Ukuzimisela Ukulandela Indlela KaNkulunkulu Yokuphila
Imihlangano ‘Yendlela KaNkulunkulu Yokuphila’ yayinokuningi okwakuzuzwa yilabo abafuna ukukhonza uNkulunkulu! Omunye ummeleli wachaza umhlangano ngokuthi “inkathi emangalisayo yokufundiswa, ukukhuthazwa nokukhanyiselwa.”
OMUNYE wathi “kwakunokuningi kokukujabulela, kokucabanga ngakho nokokukungenisa [engqondweni].” Manje ake sicabangele isimiso ngokwaso.
UJesu Kristu—Uyindlela Neqiniso Nokuphila
Lesi kwakuyisihloko sosuku lokuqala lomhlangano. (Johane 14:6) Inkulumo yokuqala yachaza injongo yokubuthana kwethu emhlanganweni: ukufundiswa ngokwengeziwe ngendlela engcono kakhulu yokuphila, indlela kaNkulunkulu yokuphila. UJehova ufundisa abantu bakhe indlela abangahamba ngayo ezindleleni zakhe. Lokhu ukwenza ngeBhayibheli, ‘ngesigqila esikholekile nesiqondayo’ nangomoya ongcwele. (Mathewu 24:45-47; Luka 4:1; 2 Thimothewu 3:16) Yeka ilungelo okuyilo ukufundiswa uMbusi wendawo yonke!
Ngokuvumelana nesihloko sosuku, inkulumo eyisihluthulelo yayithi “Isihlengo SikaKristu—Yindlela KaNkulunkulu Yensindiso.” Lapho wenza ngokuvumelana nendlela kaNkulunkulu yokuphila, kubalulekile ukuqaphela indima kaJesu Kristu enjongweni kaJehova. Isikhulumi sathi: “Ngaphandle komhlatshelo wesihlengo kaJesu Kristu, akukho muntu ongathola ukuphila okuphakade kuNkulunkulu, kungakhathaliseki izinkolelo zakhe noma imisebenzi yakhe.” Sabe sesicaphuna uJohane 3:16, othi: “UNkulunkulu walithanda izwe kakhulu kangangokuba waze wanikela ngeNdodana yakhe ezelwe yodwa, ukuze wonke umuntu obonisa ukholo kuyo angabhujiswa kodwa abe nokuphila okumi phakade.” Ukubonisa ukholo emhlatshelweni wesihlengo kaKristu kudinga ukuba sifinyelele olwazini olunembile lweqiniso. Kuhilela nokunikezela ukuphila kwethu kuJehova, sibonakalise lokho ngobhapathizo lwamanzi futhi siphile ngokuvumelana nesibonelo esabekwa uJesu Kristu.—1 Petru 2:21.
Isimiso santambama saqala ngenkulumo eyayinesihloko esithi “Indlela Yothando Ayipheli Nanini.” Yayihlanganisa ingxoxo yevesi ngalinye lencazelo kaPawulu eshukumisayo yothando, elotshwe kweyoku-1 Korinte 13:4-8. Izilaleli zakhunjuzwa ukuthi uthando lokuzidela luyisici esiphawula ubuKristu nokuthi uthando ngoNkulunkulu nangomakhelwane izici ezibalulekile zokukhulekela okwamukelwa uJehova.
Ngemva kwalokho kwaba nochungechunge olunezingxenye ezintathu olunesihloko esithi “Bazali—Gxilisani Indlela KaNkulunkulu Ezinganeni Zenu.” Abazali bangasiza izingane zabo ukuba zikhonze uNkulunkulu ngokubeka isibonelo esihle ekufundeni nasekutadisheni iZwi lakhe. Bangagxilisa iqiniso ezinganeni zabo ngesifundo somkhaya sasikhathi sonke, esilungiselelwe ukuhlangabezana nezidingo zomkhaya. Kubalulekile nokusiza izingane ukuba zibe nengxenye emisebenzini yebandla nasenkonzweni yasensimini. Nakuba ukukhulisa izingane ezesaba uNkulunkulu kuyinselele kuleli lizwe elibi, ukwenza kanjalo kuletha imivuzo emikhulu.
