Ngokushesha—Kuzoba Nokuphila Okungcono!

CABANGA ngombikezeli wesimo sezulu ozibikezelo zakhe zihlale zinembile cishe njalo. Uma ezindabeni zakusihlwa ebikezela ukuthi ngosuku olulandelayo lizona, awungabazi ukuthatha isambulela sakho lapho uphuma endlini ekuseni ngosuku olulandelayo. Ngenxa yomlando wakhe wesikhathi esidlule uyamethemba. Wenza ngokuvumelana nalokho akushoyo.

Sinokwethenjelwa kangakanani-ke isithembiso sikaJehova sokuphila okungcono emhlabeni oyipharadesi? Nokho, ubonisani umlando wakhe wesikhathi esidlule? Ukugcwaliseka kweziprofetho zeBhayibheli kuwuqinisekisa ngokucacile umlando kaJehova. UnguNkulunkulu onembayo noneqiniso ngokungaphazami. (Joshuwa 23:14; Isaya 55:11) Izithembiso zikaJehova uNkulunkulu zinokwethenjelwa kangangokuthi ngezinye izikhathi uze akhulume ngezenzakalo zesikhathi esizayo azithembisayo njengokungathi sezenzekile kakade. Ngokwesibonelo, ngemva kwesithembiso sakhe sezwe elisha okungeke kusaba khona ukufa nokulila kulo, siyafunda: ‘[Izibusiso ezithenjisiwe] sezenzekile!’ Ngamanye amazwi, ‘Ziyiqiniso!’—IsAmbulo 21:5, 6, bheka nombhalo waphansi we-NW.

Yebo, ukugcwaliseka kwezithembiso zikaJehova zesikhathi esidlule kusenza siqiniseke ngokugcwaliseka kwesithembiso sakhe sokuphila okungcono ngesintu. Kodwa kuyofika nini lokhu kuphila okungcono?

Ukuphila Okungcono—Nini?

Ukuphila okungcono kakhulu kuzofika ngokushesha! Singaqiniseka ngalokho ngoba iBhayibheli lithi kwakuyokwenzeka izinto eziningi ezimbi emhlabeni ngaphambi nje kokuba iPharadesi lilethe ukuphila okungcono. Lezo zinto ezimbi ziyenzeka manje.

Ngokwesibonelo, uJesu Kristu wabikezela ukuthi kwakuyoba nezimpi ezinkulu. Wathi: “Isizwe siyovukela isizwe nombuso uvukele umbuso.” (Mathewu 24:7) Lesi siprofetho siye sagcwaliseka. Phakathi neminyaka ka-1914 kuya ku-1945, kwaba nezimpi zezwe ezimbili, futhi lezi ziye zalandelwa ezinye izimpi eziningi izizwe eziye zalwa kuzo. “Ngokwesilinganiso sonyaka ngamunye, inani labafe ezimpini kulenkathi [kusukela eMpini Yezwe II] liye laba ngaphezu kwenani eliphindwe kabili labafa ekhulwini le-19 futhi laba likhulu ngokuphindwe kasikhombisa kunelekhulu le-18.”—World Military and Social Expenditures 1993.

Ukusakazeka kwezifo kungobunye ubufakazi bokuba seduze kokuphila okungcono ePharadesi. UJesu wabikezela ukuthi kwakuyoba khona ‘izifo eziwumshayabhuqe ezindaweni ngezindawo.’ (Luka 21:11) Ingabe lesi siprofetho siye sagcwaliseka? Yebo. Ngemva kwempi yezwe yokuqala, umkhuhlane waseSpain wabulala abantu abangaphezu kwezigidi ezingu-20. Kusukela ngaleso sikhathi, umdlavuza, isifo senhliziyo, umalaleveva, ingculaza, nezinye izifo ziye zabulala izigidi zabantu. Emazweni asathuthuka, izifo ezibangelwa amanzi angcolile (kuhlanganise nesifo sohudo nokuba nezikelemu esiswini) zibulala izigidi zabantu minyaka yonke.

UJesu wathi futhi: “Kuyoba khona ukuswelakala kokudla.” (Mathewu 24:7) Njengoba kuphawuliwe esihlokweni esandulele, abantu abampofu emhlabeni abanakho ukudla okwanele. Lena enye ingxenye yobufakazi bokuthi ukuphila okungcono kakhulu ePharadesi kuzofika ngokushesha.

