“Ithathwaphi Imali?”
ABABUKELI be-video ye-Watch Tower Society ethi “Jehovah’s Witnesses—The Organization Behind the Name” bahlabeka umxhwele. Babona abesilisa nabesifazane ababukeka kahle abavela ezinhlangeni nasezizindeni ezihlukahlukene, bemamatheka futhi besebenza ndawonye ngokuzwana. Abakhangwa izinkulungwane zezisebenzi ezijabule nje kuphela kodwa bakhangwa nayizakhiwo ezinkulu endlunkulu yeNhlangano eseBrooklyn nasepulazini eliseWallkill, eNew York. Le-video ibonisa ukuthi ngaphakathi kulezi zakhiwo kutholakala ezobuchwepheshe zesimanje—imishini yokunyathelisa neyokuhlanganisa izincwadi enejubane elikhulu ekhiqiza izigidi eziningi zezincwadi inyanga ngayinye, imishini yama-computer enhlobonhlobo, nezinkonzo eziningi ezisekelayo.
Lokhu kusho izindleko ezinkulu zezimali. Ngakho abanye bayabuza, “Ithathwaphi imali?”
Izivakashi zasendlunkulu yomhlaba wonke yeNhlangano zihlabeka umxhwele ngendlela efanayo. Izivakashi zilula izintamo ukuze zibone isakhiwo sokuhlala esisha esinezitezi ezingu-30, esinye sezakhiwo eziningi ezisetshenziselwa ukuhlalisa izikhonzi zokuzithandela ezingaphezu kuka-3 000 ezisebenza lapho. Futhi ukuvakashela i-Watchtower Educational Center entsha esebangeni elingaba amakhilomitha angu-110 ukuya enyakatho yeBrooklyn, kushiya abaningi bekhexe imilomo. Njengoba isakhiwa, ihlalisa izisebenzi ezingu-1 200. Lapho, kuzoqeqeshwa amakilasi amabili ezithunywa zevangeli unyaka ngamunye bese zithunyelwa kwamanye amazwe ezabelweni zazo. Kukulendawo futhi lapho kunikezwa khona ukuqondisa emabandleni angaphezu kwangu-10 000 oFakazi BakaJehova e-United States. Muva nje amagatsha amaningi emhlabeni wonke nawo aye andisa izakhiwo zawo noma alungiselela ukwenza kanjalo. Ukufeza yonke lemisebenzi kufuna imali eshisiwe. Abantu bayabuza, “Ithathwaphi imali?”
Impendulo iwukuthi ivela kubantu abavamile abafana nanoma ubani wethu. Bangabantu, emhlabeni wonke, abafisa ukwenza konke abangakwenza ukuze baqhubekisele phambili umsebenzi obalulekile wobuKristu wokushumayela nokufundisa. Umoya wokuzithandela onjalo awuqali.
Isibonelo Esabekwa U-Israyeli Wasendulo
Eminyakeni engaphezu kwengu-3 500 edlule, kwaphakama isidingo seminikelo yokupha. UJehova wayeyale uMose ukuba enze kwakhiwe itabernakele, noma “itende lokuhlangana,” elalizosetshenziswa ekukhulekelweni kwaKhe. Umklamo owawuvela phezulu wawudinga izinhlobonhlobo zezinto eziyigugu. UJehova wayala: “Thabathani phakathi kwenu umnikelo ube-ngokaJehova; bonke abanenhlizivo ethandayo mabawulethe, ube-ngumnikelo kaJehova.” (Eksodusi 35:4-9) Abantu basabela kanjani? Ukulandisa kusitshela ukuthi “bafika, kwaba-yilowo nalowo owavuswa yinhliziyo yakhe nowaqhutshwa ngumoya wakhe, baletha umnikelo kaJehova ube-ngowomsebenzi wetende lokuhlangana, nowenkonzo yonke yalo, nowezambatho ezingcwele.” Kancane kancane ‘lomnikelo wesihle’ waba mkhulu kangangokuthi waba ‘mningi kakhulu kunokwanele umsebenzi uJehova ayeyale ukuba wenziwe.’ (Eksodusi 35:21-29; 36:3-5) Yeka umoya wokupha ongenabugovu laba bantu abawubonisa!
