Kungani Kumelwe Siphe UJehova?

NJENGOBA lalikhipha umkhov’ etsheni edolobheni elincane laseSidoni iSarefati, umfelokazi wayekhotheme etheza izinkuni. Kwakudingeka abase umlilo ukuze apheke isidlo esincane—cishe isidlo sokugcina yena nendodana yakhe ababezosidla. Wayezabalaza ukuze agcine yena nendodana yakhe encane bephila phakathi nesikhathi eside sesomiso nendlala, futhi konke lokhu kwase kufike kulesi siphetho esidabukisayo. Babebulawa indlala.

Kwasondela indoda. Igama layo kwakungu-Eliya, futhi ngokushesha lomfelokazi wabona ukuthi yayingumprofethi kaJehova. Kubonakala sengathi wayeke wezwa ngaloNkulunkulu. UJehova wayehlukile kuBali, lowo ukukhulekelwa kwakhe okunonya nokonakele kwakuvamile ezweni lakubo laseSidoni. Ngakho lapho u-Eliya ecela amanzi okuphuza, wayezimisele ukumsiza. Mhlawumbe wayenomuzwa wokuthi ukwenza kanjalo kwakuyomzuzela umusa kaJehova. (Mathewu 10:41, 42) Kodwa u-Eliya wacela okwengeziwe—ingcosana yokudla. Wachaza ukuthi wayenokudla okwanele isidlo esisodwa kuphela sokugcina. Nokho, u-Eliya waphikelela, emqinisekisa ngokuthi uJehova wayeyomnikeza ukudla ngokuyisimangaliso kuze kuphele isomiso. Wenzani? IBhayibheli lithi: “Wayesehamba, wenza njengokusho kukaEliya.” (1 AmaKhosi 17:10-15) Lamazwi alula achaza isenzo sokholo olukhulu—eqinisweni, olukhulu kangangokuthi uJesu Kristu wamtusa lowo mfelokazi eminyakeni ecishe ibe inkulungwane kamuva!—Luka 4:25, 26.

Noma kunjalo, kungase kubonakale kuyinqaba ukuthi uJehova wayengacela okuningi kangaka kowesifazane owayentula kangaka. Lokhu kunjalo ikakhulukazi lapho sicabangela umthandazo owake wenziwa indoda eyaziwa kakhulu. Ukuqoqa kweNkosi uDavide umnikelo owawuzosetshenziswa indodana yayo uSolomoni ekwakheni ithempeli kwashukumisa ukuphana okukhulu. Ngokwezilinganiso zanamuhla, izipho ezanikelwa zilingana nezinkulungwane zezigidi zamaRandi! Nokho, lapho uDavide ethandaza kuJehova wathi: “Ngingubani mina, nabantu bami bayini ukuba sibe-namandla okunikela ngenhliziyo engaka na? Ngokuba konke kuvela kuwe, nokuvela esandleni sakho lokhu sikuniké wena.” (1 IziKronike 29:14) Njengoba uDavide asho, konke kungokukaJehova. Ngakho njalo lapho sipha ukuze sithuthukise ukukhulekela okumsulwa, simane nje sinikeza uJehova lokho okungokwakhe kakade. (IHubo 50:10) Ngakho, kuphakama umbuzo, Empeleni kungani uJehova efuna siphe?

Ingxenye Ebalulekile Yokukhulekela Kweqiniso

Impendulo elula kunazo zonke ukuthi kusukela ezikhathini zasendulo uJehova uye wenza ukupha kwaba ingxenye ebalulekile yokukhulekela okumsulwa. Indoda ethembekile u-Abela yanikela kuJehova ngengxenye ethile yemfuyo yayo eyigugu. Izinzalamizi uNowa, u-Abrahama, u-Isaka, uJakobe, noJobe zenza iminikelo efanayo.—Genesise 4:4; 8:20; 12:7; 26:25; 31:54; Jobe 1:5.