Ngemva kwalolu chungechunge kwaba nenkulumo eyayithi “Vumela UJehova Akulolongele Ukusetshenziswa Okunodumo.” Njengoba nje umbumbi elolonga isitsha sobumba, noNkulunkulu ulolonga labo abafisa ukumkhonza. (Roma 9:20, 21) Lokhu ukwenza ngokunikeza iseluleko eZwini lakhe nangenhlangano yakhe. UJehova uyosisiza ukuba sisebenzise amakhono ethu ngokugcwele uma sizenza sitholakale, sisabela emathubeni, futhi sizimisele ukumvumela ukuba aqondise izinyathelo zethu.
Kwabe sekulandela ingxenye ethakazelisayo yesimiso—“Ukukhonza Njengezithunywa Zevangeli.” Manje kunezikhonzi ezingamaKristu ezingu-2 390 ezikhonza emhlabeni wonke emazweni angu-148 ezibhekwa njengezithunywa zevangeli. Zibeka isibonelo esihle sokwethembeka nentshiseko futhi zilijabulela kakhulu ilungelo lazo lokukhonza emasimini akwamanye amazwe. Phakathi nale ngxenye yesimiso emihlanganweni yezizwe, izithunywa zevangeli zakhuluma ngezinselele nenjabulo yokuphila kwezithunywa zevangeli.
Inkulumo yokugcina ngosuku lokuqala yayinesihloko esithi “Ingabe Kukhona Ukuphila Ngemva Kokufa?” Lo mbuzo uye wadida isintu izinkulungwane zeminyaka. Abantu kuyo yonke imiphakathi baye baludingida lolu daba. Ziningi izimpendulo ezicatshangelwayo. Ziyahlukahluka, kuye ngokwamasiko nezinkolo zalabo abazinikezayo. Nokho, abantu kudingeka bafunde iqiniso.
Ngakho, isikhulumi samemezela ukukhululwa kwencwajana entsha enombala ogqamile enamakhasi angu-32 ethi Kwenzekani Kithina Lapho Sifa? Le ncwajana ichaza imvelaphi yemfundiso yokungafi komphefumulo futhi ibonisa indlela le nkolelo eye yaba ngayo isici esiyinhloko cishe kuzo zonke izinkolo zomhlaba namuhla. Ngendlela ecacile nekhangayo, icwaninga lokho iBhayibheli elikushoyo ngomphefumulo, ukuthi kungani sifa nokuthi kwenzekani kithi ekufeni. Le ncwajana ichaza nokuthi iliphi ithemba elikhona ngabafileyo nangabaphilayo. Yeka ukuthi le ncwajana izoba isibusiso kanjani kubafuni beqiniso kuyo yonke indawo!
Qaphelisisani Indlela Enihamba Ngayo
Yeka indlela lesi sihloko esasilufanela ngayo usuku lwesibili lomhlangano! (Efesu 5:15) Isimiso sasekuseni sagxila emsebenzini wokushumayela nowokwenza abafundi. Ngemva kokuxoxa ngetekisi losuku, isimiso saqhubeka ngenkulumo ethi “Ukusiza Abantu Bangene Endleleni Eya Ekuphileni.” Ekwenzeni lo msebenzi ophuthumayo, kubalulekile ukuba nesimo sengqondo esihle, uqaphela ukuthi ukuhlanganyela iqiniso nabanye kuyilungelo nesibopho. Ekhulwini lokuqala C.E., abantu abaningi balenqaba iZwi likaNkulunkulu. Nokho, naphezu kokuphikiswa, babekhona ‘ababethambekele ngokufanele ekuphileni okumi phakade futhi baba amakholwa.’ (IzEnzo 13:48, 50; 14:1-5) Isimo siyafana nanamuhla. Nakuba abaningi belenqaba iqiniso leBhayibheli, siyaqhubeka sifuna labo abazosabela kahle.—Mathewu 10:11-13.