UJesu wathi: “Kuyoba khona ukuzamazama komhlaba okukhulu.” (Luka 21:11) Nalokhu kuye kwagcwaliseka esikhathini sethu. Kusukela ngo-1914 ukucekela phansi kokuzamazama komhlaba kuye kwabulala amakhulu ezinkulungwane abantu.

IBhayibheli liqhubeka lithi ‘izinsuku zokugcina’ zaziyophawuleka ngokushintsha kwabantu. Babeyoba “abazithandayo” ‘nabathandi bemali,’ futhi izingane ‘zaziyongabalaleli abazali.’ Abantu ngokuvamile babeyoba “abathandi bezinjabulo kunokuba abathandi bakaNkulunkulu.” (2 Thimothewu 3:1-5) Awuvumi yini ukuthi abaningi bayayifanela lencazelo?

Njengoba abantu abenza izinto ezimbi banda, ukungabi namthetho kuyanda. Nalokhu kwabikezelwa. NgokukaMathewu 24:12, uJesu wakhuluma ‘ngokwanda kokungabi namthetho.’ Cishe uzovuma ukuthi manje ubugebengu sebububi kakhulu kunaseminyakeni edlule. Yonke indawo abantu besaba ukuthi bazophangwa, bakhohliswe, noma balinyazwe ngandlela-thile.

Izimpi, izifo ezisakazeke kabanzi, ukuswelakala kokudla, ukuzamazama komhlaba, ubugebengu obandayo, nokuwohloka kobuhlobo babantu—konke lokhu kuyabonakala namuhla, njengoba nje iBhayibheli labikezela. Ungase ubuze, ‘Kodwa lezi zinto bezingenzeki yini kuwo wonke umlando wabantu? Yini ehlukile ngosuku lwethu?’

Kunezici ezithile ezibaluleke kakhulu zalokho okwenzekayo namuhla. IBhayibheli alisho ukuthi noma yisiphi isici esithile, njengokuswelakala kokudla, sisodwa sasiyoba ubufakazi bokuthi sisesikhathini sokuphela nokuthi ukuphila okungcono kuseduze. Iziprofetho zeBhayibheli eziphathelene nesikhathi sokuphela zaziyogcwaliseka esizukulwaneni esingamhloniphi uNkulunkulu.—Mathewu 24:34-39; Luka 17:26, 27.

Ngaphezu kwalokho, kuyaxaka ukuthi ezinye izici zesiprofetho sikaJesu—ikakhulukazi lezo eziphathelene nokuswelakala kokudla nezifo ezisakazeke kabanzi—zigcwaliseka namuhla. Ngani? Ngoba okufinyelelwe isayensi akukaze kube kukhulu kunamanje. Ulwazi nezindlela zokwelapha akukaze kube okuthuthukile noma okusakazeke kabanzi kunamanje. UNkulunkulu kuphela owayengabikezela, eZwini lakhe, iBhayibheli, ukuthi ngesikhathi esinjena, izifo nendlala kwakuyodlanga, kungabi ngcono.

Njengoba zonke iziprofetho zeBhayibheli eziphathelene nesikhathi sokuphela, noma ‘izinsuku zokugcina,’ zigcwaliseka, yini esingaphetha ngayo? Ukuthi ukuphila okungcono kuseduze! Kodwa kuyofika kanjani?

Ukuphila Okungcono—Kanjani?

Ucabanga ukuthi abantu bangaliletha iPharadesi? Kuwo wonke umlando kuze kube namuhla, kuye kwaba nezinhlobo eziningi zohulumeni babantu. Abanye baye bazama kanzima ukwanelisa izidingo zabantu. Kodwa izinkinga eziningi ziyadlanga. Kokubili emazweni acebile nasemazweni ampofu, ohulumeni bashikashikana nokusetshenziswa kabi kwezidakamizwa, izindawo zokuhlala ezingagculisi, ubumpofu, ubugebengu, ukungatholakali kwemisebenzi, nezimpi.

Ngisho noma ohulumeni bebengazixazulula ezinye zalezi zinkinga, bebengasoze balethe ukukhululeka ngokuphelele empilweni ebuthaka; futhi bebengasoze baqede ukuguga nokufa. Kuyacaca ukuthi abantu abasoze baliletha iPharadesi kulomhlaba.

Ngokuhlakanipha iBhayibheli lithi: “Ningethembi ezikhulwini nasendodaneni yomuntu okungekho kuyo ukusiza.” Kanti kufanele sithembe bani? IBhayibheli liyaphendula: “Ubusisiwe yena omsizi wakhe unguNkulunkulu kaJakobe, othemba lakhe likuJehova uNkulunkulu wakhe.” (IHubo 146:3, 5) Uma sithembela kuJehova uNkulunkulu, asisoze sadumala.

