“Abamemezeli BoMbuso Abashisekayo” Babuthana Ngenjabulo

IZIMO ezibucayi ekuziphatheni, kwezomnotho nakwezombusazwe zinyakazisa izwe. Nokho, kuso sonke lesi siyaluyalu, oFakazi BakaJehova babuthana ngokuthula izinsuku ezintathu eMihlanganweni Yesigodi ‘Yabamemezeli BoMbuso Abashisekayo.’ Le mihlangano yaqhutshwa emhlabeni wonke kusukela ngo-May 2002.

Le mihlangano yaba izenzakalo ezijabulisa ngempela. Ake sisibukeze kafushane leso simiso esakhayo esasisekelwe eBhayibhelini.

Ngosuku Lokuqala Kwagcizelelwa Intshiseko KaJesu

Isihloko sosuku lokuqala lomhlangano sasithi “Lingisa Intshiseko YeNkosi Yethu, UJesu.” (Johane 2:17) Inkulumo ethi “Jabulani Ngokubuthana Ndawonye Njengabamemezeli BoMbuso” yamema ababekhona ukuba nabo babe nenjabulo eyayiba khona njalo emihlanganweni yabantu bakaNkulunkulu. (Duteronomi 16:15) Le nkulumo yalandelwa izingxoxo nabamemezeli abashisekayo bezindaba ezinhle.

Inkulumo ethi “Zithokozise NgoJehova” yadingida ivesi ngalinye leHubo 37:1-11. Sakhuthazwa ukuba ‘singafuthelani’ ngokubona sengathi ababi bayaphumelela. Nakuba ababi bengase basiqambele amanga, ngokuhamba kwesikhathi uJehova uyokwenza kucace ukuthi obani ngempela abangabantu bakhe abathembekile. Inkulumo ethi “Zibonakaliseni Ningababongayo” yakhuluma ngokuthi singakubonisa kanjani ukubonga kuNkulunkulu. Wonke amaKristu kumelwe anikele kuJehova “umhlatshelo wokudumisa.” (Hebheru 13:15) Yiqiniso, ukuthi singakanani isikhathi nenkonzo esikunikela kuJehova kuya ngezinga lokwazisa kwethu nangezimo zethu.

Inkulumo eyisihluthulelo yayinesihloko esithi “Abamemezeli BoMbuso Abanentshiseko Evuthayo.” Yathi nguJesu Kristu oyisibonelo sethu esihle kakhulu sentshiseko. Ngemva kokuba uMbuso wasezulwini umisiwe ngo-1914, amaKristu eqiniso ayedinga intshiseko ukuze amemezele izindaba ezinhle. Isikhulumi sakhuluma ngomhlangano owawuseCedar Point, e-Ohio, e-U.S.A., ngo-1922 sase sisikhumbuza ngesimemezelo esiyingqopha-mlando esasithi: “Memezelani uMbuso neNkosi yawo”! Ngokuhamba kwesikhathi, intshiseko yezinceku zikaNkulunkulu ezithembekile yazishukumisela ukuba zimemezele amaqiniso oMbuso amangalisayo kuzo zonke izizwe.

Inkulumo ethi “Ningesabi Ngoba Niyazi Ukuthi UJehova Unathi,” eyayintambama ngosuku lokuqala, yabonisa ukuthi abantu bakaNkulunkulu bayizisulu ezikhethekile zikaSathane. Nokho, naphezu kokushushiswa esibhekana nakho, ukucabanga ngezibonelo eziningi zokholo zangezikhathi zeBhayibheli nezanamuhla kusinikeza isibindi sokubhekana novivinyo nezilingo ngaphandle kokwesaba.—Isaya 41:10.

Kwalandela uchungechunge olunezingxenye ezintathu olunesihloko esithi “Isiprofetho SikaMika Sisiqinisela Ukuhamba Ngegama LikaJehova.” Isikhulumi sokuqala saqhathanisa ukuwohloka kokuziphatha, ukuhlubuka okungokwenkolo nokuthanda izinto ezibonakalayo kosuku lukaMika nokwezikhathi zethu. Sathi: “Ithemba lethu ngekusasa liyoqiniseka uma sihlakulela ukuba nenhliziyo elalelayo futhi siqinisekisa ukuthi ukuziphatha kwethu kungcwele nokuthi ukuphila kwethu kugcwele izenzo zokuzinikela kokwesaba uNkulunkulu—uma futhi singakhohlwa ukuthi usuku lukaJehova luzofika.”—2 Petru 3:11, 12.

