“Qinisani Izinhliziyo Zenu”

“Ninesidingo sokukhuthazela, ukuze kuthi, ngemva kokuba seniyenzile intando kaNkulunkulu, namukele ukugcwaliswa kwesithembiso.”—HEBERU 10:36.

1, 2. (a) Kwenzekani kumaKristu amaningana ekhulwini lokuqala? (b) Kungani kulula ukuba ukholo lube buthakathaka?

KUBO bonke abalobi beBhayibheli, akekho owakhuluma kaningi ngokholo kunomphostoli uPawulu. Futhi izikhathi eziningi, wayekhuluma ngalabo ukholo lwabo olwase lubuthakathaka noma olwase lufile. Ngokwesibonelo, uHimenewu no-Aleksandru “baphihlizekelwa umkhumbi ngokuphathelene nokholo lwabo.” (1 Thimothewu 1:19, 20) UDema washiya uPawulu ngoba “ethanda isimiso samanje sezinto.” (2 Thimothewu 4:10) Abanye, ngezenzo zabo ezingebona ubuKristu nezibonisa ukungabi nakwethenjelwa, ‘baluphika ukholo.’ Abanye bakhohliswa ukuhlakanipha-mbumbulu futhi “baphambuka okholweni.”—1 Thimothewu 5:8; 6:20, 21.

² Kungani lawo maKristu agcotshiwe ehluleka ngalezi zindlela? Phela, “ukholo luwukulindelwa okuqinisekisiwe kwezinto ezithenjwayo, ukuboniswa okusobala kwezinto ezingokoqobo nakuba zingabonwa.” (Heberu 11:1) Sibonisa ukholo kulokho esingenakukubona. Asiludingi ezintweni ezibonwayo. Kulula ukusebenzela ingcebo ebonakalayo kunengcebo engokomoya engabonakali. (Mathewu 19:21, 22) Izinto eziningi ezibonwayo—‘njengesifiso senyama nesifiso samehlo’—ziyikhanga ngokunamandla inyama yethu engaphelele futhi zingalwenza buthakathaka ukholo lwethu.—1 Johane 2:16.

3. Luhlobo luni lokholo okufanele umKristu aluhlakulele?

³ Nokho, uPawulu uthi “lowo osondela kuNkulunkulu kumelwe akholelwe ukuthi ukhona nokuthi uba umvuzi walabo abamfuna ngobuqotho.” UMose wayenokholo olunjalo. “Wagxilisa amehlo ekukhokhweni komvuzo” futhi “waqhubeka egxilile sengathi uyambona Lowo ongabonakali.” (Heberu 11:6, 24, 26, 27) UmKristu udinga uhlobo olunjalo lokholo. Njengoba kuphawuliwe esihlokweni esandulele, u-Abrahama wayeyisibonelo esihle kulokhu.

Isibonelo Sika-Abrahama Sokholo

4. Ukholo luka-Abrahama lwayithinta kanjani inkambo yakhe yokuphila?

⁴ U-Abrahama wayese-Uri lapho ethola isithembiso sikaNkulunkulu sokuthi wayeyozala imbewu eyayiyoba yisibusiso kubantu bazo zonke izizwe. (Genesise 12:1-3; IzEnzo 7:2, 3) Ngesisekelo saleso sithembiso, u-Abrahama wamlalela uJehova, waqale wathuthela eHarana kamuva wathuthela eKhanani. Lapho, uJehova wathembisa ukunika imbewu ka-Abrahama lelo lizwe. (Genesise 12:7; Nehemiya 9:7, 8) Nokho, okuningi kwalokho uJehova akuthembisa kwakuyogcwaliseka ngemva kokufa kuka-Abrahama. Ngokwesibonelo, akukho ngxenye yeKhanani u-Abrahama uqobo aba ngumniniyo—ngaphandle komhume waseMakaphela, awuthengela ukuba ube yindawo yokungcwaba. (Genesise 23:1-20) Noma kunjalo, wayenokholo ezwini likaJehova. Ngaphezu kwakho konke, wayenokholo ngokuphathelene ‘nomuzi onezisekelo zangempela’ oseza, “omakhi nomenzi walowomuzi uNkulunkulu.” (Heberu 11:10) Ukholo olunjalo lwamsekela kukho konke ukuphila kwakhe.