Inkulumo elandelayo yakhuluma ngenselele yokufinyelela abanye ngesigijimi sokuphila. Njengoba sekunzima ngokwengeziwe ukuthola abantu emakhaya, kudingeka sisebenzisise futhi sibe nezindlela ezihlukahlukene ukuze sifinyelele abantu abaningi ngangokunokwenzeka ngesigijimi soMbuso. Emazweni amaningi, abamemezeli bezindaba ezinhle baba nemiphumela emihle ekushumayeleni ngocingo nangokushumayela ezindaweni zamabhizinisi, ngaleyo ndlela bafinyelele labo okunzima ukubathola ngenye indlela.
Inkulumo enesihloko esithi “Ukufundisa Abafundi Konke UKristu Ayala Ngako” yagxila ekubalulekeni kokuba nekhono enkonzweni yethu. Amakhono ethu okufundisa ayaloleka njengoba sifunda kwabanye futhi sisebenzisa ukuqeqeshwa okuhle esikuthola emihlanganweni yebandla. Lapho amakhono ethu okufundisa ethuthuka, sithola injabulo eyengeziwe nokwaneliseka emsebenzini wethu wokusiza abantu bafunde iqiniso leBhayibheli.
Isimiso sasekuseni saphetha ngenkulumo ephathelene nalokho okushiwo ukuzinikezela nobhapathizo. Elinye lamaphuzu ashiwo isikhulumi laliwukuthi uma simethemba ngokuphelele uNkulunkulu futhi sizama ngobuqotho ukwenza intando yakhe, uyosibusisa futhi asisekele. Indoda ehlakaniphile yabhala: “Mazise [uNkulunkulu] ezindleleni zakho zonke, uyakuqondisa imikhondo yakho.” (IzAga 3:6) Ubhapathizo olugcwele injabulo ngokwalo lwaba isici esivelele somhlangano esabonisa ukuthi abaningi base beqalile ukwenza ngokuvumelana nendlela kaNkulunkulu yokuphila.
Ngemva kwekhefu, isimiso santambama saqala ngenkulumo ethi “Ukukhonza Sinombono Wokuphila Okungapheli.” Injongo kaNkulunkulu yokuba abantu abalalelayo bamkhonze phakade emhlabeni iyogcwaliseka. Khona-ke, yeka ukuthi kufaneleka kanjani ukuthi sigxilisa ukucabanga kwethu, lokho esikuhlelayo namathemba ethu ekukhonzeni uJehova sinombono wobuphakade! Nakuba sifuna ukulugcina luseduze engqondweni ‘usuku lukaJehova,’ kubalulekile ukuba sikhumbule ukuthi umgomo wethu uwukukhonza phakade. (2 Petru 3:12) Ukungasazi isikhathi esiqondile uJesu ayokhipha ngaso impindiselo kaNkulunkulu kusigcina siqaphile, kusinike namathuba nsuku zonke okubonisa ukuthi asikhonzi uJehova ngezisusa zobugovu.
Izinkulumo ezimbili ezalandela zahlola isahluko sesine sencwadi kaPawulu kwabase-Efesu. Phakathi kwezinto ezacatshangelwa kwakuyisibusiso esinaso ‘sezipho ezingabantu,’ okungamadoda afanelekayo ngokomoya amiswe umoya ongcwele. Laba badala banikeza iseluleko nesiqondiso esisizuzisayo ngokomoya. Le ncwadi kaPawulu ephefumulelwe inxusa nokuba amaKristu ‘agqoke ubuntu obusha.’ (Efesu 4:8, 24) Ubuntu bokuhlonipha uNkulunkulu buhlanganisa izimfanelo ezinjengobubele, umusa, ukuthobeka kwengqondo, ubumnene, ukubhekakade nothando.—Kolose 3:12-14.
Ukuqaphelisisa indlela esihamba ngayo kuhilela ukuzigcina singenabala elivela ezweni—okwaba isihloko senkulumo eyalandela. Kudingeka ukulinganisela ekukhetheni izinto zokuzijabulisa, zokuchith’ isizungu nasezintweni ezibonakalayo. Ngokusebenzisa iseluleko esikuJakobe 1:27 sokuzigcina singenabala elivela ezweni, sijabulela ukuma okuhlanzekile noNkulunkulu nonembeza ohlanzekile. Futhi singaphila ukuphila okunenjongo futhi siyobusiswa ngokuthula, ukuchuma okungokomoya nabangane abahle kakhulu.