Isikhulumi sesibili ochungechungeni sakhuluma ngokulahla kukaMika abaholi bakwaJuda. Babexhaphaza abantu abampofu, abangakwazi ukuzivikela. Kodwa futhi uMika wabikezela ukunqoba kokukhulekela kweqiniso. (Mika 4:1-5) Ngamandla omoya ongcwele kaJehova, sizimisele ukumemezela lo myalezo wethemba oqabulayo. Kodwa kuthiwani uma sizizwa sikhinyabezwa ukugula noma sizizwa silinganiselwe ngandlela-thize? Isikhulumi sesithathu sathi: “Izimfuneko zikaJehova zinengqondo futhi ziyafinyeleleka.” Saqhubeka sikhuluma ngezici ezihlukahlukene zikaMika 6:8, lapho sifunda khona ukuthi: “Yini uJehova ayicela kuwe ngaphandle kokuba ubonise ubulungisa, uthande umusa futhi ube nesizotha ekuhambeni noNkulunkulu wakho?”

Njengoba ukuwohloka kokuziphatha kwezwe kungawathinta namaKristu, sonke sazuza enkulumweni eyayinesihloko esithi “Londoloza Ubumsulwa Ngokuqapha Inhliziyo Yakho.” Ngokwesibonelo, ukuzigcina simsulwa kuyosisiza sibe nemishado enenjabulo. NjengamaKristu, akumelwe sicabange ngisho nokucabanga ngokuziphatha kabi ngokobulili.—1 Korinte 6:18.

Inkulumo ethi “Qaphela Ukukhohlisa” yabonisa ukuthi senza ngokuhlakanipha uma sikubheka njengobuthi ukuhlanekezela izinto, amaqiniso angaphelele namanga aluhlaza okusakazwa izihlubuki. (Kolose 2:8) Ngokufanayo, akumelwe sizikhohlise ngokucabanga ukuthi singazanelisa izifiso zethu eziyisono kodwa ingabikho imiphumela emibi.

Inkulumo yokuphetha ngosuku lokuqala yayinesihloko esithi “Khulekela Okuwukuphela KukaNkulunkulu Weqiniso.” Njengoba izimo ezweni ziya ngokuya ziba bucayi, akuve kukhuthaza ukwazi ukuthi ngokushesha uJehova uzoletha izwe lakhe elisha lokulunga! Obani abazophila kulo? Yilabo nje kuphela abakhulekela uJehova. Isikhulumi sakhulula incwadi entsha yokufundisa ethi Khulekela Okuwukuphela KukaNkulunkulu Weqiniso ezosiza thina, izingane zethu nesifunda nabo iBhayibheli ukuba sifinyelele lo mgomo. Sakujabulela kakhulu ukuyithola!

Ngosuku Lwesibili Kwagcizelelwa Ukushisekela Okuhle

Usuku lwesibili lomhlangano lwalunesihloko esithi “Shisekelani Okuhle.” (1 Petru 3:13) Isikhulumi sokuqala saxoxa ngombhalo weBhayibheli wangalolo suku. Sagcizelela ukuthi ukuwuhlola nsuku zonke umbhalo wosuku ngendlela ezuzisayo kwandisa intshiseko yethu.

Kwabe sekulandela uchungechunge oluthi “Abamemezeli BoMbuso Abakhazimulisa Inkonzo Yabo.” Ingxenye yokuqala yagcizelela isidingo sokuphatha iZwi likaNkulunkulu ngokufanele. (2 Thimothewu 2:15) Ukulisebenzisa kahle iBhayibheli kwenza likwazi ukuba ‘namandla’ ekuphileni kwabantu. (Hebheru 4:12) Kufanele siyise abantu eBhayibhelini sibonisane ngalo ngendlela ekholisayo. Ingxenye yesibili yochungechunge yasikhuthaza ukuba sibuyele kaningi kubantu abathakazelayo. (1 Korinte 3:6) Kudingeka ukulungiselela nokuba nesibindi ukuze sibuyele ngokushesha kubo bonke ababonise isithakazelo. Ingxenye yesithathu yatusa ukuba sibheke umuntu ngamunye esihlangana naye njengongaba umfundi yabonisa nokuthi ukucela ukufunda nomuntu iBhayibheli ngokuhambela kokuqala kungaholela enjabulweni yokusiza abantu babe abafundi.