Eminyakeni engaphansi kwengu-500 kamuva, kwaphinde kwakhishwa izwi lokuba ama-Israyeli enze umnikelo wokupha. Isifiso seNkosi uDavide sokwakhela uJehova indlu ehlala njalo eJerusalema sase sizogcwaliseka ngendodana yakhe uSolomoni. UDavide ngokwakhe waqoqa futhi wanikela ingxenye enkulu yalokho okwakuzodingeka. Abanye bahlanganyela lapho uDavide ekhipha izwi lokuba kulethwe ‘isipho sikaJehova.’ Waba yini umphumela? “Abantu bajabula ngokunikela kwabo ngenhliziyo, ngokuba banikela ngenhliziyo epheleleyo kuJehova; naye uDavide inkosi wajabula ngokujabula okukhulu.” (1 Kronike 22:14; 29:3-9, qhathanisa ne-NW.) Isiliva negolide kukodwa kwakungaba amaRandi ayizigidi eziyizinkulungwane ezingu-180 ngezilinganiso zanamuhla!—2 IziKronike 5:1.
Kulezi zibonelo siphawula ukuthi akekho owaphoqwa ukuba anikele. Kwakungumnikelo “wesihle” kuphela futhi wenziwa “ngenhliziyo epheleleyo.” UJehova wayengeke ajatshuliswe okungaphansi kwalokho. Ngokufanayo, lapho kuvela ithuba lokunikela ngemali ukuze kusizwe amaKristu antulayo, umphostoli uPawulu wabhala ukuthi kwakungafanele kube “njengokuthile okuphangiwe.” Wanezela: “Yilowo nalowo makenze njengoba nje enqumile enhliziyweni yakhe, kungabi ngokungathandi noma ngaphansi kokucindezelwa, ngoba uNkulunkulu uthanda umuphi onamileyo.”—2 Korinte 9:5, 7.
Isidingo Namuhla
Ingabe sikhona isidingo seminikelo namuhla? Ngempela sikhona, futhi sizoba khona nakakhulu njengoba isikhathi siqhubeka. Ngani?
AmaKristu aye anikezwa iziyalezo ezikhethekile zalesi sikhathi sokuphela. UJesu wayala abafundi bakhe: “Ngakho-ke hambani niyokwenza abantu bazo zonke izizwe babe abafundi, nibabhapathize egameni likaYise neleNdodana nelomoya ongcwele, nibafundise ukugcina zonke izinto enginiyale ngazo.”—Mathewu 28:19, 20.
Ukuze kufezwe lomsebenzi omkhulu wokufundisa nokushumayela njengoba sisondela nakakhulu ekupheleni ‘kwesiphelo sesimiso sezinto’ kudingeka isikhathi nezimali eziningi. Ngani? Ngenxa yakho konke okuhilelekile ekuyiseni isigijimi soMbuso kaNkulunkulu “ezingxenyeni eziqhele kakhulu zomhlaba.” (IzEnzo 1:8) Abantu abaningi abanalo ulwazi lwemiBhalo njengamaJuda ekhulu lokuqala. Eqinisweni, inani elikhulu lezakhamuzi zasemhlabeni alijwayelene nokujwayelana neBhayibheli futhi alilibheki njengeZwi likaNkulunkulu. Abashumayeli kumelwe baqeqeshwe futhi bathunyelwe emazweni akude. (Roma 10:13-15) Futhi cabanga ngenani lezilimi ezihilelekile! Labo abashunyayezwayo kudingeka babe namaBhayibheli nezincwadi ezisekelwe eBhayibhelini ukuze bazifunde futhi bazitadishe ngolimi lwabo siqu. Ukuze bonke bafinyelelwe ngendlela ehlelekile futhi balethwe ekuvuthweni okungokomoya ngendlela ethuthukayo ukuze basize nabanye kudingeka ukuhlela okukhulu.—2 Thimothewu 2:2.
UJesu wathi kumelwe kuqale ‘kushunyayelwe izindaba ezinhle zombuso emhlabeni wonke owakhiweyo ngenjongo yobufakazi ezizweni zonke; khona-ke ukuphela kufike.’ (Mathewu 24:14) Ngakho manje yisikhathi sokunikela konke esingakunikela ukuze kwenziwe lowo msebenzi obalulekile. Ayikho enye indlela engcono esingasebenzisa ngayo izimali zethu ngaphambi kokuba ingcebo yezinto ezibonakalayo iphelelwe ukubaluleka kwayo.—Hezekeli 7:19; Luka 16:9.
Iyaphi Lemali?