Ngokuqinisekile Lowo onokuhlakanipha namandla okudala umhlaba, ilanga, nezinkanyezi angawenza futhi umhlaba ube ipharadesi. Angabenza abantu bakwazi ukujabulela ukuphila okungcono. Noma yini uJehova uNkulunkulu azimisela ukuyenza, angayifeza futhi uyoyifeza. IZwi lakhe lithi: “KuNkulunkulu akukho simemezelo esiyoba into engenakwenzeka.” (Luka 1:37) Kodwa uNkulunkulu uyokuletha kanjani ukuphila okungcono?

UJehova uyolethela isintu ukuphila okungcono kakhulu ngoMbuso wakhe. Uyini uMbuso kaNkulunkulu? Uwuhulumeni ongokoqobo onoMbusi omiswe uNkulunkulu, uJesu Kristu. UMbuso kaNkulunkulu usezulwini, kodwa ngokushesha uzoletha izibusiso ezimangalisayo nokuphila okungcono kakhulu kuzakhamuzi zasemhlabeni oyiPharadesi.—Isaya 9:6, 7.

Kungenzeka kakade ujwayelene nomthandazo kaJesu oyisibonelo, otholakala eBhayibhelini kuMathewu 6:9-13. Ingxenye yalowo mthandazo oya kuNkulunkulu ithi: “Umbuso wakho mawuze. Intando yakho mayenzeke nasemhlabeni, njengasezulwini.” Ngokuvumelana nalowo mthandazo, uMbuso kaNkulunkulu ‘uzoza’ ukuze ufeze injongo kaJehova uNkulunkulu ngomhlaba. Futhi kuyinjongo yakhe ukuba umhlaba ube yipharadesi.

Kuphakama umbuzo owodwa wokugcina: Yini okumelwe uyenze ukuze ujabulele ukuphila okungcono ePharadesi elizayo?

Okudingeka Ukwenze

Ngothando uJehova uNkulunkulu unikeza ithemba lokuphila okungcono ePharadesi kubo bonke abenza intando yakhe. IBhayibheli liyasitshela: “Abalungileyo bazakudla ifa lomhlaba, bahlale kuwo njalonjalo.” (IHubo 37:29) Kodwa yini eyenza umuntu abe olungile emehlweni kaNkulunkulu?

Ukuze sijabulise uJehova kudingeka sifunde okwengeziwe ngalokho afuna sikwenze. Uma singenisa ulwazi ngoNkulunkulu bese silusebenzisa ekuphileni kwethu, singaphila phakade. Ethandaza kuNkulunkulu, uJesu wathi: “Lokhu kusho ukuphila okumi phakade, ukungenisa kwabo ulwazi ngawe, owukuphela kukaNkulunkulu weqiniso, nangalowo owamthuma, uJesu Kristu.”—Johane 17:3.

Incwadi esitshela ngoJehova uNkulunkulu noJesu Kristu yiZwi likaNkulunkulu, iBhayibheli. Ingesinye sezipho zikaJehova eziyigugu kakhulu. IBhayibheli linjengencwadi evela kubaba onothando iya ezinganeni zakhe. Lisitshela ngesithembiso sikaNkulunkulu sokulethela isintu ukuphila okungcono futhi lisibonise ukuthi singakuzuza kanjani. IBhayibheli lisazisa lokho uNkulunkulu aye wakwenza esikhathini esidlule nalokho azokwenza esikhathini esizayo. Lisinikeza neseluleko esisebenzisekayo ngokuphathelene nendlela yokubhekana nezinkinga zethu ngokuphumelelayo manje. Ngempela, iZwi likaNkulunkulu lisifundisa indlela yokuthola isilinganiso esithile senjabulo ngisho nakulelizwe elinezinkinga.—2 Thimothewu 3:16, 17.

OFakazi BakaJehova bayokujabulela ukukuhlelela isifundo seBhayibheli sasekhaya samahhala. Funda ukuthi ungaba kanjani nokuphila okujabulisa ngokwengeziwe manje, unethemba lokuphila okungcono kakhulu esikhathini esizayo esiseduze.

[Isithombe ekhasini 5]

Iziprofetho zeBhayibheli zibonisa ukuthi ukuphila okungcono kuseduze

[Isithombe ekhasini 7]

UMbuso kaNkulunkulu uzolethela isintu ukuphila okungcono