“Ilukuluku Lokwazi Enhliziyweni Nasengqondweni”
“Amazwi awanakuyichaza injabulo eqhubeka ikhula njengoba ngifunda ngentshiseko incwadi ethi Is There a Creator Who Cares About You? Yakha kumuntu isifiso—cha, isidingo—sokwazi okwengeziwe. Ngiyabonga ngokwakha ilukuluku lokwazi enhliziyweni nasengqondweni yami.”
WAZIZWA kanjalo omunye woFakazi BakaJehova eNyakatho Carolina, e-U.S.A., ngencwadi ekhululwe yi-Watch Tower Society eMihlanganweni Yezigodi ‘Yendlela KaNkulunkulu Yokuphila’ ngo-1998/99. Ngisho noma ungenayo ikhophi yayo, phawula indlela abanye abaye basabela ngayo.
Ngemva kwezinsuku ezithile ithole ikhophi emhlanganweni eSan Diego, eCalifornia, e-U.S.A., indoda ethile yabhala: “Le ncwadi ngiyizwa iluqinisa kakhulu ukholo. Igcwalisa inhliziyo yami ngokwazisa okukhulu ngemisebenzi kaJehova yokudala. Sengisekhasini 98, futhi ngifisa sengathi ingangaphela! Iletha injabulo enkulu yokwaneliseka.”
Owesifazane othile waseMpumalanga wabhala: “Isikhulumi emhlanganweni sasebenzisa amazwi athi ‘yincwadi eyingqayizivele,’ futhi lawo mazwi afanelana ngempela nalokho ekuqukethe. Isici esivelele siwukuthi le ncwadi ayiphoqeleli ukuba umfundi akholelwe ebukhoneni bukaNkulunkulu, kodwa inikeza amaqiniso.”
Lawo maqiniso ahlanganisa nokwaziswa okuthakazelisayo okuye kwatholakala ngokwesayensi ngokuphathelene nendawo yonke yethu, ukuphila nathi ngokwethu. Lokhu kubahlabe umxhwele abaningi. Owesifazane othile waseCalifornia wabhala: “Ngiswele amazwi okuchaza indlela le ncwadi encane eye yangithinta ngokujule ngayo. Bengingakwazi ukuyibeka phansi ngoba ikhasi ngalinye lichaza okwengeziwe okuye kwatholakala ngendawo yonke yethu nokuphila ngokwako. Ngifunde okuningi ngempela! Izohlale iyigugu kimi le ncwadi encane futhi ngizoyihambisela abaningi ngangokunokwenzeka.”
Isici esiye sajabulisa abaningi yindlela le ncwadi ebukeza ngayo iBhayibheli, iqokomisa ubuntu boMdali. Kuvamile ukuzwa amazwi athi: “Umbono walo lonke iBhayibheli, onikezwe ngasekupheleni kwale ncwadi, ungomunye wengcono kakhulu engake ngayifunda.” Ngemva nje komunye wemihlangano yokuqala eNew York, e-U.S.A., omunye wabhala: “Le ncwadi entsha ekhululiwe kumelwe ukuba ithumba ingqondo kunazo zonke enake nazinyathelisa. Bungikhexise umlomo ubufakazi obungokwesayensi bokuba khona koMdali. Ukubukezwa kweBhayibheli okushaya emhloleni kwanele ngokwako ukuchaza amaphuzu avezwayo nokuvusa isithakazelo sokufunda okwengeziwe.”
Isayensi Eqondakalayo
Ukwaziswa okungokwesayensi okusezahlukweni zokuqala kungase kubonakale kunzima ukukuqonda, kodwa nansi indlela abantu abasabela ngayo ngokuvamile.
Owesilisa othile waseCanada wabhala: “Yeka indlela ehluke ngayo ezincwadini zolwazi zobuchwepheshe ezinabalobi abazama ukusihlaba umxhwele ngamazwi abo amakhulu. Nikwazi ngendlela ephawulekayo ukwenza siziqonde kahle izihloko zesayensi yezinto zemvelo, isayensi yokuthakwa kwemithi, i-DNA, izici zofuzo, nezinye. Yeka ukuthi kwakuyoba kuhle kanjani ukube zazibhalwa yini izincwadi zezifundo zaseyunivesithi engazifunda eminyakeni edlule!”
Uprofesa waseyunivesithi wesayensi yezinto zemvelo wabhala: “Ilubeka ngokucacile udaba ngaphandle kokuningiliza imininingwane yezobuchwepheshe. Le ncwadi ibonisana nomfundi futhi icaphune ososayensi abaningi abavelele. Lena yincwadi ‘okumelwe ifundwe’ yinoma ubani onesithakazelo emsukeni wendawo yonke nokuphila, kungakhathaliseki ukuthi ngusosayensi noma umuntu ovamile.”