5, 6. Ukholo luka-Abrahama lwavivinyeka kanjani ngokuqondene nesithembiso sikaJehova?

⁵ Lokhu kubonakala ngokukhethekile ngokuphathelene nesithembiso sokuthi imbewu ka-Abrahama yayiyoba yisizwe esikhulu. Ukuze kwenzeke lokhu, u-Abrahama wayedinga indodana, futhi walinda isikhathi eside ngaphambi kokubusiswa ngayo. Asazi ukuthi wayemdala kangakanani lapho eqala ukuzwa isithembiso sikaNkulunkulu, kodwa lapho ethatha uhambo olude lokuya eHarana, uJehova wayengakamniki umntwana. (Genesise 11:30) Wahlala eHarana isikhathi eside ngokwanele ukuba ‘abuthe impahla athole nezinceku,’ futhi lapho ethuthela eKhanani, wayeneminyaka engu-75 ubudala, uSara enengu-65. Nangaleso sikhathi, babengakabi nandodana. (Genesise 12:4, 5) Lapho uSara eva eminyakeni engaba ngu-70, waphetha ngokuthi wayesemdala kakhulu manje ukuba angazalela u-Abrahama umntwana. Ngakho, elandela isiko langaleso sikhathi, wanika u-Abrahama isigqila sakhe uHagari, u-Abrahama wathola indodana kuso. Kodwa lona kwakungeyena umntwana othenjisiwe. UHagari nomntanakhe, u-Ishmayeli, bagcina bexoshiwe. Nokho, lapho u-Abrahama ebancengela, uJehova wathembisa ukumbusisa u-Ishmayeli.—Genesise 16:1-4, 10; 17:15, 16, 18-20; 21:8-21.

⁶ Ngesikhathi sikaNkulunkulu esifanele—eminyakeni eminingi ngemva kokuba bezwe isithembiso okokuqala—u-Abrahama owayeseneminyaka eyikhulu noSara owayeneminyaka engamashumi ayisishiyagalolunye baba nomntwana womfana, u-Isaka. Yeka ukuthi kumelwe ukuba kwaba yisimangaliso kanjani! Kulo mbhangqwana owawusugugile, kwakucishe kufane novuko lapho imizimba yabo ‘eyayisifile’ iveza ukuphila okusha. (Roma 4:19-21) Babelinde isikhathi eside, kodwa lapho ekugcineni isithembiso sifezeka, ukulinda kwaba okufanelekile.

7. Ukholo luhlobene kanjani nokukhuthazela?

⁷ Isibonelo sika-Abrahama sisikhumbuza ukuthi ukholo akufanele lube olwesikhashana nje. UPawulu wahlobanisa ukholo nokukhuthazela lapho ebhala: “Ninesidingo sokukhuthazela, ukuze kuthi, ngemva kokuba seniyenzile intando kaNkulunkulu, namukele ukugcwaliswa kwesithembiso. . . . Asilona uhlobo oluhlehlela emuva ekubhujisweni, kodwa siwuhlobo olunokholo kube ukulondolozwa komphefumulo uphila.” (Heberu 10:36-39) Abaningi baye bakulinda isikhathi eside ukugcwaliseka kwesithembiso. Abanye baye balinda ukuphila kwabo konke. Ukholo lwabo oluqinile luye lwabasekela. Futhi, njengo-Abrahama, bayowuthola umvuzo ngesikhathi sikaJehova esifanele.—Habakuki 2:3.

