Imihlangano Yesigodi Ejabulisayo Ithuthukisa Ukufundisa Kwaphezulu
NAMUHLA, ukwaziswa kwanda ngokushesha ezweni. Kuthelevishini nasemsakazweni, ezincwadini noma ngama-computer, cishe kunolwazi olungenakulinganiswa nganoma iyiphi indaba ongacabanga ngayo. Nakuba kunjalo, abantu basagula futhi bayafa. Ubugebengu, indlala, nobumpofu kukhona kuwo wonke umhlaba, futhi ukuphazamiseka kwemizwelo kuthonya abantu abaningi kunanini ngaphambili. Lonke ulwazi olutholakalayo luhlulekile ukulungisa izindaba. Ngani? Ngoba isintu sikulahlile ukuhlakanipha kukaNkulunkulu.
Khona-ke, yeka ukuthi isihloko esithi “Ukufundisa Kwaphezulu” esasikhethelwe imihlangano yesigodi yamuva yoFakazi BakaJehova sasifaneleka kanjani! Isimiso sakhumbuza labo ababekhona ukuthi ukufundisa okutholakala eZwini likaNkulunkulu kuphela, iBhayibheli, okunokubaluleka kwangempela okusindisa ukuphila.
Umhlangano wokuqala waqala ngoLwesine, ngo-June 3, e-Uniondale, eNew York, e-U.S.A. Kusukela ngalesosikhathi kuqhubeke, isimiso saqhutshwa emadolobheni ahlukahlukene ezweni ngalinye, sayophelela emazwekazini ase-Afrika naseNingizimu Melika.
Ntambana Ngosuku Lokuqala
Usuku ngalunye lwalunesihloko esasigcizelela isici sokufundisa kwaphezulu. Ngokwesibonelo, isimiso sosuku lokuqala sasisekelwe esihlokweni esithi “Ukwazi Ukufundisa Okuvela KuNkulunkulu.” (Johane 7:17) Lomqondo wathuthukiswa kahle njengoba usuku luqhubeka.
Ngemva kwengoma nomthandazo, usihlalo womhlangano wavula isimiso ngenkulumo enesihloko esithi “Ukufundisa Kwaphezulu Kuyasihlanganisa.” Wabonisa ukuthi abantu bakaJehova banobunye ngokufunda izindlela zaKhe nangokuhamba emikhondweni yaKhe. (Mika 4:1-5) Ukufundisa kwaphezulu kuqinisa ubunye babo. Ababeze emhlanganweni bakhuthazwa ukuba bajabulele ukuba nobudlelwane obunobunye.—IHubo 133:1-3.
Kamuva ntambama, kwaxoxwa ngemihlangano yebandla yasikhathi sonke ochungechungeni olwalunesihloko esithi “Imihlangano Esifundisa Ngezindlela ZikaJehova.” Isikhulumi sokuqala sakhumbuza ababeze emhlanganweni ukuthi lapho sihlangana, sihlonipha uJehova futhi ngaleyondlela sithola isibusiso saKhe. Isikhulumi esilandelayo sagcizelela isidingo sokuba nengxenye emihlanganweni. Ngokwenza kanjalo, sidumisa uJehova obala, sibonakalisa ukholo lwethu, futhi siqinisa ukholo lwabanye. Isikhulumi sesithathu ochungechungeni sabonisa isidingo sokusebenzisa esikufunda emihlanganweni. Kumelwe sibe ‘ngabalenzayo izwi, singabi ngabalizwayo kuphela.’—Jakobe 1:22.
