
16. Yisiphi isikhuthazo uPetru asinikeza abadala?
16 Yebo, abadala abaningi basebenzisa isikhuthazo sikamphostoli uPetru: “Yalusani umhlambi kaNkulunkulu ophakathi kwenu, kungabi-ngokucindezelwa kodwa ngokwentando kaNkulunkulu, kungabi-ngenxa yenzuzo eyihlazo kodwa ngenhliziyo evumayo, kungabi-njengabazenza amakhosi phezu kwamabandla enabelwa wona, kodwa nibe-yizibonelo zomhlambi.” (1 Petru 5:1-3) Yeka ukuthi abadala abanjalo abangokwasezulwini bayisibusiso kanjani!
Izimvu EMbusweni Ongokwasezulwini
17. Yisho ezinye izimfanelo wonke amalungu ebandleni okufanele azihlakulele.
17 Nokho, umbuso ongokwasezulwini awakhiwa nje abadala kuphela. Uma abelusi kumelwe babe abangokwasezulwini, nezimvu kumelwe zibe njalo. Ngaziphi izindlela? Phela, izimiso ezifanayo eziqondisa abelusi kumelwe ziqondise izimvu. Wonke amaKristu, hhayi abadala kuphela, kumelwe athobeke ukuze athole isibusiso sikaJehova. (Jakobe 4:6) Sonke kumelwe sihlakulele uthando ngoba ngaphandle kwalo imihlatshelo yethu eya kuJehova ayinakumjabulisa. (1 Korinte 13:1-3) Futhi sonke, hhayi abadala nje kuphela, kufanele ‘sigcwaliswe ngokwazi intando [kaJehova] ngokuhlakanipha konke nokuqonda okungokomoya.’—Kolose 1:9.
18. (a) Kungani ulwazi lweqiniso olukha phezulu lunganele? (b) Singagcwaliswa kanjani sonke ngolwazi oluqondile?
18 Abasha nabadala ngokufanayo babhekene nezinqumo ezinzima ngokuqhubekayo njengoba bezama ukuhlala bethembekile naphezu kokuphila ezweni likaSathane. Ukuthambekela kwezwe endleleni yokugqoka, umculo, amabhayisikobho, nezincwadi kuvivinya ingokomoya labanye. Ulwazi lweqiniso olukha phezulu alwanele ukusisiza ukuba sigcine ukulinganisela kwethu. Ukuze siqiniseke ngokuthi sihlala sithembekile, sidinga ukugcwaliswa ngolwazi oluqondile. Sidinga ukuqonda nokuhlakanipha okuyiZwi likaNkulunkulu kuphela elingasinikeza khona. (IzAga 2:1-5) Lokhu kusho ukuhlakulela imikhuba emihle yokutadisha, ukuzindla ngalokho esikufundayo, nokukusebenzisa. (IHubo 1:1-3; IsAmbulo 1:3) UPawulu wayebhalela wonke amaKristu, hhayi abadala nje kuphela, lapho ethi: “Ukudla okuqinileyo kungokwabakhulileyo, abathi ngokujwayela ukuwusebenzisa umqondo, sebenawo osulungele ukwahlukanisa okuhle kokubi.”—Heberu 5:14.
Abelusi Nezimvu Basebenza Ndawonye
19, 20. Yisiphi isikhuthazo sonke esisinikezwayo sokubambisana nabadala, futhi ngani?
19 Ekugcineni, kufanele sisho ukuthi umoya ongokwasezulwini ngempela uboniswa yilabo ababambisana nabadala. UPawulu wabhalela uThimothewu: “Amalunga aphatha kahle akuthiwe afanele ukutuswa ngokuphindiweyo, ikakhulu lawo akhuthalela izwi nokufundisa.” (1 Thimothewu 5:17; 1 Petru 5:5, 6) Ukuba umdala kuyilungelo elimangalisayo, kodwa abadala abaningi bangamadoda emikhaya aya nsuku zonke emisebenzini yawo yokuziphilisa futhi anamakhosikazi nabantwana okumelwe abanakekele. Nakuba bekujabulela ukukhonza, inkonzo yabo ilula futhi ivuza kakhulu lapho ibandla libambisana, lingagxeki futhi lifune ngokweqile.—Heberu 13:17.
20 Umphostoli uPawulu wathi: “Bakhumbuleni ababenihola bekhuluma izwi likaNkulunkulu kini, niqonda ukuphela kokuhamba kwabo, nilingise ukukholwa kwabo.” (Heberu 13:7) Cha, uPawulu akazange akhuthaze abazalwane ukuba balandele abadala. (1 Korinte 1:12) Ukulandela umuntu akukhona okungokwasezulwini. Kodwa ngokuqinisekile kuhlakaniphile ukulingisa ukholo oluqinisekisiwe lomdala obusa ngendlela engokwasezulwini okhuthele emsebenzini wokushumayela, oba khona njalo emihlanganweni, futhi osebenzelana nebandla ngokuthobeka nangothando.
Isiqinisekiso Esiphathekayo Sokholo
21. AmaKristu alubonisa kanjani ukholo oluqine njengolukaMose?
21 Ngempela, ukuba khona kwenhlangano engokwasezulwini kulesisikhathi esiwohloke kakhulu somlando womuntu kuwubufakazi bamandla oMbusi OMkhulu WoMbuso Ongokwasezulwini. (Isaya 2:2-5) Futhi kuwubufakazi bokholo lwamadoda, abesifazane, nabantwana abangamaKristu abacishe babe izigidi ezinhlanu, abalwisana nezinkinga zokuphila kwansuku zonke kodwa abangakhohlwa ukuthi uJehova unguMbusi wabo. Njengoba nje uMose othembekile ‘akhuthazela sengathi uyambona ongabonwayo,’ ngakho amaKristu namuhla anokholo oluqinile olufanayo. (Heberu 11:27) Anelungelo lokuphila embusweni ongokwasezulwini, futhi nsuku zonke ayambonga uJehova ngalo. (IHubo 100:4, 5) Njengoba ethola amandla kaJehova asindisayo, ayajabula ukumemezela: “UJehova ungumahluleli wethu, uJehova ungumenzi wemithetho yethu, uJehova uyinkosi yethu; uyakusisindisa.”—Isaya 33:22.
[Umbhalo waphansi]
a Phakathi kwezincwadi ezinjalo kunethi “Ziqapheleni Nina Nomhlambi Wonke,” equkethe iziqondiso ezingokomBhalo futhi ilungiselelwe ababonisi bebandla abamisiwe, noma abadala.
Libonisani IBhayibheli?
◻ AmaKristu azithoba ngayiphi indlela embusweni ongokwasezulwini?
◻ Umbuso ongokwasezulwini uhlelwa kanjani namuhla?
◻ Abadala kufanele bazilungiselele ngaziphi izindlela ukufeza imithwalo yabo yemfanelo?
◻ Yiziphi izimfanelo zobuKristu okubalulekile ngabadala ukuba bazihlakulele futhi bazibonise?
◻ Embusweni ongokwasezulwini, yibuphi ubuhlobo okufanele bube khona phakathi kwezimvu nabelusi?
[Isithombe ekhasini 16]
U-Adamu no-Eva balahlekelwa iPharadesi ngoba bafuna ukuzenzela izinqumo zabo ngokulungile nokungalungile
[Isithombe ekhasini 18]
Uma umdala esebenzelana nezimvu ngokuthobeka nangothando, ngaso sonke isikhathi uyoba ithonya lokuhle