Ukulalela UNkulunkulu

8. Simlalela kanjani uNkulunkulu namuhla, futhi kungani lokho kuyoqinisa ukholo lwethu?

⁸ Kunezinto ezine okungenani ezaqinisa ukholo luka-Abrahama, futhi zona lezo zinto zingasisiza nathi. Okokuqala, wabonisa ukuthi ‘wayekholelwa ukuthi uNkulunkulu ukhona’ ngokulalela lapho uJehova ekhuluma. Ngakho, wayehlukile kumaJuda osuku lukaJeremiya, njengoba wona ayekholelwa kuJehova kodwa engakholelwa emazwini akhe. (Jeremiya 44:15-19) Namuhla, uJehova ukhuluma nathi ngeBhayibheli, iZwi lakhe eliphefumulelwe, uPetru athi ‘linjengesibani esikhanya endaweni emnyama ezinhliziyweni zenu.’ (2 Petru 1:19) Lapho sifunda iBhayibheli ngokunakisisa, “sondliwa ngamazwi okholo.” (1 Thimothewu 4:6; Roma 10:17) Ngaphezu kwalokho, kulezi zinsuku zokugcina, “isigqila esikholekile nesiqondayo” sinikeza “ukudla [okungokomoya] ngesikhathi esifanele,” iziqondiso zokusebenzisa izimiso zeBhayibheli nokuqonda iziprofetho zeBhayibheli. (Mathewu 24:45-47) Ukulalela uJehova ngalezi zindlela kuyinto esemqoka ukuze sibe nokholo oluqinile.

9. Uyoba yini umphumela uma silikholelwa ngempela ithemba lamaKristu?

⁹ Ukholo luka-Abrahama lwaluhlobene eduze nethemba lakhe. “Ngokusekelwe ethembeni waba nokholo, ukuze abe uyise wezizwe eziningi.” (Roma 4:18) Lena yinto yesibili engasisiza. Akufanele nanini sikhohlwe ukuthi uJehova ‘ungumvuzi walabo abamfuna ngobuqotho.’ Umphostoli uPawulu wathi: “Sisebenza kanzima futhi siyazikhandla, ngoba ithemba lethu silibeke kuNkulunkulu ophilayo.” (1 Thimothewu 4:10) Uma silikholelwa ngempela ithemba lamaKristu, inkambo yokuphila kwethu konke iyobonakalisa ukholo lwethu, njengoba kwakunjalo ngo-Abrahama.

Ukukhuluma NoNkulunkulu

10. Luhlobo luni lomthandazo oluyoqinisa ukholo lwethu?

¹⁰ U-Abrahama wayekhuluma noNkulunkulu, futhi lena kwakuyinto yesithathu eyayiqinisa ukholo lwakhe. Namuhla, nathi singakhuluma noJehova, sisebenzisa isipho somthandazo ngoJesu Kristu. (Johane 14:6; Efesu 6:18) Kwakungemva kokulandisa umzekeliso ogcizelela isidingo sokuthandaza njalo lapho uJesu ebuza lo mbuzo: “Lapho iNdodana yomuntu ifika, ingabe ngempela iyoluthola ukholo emhlabeni?” (Luka 18:8) Umthandazo owakha ukholo awuwona umthandazo owenziwa ngaphandle kokucabanga noma ngokuzenzakalelayo. Unenjongo ngokujulile. Ngokwesibonelo, umthandazo osuka enhliziyweni ubalulekile lapho sinezinqumo ezibalulekile okufanele sizenze noma lapho sicindezeleke kakhulu.—Luka 6:12, 13; 22:41-44.

11. (a) U-Abrahama waqiniswa kanjani lapho evulela uNkulunkulu inhliziyo yakhe? (b) Singafundani kulokho okwehlela u-Abrahama?

¹¹ Lapho u-Abrahama eguga futhi uJehova engakamniki imbewu ayemthembise yona, wakhuluma noNkulunkulu ngokukhathazeka kwakhe. UJehova wamqinisekisa. Waba yini umphumela? U-Abrahama “wakholwa nguJehova; wambalela lokho kwaba-ngukulunga.” Khona-ke, uJehova wamnika isibonakaliso ukuze aqinisekise amazwi akhe okumqinisa idolo. (Genesise 15:1-18) Uma sivulela uJehova izinhliziyo zethu ngomthandazo, samukela ukuqinisekisa kukaJehova okuseZwini lakhe, iBhayibheli, futhi simlalela ngokholo oluphelele, khona-ke uJehova uyoluqinisa nolwethu ukholo.—Mathewu 21:22; Jude 20, 21.