Kwabe sekulandela uchungechunge olunezingxenye ezintathu olwalunesihloko esithi “Basha—Landelani Indlela KaNkulunkulu.” Njengoba bazi ukuthi uNkulunkulu uyabathanda futhi uyayazisa imizamo yabo yokunamathela ekukhulekeleni okuhlanzekile, abantu abasha kufanele baqeqeshe amandla abo okuqonda ukuze bamkhonze ngokwethembeka. Enye indlela yokuthuthukisa amandla okuqonda ingokufunda iZwi likaNkulunkulu nsuku zonke nangokuzindla ngalo. Uma senza kanjalo, singazazi izindlela zikaJehova. (IHubo 119:9-11) Amandla okuqonda athuthukiswa nangokwamukela iseluleko esivuthiwe esivela kubazali, abadala nezincwadi zeNhlangano. Ngokusebenzisa amandla ayo okuqonda ngendlela efanele, intsha imelana nokuba matasa ngezinto ezibonakalayo, inkulumo engahlanzekile nokweqisa ezintweni zokuzilibazisa okuvamile kuleli lizwe elihlukanisiwe noNkulunkulu. Ngokulandela indlela kaNkulunkulu yokuphila, abasha nabadala ngokufanayo bangajabulela impumelelo yangempela.
Inkulumo yokugcina yalolo lusuku yathi “Umdali—Ubuntu Bakhe Nezindlela Zakhe.” Ngemva kokuphawula ukuthi izinkulungwane zezigidi zabantu azimazi uMdali, isikhulumi sathi: “Injongo yangempela ekuphileni iphathelene nokwazi uMdali, uNkulunkulu wethu ongumuntu ongokoqobo; uqaphele ubuntu bakhe; futhi ubambisane nezindlela zakhe. . . . Kunamaqiniso aphathelene nomhlaba wethu kanye nathi ongawasebenzisa ekusizeni abantu bamukele uMdali futhi bathole injongo ngokuphathelene naye.” Isikhulumi sabe sesikhuluma ngobufakazi obubonisa ukuba khona koMdali ohlakaniphile nonothando. Le nkulumo yafinyelela umvuthwandaba wayo ngokukhululwa kwencwadi entsha (yesiNgisi) ethi Is There a Creator Who Cares About You?
“Nansi Indlela; Hambani Ngayo”
Lesi kwakuyisihloko sosuku lwesithathu lomhlangano. (Isaya 30:21) Isimiso saqala ngochungechunge oluthakazelisayo lwezinkulumo ezintathu, olugxile embonweni kaHezekeli wethempeli. Lo mbono usho lukhulu kubantu bakaNkulunkulu namuhla, njengoba uphathelene nokukhulekela okuhlanzekile esikhathini sethu. Isihluthulelo sokuqonda lo mbono yilesi: Ithempeli likaJehova elikhulu elingokomoya limelela ilungiselelo lakhe lokukhulekela okuhlanzekile. Njengoba kwakuxoxwa ngezici zalo mbono, izilaleli zazicabanga ngomsebenzi wazo wokusekela umsebenzi owenziwa ababonisi abanothando bensali egcotshiwe namalungu esikhathi esizayo esigaba samakhosi.
Kamuva ekuseni, kwaba nedrama yeBhayibheli ekhangayo eyayineqembu labadlali ababegqoke ezasendulo. Le drama yayinesihloko esithi “Mikhaya—Ukufunda IBhayibheli Nsuku Zonke Makube Yindlela Yenu Yokuphila!” Yabonisa ukholo nesibindi samaHeberu amathathu lawo enqaba ukukhothamela isithombe segolide esasimiswe inkosi yaseBabiloni uNebukadinesari. Injongo yedrama yayiwukubonisa ukuthi iBhayibheli aliyona nje incwadi yomlando wasendulo kodwa ukuthi iseluleko salo sizuzisa ngempela kokubili kwabancane nabadala namuhla.