I-Watch Tower Society inyathelisa izincwadi zeBhayibheli ngezilimi ezingaphezu kwezingu-230, kanye nange-Braille yabayizimpumputhe nama-video olimi lwezandla lwabayizithulu. Lokho kudinga amaqembu abahumushi nabafunda okuhunyushiwe olimini ngalunye. Ukucabanga nje ngokwenza wonke lomsebenzi, ikakhulukazi ngomagazini INqabayokulinda onyatheliswa inyanga ngayinye ngezilimi ezingu-121 futhi ezingu-101 zazo ezinyatheliswa kanyekanye, kuyamangaza. Nokho kudingekile ukuze abantu emhlabeni kabanzi bakwazi ukuba nokwaziswa okufanayo futhi bakufunde. Minyaka yonke ziyakhuphuka izindleko zephepha nezinye izinto ezisetshenziswa ekukhiqizeni isigijimi soMbuso esinyathelisiwe noma esiqoshelwe ukulalelwa noma ukubukelwa. Izindleko ezinjalo kufanele zikhokhwe ngokusebenzisa iminikelo evela kubafowethu.
Umsebenzi wokushumayela nokufundisa wenziwa ezindaweni ezihlanganiswa amabandla oFakazi BakaJehova angaphezu kuka-75 000 emhlabeni wonke. Ukuze bawenze abe nobunye futhi bawakhuthaze, ababonisi abajikelezayo abaqeqeshiwe bahambela ibandla ngalinye cishe kabili unyaka ngamunye. Imihlangano emikhulu nayo ifeza indima ebalulekile ekufundiseni. Kumelwe kuqashwe izindawo ezinkulu zemihlangano emikhulu eqinisa ukholo kakhulu. Iminikelo yakho isetshenziselwa nalezi zinjongo.
Nakuba ngokuvamile kuba nemihlangano emikhulu kathathu kuphela ngonyaka, amabandla endawo ahlangana ndawonye emihlanganweni emihlanu yamasonto onke. (Qhathanisa no-Eksodusi 34:23, 24.) Ukuthutheleka kwabasanda kuhlanganyela besabela ezindabeni ezinhle kuye kwasho ukwenezelwa kwezinkulungwane zamabandla amasha unyaka ngamunye. Ngosizo lwezigidi zamarandi ezibolekiswa iNhlangano, unyaka ngamunye kwakhiwa amakhulu amaHholo OMbuso, futhi amanye amaningi ayalungiswa futhi anwetshwe. Nakuba lezi kuyizimali ezijikelezayo ezisetshenziswa ngokuphindaphindiwe, isidingo siyaqhubeka sikhula.
Enye indawo eye yaba nokwanda okungakaze kube khona kusemazweni aseMpumalanga Yurophu ayengaphansi kwezwe elaliyiSoviet Union. Yeka ukuthi zazijabulisa kanjani izindaba zentuthuko zokuthi umsebenzi usuvulekile kulezi zindawo! Manje kuthunyelwa izithunywa zevangeli kwamaningi alamazwe. Kwamanye amazwe kuye kwamiswa amagatsha amasha, okukhulise inani lezikhonzi zokuzithandela ezisebenza emkhayeni waseBethel womhlaba wonke laba ngaphezu kuka-15 000. Yebo, kudingeka kwakhiwe noma kuthengwe izakhiwo zamagatsha zokuzihlalisa. Iminikelo yakho isiza ekufezeni lesi sidingo.
USathane namademoni akhe bayawuqaphela wonke lomsebenzi. Benza konke abangakwenza ukuze babhuntshise imizamo yezinceku zikaJehova ezikholekile noma bazibangele izinkinga. (IsAmbulo 12:17) Lokhu kusho izimpi ezingokomthetho ezandayo ukuze kuvikelwe amalungelo abantu bakaNkulunkulu okushumayela futhi baphile ngokuvumelana nemithetho yakhe elungile. Ngaphezu kwalokho, umonakalo odalwa izimpi esimisweni sikaSathane sezinto, kanye nezinhlekelele ezingokwemvelo, kubangela ukuba izikhathi eziningi kudingeke izinto zokusiza abafowethu nodadewethu abahluphekile nabanye abakanye nabo. Iminikelo yakho isiza ekunikezeni lolu sizo olubalulekile.