12, 13. (a) U-Abrahama wabusiswa kanjani lapho elandela iziqondiso zikaJehova? (b) Luhlobo luni lwezenzakalo eziyoqinisa ukholo lwethu?

¹² Into yesine eyaqinisa ukholo luka-Abrahama kwakuyindlela uJehova ayemsekela ngayo lapho elandela iziqondiso zaKhe. Lapho u-Abrahama eya kohlenga uLoti emakhosini ayehlasele, uJehova wamenza wanqoba. (Genesise 14:16, 20) Lapho u-Abrahama ephila njengesakhamuzi sesikhashana ezweni elaliyozuzwa njengefa yinzalo yakhe, uJehova wambusisa ngokwezinto ezibonakalayo. (Qhathanisa noGenesise 14:21-23.) UJehova waqondisa imizamo yomphathi wakhe yokutholela u-Isaka umfazi ofanelekayo. (Genesise 24:10-27) Yebo, uJehova “wayembusisile uAbrahama kukho konke.” (Genesise 24:1) Ngenxa yalokhu ukholo lwakhe lwaqina futhi waba nobuhlobo obuseduze noJehova uNkulunkulu kangangokuthi uJehova wambiza ngokuthi ‘umngane wakhe.’—Isaya 41:8; Jakobe 2:23.

¹³ Ingabe singaba nokholo oluqine kangako namuhla? Yebo. Uma, njengo-Abrahama, sivivinya uJehova ngokulalela imiyalo yakhe, nathi uyosibusisa, futhi lokho kuyoqinisa ukholo lwethu. Ngokwesibonelo, ukubuka uMbiko Wonyaka Wenkonzo Ka-1998 kubonisa ukuthi abaningi babusiswa ngendlela emangalisayo lapho belalela umyalo wakhe wokushumayela izindaba ezinhle.—Marku 13:10.

Umlando Wokholo Namuhla

14. UJehova wawubusisa kanjani umkhankaso we-Kingdom News No. 35?

¹⁴ Emuva ngo-October 1997, umkhankaso womhlaba wonke we-Kingdom News No. 35 waphumelela ngokuphawulekayo, ngenxa yentshiseko nomdlandla wezigidi zoFakazi ngabanye. Okwenzeka eGhana kungesinye sezibonelo. Kwasakazwa amakhophi acishe abe yizigidi ezimbili nengxenye ngezilimi ezine, futhi ngenxa yalokho kwacelwa izifundo zeBhayibheli ezicishe zibe ngu-2 000. ECyprus oFakazi ababili ababesakaza i-Kingdom News baphawula umpristi owayebalandela. Ngemva kwesikhashana, bamhambisela ikhophi ye-Kingdom News. Wayeseyitholile kakade ikhophi futhi wathi: “Umyalezo walo [leli pheshana] ungihlabe umxhwele kakhulu kangangokuthi ngifuna ukuhalalisela abantu abalenzile.” EDenmark, kwasakazwa amakhophi e-Kingdom News ayisigidi nengxenye futhi kwaba nemiphumela emihle. Khona, intokazi esebenza kwezokwakha ubuhlobo obuhle nomphakathi yathi: “Leli pheshana linomyalezo wawo wonke umuntu. Liqondakala kalula, futhi liyakushukumisa, likwenza ufise ukwazi okwengeziwe. Lishaya emhloleni ngempela!”

