Ukunikezelwa KweWatchtower Educational Center—Umkhosi KaJehova

KUSUKELA ezikhathini zasendulo, imikhosi yenjabulo ibilokhu iyingxenye yokukhulekela kweqiniso. Eminye yemikhosi eyayiba khona kwa-Israyeli wasendulo yayithatha izinsuku eziningana futhi kwakuba nezinkulungwane eziningi zabakhulekeli bakaJehova. Umkhosi wokunikezelwa kwethempeli likaSolomoni wathatha izinsuku eziyisikhombisa futhi walandelwa uMkhosi Wamadokodo owathatha isonto. Lokhu kwanika ama-Israyeli ithuba lokucabanga ngendlela emangalisayo uJehova asebenzelana ngayo nawo. Abuyela ekhaya ‘ejabula, ethokoza ngenhliziyo ngakho konke okuhle uJehova akwenzile.’—1 AmaKhosi 8:66.

Okwenzeka eWatchtower Educational Center ePatterson, eNew York, e-U.S.A., ngo-May 17-22, 1999, kwakhumbuza izihambeli ngaleyo mikhosi yasendulo ejabulisayo. Leli kwakuyisonto lezici ezikhethekile ezigxile ekunikezelweni konxanxathela lwezakhiwo ezingu-28 eziklanyelwe ukuthuthukisa imfundo yeBhayibheli yomhlaba wonke. Kwenziwa amalungiselelo okuba wonke amalungu ezisebenzi zasendlunkulu ezingu-5 400, ezaseBrooklyn, eWallkill nasePatterson, ahambe ebuka lezi zakhiwo zasePatterson phakathi nalelo sonto elikhumbulekayo. Phakathi kwezihambeli kwakunabangaphezu kuka-500 ababekade bengamalungu ezisebenzi ezazihlanganyele kulo msebenzi phakathi nokwakhiwa kwalesi sikhungo semfundo, abameleli abavela emagatsheni angu-23 e-Watch Tower Society nabanye basemabandleni aseduze—ingqikithi yabangaphezu kuka-8 100.

Imibukiso Yasohambweni Lokubuka Iyafundisa

Kwenziwa imibukiso ekhethekile, ama-video afundisayo kwahlelwa nohambo lokubuka olwalungadingi mqondisi ukuze kwenziwe izihambeli zijwayelane nalesi sikhungo semfundo. Endaweni yokwamukela izihambi eyinhloko, izihambeli zakhangwa ngokushesha umfanekiso wethempeli elaliseJerusalema phakathi nesikhathi senkonzo kaJesu yasemhlabeni. Eminye imibukiso yayiqokomisa umlando wokuqala we-Watchtower Bible School of Gilead, imihlangano emikhulu eyingqopha-mlando, imihlangano yebandla, intuthuko yanamuhla yokuba nezifundo zeBhayibheli zasekhaya—izigidi zazo eziqhutshwa isonto ngalinye manje—nomsebenzi owenziwa uMnyango Wezomthetho ukugcina lo msebenzi uqhubeka wenziwa njengoba kulalelwa umyalo kaJesu.—Mathewu 28:19, 20.

Ehholo elincikene nalapho, elihlalisa ngokunethezeka abantu abangu-1 700, lezo zihambeli ezazikhona phakathi nalo mkhosi zabungazwa ngokuboniswa i-video yemizuzu engu-33 enesihloko esithi “Kungabi Ngamandla—Kube Ngomoya Wami!” Le video yabonisa indlela eyaba khona ngayo iWatchtower Educational Center. Izingxoxo nabathile zaveza izenzakalo ezazisibonisa ngokucacile isiqondiso sikaJehova ezindabeni ezihilelekile kanye nezibusiso zakhe emizamweni yokuwuqeda ngokuphumelelayo lo msebenzi weminyaka engu-15. Kunezinkulungwane ezahlanganyela emsebenzini wokwakha ongokoqobo. Esikhathini esithile ngo-1994, kwakunezisebenzi ezingu-526 esakhiweni, ezihlanganisa izisebenzi zokuzithandela zesikhathi esigcwele ezingu-350, izisebenzi zesikhashana ezingu-113 nezingu-63 ezaziza nsuku zonke zizosiza. Abaningi abengeziwe basiza ngeminikelo kulo msebenzi. Bonke bayaqaphela ukuthi lokhu kwakungeke kwenzeke ngaphandle komoya kaJehova.—Zakariya 4:6.

