Indaba Yokuphila

Ukhonza Abanye Kudambisa Ukuhlupheka

NJENGOBA ILANDISWA NGU-JULIÁN ARIAS

Lapho ngineminyaka engu-40 ubudala, ngo-1988, ikusasa lomsebenzi wami lalibonakala lilihle. Ngangingumqondisi wesifunda enkampanini esabalele emazweni ngamazwe. Ngangihola kahle, nginikwe nonyanyavu lwemoto, nehhovisi likanokusho enkabeni yeMadrid, eSpain. Inkampani yaze yahlongoza ukuthi yayingase ingimise njengomqondisi wayo kazwelonke. Ngangingacabangi nhlobo ukuthi kanti ukuphila kwami kwakuzoshintsha ngokuphelele.

NGOLUNYE usuku kulowo nyaka, udokotela wami wangitshela ukuthi ngine-multiple sclerosis (isifo sokuqina kwezicubu), isifo esingalapheki. Ngakhungatheka. Kamuva lapho ngifunda ngalokho i-multiple sclerosis engakwenza kumuntu, ngakhwantabala.a Kwaba sengathi ngizozulelwa amanqe ukuphila kwami konke. Ngangizomnakekela kanjani uMilagros, umkami, no-Ismael, indodana yami eneminyaka emithathu? Sasizobhekana kanjani nalesi simo? Lapho ngisazama nje ukuphuthaza izimpendulo zale mibuzo, ngahlangana nezinye izimbila zithutha.

Cishe ngemva kwenyanga udokotela wami engitshele ngokugula kwami, umphathi wami wangibizela ehhovisi lakhe wabe esengazisa ukuthi inkampani idinga abantu “ababukeka kahle.” Futhi umuntu onesifo esiwohlozayo—ngisho noma sisaqala—wayengabonakalisi lokho kubukeka. Ngakho ngaso leso sikhathi, umqashi wami wangixosha. Ngokuphazima kweso, ngase ngiphelelwe umsebenzi!

Ngangizama ukuziqinisa uma ngiphambi komkhaya wami, kodwa ngangikulangazelela ukuba ngedwa, ukuze ngicabange ngezimo zami ezintsha, ngizindle nangekusasa lami. Ngazama ukulwa nomuzwa okhulayo wokucindezeleka. Okwakungidla nakakhulu ukuthi masinyane nje ngangingasento yalutho emehlweni enkampani engangiyisebenzela.

Ukuthola Amandla Ebuthakathakeni

Ngiyabonga ngokuthi kuleso sikhathi esibucayi, ngangingathembela ezintweni eziningana ezazingangiqinisa. Eminyakeni engaba ngu-20 ngaphambili, ngangibe omunye woFakazi BakaJehova. Ngakho ngathandaza ngobuqotho kuJehova ngemizwa yami nangokungaqiniseki ngekusasa. Umkami, naye ongomunye woFakazi BakaJehova, wayengiqinisa njalo, futhi ngathola nokusekelwa abanye abangane abaseduze ababenomusa nobubele okwaba yigugu.—IzAga 17:17.

Ukuba nomuzwa wesibopho ngabanye nakho kwasiza. Ngangifuna ukuyikhulisa kahle indodana yami, ngiyifundise, ngidlale nayo, futhi ngiyiqeqeshe emsebenzini wokushumayela. Ngakho ngangingenakuliphonsa ithawula. Ngaphezu kwalokho, ngangingumdala kwelinye lamabandla oFakazi BakaJehova, futhi abafowethu nodadewethu abangamaKristu babekudinga ukusekela kwami lapho. Uma ngangivumele ukuhlupheka kwami kwalwenza buthaka ukholo lwami, ngangiyobe ngibabekele isibonelo esinjani abanye?

Ngokungenakugwenywa, ukuphila kwami kwashintsha ngokwenyama nangokwezimali—ngezinye izindlela kwakuba kubi kakhulu kodwa ngezinye kwakuba yinzuzo. Ngangike ngezwa udokotela ethi: “Isifo asibubulali ubuntu [bomuntu]; kunalokho, siyabushintsha.” Futhi ngiye ngafunda ukuthi izinguquko azizimbi zonke.