15. Yikuphi okuhlangenwe nakho okubonisa ukuthi uJehova wayibusisa imizamo yokufinyelela abantu yonke indawo?

¹⁵ Ngo-1998 kwenziwa umzamo wokushumayela kubantu yonke indawo, hhayi emakhaya abo kuphela. ECôte d’Ivoire umbhangqwana wezithunywa zevangeli wahambela imikhumbi engu-322 eyayisechwebeni. Wahambisa izincwadi ezingu-247, omagazini abangu-2 284, izincwajana ezingu-500 namakhulu amapheshana, kanye nama-video amatilosi ayezowabukela lapho esolwandle. ECanada uFakazi waya endaweni yokucangcatha izimoto. Umnikazi wendawo wayenesithakazelo, futhi lo mzalwane wahlala amahora amane nengxenye, nakuba isikhathi asichitha eshumayela saba yingqikithi engaba yihora njengoba kwakulokhu kufika amakhasimende. Ekugcineni, kwahlelwa isifundo sango-10:00 ebusuku. Nokho, ngezinye izikhathi sasize siqale phakathi kwamabili futhi siqhubeke kuze kube yihora lesibili ekuseni. Cishe lesi simiso sasiyinselele, kodwa kwaba nemiphumela emihle. Le ndoda yanquma ukuyivala indawo yayo ngamaSonto ukuze ikwazi ukuya emihlanganweni. Ngokushesha yona nomkhaya wayo base bethuthuka kahle.

16. Yikuphi okuhlangenwe nakho okubonisa ukuthi incwajana ethi Yini UNkulunkulu Ayifunayo? nencwadi Ulwazi kungamathuluzi anamandla emsebenzini wokushumayela nokufundisa?

¹⁶ Incwajana ethi Yini UNkulunkulu Ayifunayo Kithi? nencwadi ethi Ulwazi Oluholela Ekuphileni Okumi Phakade kuyaqhubeka kungamathuluzi anamandla emsebenzini wokushumayela nokufundisa. E-Italy indelakazi eyayilindele ibhasi yamukela ikhophi ye-Kingdom News. Ngosuku olulandelayo, kwaphinde kwaxoxwa nayo futhi yamukela incwajana ethi Yini UNkulunkulu Ayifunayo? Usuku ngalunye ngemva kwalokho, yayiba nesifundo seBhayibheli semizuzu engu-10 kuya ku-15 esitobhini sebhasi. Ngemva kwenyanga nengxenye, yanquma ukushiya emzini wezindela iye ekhaya eGuatemala ukuze iqhubeke nesifundo sayo. EMalawi ilungu elishisekayo lesonto okuthiwa uLobina alithandanga lapho amadodakazi alo eqala ukufunda iBhayibheli noFakazi BakaJehova. Noma kunjalo, la mantombazane ayexoxa nonina ngeqiniso leBhayibheli lapho ekwazi ukukwenza. Ngo-June 1997, uLobina wabona incwadi Ulwazi futhi wakhangwa amazwi athi “Ulwazi Oluholela.” Ngo-July wavuma ukuba nesifundo seBhayibheli. Ngo-August weza emhlanganweni wesigodi futhi wasilalelisisa sonke isimiso. Leyo nyanga yaphela eselishiyile isonto lakhe futhi wafanelekela ukuba ummemezeli ongabhapathiziwe. Wabhapathizwa ngo-November 1997.

17, 18. Ama-video eNhlangano aye aba usizo ngayiphi indlela ekusizeni abantu ukuba “babone” izinto ezingokomoya?