Isimiso santambama saba nenkulumo yeningi enesihloko esithi “Okuwukuphela Kwendlela Eya Ekuphileni Okumi Phakade.” Ngemva kokulandelela umlando wokuwela kwesintu esonweni nokufa, isikhulumi saphetha ngala mazwi ashukumisa ingqondo: “Umbhalo weBhayibheli oyisihloko salolu suku lomhlangano, u-Isaya isahluko 30, ivesi 21, uthi: ‘Nezindlebe zakho ziyakuzwa izwi emva kwakho, lithi: Nansi indlela; hambani ngayo, noma niphambuka ngakwesokunene, noma niphambuka ngakwesokhohlo.’ Silizwa kanjani leli lizwi? Ngokulalela iZwi likaNkulunkulu, iBhayibheli Elingcwele, nangokulandela isiqondiso uMfundisi wethu Omkhulu, uJehova uNkulunkulu, asinika sona ngalo nangenhlangano yakhe yobuKristu yanamuhla. Ngempela, ukwenza lokhu kuwukuphela kwendlela eyisa ekuphileni okumi phakade.”
Ngemva kokubukezwa kwesihloko sesifundo se-Nqabayokulinda sangalelo sonto, kwaba nenkulumo yokugcina, enesihloko esithi: “Qhubeka Uhamba Endleleni KaJehova.” Ngokwengxenye, yabukeza amaphuzu ayinhloko esimiso. Isikhulumi sabe sesikhipha izwi lesinqumo elizwakalisa ukuzimisela ukuqhubeka siphila ngendlela kaNkulunkulu.
Izwi lesinqumo laphetha ngala mazwi ashukumisayo: “Siyaqiniseka ukuthi ukuphila ngezimiso, iseluleko nesiyalo esingokomBhalo kuyindlela engcono kakhulu yokuphila manje futhi kubeka isisekelo esihle sesikhathi esizayo, ukuze sibambisise ukuphila kwangempela. Ngaphezu kwakho konke, sithatha leli lizwi lesinqumo ngoba sithanda uJehova uNkulunkulu ngenhliziyo yethu yonke, ngomphefumulo wonke, ngengqondo yonke, nangamandla onke!” Bonke ababekhona baqinisekisa ukuvuma kwabo ngo-elethu odumayo!
[Ibhokisi/Isithombe ekhasini 8]
Ingabe Ukhona UMdali Osikhathalelayo?
Incwadi entsha enalesi sihloko inikeza ubufakazi obukholisayo bokuthi uMdali, uJehova, ukhona futhi ikhuluma nangezimfanelo zakhe. Iklanyelwe ngokukhethekile labo abafundile ngokwezwe kodwa abangakholelwa kuNkulunkulu. Le ncwadi enamakhasi angu-192 iyoqinisa nokholo lwalabo asebekholelwa kakade kuNkulunkulu, yakhe ukwazisa kwabo ngobuntu nangezindlela zakhe.
Incwadi ethi Is There a Creator Who Cares About You? ayenzi sengathi umuntu oyifundayo uyakholelwa kuNkulunkulu. Kunalokho, ichaza indlela lokho okutholakele muva nje nemibono yesayensi okufakazela ngayo ukuba khona koMdali. Phakathi kwezihloko zayo kunesithi “Yini Engenza Ukuphila Kwakho Kube Nenjongo?,” “Yaba Khona Kanjani Indawo Yonke?—Impikiswano” nesithi “Yeka Indlela Ohluke Ngayo!” Ezinye izahluko zicabangela isizathu esingenza siqiniseke ukuthi iBhayibheli liphefumulelwe ngokwaphezulu. Le ncwadi entsha inikeza umbono walo lonke iBhayibheli, elembula ubuntu nezindlela zoMdali. Ayikhulumi kuphela ngesizathu esenza uNkulunkulu avumele ukuhlupheka okungaka kodwa ichaza nendlela ayokuqeda ngayo phakade.
[Izithombe ekhasini 7]
Kwabhapathizwa abaningi
[Izithombe ekhasini 7]
Incwajana entsha yakhululwa ngu-A. D. Schroeder, ilungu leNdikimba Ebusayo YoFakazi BakaJehova
[Izithombe ekhasini 8, 9]
Idrama evusa amadlingozi yakhuthaza ukufundwa kweBhayibheli kwansuku zonke