Okokuqala nje, ‘iva lami enyameni’ langisiza ukuba ngiziqonde kangcono izinkinga zempilo zabanye abantu nokuba ngikwazi ukuzwelana nabo. (2 Korinte 12:7) Ngawaqonda kakhulu kunanini ngaphambili amazwi ezAga 3:5: “Thembela kuJehova ngayo yonke inhliziyo yakho, ungenciki kokwakho ukuqonda.” Ngaphezu kwakho konke, izimo zami ezintsha zangifundisa lokho okubaluleke ngempela ekuphileni nokuthi yini enikeza ukwaneliseka kwangempela nomuzwa wokuzizwa ubalulekile. Kwakusenokuningi engangisengakwenza enhlanganweni kaJehova. Ngathola injongo yangempela emazwini kaJesu: “Kukhona injabulo eyengeziwe ekupheni kunasekwamukeleni.”—IzEnzo 20:35.

Ukuphila Okusha

Ngokushesha nje ngemva kokuba sitholakele isifo esasingiphethe, ngamenyelwa emhlanganweni eMadrid lapho izisebenzi zokuzithandela ezingamaKristu zafundiswa khona ukwakha ukubambisana phakathi kodokotela neziguli zabo ezingoFakazi. Kamuva, lezo zisebenzi zokuzithandela zahlelwa zaba amaKomiti Okubonisana Nezibhedlela. Ngokuqondene nami, lowo mhlangano wawufike ngesikhathi esifanele impela. Ngathola umsebenzi ongcono, owawuzonginika ukwaneliseka okukudlula kude lokho okungatholakala kunoma yimuphi umsebenzi wokuziphilisa.

Kulowo mhlangano safunda ukuthi lawo maKomiti Okubonisana Nezibhedlela ayesanda kumiswa kwakumelwe ahambele izibhedlela, axoxe nodokotela, abeke nezinkulumo phambi kwezisebenzi zezempilo, konke lokhu ekwenza ngenjongo yokuhlakulela ukubambisana nokuvimbela ukungqubuzana. La makomiti asiza oFakazi ukuba bathole odokotela abazimisele ukwelapha ngaphandle ngokusebenzisa igazi. Yiqiniso, njengomuntu owayengazi lutho ngezokwelapha, kuningi okwakumelwe ngikufunde ngamagama ezokwelapha, izimiso zezokwelapha, nangokuhlelwa kwezibhedlela. Nakuba kunjalo, ngaya ekhaya ngingumuntu omusha, nginenselele entsha eyayingithakazelisa.

Ukuhambela Izibhedlela—Umthombo Wokwaneliseka

Nakuba isifo esasingiphethe sasingikhubaza kancane kancane nangokungenakuvinjwa, imithwalo yami yemfanelo njengelungu leKomiti Yokubonisana Nezibhedlela yayanda. Ngangithole impesheni yabakhubazekile, ngakho nganginesikhathi esanele sokuhambela izibhedlela. Ngaphandle kokudumazeka izikhashana ezimbalwa, lokhu kuhambela kwaba okulula nokuzuzisa ngaphezu kwalokho engangikulindele. Nakuba manje ngihlala ngisesihlalweni sabakhubazekile, lokho bekungakaze kube isithiyo esikhulu. Elinye ilungu lekomiti lihamba nami njalo. Ngaphezu kwalokho, odokotela bajwayelene nokukhuluma nabantu abasezihlalweni zabakhubazekile, futhi ngezinye izikhathi babonakala belalela ngenhlonipho enkulu lapho beqaphela umzamo engiwenzayo ukuze ngibahambele.