Ngokulandelayo kwaba nengxoxo ephathelene nokuhubela uJehova izindumiso. Ingoma ehlatshelelwa ngokusuka enhliziyweni iyingxenye yokukhulekela kwethu. Lenkulumo yalandelwa inkulumo eyisihluthulelo, ethi “Ukufundisa Kwaphezulu Kuyanqoba.” Yeka isihloko esihle kakhulu! “UJehova unguMthombo wokufundisa okungcono kakhulu noma ubani angakuthola,” kusho isikhulumi. Khona-ke, ngemva kwengxoxo emfushane ephathelene nokusebenza kwengqondo yomuntu ngendlela emangalisayo, sathi: “Ngokuyinhloko kufanele sisebenzise amakhono ethu okucabanga ukuze sizuze ukufundisa kwaphezulu. Lokho nje kukodwa kuphumela ekutholeni ukuhlakanipha okuyikho.” Yeka indlela okuyiqiniso ngayo!
Ekuseni Ngosuku Lwesibili
Isihloko sosuku lwesibili lomhlangano sasithi, ‘Qhubekani Nihlobisa Isifundiso SikaNkulunkulu UMsindisi Wethu.’ (Thithu 2:10) Lesisimiso savezwa enkulumweni ethi “Ukufundisa Kwaphezulu Kumelene Nezimfundiso Zamademoni.” Yebo, amademoni anezimfundiso zawo. (1 Thimothewu 4:1) Njengoba isikhulumi sachaza, ukufundisa kwaphezulu kunqoba “ukuhlakanipha” kukaSathane ngokudalula izimfundiso zamanga nezindlela zobuqili zikaDeveli zokudukisa. Ngenxa yalokhu, amaKristu anezinhliziyo ezinhle angaba ngu-4 500 000 awasezona izigqila ezisebumnyameni bukaSathane.—Johane 8:32.
Nakuba kunjalo, kusamelwe siqhubeke simelana noSathane. Lokhu kwagcizelelwa inkulumo ethi “Ingabe Uyamelana Nomoya Wezwe?” Umoya walelizwe uyabulala. Ukhuthaza ukuziphatha okonakele, umbono wokuvukela igunya, nesifiso sokuhahela izinto ezibonakalayo. UmKristu kumelwe azihlole njalo. Ingabe usenazo izindinganiso eziphakeme uma kuziwa kulokho akubukayo, akulalelayo, noma akufundayo? Ngokukhuthazayo, isikhulumi sathi: “Siyanitusa bafowethu, bodade, nabasha, ngemizamo yokwethembeka kakade eniyenzayo kulokhu.”—1 Johane 2:15-17.
Kunesici esikwenza kube nzima ukumelana nomoya wezwe. Siyini? Sonke asiphelele. Yiqiniso, uJesu wafela izono zethu, kodwa kusamelwe silwisane nokuthambekela esonweni. Lokhu kwacatshangelwa enkulumweni ethi “Ukulwisana Namandla Esono Enyameni Ebuthaka.” Phakathi kwezinye izinto, isikhulumi sathi singasinqoba isono uma sembatha ubuntu obusha futhi sigwema noma yini ewukuzitika ekuthambekeleni okunesono.
Isihloko senkulumo elandelayo sasithi “Yenza Isifundiso Esiphilileyo Sibe Indlela Yakho Yokuphila.” Abanye bakhathazeka ngokweqile ngempilo yabo engokwenyama. Nokho, kuyiqiniso ukuthi impilo engokomoya ibaluleke ngokwengeziwe. Isikhulumi sagcizelela isidingo sokuthatha imithwalo yethu yemfanelo ngokungathi sína kulokhu, futhi sabakhuthaza ngokukhethekile abesifazane abangamaKristu. Sathi: “Sibazisa kakhulu odadewethu abadala nabasha abalinganisela kahle ekushisekeleni kwabo inkonzo nasekunakekeleni kwabo imithwalo yemfanelo yomuntu siqu.” Yebo, futhi sonke sibonga uJehova ngesifundiso esiphilileyo esisihlukanisa nezwe.