¹⁷ Ama-video eNhlangano aye asiza abaningi ukuba “babone” izinto ezingokomoya. EMauritius indoda ethile yashiya isonto layo ngenxa yokuhlukana okukulo. Isithunywa sevangeli sayibonisa ubunye boFakazi BakaJehova, sisebenzisa i-video ethi United by Divine Teaching. Ihlabeke umxhwele, le ndoda yathi: “Nina boFakazi BakaJehova senisePharadesi kakade!” Yavuma ukuqhutshelwa isifundo seBhayibheli. EJapane udade wabonisa umyeni wakhe ongakholwa i-video ethi Jehovah’s Witnesses—The Organization Behind the Name, futhi washukumiseleka ukuba abe nesifundo seBhayibheli sasikhathi sonke. Ngemva kokubuka i-video ethi United by Divine Teaching, yafuna ukuba omunye woFakazi BakaJehova. Uchungechunge lwama-video amathathu oluthi The Bible—A Book of Fact and Prophecy lwayisiza ukuba isebenzise izimiso zeBhayibheli ekuphileni kwayo. Ekugcineni, i-video ethi Jehovah’s Witnesses Stand Firm Against Nazi Assault yayibonisa ukuthi uJehova uyabaqinisa abantu bakhe ukuba bamelane nokuhlasela kukaSathane. Le ndoda yabhapathizwa ngo-October 1997.

¹⁸ Lokhu kumane kungokuhlangenwe nakho okumbalwa kokuninginingi okwatholakala ngonyaka wenkonzo odlule. Kubonisa ukuthi oFakazi BakaJehova banokholo olusebenzayo nokuthi uJehova uyaluqinisa lolo kholo ngokubusisa umsebenzi wabo.—Jakobe 2:17.

Hlakulela Ukholo Namuhla

19. (a) Kungayiphi indlela thina sisesimweni esingcono kuno-Abrahama? (b) Bangaki ababuthana ngonyaka odlule ukuze bagubhe ukufa kukaJesu okuyisihlengo? (c) Yimaphi amazwe aba namanani avelele ababa khona eSikhumbuzweni ngonyaka odlule? (Bheka ishadi elisemakhasini 12 kuya ku-15.)

¹⁹ Ngezindlela eziningi thina namuhla sisesimweni esingcono kuno-Abrahama. Siyazi ukuthi uJehova wazifeza zonke izithembiso ayezenze ku-Abrahama. Inzalo ka-Abrahama yalizuza njengefa iKhanani, futhi yaba yisizwe esikhulu. (1 AmaKhosi 4:20; Heberu 11:12) Ngaphezu kwalokho, eminyakeni engaba ngu-1 971 ngemva kokuba u-Abrahama ephume eHarana, inzalo yakhe, uJesu, yabhapathizwa ngamanzi nguJohane uMbhapathizi nangomoya ongcwele nguJehova uqobo ukuze ibe nguMesiya, iMbewu ka-Abrahama ngomqondo ophelele ongokomoya. (Mathewu 3:16, 17; Galathiya 3:16) Ngo-Nisan 14, 33 C.E., uJesu wanikela ngokuphila kwakhe ukuze kube yisihlengo salabo ababeyobonisa ukholo kuye. (Mathewu 20:28; Johane 3:16) Izigidi manje zazingase zizibusise ngaye. Ngonyaka odlule, abangu-13 896 312 babuthana ngo-Nisan 14 ukuze bagubhe lesi senzo esimangalisayo sothando. Yeka ukulwelwa kukaJehova, uMgcini Omkhulu wezithembiso!

20, 21. Abantu abavela kuzo zonke izizwe bazibusisa kanjani ngeMbewu ka-Abrahama ekhulwini lokuqala, futhi bazibusisa kanjani namuhla?

²⁰ Ekhulwini lokuqala, abaningi abavela kuzo zonke izizwe—kuqala ngo-Israyeli wenyama—babonisa ukholo kule Mbewu ka-Abrahama futhi baba amadodana kaNkulunkulu agcotshiwe, amalungu ‘ka-Israyeli kaNkulunkulu’ omusha nongokomoya. (Galathiya 3:26-29; 6:16; IzEnzo 3:25, 26) Babelindele ngokuqiniseka ukuphila komoya okungenakufa emazulwini njengababusi eMbusweni kaNkulunkulu. Bangu-144-000 kuphela abayobusiswa ngale ndlela, futhi kulabo bambalwa abasasele. (IsAmbulo 5:9, 10; 7:4) Ngonyaka odlule, abangu-8 756 banikeza ubufakazi bokuthi bakholelwa ukuthi bayingxenye yaleli nani, ngokudla izifanekiselo phakathi nomkhosi weSikhumbuzo.