Sengihambele amakhulu odokotela phakathi neminyaka eyishumi edlule. Abanye babezimisela zisuka nje ukusisiza. UDkt. Juan Duarte—udokotela ohlinza inhliziyo eMadrid oziqhenyayo ngokuhlonipha kwakhe unembeza wesiguli—ngokushesha wanikela ngenkonzo yakhe. Kusukela ngaleso sikhathi, usehlinze iziguli ezingoFakazi ngaphandle ngokusebenzisa igazi izikhathi ezingaphezu kuka-200 ezingxenyeni eziningi zaseSpain. Njengoba iminyaka ihamba, baye ngokwanda odokotela abaye baqala ukuhlinza ngaphandle kokusebenzisa igazi. Ukubahambela kwethu njalo odokotela kwaba nengxenye ethile, kodwa intuthuko yabangelwa nawukuthuthuka kwezokwelapha kanye nemiphumela emihle eyatholwa ekuhlinzeni ngaphandle kokusetshenziswa kwegazi. Futhi siyaqiniseka ukuthi uJehova uye wayibusisa imizamo yethu.

Ngiye ngakhuthazwa ngokukhethekile yindlela abaye basabela ngayo odokotela abathile abahlinza inhliziyo abangongoti ekwelapheni izingane. Isikhathi esingangeminyaka emibili sasihambela iqembu elilodwa lodokotela ababili abahlinzayo kanye nozakwabo ababulala izinzwa. Sabanika izincwadi ezichaza lokho abanye odokotela abakwenzayo kulo mkhakha. Imizamo yethu yavuzwa ngo-1999 phakathi neNgqungquthela Yezokwelapha Yokuhlinzwa Kwemithambo Yezinhliziyo Zezinsana. Labo dokotela ababili abahlinzayo—beqondiswa ngobuhlakani udokotela ohlinzayo waseNgilandi owayebambisene nathi—benza umsebenzi owawunzima kakhulu wokuhlinza ingane enguFakazi eyayinesivalo somthambo omkhulu wenhliziyo (aortic valve) esasidinga ukulungiswa.b Ngajabula kanye nabazali ngesikhathi omunye wodokotela ephuma egumbini lokuhlinzela ezomemezela ukuthi ukuhlinza kube yimpumelelo nokuthi unembeza womkhaya uye wahlonishwa. Manje lab’ odokotela bamukela iziguli ezingoFakazi ziza zilandelana zisuka kulo lonke elaseSpain.

Engikuthola kujabulisa ngezimo ezinjalo ukuphawula ukuthi ngiyakwazi ukusiza abafowethu abangamaKristu. Lapho bexhumana neKomiti Yokubonisana Nezibhedlela, ngokuvamile basuke bebhekene nesinye sezikhathi ezinzima kakhulu ekuphileni kwabo. Bathi bebhekene nokuhlinzwa, bese kuba odokotela abasesibhedlela sendawo abangazimisele noma abangenakukwazi ukubelapha ngaphandle kokusebenzisa igazi. Nokho, lapho abafowethu bethola ukuthi bakhona odokotela kuyo yonke imikhakha yezokwelapha abazimisele ukubambisana nathi khona lapha eMadrid, bakhululeka ngempela. Ngiye ngabona ukukhathazeka ebusweni bomzalwane kushintsha kuba ukuzola, ngenxa nje yokuba khona kwethu eduze kwakhe esibhedlela.

Izindaba Zamajaji Nezezimiso Zezokwelapha

Eminyakeni yamuva, amalungu amaKomiti Okubonisana Nezibhedlela aye ahambela namajaji. Phakathi nalokho kuhambela, siwanika incwadi ebizwa ngokuthi Family Care and Medical Management for Jehovah’s Witnesses, eyalungiselelwa ngokukhethekile ukuba yazise iziphathimandla ezinjalo ngokuma kwethu ekusetshenzisweni kwegazi nangokutholakala kwezinye izindlela zokwelapha ezingahileli ukusetshenziswa kwegazi. Kwakunesidingo esikhulu salokhu kuhambela, njengoba esikhathini esidlule kwakungeyona into engavamile ngamajaji aseSpain ukuba agunyaze odokotela ukuba basebenzise igazi ngokuphambene nezifiso zesiguli.