UJehova Uyokuvuza
Ukusebenzisa isikhathi nezimali zethu ngokupha ukuze sithuthukise umsebenzi weNkosi kuletha izibusiso ezinkulu. Kanjani? Ngoba uNkulunkulu, ngokuyinhloko ezingezakhe zonke izinto, uyosivuza. IzAga 11:25 zithi: “Umphefumulo ophanayo uyakukhuluphaliswa; ophuzisayo uyakuphuziswa naye.” Ngempela uJehova uyajabula lapho senza ingxenye yethu ukuze siqhubekisele phambili ukukhulekelwa kwakhe. (Heberu 13:15, 16) Wathembisa ama-Israyeli asendulo ayezoletha iminikeko eyayifuneka ngaphansi kwesivumelwano soMthetho: “Ningivivinye ngalokhu, usho uJehova-Sebawoti, uma ngingayikunivulela amafasitele asezulwini, nginithululele isibusiso kunokwaneleyo.” (Malaki 3:10) Ukuchuma okungokomoya izinceku zikaJehova ezikujabulelayo namuhla kuwubufakazi bokuthi uJehova uyasigcina isithembiso sakhe.
Lomsebenzi omkhulu wokumemezela kubo bonke usuku lwensindiso nokusiza abanhliziyo ziqotho ukuba bangene emgwaqweni oya ekuphileni ngeke uqhubeke kuze kube phakade. (Mathewu 7:14; 2 Korinte 6:2) Kodwa kumelwe kuqoqwe bonke labo ‘bezinye izimvu’ zeNkosi. (Johane 10:16) Yeka ukuthi kubaluleke kangakanani ukuhlangabezana naleyo nselele namuhla! Futhi yeka indlela ngamunye wethu ayojabula ngayo lapho ebheka emuva ekulelozwe elisha lokulunga, ethi, ‘Ngaba nengxenye egcwele kuloya msebenzi wokuvuna kokugcina’!—2 Petru 3:13.
[Ibhokisi/Isithombe ekhasini 30, 31]
Indlela Abanye Abenza Ngayo Iminikelo Emsebenzini Wokushumayela Ngombuso
IMINIKELO YOMSEBENZI WOMHLABA WONKE: Abaningi babekela eceleni imali ethile abayifaka emabhokisini omnikelo aseHholo LoMbuso. Inyanga ngayinye amabandla athumela lemali endlunkulu yomhlaba wonke eseBrooklyn, eNew York, noma ehhovisi legatsha eliseduze.
IZIPHO: Iminikelo yokuzithandela yemali ingase ithunyelwe ngokuqondile e-Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, noma ehhovisi leNhlangano elikhonza izwe lakini. Amatshe ayigugu noma ezinye izinto eziyigugu nakho kunganikelwa. Incwadi emfushane ebonisa ukuthi okunjalo kuyisipho esiqondile kufanele ihambisane naleminikelo.
ILUNGISELELO LOMNIKELO ONOMBANDELA: Imali ingase inikwe i-Watch Tower Society ngendlela yokuyigcina kuze kufe umniniyo, ngelungiselelo lokuthi uma kuphakama isidingo somuntu siqu, iyobuyiselwa kumniniyo.
UMSHWALENSE: I-Watch Tower Society ingase ibhaliswe njengendlalifa yomshwalense wokuphila noma womhlala-phansi/wokuguga. INhlangano kumelwe yaziswe nganoma yimaphi amalungiselelo anjalo.
AMASHEYA NEZIBAMBISO: Amasheya nezibambiso kunganikelwa e-Watch Tower Society njengesipho esiqondile noma ngaphansi kwelungiselelo lapho inzuzo iqhubeka ikhokhelwa umniniyo.
IZINDLU NEZINDAWO: Izindlu nezindawo ezisesimweni esifanelekile zinganikelwa e-Watch Tower Society ngokwenza isipho esiqondile noma ngokuthi indawo igcinelwe umniniyo osaphila, ongaqhubeka ehlala kuyo phakathi nesikhathi sokuphila kwakhe. Umuntu kumelwe athinte iNhlangano ngaphambi kokuba enze noma yimuphi umnikelo wendlu nendawo eNhlanganweni.
IZINCWADI ZEFA: Impahla noma imali ingabhaliswa nge-Watch Tower Bible and Tract Society of Pennsylvania njengefa ngokusebenzisa incwadi yefa ebhalwe ngokomthetho. Ikhophi yencwadi yefa kumelwe ithunyelwe eNhlanganweni.
Ukuze uthole ukwaziswa okwengeziwe ngokuphathelene nezindaba ezinjalo, bhalela i-Treasurer’s Office, Watch Tower Bible and Tract Society of Pennsylvania, Private Bag X2067, Krugersdorp, 1740, noma ubhalele ihhovisi leNhlangano elikhonza izwe lakini.