Labo ababesohambweni lokubuka babebona ukuthi umsebenzi owawenziwa kulesi sikhungo semfundo ugxile ekuthuthukiseni ukufundisa kwaphezulu. Umbukiso owawungasemnyango eSikoleni SaseGileyadi esitezi sokuqala sesakhiwo sesikole wawuqokomisa ifa elicebile elingokomoya nomlando walesi sikole. Kusukela ekilasini laso lokuqala ngo-1943 esakhiweni sokuqala salesi sikole esasiseNingizimu yeLansing, eNew York, iSikole SaseGileyadi siye saqeqesha abafundi abangaphezu kuka-7 000 sibaqeqeshela inkonzo yezithunywa zevangeli. Imiboniso eyayisesitezi sesibili salesi sakhiwo sesikole yayenza umuntu abe nombono weSikole Samalungu AmaKomiti Amagatsha neSikole Sababonisi Abajikelezayo, zombili eziqhutshelwa lapho. Kusukela ekuqaleni kwaso ngo-November ka-1995, isikole samaKomiti Amagatsha siye sanikeza imfundo ethuthukisiwe emalungwini angu-360 amaKomiti Amagatsha avela emazweni angu-106.

Njengoba izihambeli zihambe zibuka, ngokushesha zaqaphela ukuthi ezindaweni eziningi, zazingagcini ngokubona imiboniso yezithombe. Zazikwazi ukungena phakathi eminyangweni ehlukahlukene, zivakashele amahhovisi nezinye izindawo zokusebenza, zibe nombono ocacile womsebenzi owenziwayo. Okwaba okuvelele kulolu hambo lokubuka kwakuyindawo yokuQopha Amakhasethi Alalelwayo Nabukwayo. Yeka izinto ezinhle ezisetshenziswayo lapho ukuthuthukisa imfundo yeBhayibheli! Kusetshenziswa uchungechunge lwemiboniso efundisayo kanye nama-video amafushane, izihambeli zasizwa ukuba ziqonde indlela aqoshwa ngayo amazwi nendlela okwenziwa ngayo ama-video. Zafunda okuthile ngocwaningo olunzulu olwenziwayo lapho kulungiselelwa izinto ezizobekwa esiteji nezingubo zabadlali. Zabona indlela isiteji esihlelwa ngayo ngezindleko eziphansi kodwa kunakekelwa ngendlela ephawulekayo imininingwane. Zabona indlela umculo osetshenziswa ngayo ukuze kwenziwe abantu babe nomuzwa wokuba ngokoqobo kuleyo ndawo abayibukayo. Kusukela ngo-1990 iNhlangano iye yenza ama-video ayishumi ngezilimi ezingu-41, aqokomisa izihloko ezihlukahlukene zeBhayibheli, ngaphezu kwamanye ama-video alabo abasebenzisa uLimi Lwezandla LwaseMelika.

Abaningi abathatha uhambo lokubuka baya eNdaweni Yezithombe, eMnyangweni Wezobuciko, eMnyangweni Wezokwaziswa, oqeqesha futhi usize ngokuphathelene nama-computer, uMnyango Wenkonzo, oqondisa umsebenzi wamabandla angu-11 242 nababonisi abajikelezayo abangu-572 noMnyango Wokubhala Izincwadi, lapho kusingathwa imibuzo engaba ngu-14 000 unyaka ngamunye. Zahlatshwa umxhwele ucwaningo olwenziwayo lapho kuphendulwa izincwadi kanye nokukhathalela okuqotho okuboniswa labo abanemibuzo ebonisa ukuthi bazama ukubhekana nezinkinga ezinkulu.