UMthetho kaMose wayala futhi waze wakulawula ukunikelwa kweminikelo kuJehova. Ngokwesibonelo, wonke ama-Israyeli ayalwa ukuba anikele okweshumi, noma ingxenye yeshumi yesivuno somhlaba neyokwanda kwemfuyo yawo. (Numeri 18:25-28) Eminye iminikelo yayingalawulwa ngokuqondile. Ngokwesibonelo, umIsrayeli ngamunye kwakudingeka anikele kuJehova ulibo lwemfuyo yakhe nolwesivuno. (Eksodusi 22:29, 30; 23:19) Nokho, uMthetho wawushiyela kumuntu ngamunye ukuba anqume ukuthi uyonikela okungakanani olibweni lwakhe, uma nje enikele okungcono kakhulu. UMthetho wawenza nelungiselelo leminikelo yokubonga neyesithembiso, eyayingeyokuzithandela ngokuphelele. (Levitikusi 7:15, 16) UJehova wakhuthaza abantu bakhe ukuba baphe ngokwesilinganiso ayebabusise ngaso. (Duteronomi 16:17) Njengoba kwakunjalo lapho kwakhiwa itabernakele futhi kamuva ithempeli, ngamunye wayenikela lokho inhliziyo yakhe eyayimshukumisela ukuba anikele ngakho. (Eksodusi 35:21; 1 IziKronike 29:9) Ngokuqinisekile iminikelo enjalo yokuzithandela yayimjabulisa kakhulu uJehova!

Ngaphansi ‘komthetho kaKristu,’ konke ukupha kwakumelwe kube okokuzithandela. (Galathiya 6:2; 2 Korinte 9:7) Lokho kwakungasho ukuthi abalandeli bakaKristu babezoyeka ukupha noma baphe kancane. Kwakusho okuphambene nalokho! Lapho uJesu nabaphostoli bakhe beshumayela kwa-Israyeli, iqembu labesifazane labalandela futhi labakhonza ngezinto zalo. (Luka 8:1-3) Ngokufanayo umphostoli uPawulu wamukela izipho ezazisekela umsebenzi wakhe wezithunywa zevangeli, futhi kamuva wakhuthaza amabandla athile ukuba anikele ngezimali kwabanye lapho beswele. (2 Korinte 8:14; Filipi 1:3-5) Indikimba ebusayo eJerusalema yabela amadoda anokwethenjelwa ukuba aqiniseke ukuthi izinto ezinikelwe zazabelwa abasweleyo. (IzEnzo 6:2-4) Ngokusobala, amaKristu okuqala akubheka njengelungelo ukusekela ukukhulekela okumsulwa ngalezi zindlela.

Noma kunjalo, singase sizibuze ukuthi kungani ngempela uJehova enza ukupha kube ingxenye yokukhulekelwa kwakhe. Cabangela izizathu ezine.

Isizathu Sokuba Siphe

Okokuqala, uJehova wenza ukupha kube ingxenye yokukhulekela kweqiniso ngoba ukwenza kanjalo kuyasizuzisa. Kugcizelela ukwazisa kwethu ngobuhle bukaNkulunkulu. Ngokwesibonelo, uma ingane ithenga noma yenzela umzali wayo isipho, kungani umzali emomotheka ngenjabulo? Ingabe leso sipho sihlangabezana nesidingo esithile esiphuthumayo umzali abengenakukwazi ukuhlangabezana naso ngenye indlela? Cishe akunjalo. Kunalokho, umzali ujabulela ukubona ingane ihlakulela umoya wokwazisa nowokuphana. Ngesizathu esifanayo uJehova usikhuthaza ukuba siphe futhi uyajabula lapho sikwenza. Lena indlela esimbonisa ngayo ukuthi siwazisa ngempela wonke umusa wakhe ongenamingcele nokuphana asibonisa kona. Ungumuphi wazo “zonke izipho ezinhle nazo zonke izipho eziphelele,” ngakho ngeke siphelelwe izizathu zokumbonga. (Jakobe 1:17) Ngaphezu kwakho konke, uJehova wanikela ngeNdodana yakhe ethandekayo, evumela ukuba ife ukuze siphile phakade. (Johane 3:16) Ingabe siyoke simbonge ngokwanele?

Okwesibili, uma sikwenza umkhuba ukupha, ngaleyo ndlela sifunda ukulingisa uJehova neNdodana yakhe, uJesu Kristu, esicini esibaluleke kakhulu. UJehova upha ngokungaguquguquki, futhi uphana njalo. Njengoba iBhayibheli lisho, usipha “ukuphila nomoya nazo zonke izinto.” (IzEnzo 17:25) Singambonga ngokufanele ngesikhathi ngasinye esidonsa ngaso umoya, ngomthamo ngamunye wokudla esiwujabulelayo, ngomzuzwana ngamunye ojabulisayo nowanelisayo ekuphileni. (IzEnzo 14:17) UJesu, njengoYise, wabonisa umoya wokupha. Wazinikela ngokungagodli. Bewazi yini ukuthi lapho uJesu enza izimangaliso, wayelahlekelwa? ImiBhalo isitshela izikhathi ezingaphezu kwesisodwa ukuthi lapho ephulukisa abantu abagulayo, amandla ‘ayephuma kuye.’ (Luka 6:19; 8:45, 46) UJesu wayephana kangangokuthi waze wathulula umphefumulo wakhe siqu, ukuphila kwakhe, ekufeni.—Isaya 53:12.