Isimiso sasekuseni saphetha ngenkulumo ethi, “Ukufundisa Kwaphezulu Kwembula Injongo Yokuphila.” Isikhulumi sathi: “Esikhathini esithile ekuphileni, cishe wonke umuntu uyaye azibuze, ‘Iyini injongo yokuphila?’” Ngamaphuzu anamandla, saqinisekisa ukuthi iBhayibheli kuphela elinikeza impendulo yangempela yalowombuzo. Khona-ke, isikhulumi sabonisa ukuthi izithembiso zikaNkulunkulu ezimangalisayo zisinikeza ngokuphumelelayo injongo ekuphileni. Ngokunokwenzeka, abaningi kwababekhona babecabanga, ‘Lokhu yikho kanye abantu abasensimini engikuyo abadinga ukukuzwa.’ INdikimba Ebusayo yayinombono ofanayo. Incwajana entsha engangomagazini, enesihloko esithi Iyini Injongo Yokuphila? yakhululwa ekupheleni kwalenkulumo. Yeka indlela wonke umuntu ayejabule ngayo! Isikhathi sekhefu saveza ithuba lokuhlola lencwadi entsha.
Ntambama Ngosuku Lwesibili
Inkulumo yokuqala ntambama yayinesihloko esiduduzayo esithi “Phonsa Zonke Izinkathazo Zakho KuJehova.” Ziningi izinto ezibangela inkathazo; nokho, iZwi likaNkulunkulu lithi kufanele siphonse zonke izinkathazo zethu kuye. (1 Petru 5:6, 7) Yiqiniso, ezinye izinkinga ziyaphikelela, futhi ngokuphathelene nalokhu isikhulumi sanxusa: ‘Bekezela. Lindela uJehova. Kukholelwe ngokuqinile ukuthi ukulalela iBhayibheli yikhona okungcono ngaso sonke isikhathi. Uma sigxilisa izinhliziyo zethu kuJehova, siyojabulela “ukuthula kukaNkulunkulu” okudlula ukuqonda konke.’—Filipi 4:6, 7.
Izinkulumo ezine ezilandelayo zabonisa ukuthi ukufundisa kwaphezulu kusebenza ekuphileni komkhaya. Eyokuqala, ethi “Ukwenza Umshado Ube Isibopho Esihlala Njalo,” yakhumbuza ababeze emhlanganweni ukuthi uJehova akabheki umshado njengelungiselelo elingachithwa, njengoba abaningi ezweni bewubheka kanjalo. Nokho, ukuze siphumelele emshadweni, kumelwe silandele isiqondiso sikaJehova. Wasidala. Ngakho-ke, iZwi lakhe eliphefumlelwe liqukethe iseluleko esingcono kunazo zonke ezitholakalayo.
Inkulumo ethi, “Sebenza Kanzima Ukuze Kusindiswe Umkhaya Wakho” yakhuluma ngezinselele zokunakekela umkhaya kulezizikhathi ezinzima. (2 Thimothewu 3:1) Abazali bafundisa abantwana babo ukuhlanzeka emzimbeni, imikhuba emihle, indlela yokusebenza, nendlela yokupha nokunakekela abanye. Okubaluleke kakhulu, kumelwe bafundise abantwana babo ukuba babe izinceku zikaJehova ezizinikele.—IzAga 22:6.
Enkulumweni elandelayo, ethi “Bazali, Abantwana Benu Badinga Ukunakekelwa Okukhethekile,” isikhulumi sakhumbuza ababeze emhlanganweni ngesidingo sokutusa abantwana, kuyilapho bengazenzi abangabuboni ubuthakathaka babo. Abazali kumelwe baqaphele ngokukhethekile ukuthambekela kokungathembeki, ukuthanda izinto ezibonakalayo, noma ubugovu.
