Ingabe Uyakhumbula?
Ingabe uye wakujabulela ukufunda omagazini bamuva be-Nqabayokulinda? Uma kunjalo, uyokuthola kuthakazelisa ukukhumbula lokhu okulandelayo:
▫ Kungani izinhloli zakwa-Israyeli zakhetha ukulala endlini yesifebe uRahabi?
Izinhloli zakwa-Israyeli zaziphila ngokuvumelana noMthetho kaNkulunkulu, ngakho azizange zilale endlini kaRahabi ngezizathu zokuziphatha okubi. Kungenzeka zacabanga ukuthi kwakungenakusoleka kalula emzini ukuba kwazo sendlini yesifebe. Ukuba kwendlu yaso odongeni lomuzi nakho kwakuyokwenza kube lula ukubaleka. Kodwa ngaphezu kwakho konke, uJehova waziholela esonini esinhliziyo yaso yayithintwe imibiko yokusebenzelana kukaNkulunkulu nama-Israyeli kangangokuba saphenduka futhi sashintsha izindlela zaso.—12/15, amakhasi 24-5.
▫ Intukuthelo iyithinta kanjani impilo yethu?
Ukuhlola kubonisa ukuthi intukuthelo ikhiqiza ama-hormone okucindezeleka. Ukufutheka kwasikhathi sonke kungabangela ukungalingani phakathi kwezinhlobo ze-cholesterol ezivikelayo neziyingozi, kusibeke engozini yokuthola isifo semithambo yegazi yenhliziyo.—12/15, ikhasi 32.
▫ Ikuphi ukusikisela okuyosisiza ukuba sandise ukusakaza kwethu omagazini INqabayokulinda ne-Phaphama!?
Khathalela INqabayokulinda ne-Phaphama!; gcina intshumayelo ilula; vumelana nezimo ngokulungiselela izintshumayelo ezimbalwa ezimfushane; zibekele umgomo wakho siqu.—1/1, amakhasi 24-5.
▫ Kungani uMose eyisibonelo esihle kangaka esingokwasezulwini ukuba sisilandele?
UMose wafuna isiqondiso sikaJehova ngezindaba. Wayengenazo izifiso zomuntu siqu zokuvelela, kodwa wayekhathalela ukudunyiswa kukaJehova. Wayenokholo oluqinile, futhi akazange akhohlwe ukuthi uJehova wayewuMbusi wangempela wesizwe sakwa-Israyeli.—1/15, ikhasi 11.
▫ Yiziphi ezinye izindlela ukufundisa kwaphezulu okunqoba ngazo?
Ukufundisa kwaphezulu kunqoba ngokunikeza abantu bakaJehova ukuqonda iqiniso okuqhubekayo. Kuletha abantu ekukhanyeni okungokomoya, futhi kubonisa abathobekile indlela yokukhulekela uNkulunkulu “ngomoya nangeqiniso.” (Johane 4:24) Ukufundisa kwaphezulu kunqoba futhi uvivinyo nezwe elibi.—2/1, amakhasi 10-12.
▫ Siyini isihluthulelo sokunikeza iseluleko esiphumelelayo?
Isihluthulelo siyinhlonipho efanele ngomunye umuntu nelungelo lakhe lokuphathwa ngendlela engalulazi. Ngakho, umeluleki ongumKristu kufanele abe nomusa futhi aqine, kodwa embathise owamukela iseluleko ngokuhlonipheka.—2/1, ikhasi 28.
▫ Kwenzeka kanjani ukuba iSonto LamaRoma Katolika lamukele Ukwenyuka KukaMariya njengemfundiso?
Emakhulwini okuqala eminyaka ngemva kokufa kukaJesu, umqondo woKwenyukela KukaMariya ezulwini wawungekho ngokuphelele ezingqondweni zamaKristu. Nokho, ngemva kokuba imfundiso kaZiqu-zintathu ibe yimfundiso yesonto engokomthetho, uMariya wanikezwa indima ebaluleke kakhulu. Lemfundiso yoKwenyuka KukaMariya esekelwe ekucabangeni ayizange yamukelwe njengemfundiso engenakuphikiswa kwaze kwaba ngo-November 1, 1950, lapho uPapa Pius XII ememezela: “Sikuchaza njengemfundiso engenakuphikiswa eyembulwe uNkulunkulu.”—Munificentissimus Deus.—2/15, amakhasi 26-7.
▫ KuJeremiya isahluko 24, ayefanekiselani amaqoma amabili amakhiwane, amakhiwane amahle nalawo ayemabi?
Amakhiwane amahle ayefanekisela amaJuda okokuqala ayethunjelwe eBabiloni, insali yawo eyayizophindela kwaJuda. Amakhiwane amabi ayemelela iNkosi uSedekiya nababekanye naye abahlubuka eNkosini uNebukadinesari naphezu kokuba babefunge egameni likaNkulunkulu. Uma siqhathanisa, ezikhathini zanamuhla sithola insali ka-Israyeli ongokomoya, eye yaveza izithelo ezinhle ekuphileni kwayo, ngokungafani nabefundisi beLobukholwa, abaye baveza izithelo ezibolile.—3/1, amakhasi 14-16.
▫ Ayengobani ama-Quartodeciman, futhi kungani ethakazelisa kumaKristu namuhla?
Ngemva kwesikhathi sabaphostoli, kwakunabathile ababegubha iSidlo SeNkosi Sakusihlwa ngo-Nisan 14 unyaka ngamunye, belandela inkambo yabaphostoli. Baqala ukwaziwa ngokuthi “Abantu bosuku lweshumi nane,” noma ama-Quartodeciman. Lokhu kuyathakazelisa namuhla, ngoba kubonisa ukuthi ngisho nangemva kokuba abaphostoli sebefile, kwakunabathile ababebambelele enkambweni efanelekile yokukhumbula ukufa kukaJesu kanye ngonyaka ngo-Nisan 14.—3/15, amakhasi 4-5.
▫ Wayengubani uWilliam Whiston?
Wayeyisazi esikhaliphile sekhulu le-18 eNgilandi, umngane oseduze kaSir Isaac Newton. UWhiston wahumusha imiBhalo YamaKristu YesiGreki, wakuphikisa obala ukufundiswa kwemfundiso kaZiqu-zintathu, futhi wayengumfundisi wesayensi yezinkayezi neyezibalo. Kodwa uWhiston ukhunjulwa kakhulu cishe ngokuhumushela kwakhe esiNgisini imibhalo yesazimlando esingumJuda uFlavius Josephus.—3/15, amakhasi 26-8.
▫ Umuntu wenziwa kanjani ngomfanekiso kaNkulunkulu? (Genesise 1:27)
Umuntu wenziwa enamandla okubonakalisa izimfanelo zikaNkulunkulu ezivelele zothando, ubulungisa, ukuhlakanipha, namandla—kanye nezinye izimfanelo.—4/1, ikhasi 25.