Labo ababesohambweni lokubuka babelokhu betheleke njalo eMnyangweni Wokuhumusha. Bamangala ukuzwa ukuthi phakathi neminyaka emihlanu edlule, kuye kwanezelwa izilimi ezingu-102 enanini lezilimi iNhlangano enyathelisa ngazo izincwadi zeBhayibheli. Emhlabeni wonke, amaphesenti angaba ngu-80 oFakazi BakaJehova afunda izincwadi zeNhlangano ngezinye izilimi ezingesona isiNgisi. Ukuze kunakekelwe izidingo zabo, kunezisebenzi zokuzithandela ezingaphezu kuka-1 700 ezisemkhakheni wokuhumusha emazweni ayikhulu. Imibukiso yabonisa INqabayokulinda ngezilimi zaseMelika, eYurophu, e-Asia nase-Afrika. Izihambeli zabona iBhayibheli i-New World Translation ngezilimi ezingu-31 eliye lanyatheliswa ngazo. Zezwa nokuthi manje izincwadi ze-Watch Tower Society zitholakala ngezilimi ezingu-332 nokuthi incwajana engangomagazini ethi Yini UNkulunkulu Ayifunayo Kithi? iye yanyatheliswa ngezingu-219 zalezi zilimi.

Izihambeli ezaya eMnyango Wezomthetho zaboniswa imisebenzi yemikhakha eminingi edinga ezomthetho emhlabeni wonke. Kuyi-video, zakubona ngokoqobo ukuqulwa kwecala lapho ummeli onguFakazi enikeza ubufakazi ecaleni elihilela ukumpontshelwa kwegazi. Zezwa nokuthi yini eyenziwayo ukuze kugcinwe umsebenzi wokushumayela izindaba ezinhle uqhubeka. (Filipi 1:7) Kwaphawulwa nangesinqumo esakhishwa ngo-March walo nyaka, esenziwa inkantolo yesigodi kahulumeni, iyala idolobha likahulumeni lase-Oradell, eNew Jersey, e-U.S.A., ukuba lishintshe imithetho yalo ukuze liqede imfuneko yemvume namabheji koFakazi BakaJehova abafuna ukuhlanganyela enkonzweni yasobala yendlu ngendlu kulowo mphakathi.

Lokhu akukhona konke izihambeli ezakubona. Zahlola imiboniso yokwakha eNdaweni Yokwakha Izinto Zikakhonkolo futhi zaya eNdaweni Yokuhlanza Amanzi, eSiteshini Sikagesi, eNdaweni Yokuhlunga Amanzi, kanye nakwezinye izindawo eziningana zokunakekela izinto ezihlukahlukene. Lelo kwakuyithuba eliyingqayizivele ekuphileni.

Isimiso Sokunikezela Sigcizelela Imfundo Yaphezulu

Isimiso sokunikezela ngokwaso saba ngoLwesithathu, ngo-May 19, futhi saqala ngehora lesine ntambama. Phakathi kwesixuku esasijabule sabangu-6 929 kwakunamalungu ezisebenzi zasendlunkulu, izivakashi zeNhlangano, futhi abangu-372 babehlangene egatsheni laseCanada, elalixhunyaniswe ngocingo.

Izilaleli zajabula kakhulu ukuzwa amazwi ajabulisayo okuzamukela kaMilton G. Henschel, umongameli we-Watch Tower Society. UTheodore Jaracz, ilungu leNdikimba Ebusayo owayengusihlalo kulesi senzakalo, wabe esethula uWilliam Malenfant. Ethula “Amazwibela Esimiso Sokwakha,” waxoxa nabazalwane abathathu ababa nengxenye ebalulekile ekuhleleni, ekuklameni nasekwakheni iWatchtower Educational Center. Phakathi nengxoxo, kwaphawulwa ukuthi phakathi neminyaka yokwakha, izisebenzi zesikhashana ezingaphezu kuka-8 700 zaziza ngezindleko zazo kulo msebenzi. Yeka ubufakazi obuhle bobunye nokuphana okwabangelwa ukufundisa kwaphezulu!