Amagumbi amajaji ahlaba umxhwele, futhi ekuhambeleni kwami kokuqala, ngazizwa ngingento yalutho njengoba ngangihamba emaphaseshi akhona ngesihlalo sami. Okwenza izinto zaba zimbi nakakhulu kwaba yingozi engatheni esayithola, ngawa esihlalweni ngayoshayeka phansi ngamadolo. Amajaji nabameli abambalwa ababona usizi lwami bangisiza ngomusa, kodwa ngazizwa ngiyisiwula phambi kwabo.

Nakuba amajaji ayengaqiniseki ngesizathu sokuwahambela kwethu, amaningi asiphatha ngomusa. Ijaji lokuqala engalihambela lase liqalile kakade ukuhlola ukuma kwethu, futhi lathi lingathanda ukuxoxa nathi kabanzi. Ekuhambeleni kwethu okwalandela, ngaqhutshwa yilo uqobo siya egumbini lalo futhi lalalelisisa. Imiphumela emihle eyatholakala kulokho kuhambela kokuqala yasikhuthaza mina nozakwethu ukuba sinqobe ukwesaba esasinakho, futhi ngokushesha sabona imiphumela emihle eyengeziwe.

Kuwo lowo nyaka, sashiya incwadi ethi Family Care kwelinye ijaji elasamukela ngomusa futhi lathembisa ukuyifunda. Ngalinika inombolo yocingo lwami ukuze likwazi ukuxhumana nathi uma kunezimo eziphuthumayo. Emasontweni amabili kamuva lasishayela ucingo lisitshela ukuthi kunodokotela wendawo ohlinzayo olicele ukuba ligunyaze ukumpontshelwa kwegazi kuFakazi owayedinga ukuhlinzwa. Lelo jaji lasitshela ukuthi lalifuna ukuba silisize ukuthola ikhambi elalizobonisa inhlonipho ngesifiso sikaFakazi sokugwema igazi. Asibanga nobunzima obukhulu ekutholeni esinye isibhedlela, lapho odokotela bahlinza khona ngokuphumelelayo ngaphandle kwegazi. Lajabula ijaji lapho lizwa ngemiphumela, labe selisithembisa ukuthi lizofuna izixazululo ezinjalo esikhathini esizayo.

Phakathi nokuhambela kwami izibhedlela, indaba yezimiso zezokwelapha yayiphakama njalo, njengoba sasifuna ukuba odokotela bacabange ngamalungelo nonembeza wesiguli. Esinye isibhedlela esibambisanayo eMadrid sangimema ukuba ngihlanganyele ezifundweni ababezifundisa ezaziphathelene nezimiso zezokwelapha. Lezo zifundo zabangela ukuba ngikwazi ukuveza umbono wethu osekelwe eBhayibhelini kochwepheshe abaningi balo mkhakha. Zangisiza nami ukuba ngiqonde izinqumo eziningi ezinzima okumelwe odokotela bazenze.

UProfesa Diego Gracia, omunye wabafundisi balezo zifundo, njalo uhlelela odokotela baseSpain izifundo eziphakeme ze-masters ezimisweni zezokwelapha futhi usengumsekeli oqinile welungelo lethu lokuvuma ngemva kokwaziswa endabeni yokumpontshelwa igazi.c Ukuxhumana kwethu njalo naye kwaholela ekumenyweni kwabameleli behhovisi legatsha loFakazi BakaJehova laseSpain ukuba bachaze ukuma kwabo kubafundi bakaProfesa Gracia asebephothulile, abanye babo ababhekwa njengodokotela abangcono kakhulu ezweni lonke.

Ukubhekana Nokuphila Okungokoqobo

Yebo, lo msebenzi owanelisayo engangiwenzela amakholwa engikanye nawo awuzange uzixazulule zonke izinkinga zami zomuntu siqu. Isifo esingiphethe siqhubeka ngokungenakuvinjwa. Nokho, okuhle ukuthi ingqondo yami iphapheme. Ngenxa yomkami nendodana yami, abangakaze bakhononde, ngisakwazi ukunakekela imithwalo yami yemfanelo. Ngaphandle kosizo nokusekela kwabo, bekungenakwenzeka lokhu. Angikwazi ngisho nokufasa ibhulukwe lami noma ukugqoka ijazi. Ngikujabulela ngokukhethekile ukushumayela njalo ngeMigqibelo nendodana yami, u-Ismael, engiqhuba ngesihlalo sabakhubazekile ezindaweni ezihlukahlukene ukuze ngikhulume nabaninikhaya abahlukahlukene. Ngisakwazi nokunakekela imisebenzi yami njengomdala webandla.