²¹ Cishe bonke oFakazi BakaJehova namuhla ‘bangabesixuku esikhulu’ okwaprofethwa ngaso kusAmbulo 7:9-17. Ngenxa yokuthi bazibusisa ngoJesu, banethemba lokuphila okumi phakade emhlabeni oyipharadesi. (IsAmbulo 21:3-5) Abangu-5 888 650 abahlanganyela emsebenzini wokushumayela ngo-1998 bawubufakazi bokuthi lesi sixuku “sikhulu” ngempela. Kwajabulisa ngokukhethekile ukubona iRussia ne-Ukraine ngalinye lala mazwe libika abamemezeli abangaphezu kuka-100 000 okokuqala ngqá. Wawuphawuleka nombiko wase-United States—abamemezeli abangu-1 040 283 ngo-August! Lawa amazwe amathathu kuphela kwangu-19 abika abamemezeli abangu-100 000 ngonyaka odlule.

Ithemba Elizogcwaliseka Ngokushesha

22, 23. (a) Kungani kufanele siqinise izinhliziyo zethu namuhla? (b) Singazibonakalisa kanjani sinjengo-Abrahama, hhayi njengabangenalukholo uPawulu akhuluma ngabo?

²² Ababekhona eSikhumbuzweni bakhunjuzwa ukuthi sesiqhubeke kangakanani nokugcwaliseka kwezithembiso zikaJehova. Ngo-1914, uJesu wabekwa esihlalweni sobukhosi njengeNkosi yoMbuso kaNkulunkulu wasezulwini, waqala ukuba khona kwakhe emandleni oMbuso. (Mathewu 24:3; IsAmbulo 11:15) Yebo, iMbewu ka-Abrahama manje iyabusa ezulwini! UJakobe wathi kumaKristu osuku lwakhe: “Bonisani ukubekezela; qinisani izinhliziyo zenu, ngoba ukuba khona kweNkosi sekusondele.” (Jakobe 5:8) Manje lokho kuba khona kuyenzeka! Yeka ukuthi sinesizathu esikhulu nakakhulu kanjani sokuqinisa izinhliziyo zethu!

²³ Kwangathi ukuqiniseka kwethu ngezithembiso zikaNkulunkulu kungahlala kuvuselelwa ngokutadisha iBhayibheli njalo nomthandazo onenjongo. Kwangathi singepheze nanini ukuthola isibusiso sikaJehova njengoba silalela iZwi lakhe. Khona-ke siyoba njengo-Abrahama, hhayi njengalabo abalukholo lwabo lwaba buthakathaka futhi lwafa, njengoba kwasho uPawulu. Akukho lutho oluyosihlukanisa nokholo lwethu olungcwele kakhulu. (Jude 20) Sithandazela ukuba kube njalo kuzo zonke izinceku zikaJehova phakathi nonyaka wenkonzo ka-1999 kuze kube yikusasa elingunaphakade.

Ingabe Uyazi?

◻ Singamlalela kanjani uNkulunkulu namuhla?

◻ Yiziphi izinzuzo ezitholakala ngokuthandaza kuNkulunkulu ngendlela enenjongo?

◻ Uma silandela iziqondiso zikaJehova ngokuzithoba, ukholo lwethu luyoqina kanjani?

◻ Yiziphi izici zombiko wonyaka (osemakhasini 12 kuya ku-15) ozithole zithakazelisa ngokukhethekile?

[Ishadi ekhasini 12-15]

UMBIKO WONYAKA WENKONZO KA-1998 WOFAKAZI BAKAJEHOVA EMHLABENI WONKE

(See bound volume)

[Isithombe ekhasini 16]

Uma silalela iZwi likaJehova, ukuqiniseka kwethu ngezithembiso zakhe kuyovuseleleka

[Isithombe ekhasini 18]

Ukholo lwethu luyaqina lapho sihlanganyela enkonzweni