Intsha eyayize emhlanganweni yalalelisisa ngokukhethekile inkulumo ethi “Basha—Izimfundiso Zikabani Enizilalelayo?” AmaKristu asemasha abhekene nobunzima namuhla. Kulula ukuhambisana nezwe, kodwa lokhu kuholela ekufeni. Nakuba ukukhetha ukubambelela ekufundiseni kwaphezulu kudinga ukuba umuntu osemusha abe nesibindi, kuletha izibusiso eziningi manje nokuphila okuphakade okuzayo.—1 Thimothewu 4:8.
Usuku lwesibili lwaphetha nge-drama ejabulisayo ethi Intsha Ekhumbula UMdali Wayo Manje. Esethulweni, umqondisi wabiza intsha esenhlanganweni kaNkulunkulu ngokuthi “ibutho elingokwasezulwni elihlanganyela ngokwethembeka enkonzweni yokuzinikela kuJehova uNkulunkulu neNkosi yakhe ayimisile yasezulwini, uKristu Jesu.” Wanezela: “Ngempela intsha yethu ifeza okuthile okuhle!” Le-drama yabonisa ngokucacile ukuthi uma umzali eqeqesha umntwana wakhe kahle, lokho kuyomzuzisa lapho ekhula futhi ekhonza uJehova ngokwakhe.
Ekuseni Ngosuku Lwesithathu
Isihloko sosuku lwesithathu sasithi “Qhubekani Nifundisa Abantu Bazo Zonke Izizwe.” (Mathewu 28:19, 20) Ngokungangabazeki ababeze emhlanganweni babelindele iseluleko esifike ngesikhathi ngomsebenzi wokushumayela, futhi abazange badumazeke. Uchungechunge olunesihloko esithi “Ukufeza Ngenjabulo Ukuthunywa Kwethu Kokushumayela Nokufundisa” lwaqinisa ukuzimisela kwabo ukuqhubeka behlanganyela emsebenzini wokufakaza. Inkulumo yokuqala yakhuluma ngokuhambela kokuqala; eyesibili, ngezimpindelo; futhi eyesithathu, ngezifundo zeBhayibheli. Kwakumenywé izithunywa zevangeli ezivela ezingxenyeni ezihlukahlukene zezwe ukuba ziphindele emakhaya ukuze zibe semihlanganweni nemikhaya yazo nabangane. Kwezinye izindawo, izithunywa zevangeli zahlanganyela kulengxenye yesimiso. Kwakujabulisa ukuthola ukuqonda okuthile ngempumelelo ezinayo ezabelweni zazo. Ngokulandelayo, isihloko esithi “Ukufinyelela Bonke Abantu Ngezindaba Ezinhle” sacabangela ithonya lokufakaza ngokwethukela.
Usuku lwasekuseni lwaphetha ngenkulumo yobhapathizo, isici esivelele ngaso sonke isikhathi emibuthwaneni emikhulu yoFakazi BakaJehova. Emhlanganweni ngamunye, amaqembu amakhulu abantu ababesanda kuzinikezela ema phambi kwezixuku ezihlangene futhi ngokuqiniseka ayiphendula ngoyebo imibuzo emibili eyayibhekiswe kuwo. Khona-ke abhapathizwa phambi kweningi. Yeka ubufakazi obunamandla bethonya elihle lokufundisa kwaphezulu!
Ntambama Ngosuku Lwesithathu
Isimiso santambama saqalisa ngenkulumo ejulile engokomBhalo. OFakazi BakaJehova bajwayelene namazwi kaMathewu isahluko 24 noLuka isahluko 21. Ingabe abathile baye bacabanga ukuthi akukho okusha okungashiwo ngalezizahluko zeBhayibheli? Yeka indlela ababenephutha ngayo! Inkulumo ethi “Siyakuba Yini Isibonakaliso Sokuba-khona Kwakho?” nethi “Sitshele, Lokhu Kuyakuba-nini?” zaholela ababeze emhlanganweni engxoxweni ejabulisayo yezingxenye zalezo zahluko ezimbili futhi zanikeza izincazelo ezithuthukisiwe zamavesi athile. Kwakunezingxoxo ngemva kwesimiso njengoba ababeze emhlanganweni beqhathanisa amanothi ukuze babone ukuthi babewazwisisile yini amaphuzu. Ngokungangabazeki, imibuzo eminingi iyophendulwa lapho lokhu kwaziswa kunyatheliswa ku-Nqabayokulinda.