Ngiye ngabhekana nezikhathi ezinzima phakathi nale minyaka engu-12 edlule. Ngezinye izikhathi, ukubona indlela ukukhubazeka kwami okuwuthinta ngayo umkhaya wami kuye kwangibangela ubuhlungu obudlula lobo obubangelwa ukugula ngokwako. Ngiyazi ukuthi kuyabacindezela, nakuba befela ngaphakathi. Esikhathini esingengakanani esidlule, onyakeni owodwa, kwashona umkhwekazi wami nobaba. Kuwo lowo nyaka, ngazithola ngingasakwazi ukuhambahamba ngaphandle kokusebenzisa isihlalo sabakhubazekile. Ubaba, owayehlala nathi, wabulawa esinye isifo esiwohlozayo. KuMilagros, owayemnakekela, kwaba sengathi ubona lokho okwakuzokwenzeka kimina esikhathini esizayo.

Nokho, ohlangothini oluhle, umkhaya wethu unobunye njengoba sibhekana nobunzima ngokubambisana. Ngishintshe isihlalo somqondisi ngathatha isihlalo sabakhubazekile, kodwa ukuphila kwami kungcono ngempela manje ngoba kunikelwe ngokugcwele ekukhonzeni abanye. Ukupha kungakudambisa ukuhlupheka, futhi uJehova uyasigcina isithembiso sakhe sokusiqinisa ngezikhathi zobunzima. NjengoPawulu, ngingasho ngokuqiniseka ngithi: “Nginamandla azo zonke izinto ngenxa yalowo ongipha amandla.”—Filipi 4:13.

[Imibhalo yaphansi]

[Ibhokisi ekhasini 24]

Umbono Wenkosikazi

Ngokwenkosikazi, ukuhlala nomlingane ophethwe yi-multiple sclerosis kunzima—ngokwengqondo, ngokomzwelo, nangokwenyama. Kumelwe ngilinganisele kulokho engihlela ukukwenza futhi ngizimisele ukungakunaki ukukhathazeka okungadingekile ngekusasa. (Mathewu 6:34) Noma kunjalo, ukuphila okucindezelayo kungaveza okuhle ngomuntu. Umshado wethu uqine kakhulu kunanini ngaphambili, nobuhlobo bami noJehova buqine nakakhulu. Izindaba zokuphila zabanye abasezimweni ezicindezela ngale ndlela ziye zangiqinisa kakhulu. Ngihlanganyela lokho kwaneliseka uJulián akuzwayo ngenxa yomphumela wenkonzo yakhe ebalulekile ayenzela abafowethu, futhi ngiye ngathola ukuthi uJehova akakaze asilahle, nakuba usuku ngalunye lungase lulethe inselele entsha.

[Ibhokisi ekhasini 24]

Umbono Wendodana

Emoyeni kababa wokukhuthazela nowesimo esihle sengqondo, ngithola isibonelo esihle kakhulu, futhi kuba sengathi kukhona engimenzela khona uma ngimqhuba. Ngiyazi ukuthi ngeke ngikwazi njalo ukwenza engifuna ukukwenza. Okwamanje ngisemusha, kodwa lapho ngiba mdala, ngingathanda ukukhonza njengelungu leKomiti Yokubonisana Nezibhedlela. Ngiyazi ukuthi ngokwezithembiso zeBhayibheli, ukuhlupheka kungokwesikhashana nokuthi abanye abafowethu nodadewethu bahlupheka ngaphezu kwethu.

[Isithombe ekhasini 22]

Umkami ungumthombo wamandla kimi

[Isithombe ekhasini 23]

Lapho ngixoxa noDkt. Juan Duarte ohlinza inhliziyo

[Isithombe ekhasini 25]

Mina nendodana yami siyakujabulela ukusebenza ndawonye enkonzweni