Isihloko senkulumo eyalandela sasithi “Isizathu Sokuba ‘Sithandaze Singaphezi.’” IBhayibheli liyala amaKristu ukuba afune isiqondiso sikaNkulunkulu kuzo zonke izici zokuphila. Kudingeka sakhe isikhathi sokuthandaza ngasese. Ngaphezu kwalokho, kumelwe sikhuthazele emthandazweni, ngoba uJehova angase asiyeke sithandaze isikhathi esithile ngaphambi kokuba siyibone impendulo yakhe.—Jakobe 4:8.

Inkulumo ethi “Ukuxoxa Ngezinto Ezingokomoya Kuyakha” yasikhuthaza ukuba sisebenzise isipho sethu sokukhuluma ukuze sizizuzise thina nabanye. (Filipi 4:8) Kudingekile ukuba abantu abashadile kanye nezingane zabo baxoxe ngezinto ezingokomoya nsuku zonke. Ukuze imikhaya yenze kanjalo, kufanele izame ukudla ndawonye okungenani kanye ngosuku, ngaleyo ndlela ikwazi ukuba nezingxoxo ezakhayo.

Isimiso sasekuseni saphetha ngenkulumo ejabulisa inhliziyo ethi “Indlela Ukuzinikezela Nobhapathizo Okuholela Ngayo Ensindisweni.” Ababezobhapathizwa babethole ulwazi, baba nokholo, baphenduka, bayeka ukwenza okubi base bezinikezela kuNkulunkulu. Isikhulumi sathi, ngemva kokubhapathizwa kumelwe baqhubeke bekhula ngokomoya futhi balondoloze intshiseko yabo nokuziphatha okuhle.—Filipi 2:15, 16.

Ngaleyo ntambama, kwagcizelelwa amaphuzu amabili enkulumweni ethi “Yiba Othobekile, Ugcine Iso Lakho Lilihle.” Ukuba othobekile kusho ukuba nombono ongokoqobo ngokulinganiselwa nokuma kwethu phambi kukaNkulunkulu. Ukuthobeka kusisiza sigcine iso lethu “lilihle”—ligxilé eMbusweni kaNkulunkulu, hhayi ezintweni ezibonakalayo. Uma senza kanjalo, ngeke kudingeke sikhathazeke, ngoba uJehova uyosinika esikudingayo.—Mathewu 6:22-24, 33, 34.

Isikhulumi esilandelayo sabonisa ukuthi kungani kufanele ‘Simethembe Ngokuphelele UJehova Ezikhathini Zokucindezeleka.’ Singabhekana kanjani nezinto ezinjengobuthakathaka bomuntu siqu nezinkinga zezimali noma zempilo? Masicele kuJehova ukuhlakanipha sicele nosizo kwabanye. Kunokuba sinqotshwe ukwesaba nokuphelelwa ithemba, kufanele siqinise ukuthembela kwethu kuNkulunkulu ngokufunda iZwi lakhe.—Roma 8:35-39.

Uchungechunge lokugcina lomhlangano lwalunesihloko esithi “Ukuqina Kokholo Lwethu Kuvivinywa Ngezindlela Eziningi.” Ingxenye yokuqala yasikhumbuza ukuthi wonke amaKristu eqiniso abhekana noshushiso. Lunikeza ubufakazi, luqinisa ukholo lwethu futhi lusinika ithuba lokubonisa ukuthembeka kwethu kuNkulunkulu. Nakuba singakufaki engozini ngokungadingekile ukuphila kwethu, asisoze sasebenzisa izindlela ezingavumelani nemiBhalo ukuze sigweme ukushushiswa.—1 Petru 3:16.