Ngakho lapho sinikela, kungaba ngesikhathi sethu, amandla ethu, noma ngempahla yethu, silingisa uJehova futhi senza inhliziyo yakhe ithokoze. (IzAga 27:11; Efesu 5:1) Futhi silandela isibonelo esiphelele sokuziphatha komuntu esasishiyelwa uJesu Kristu.—1 Petru 2:21.

Okwesithathu, ukupha kuhlangabezana nezidingo zangempela nezibalulekile. Yiqiniso, uJehova angahlangabezana kalula nezidingo zezithakazelo zoMbuso ngaphandle kosizo lwethu, njengoba nje engahlela ukuba amatshe akhamuluke kunokusebenzisa thina ukuba sishumayele izwi. (Luka 19:40) Kodwa uye wakhetha ukusiphakamisa ngokusinika lamalungelo. Ngakho lapho sinikela ngezinto zethu ukuze kuthuthukiswe izithakazelo zoMbuso, siba nokwaneliseka okukhulu ngokwazi ukuthi sinengxenye yangempela emsebenzini obaluleke kunayo yonke eqhubeka kulomhlaba.—Mathewu 24:14.

Akudingeki nokuba kuze kushiwo ukuthi imali iyadingeka ukuze kusekelwe umsebenzi womhlaba wonke woFakazi BakaJehova. Phakathi nonyaka wenkonzo ka-1995, iNhlangano yasebenzisa cishe izigidi ezingu-260 zamaRandi ekunakekeleni amaphayona akhethekile, izithunywa zevangeli, nababonisi abajikelezayo nje kuphela ezabelweni zabo zenkonzo yasensimini. Nokho, lezi zindleko zincane uma ziqhathaniswa nezokwakhiwa nokusebenza kwamahhovisi amagatsha nezindawo zokunyathelisa emhlabeni wonke. Nokho, konke lokhu kuyenzeka ngeminikelo yokuzithandela!

Abantu bakaJehova ngokuvamile abacabangi ukuthi uma isimo sabo singesihle ngokwezimali, bangamane bashiyele kwabanye ukuba bathwale lowo mthwalo. Isimo sengqondo esinjalo singasiholela ekubeni siphuthelwe yilengxenye yokukhulekela kwethu. Ngokomphostoli uPawulu, amaKristu aseMakedoniya ‘ayempofu kakhulu.’ Noma kunjalo, anxusa ilungelo lokupha. Futhi uPawulu wafakaza ukuthi lokho anikela ngako “kwakungaphezu kwamandla awo angokoqobo”!—2 Korinte 8:1-4.

Okwesine, uJehova uye wenza ukupha kwaba ingxenye yokukhulekela kweqiniso ngoba ukupha kuyosisiza ukuba sijabule. UJesu ngokwakhe wathi: “Kukhona injabulo eyengeziwe ekupheni kunekhona ekwamukeleni.” (IzEnzo 20:35) UJehova usiklame ngaleyo ndlela. Kungesinye isizathu esingase sisenze sibe nomuzwa wokuthi kungakhathaliseki ukuthi simupha okungakanani, ngeke sikwazi ukukulinganisa nokwazisa esikuzwa ezinhliziyweni zethu ngaye. Nokho, kuyajabulisa ukuthi uJehova akalindeli okungaphezu kwalokho esingaphana ngakho. Singaqiniseka ukuthi uyajabula lapho sinikela ngenjabulo ngokwamandla ethu!—2 Korinte 8:12; 9:7.

Ukubonisa Umoya Wokupha Kuletha Izibusiso

Uma sibuyela esibonelweni sethu sasekuqaleni, ake sithi umfelokazi waseSarefati wayebeke izaba zokuthi othile wayengase anakekele isidingo sokudla sika-Eliya. Yeka isibusiso esasiyobe simlahlekele!

Akungabazeki ukuthi uJehova uyababusisa labo ababonisa umoya wokupha. (IzAga 11:25) Umfelokazi waseSarefati akuzange kudingeke ahlupheke ngenxa yokuphana ngalokho ayecabanga ukuthi kwakuwukudla kwakhe kokugcina. UJehova wamvuza ngokumenzela isimangaliso. Njengoba u-Eliya ayethembisile, impuphu namafutha akuzange kuphele ezitsheni zakhe kwaze kwaba yilapho sekudlule isomiso. Kodwa wathola umvuzo omkhulu nangokwengeziwe. Lapho indodana yakhe igula futhi ifa, u-Eliya, umuntu kaNkulunkulu weqiniso, wayibuyisela kuye. Yeka indlela lokhu okumelwe ukuba kwamakha ngayo ngokomoya!—1 AmaKhosi 17:16-24.