Kwalandela uchungechunge olwalunesihloko esithi “Imfundo Yaphezulu Emhlabeni Wonke.” Lwanikezwa amalungu amane eNdikimba Ebusayo. UJohn E. Barr wagcizelela ukuthi imfundo yaphezulu isekelwe eZwini likaNkulunkulu, iBhayibheli, elikhuthaza amaKristu ukuba ‘aqhubeke ethela isithelo kuyo yonke imisebenzi emihle futhi anda olwazini olunembile ngoNkulunkulu.’ (Kolose 1:10) UDaniel Sydlik waxoxa ngendlela imfundo yaphezulu ehlelwa ngayo ngokwaphezulu ukusuka enhlokweni yebandla lobuKristu, uJesu Kristu, ukuya phansi kuwo wonke amalungu obuzalwane bomhlaba wonke. (1 Korinte 12:12-27) Izingxenye ezimbili zokugcina zalolu chungechunge, ezazibekwa uGerrit Lösch noCarey Barber, zabonisa indlela imfundo yaphezulu eyenza ngayo izikhonzi zikufanelekele ukufinyelela abantu yonke indawo nokubafundisa ukuze nabo bahambe endleleni kaNkulunkulu.—Isaya 2:1-4; 2 Korinte 3:5.

Ukuze kwenziwe izilaleli zizazi kangcono izikole ezihlukahlukene eziqhutshwa kulesi sikhungo semfundo, kwaxoxwa nabafundisayo kanye nabanye abahilelekile kulesi sikole. Kwaboniswa indima yesikole ngasinye ekuqhubeni isimiso semfundo yaphezulu emhlabeni wonke. Kwavezwa ukuthi iSikole SaseGileyadi sigxila ekutadisheni incwadi ngayinye yeBhayibheli, emlandweni wanamuhla wabantu bakaJehova nasekulungiseleleni inkonzo yezithunywa zevangeli. Isikole samakomiti amagatsha sinesifundo esiningiliziwe esihle kakhulu semisebenzi yemikhakha eminingana amalungu amaKomiti Amagatsha ahileleke kuyo. ISikole Sababonisi Abajikelezayo siklanyelwe ukungagcini ngokwanelisa izidingo zabazalwane abajikelezayo kuphela kodwa nokubahlomisela ukunikeza usizo olungokomoya oluyowazuzisa ngokukhethekile amabandla.

Ephetha lesi simiso esihle, uLloyd Barry weNdikimba Ebusayo wanikeza inkulumo yokunikezela enesihloko esithi “Ukwakha NoMdali Wethu Omkhulu.” Waveza ukuthi uMdali, uJehova, uyayijabulela yonke indalo yakhe futhi usimema ukuba sijabule naye. (Isaya 65:18) Njengoba “lowo owakha izinto zonke [kunguNkulunkulu],” ekugcineni nguJehova uNkulunkulu okumelwe adunyiswe ngaso sonke lesi sakhiwo. (Heberu 3:4) Ngemva kwalawo mazwi, isikhulumi sathandaza ngobuqotho, sinikezela iWatchtower Educational Center kuJehova, uMdali wethu Omkhulu.a

Akungabazeki ukuthi lo mkhosi wesonto lonke uyohlala ukhunjulwa isikhathi eside yilabo ababekhona. Kungani ungahleli ukuvakashela iWatchtower Educational Center? Siyaqiniseka ukuthi ukuvakasha nokuhamba uyibuka kuyokukhuthaza emizamweni yakho yokufunda okwengeziwe ngoMdali wethu onothando nokuphila ngezindinganiso zakhe zokulunga.

[Umbhalo waphansi]

[Izithombe ekhasini 10]

Ihholo eligcwele negumbi lokudlela eliphuphumayo

[Izithombe ekhasini 10]

Uhambo lokubuka lwaluyisici esijabulisa ngokukhethekile