Isikhulumi sesibili kulolu chungechunge saphendula imibuzo emayelana nokungathathi hlangothi. Akusikho ukuthi amaKristu okuqala ayemelene nanoma iyiphi impi, kodwa ayeqaphela ukuthi nguNkulunkulu ngokuyinhloko okwakumelwe athembeke kuye. Ngokufanayo nanamuhla, oFakazi BakaJehova babambelele ngokuqinile kulesi simiso: “Aniyona ingxenye yezwe.” (Johane 15:19) Njengoba ukungathathi kwethu uhlangothi kungase kuvivinywe ngokushesha, imikhaya kumelwe ihlele isikhathi sokubukeza iziqondiso zeBhayibheli kule ndaba. Njengoba inkulumo yesithathu kulolu chungechunge yabonisa, injongo kaSathane ayikona ngempela ukusibulala, kodwa ukusicindezela ukuba singathembeki. Ngokukhuthazelela ngokwethembeka ukuhlekwa usulu, izilingo zokuziphatha okubi, ubuhlungu obungokomzwelo nokugula, siyisa udumo kuJehova.

Isimemo esithi “Sondela KuJehova” saba isihloko senkulumo yokugcina ngalolo suku. Ukuqonda izimfanelo zikaJehova eziyinhloko kusisondeza kuye. Usebenzisa amandla akhe angenamkhawulo ukuze avikele abantu bakhe, ikakhulukazi ngokomoya. Ubulungisa bakhe abunalo unya kunalokho bumenza anikeze wonke umuntu owenza ukulunga ithuba lokuphila okungenasiphelo. Ukuhlakanipha kukaNkulunkulu kubonakala endleleni asebenzisa ngayo abantu abangaphelele ukuba babhale iBhayibheli. Ekhanga kakhulu uthando lwakhe, olwamenza wenza ilungiselelo lokusindiswa kwesintu ngoJesu Kristu. (Johane 3:16) Isikhulumi saphetha ngokukhulula incwadi entsha ejabulisayo ethi Sondela KuJehova.

Ngosuku Lwesithathu Kwagcizelelwa Ukushisekela Imisebenzi Emihle

Isihloko sosuku lwesithathu lomhlangano sasithi “Abantu Abashisekela Imisebenzi Emihle.” (Thithu 2:14) Ekuseni kwaqalwa ngengxoxo yomkhaya yombhalo wosuku. Kwalandela inkulumo eyayinesihloko esithi “Ingabe Ithemba Lakho LikuJehova?” Izizwe zibeke ithemba lazo endaweni engafanele—ekuhlakanipheni nasemandleni azo. Nokho, ngokungafani nazo, izinceku zikaJehova zithembela kuye ngesibindi nangenjabulo naphezu kwezinhlekelele.—IHubo 46:1-3, 7-11.

Ingxenye eyayinesihloko esithi “Basha—Yakhani Ikusasa Nenhlangano KaJehova” yayiphendula lo mbuzo: Umuntu omusha angakuthola kanjani ngempela okungcono kakhulu ekuphileni? Lokho akwenzeki ngokuphishekela imali, ukuba nezinto nodumo. UMdali wethu unxusa intsha ngothando ukuba imkhumbule ebusheni bayo. Isikhulumi saxoxa nenye intsha eye yazikhandla enkonzweni yobuKristu ebusheni bayo, futhi kwakuzwakala ukuthi iyajabula. Yeka ukuthi kwakuzuzisa kanjani ukwamukela ipheshana elisha elithi Basha—Nizokwenzani Ngokuphila Kwenu?, elihloselwe ukusiza intsha yoFakazi ukuba ibeke isisekelo sekusasa laphakade enhlanganweni kaJehova!

Kwalandela i-drama yeBhayibheli ethakazelisayo ethi “Yima Uqine Ngezikhathi Zobunzima.” Yabonisa kafushane inkonzo ende kaJeremiya kusukela ebusheni bakhe kuze kube sekubhujisweni kweJerusalema, ayekubikezele ngentshiseko. UJeremiya wayezizwa engasifanelekele isabelo sakhe, kodwa wasifeza naphezu kokuphikiswa, futhi uJehova wamkhulula.—Jeremiya 1:8, 18, 19.

I-drama yalandelwa inkulumo ethi “Yiba NjengoJeremiya—Memezela IZwi LikaNkulunkulu Ngesibindi.” Abamemezeli boMbuso banamuhla bavame ukuqanjelwa amanga futhi kusakazwe inkulumo-ze yenzondo ngabo. (IHubo 109:1-3) Nokho, njengoJeremiya, ngokujabula ngeZwi likaJehova singakwazi ukubhekana nokudikibala. Futhi siyaqiniseka ukuthi labo abalwa nathi ngeke baphumelele.