Owesifazane othile osemusha ofundela ubuhlengikazi wathi: “Angizange ngikukholelwe engangikubona lapho ngivula isahluko 4 futhi ngifunda ingcaphuno ethathwe encwadini engiyisebenzisa ekilasini! Ngayithatha le ncwadi ngayinika uprofesa wethu, ngamtshela ukuthi ngangazi ukuthi wayezokuthola kuqabula lokho kwaziswa. Ngambonisa ikhasi 54 elikhuluma ngobuchopho. Wayifunda buthule wabe esethi, ‘Kuyathakazelisa lokhu! Ngizoke ngikuhlole.’”
Ilungu lephalamende eBelgium labhala: “Okwangikhanga futhi kwangenza ngathatheka ukubukeza okungokwesayensi okuqokomisa ukuthi isayensi yanamuhla ayimelene nombono weBhayibheli wokuba khona kukaNkulunkulu oyedwa, kodwa kunalokho ivumelana nawo. Lona umbono ophawuleka kakhulu.”
Ukumazi Kangcono UMdali
Le ncwadi isize abantu emazweni amaningi ukuba bamazi kangcono uNkulunkulu futhi bazizwe beseduze kakhulu naye. Umfundi waseFukuoka City, eJapane, waphawula: “Kunjengokungathi izingilazi zokubuka ziqondiswe ngqó kuJehova okokuqala ngqá. Le ncwadi ikholisa ngendlela emangalisayo. Ngiye ngakwazi ukwazi uJehova ngendlela ebengingakaze ngiyicabanga kuze kube manje.” Umuntu othile e-El Salvador wabhala: “Niyichaza ngendlela ecacile indlela uNkulunkulu anomusa, amnene, aphuza ukuthukuthela navame ngayo umusa wothando. Ngempela, yilokho kanye esikudingayo ukuze sibe seduze naye neNdodana yakhe. Iyincwadi yokuqala echaza imizwa kaJehova neyeNdodana yakhe, uJesu.” Futhi umfundi othile eZambia wasabela ngokuthi: “Ngiye ngaba nombono ohluke ngokuphelele ngoJehova.”
Ngokuqondakalayo, oFakazi BakaJehova bamagange ukuyihambisela abanye le ncwadi ethi Is There a Creator Who Cares About You? Omunye wathi: “Lapho ngiqeda ukufunda isahluko 10 [esithi “Uma UNkulunkulu Esikhathalela, Kungani Kunokuhlupheka Okungaka?”] ngamemeza ngithi, ‘Lena yiyo kanye incwadi esiyidingayo lapha eJapane!’ Ngifuna ukuzijwayeza ukwaziswa okukulesi sahluko bese ngikusebenzisa ngokuphindaphindiwe enkonzweni yasensimini.” Omunye wesifazane ufunda iBhayibheli nentombazane eyakhulela ethempelini uyise angumpristi kulo. “Ikuthola kunzima ukwamukela udaba loMdali. Incazelo yale ncwadi ayiphoqeleli, kodwa iveza amaqiniso, ngakho ngicabanga ukuthi nabantu abangamaBuddha bangayifunda ngaphandle kokungabaza. Futhi isenza siluzwe ngokwengeziwe uthando lukaJehova.”
KwelaseNgilandi kwavela nanku umbono: “Ngisanda kuqeda incwadi i-Creator futhi sengizoyiqala phansi. Yeka ukuthi iyincwadi enhle ngokumangalisa kanjani! Lapho umuntu eyifunda uba nothando ngoJehova. Ngiye ngayinika umakhelwane wami, owathi ngemva kokufunda izahluko ezimbili nje wathi, ‘Kunzima ukuyibeka phansi, ithakazelisa kakhulu.’ Ngiyaqiniseka ukuthi le ncwadi iyobasiza abantu ukuba bamazi futhi bamthande uMdali wethu Omkhulu.”
Indoda ethile eMaryland, e-U.S.A., yathi: “Iye yangena ngokuqondile emathanjeni nasemnkantsheni wami ongokomoya! Ngihlela ukunika bonke abantu engisebenzelana nabo ikhophi yayo. Ngezinye izikhathi ngikuthola kunzima ukuqala ukufakaza kubantu abamatasa nabafunde ngale ndlela. Ngale ncwadi sengizothola indlela ekhangayo nephumelelayo.”
Ngokusobala, le ncwadi ethi Is There a Creator Who Cares About You? iyoba nethonya elihle kubantu emhlabeni wonke.
[Umthombo Wesithombe ekhasini 25]
Cover photo above, Eagle Nebula: J. Hester and P. Scowen (AZ State Univ.), NASA