Isihloko esikhuluma ngezifundo zeBhayibheli saqhutshekiselwa phambili enkulumweni ethi “Izimpendulo Ezifundisayo Zemibuzo Yakho YeBhayibheli.” Khona-ke isimiso sashintshela esihlokweni esihlukile. Unyaka ka-1993 waba unyaka wama-50 we-Watchtower Bible School of Gilead. Inkulumo ethi “Iminyaka Engamashumi Amahlanu Yokuqeqeshwa Kwezithunywa Zevangeli ZaseGileyadi Nomsebenzi Wazo” yabonisa ababeze emhlanganweni lokho okwase kufeziwe phakathi naleyonkathi. Lapho kwakukhona khona noma yiziphi izithunywa zevangeli phakathi nenkulumo ethi “Lokho Okufezwa Ukushumayela Ivangeli Ensimini Yomhlaba Wonke,” zamenywa ukuba zihlanganyele okunye kokuhlangenwe nakho kwazo nezilaleli. Ukuzwa ukulandisa kwezithunywa zevangeli kwakujabulisa!
Inkulumo elandelayo, ethi “Isizathu Esenza OFakazi BakaJehova Bahlale Beqaphile,” yayingesinye isifundo esingumlando. Yabonisa ukuthi amaKristu abelokhu eqaphile kusukela ekhulwini lokuqala C.E. kuze kube manje. Lokho kwaholela kwesinye isenzakalo esingalindelekile. Ngokushesha enkulumweni elandelayo, eyayinesihloko esithi “Abamemezeli BoMbuso Bakhuthele Emhlabeni Wonke,” isikhulumi saphakamisa umqulu omkhulu (lapho usutholakala kakade ngolimi lwendawo) futhi sathi: “Kuyinjabulo ukumemezela namuhla ukukhululwa kwalencwadi entsha, enesihloko esithi OFakazi BakaJehova—Abamemezeli BoMbuso KaNkulunkulu.” Lencwadi iqukethe ukufundisa okuningiliziwe komlando wosuku lwanamuhla woFakazi BakaJehova. Ilandisa ngendaba ejabulisayo yokukhuthazela, ukuzimisela, nempumelelo, inikeza ubufakazi obunamandla bomoya kaJehova osebenza ezincekwini zakhe.
Ekuseni Ngosuku Lwesine
Lwase lufikile njalo usuku lokugcina lomhlangano. Isihloko sosuku, esithi “Ukuzizuzisa Thina Ngokwethu Ngokufundisa Kwaphezulu,” saba umvuthwandaba omuhle wesimiso. (Isaya 48:17) Ekuseni ukunakekela kwababeze emhlanganweni kwadonselwa ochungechungeni lwezinkulumo ezintathu ezinamandla. Lunesihloko esithi “Isigijimi SikaJeremiya Esiphefumlelwe Esiyisixwayiso—Sesikhathi Esedlule Nesamanje,” loluchungechunge lwalukhulumela ivesi nevesi lezahluko 23, 24, no-25 zikaJeremiya. Yeka isigijimi esinamandla esiqukethwe yilezizahluko! Kumelwe ukuba u-Israyeli ongathembekile wosuku lukaJeremiya wathuthumela lapho ezwa izixwayiso zakhe ezingagunci, eziphefumlelwe ngokwaphezulu. Izwe lonke lathuthumela ngisho nangokwengeziwe lapho lezozixwayiso zigcwaliseka. Ingabe kunomehluko namuhla? Lutho neze. OFakazi BakaJehova bashumayela ngesibindi izigijimi zikaNkulunkulu zesahlulelo. Ekugcineni, sonke lesisimiso sezinto kuyomelwe sibhekane nezenzo zikaJehova zokwahlulela. Lokho kuyosho ukubhujiswa okuphelele kwezwe likaSathane.