Ngempela yayifike ngesikhathi inkulumo yeningi eyayinesihloko esithi “Isimo Saleli Zwe Siyashintsha.” Usuku lwethu lube nezinguquko ezinkulu. IBhayibheli labikezela ukuthi izimo ezinjalo, ezihlanganisa nesimemezelo ‘sokuthula nokulondeka,’ zaziyoholela osukwini lukaNkulunkulu olusabekayo lokwahlulela. (1 Thesalonika 5:3) Luyoletha izinguquko ezinhle kakhulu—ukuphela kwazo zonke izimpi, ubugebengu, ubudlova, ngisho nezifo. Ngakho, kunokuthembela kulesi simiso sezinto, lesi yisikhathi sokuphishekela ukuzinikela kokwesaba uNkulunkulu nokulondoloza ukuziphatha okumsulwa.

Ukubukezwa kwesifundo se-Nqabayokulinda sangalelo sonto kwalandelwa inkulumo yokugcina yomhlangano, eyayinesihloko esithi “Masivame Emisebenzini Emihle Njengabamemezeli BoMbuso Abashisekayo.” Isikhulumi sabonisa indlela isimiso esasisivuselele ngayo ngokomoya nokuthi sasisikhuthaze kanjani ukuba sithembele kuJehova. Ekuphetheni, sakhuthazwa ukuba sibe abamemezeli boMbuso kaNkulunkulu abahlanzekile, abanothando nabashisekayo.—1 Petru 2:12.

Ngempela sabuyela emakhaya sizizwa njengezinceku zikaJehova zosuku lukaNehemiya, sijabule ngezibusiso ezingokomoya esasizithole eMihlanganweni Yesigodi ‘Yabamemezeli BoMbuso Abashisekayo.’ (Nehemiya 8:12) Le mihlangano evusa amadlingozi ayikugcwalisanga yini ngenjabulo futhi yakwenza wazimisela ukuphikelela njengommemezeli woMbuso oshisekayo?

[Ibhokisi/Isithombe ekhasini 23]

Insiza-kufundisa Entsha!

Ekupheleni kosuku lokuqala lomhlangano wesigodi, ababekhona bajabula ngokukhululwa kwencwadi entsha ethi Khulekela Okuwukuphela KukaNkulunkulu Weqiniso. Ihlelelwe ukufundwa nalabo asebeqedile ukufunda incwadi ethi Ulwazi Oluholela Ekuphileni Okumi Phakade futhi akungabazeki ukuthi izoluqinisa ukholo lwalabo ‘abathambekele ngokufanele ekuphileni okuphakade.’—IzEnzo 13:48.

[Umthombo]

Image on book cover: U.S. Navy photo

[Ibhokisi/Izithombe ekhasini 24]

Usizo Lokusondela KuNkulunkulu

Isikhulumi sokugcina ngosuku lwesibili lomhlangano wesigodi samemezela ukukhululwa kwencwadi entsha ethi Sondela KuJehova. Inezingxenye ezine eziyinhloko, ezikhulumela ngayinye yezimfanelo zikaJehova eziyinhloko—amandla, ubulungisa, ukuhlakanipha, nothando. Ingxenye ngayinye yale ncwadi inesahluko esibonisa izindlela uJesu Kristu anikeza ngazo ngokucacile izibonelo zezimfanelo zikaNkulunkulu. Injongo eyinhloko yale ncwadi ukusiza thina nalabo esifunda nabo iBhayibheli ukuba sakhe ubuhlobo obuseduze nobuqinile noJehova uNkulunkulu.

[Ibhokisi/Izithombe ekhasini 26]

Isiqondiso Esingokomoya Kubantu Abasha

Ngosuku lwesithathu lomhlangano wesigodi kwakhululwa ipheshana elikhethekile elinesihloko esithi Basha—Nizokwenzani Ngokuphila Kwenu? Leli pheshana elisha elihlelelwe ukusiza intsha yoFakazi ukuba yenze izinqumo ezifanele ngekusasa, linikeza iseluleko semiBhalo mayelana nokwakha ikusasa laphakade enkonzweni kaJehova.