Namuhla asilindele ukuba sibusiswe ngezimangaliso. (1 Korinte 13:8) Kodwa uJehova uyasiqinisekisa ukuthi uyobasekela labo abamkhonza ngomphefumulo wonke. (Mathewu 6:33) Ngakho singaba njengomfelokazi waseSarefati kuleso sici, siphe ngokukhululekile, siqiniseka ukuthi uJehova uyosinakekela. Ngokufanayo, singajabulela imivuzo emikhulu engokomoya. Uma ukupha kwethu kuyinsakavukela, kunokuba kube into eyenzeka ngokwethukela nengacatshangwa kusengaphambili kuyosisiza ukuba sigcine iso lethu lilihle futhi ligxile ezithakazelweni zoMbuso, njengoba uJesu atusa. (Luka 11:34; qhathanisa neyoku-1 Korinte 16:1, 2.) Futhi kuyosisiza ukuba sizizwe siseduze kakhudlwana noJehova noJesu njengezisebenzi ezikanye nabo. (1 Korinte 3:9) Kuyokhulisa nomoya wokupha ngokungagodli kakade owuphawu lwabakhulekeli bakaJehova emhlabeni wonke.

[Ibhokisi ekhasini 31]

IZINDLELA ABANYE ABAKHETHA UKUPHA NGAZO

IMINIKELO YOMSEBENZI WOMHLABA WONKE

Abaningi babekela eceleni imali ethile abayifaka emabhokisini omnikelo aseHholo LoMbuso. Inyanga ngayinye amabandla athumela lemali endlunkulu yomhlaba wonke eseBrooklyn, eNew York, noma ehhovisi legatsha eliseduze.

Iminikelo yokuzithandela yemali ingase futhi ithunyelwe ngokuqondile e-Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, noma ehhovisi leNhlangano elikhonza izwe lakini. Amatshe ayigugu noma ezinye izinto eziyigugu nakho kunganikelwa. Incwadi emfushane ebonisa ukuthi okunjalo kuyisipho esiqondile kufanele ihambisane naleminikelo.

ILUNGISELELO LOMNIKELO ONOMBANDELA

Imali ingase inikwe i-Watch Tower Society ngendlela yokuyigcina kuze kufe umniniyo, ngelungiselelo lokuthi uma kuphakama isidingo somuntu siqu, iyobuyiselwa kumniniyo.

UKUPHA OKUHLELIWE

Ngaphezu kwezipho eziqondile eziyimali neminikelo enemibandela yemali, kunezinye izindlela zokupha ukuze kusekelwe inkonzo yoMbuso emhlabeni wonke. Lezi zihlanganisa:

Umshwalense: I-Watch Tower Society ingase ibhaliswe njengendlalifa yomshwalense wokuphila noma womhlala-phansi/wokuguga. INhlangano kufanele yaziswe nganoma yimaphi amalungiselelo anjalo.

Amasheya Nama-bond: Amasheya nama-bond kunganikelwa kuyi-Watch Tower Society njengesipho esiqondile noma ngaphansi kwelungiselelo lapho inzuzo iqhubeka ikhokhelwa umniniyo.

Izindlu Nezindawo: Izindlu nezindawo ezingathengiseka zinganikelwa kuyi-Watch Tower Society ngokwenza isipho esiqondile noma ngokuthi indawo igcinelwe umniniyo osaphila, ongaqhubeka ehlala kuyo phakathi nesikhathi sokuphila kwakhe. Umuntu kumelwe athinte iNhlangano ngaphambi kokuba enze noma yimuphi umnikelo wendlu nendawo eNhlanganweni.

Izincwadi Zefa: Impahla noma imali ingabhaliswa nge-Watch Tower Society njengefa ngokusebenzisa incwadi yefa ebhalwe ngokomthetho. Ikhophi yencwadi yefa kumelwe ithunyelwe eNhlanganweni.

Labo abanesithakazelo kunoma yiliphi lalamalungiselelo okupha okuhleliwe kufanele bathinte i-Treasurer’s Office ekhelini elingezansi noma ihhovisi leNhlangano elikhonza izwe lakini. I-Treasurer’s Office kufanele ithole ikhophi yezincwadi zobufakazi ezifanele ngokuphathelene nanoma iliphi lalamalungiselelo.

TREASURER’S OFFICE

Watch Tower Bible and Tract Society of Pennsylvania

Private Bag X2067, Krugersdorp, 1740

Ucingo: (011) 761-1000