Usuku lwangeSonto ekuseni lwaphetha nge-drama yesibili, ethi Ungadukiswa Noma Uhleke UNkulunkulu. Yabonisa ngokucacile indlela ukufundisa kwaphezulu okungasivikela ngayo ekuthonyweni ama-video nomculo owonakalisayo nasekuthambekeleni kokuhlwanyela ukwahlukana phakathi kwamaKristu esikanye nawo. Ekupheleni kwe-drama, usihlalo wacaphuna lamazwi ashukumisa ingqondo omunye wabadlali: “Asiligonyelwe ithonya lezwe. Uma singalwi, izwe lingonakalisa ukucabanga kwethu ngendlela ecashile. Futhi ukuthi sihlala sithembekile yini noma cha kuyoxhomeka kulokho ebesilokhu sikuhlwanyela.” Yeka indlela okuyiqiniso ngayo!
Ntambama Ngosuku Lokugcina
Umhlangano wawusondela ngokushesha ekupheleni njengoba isikhulumi sasiya endaweni yesikhulumi ukuze sinikeze inkulumo yeningi enesihloko esithi, “Ukufundisa Okuwusizo Ezikhathini Zethu Ezinzima.” Ngokucacile nangokuhlelekile, saveza izinkinga eziyinhloko ezisithintayo namuhla sabuye saveza izindlela ezithile ukufundisa kwaphezulu okungasisiza ngazo ukuba sijabulele ukuphila okungcono. Sathi uma silandela ukufundisa kwemiBhalo manje, siyokwazi ukukulandelela phakade ezweni elisha likaJehova.
Ngemva kokubukezwa kwesifundo se-Nqabayokulinda sangalelosonto, kwase kuyisikhathi senkulumo yokuphetha. Isikhulumi sakhulumela ngokushesha amaphuzu amakhulu esimiso sezinsuku ezine futhi sakhumbuza ababeze emhlanganweni ngezincwadi ezintsha. Samemezela futhi ukuthi ikhasethi lesibili le-video lochungechunge oluthi The Bible—A Book of Fact and Prophecy lalizokhululwa ngokushesha. Eqinisweni, lelokhasethi le-video elinesihloko esithi The Bible—Mankind’s Oldest Modern Book, manje seliyatholakala ngesiNgisi. Kwafundwa imibiko eshukumisayo evela ezindaweni lapho kunezimo ezibucayi ezingathi sína khona, njengaseBosnia naseHerzegovina. Ekuphetheni, isikhulumi safunda amazwi omShumayeli 12:13: “Nakhu ukuphela kwendaba, lapho sekuzwakele konke: Mesabe uNkulunkulu, ugcine imiyalo yakhe, ngokuba lokho kungokwabantu bonke.”
Yeka isikhumbuzo esihle! Masiphilele usuku lapho sonke isintu siyodumisa uMfundisi wethu oMuhle, uJehova, futhi silalele ukufundisa kwakhe kwaphezulu.
[Izithombe ekhasini 24, 25]
Imihlangano yesigodi ‘Yokufundisa Kwaphezulu’ eMoscow naseKiev yaphumela enjabulweni enkulu
[Izithombe ekhasini 26, 27]
1. Abaningi babonakalisa ukuzinikezela kwabo kuNkulunkulu ngokubhapathizwa
2. Owayeze emhlanganweni oneminyaka eyikhulu ubudala wajatshuliswa ukuthola incwadi entsha
3, 4. Ama-drama ashukumisa ingqondo aziswa kakhulu
5. Izithunywa zevangeli okwaxoxwa nazo emihlanganweni yesigodi zaqokomisa izinzuzo zokufundisa kwaphezulu