Ubuhle Bendalo KaJehova

‘Ihlobo Nobusika Akusoze Kwakhawuka’

ILANGA elikhipha umkhov’ etsheni lihlaba ogwadule. Kwezinye izingxenye zomhlaba, liletha ukufudumala ngemva kobusika obubandayo. Yebo, ukushisa kwelanga kungenye yezimbangela eziyinhloko zokushintsha kwesimo sezulu nezinkathi zonyaka.

Izimo zezinkathi zonyaka ziyahlukahluka emhlabeni wonke. Kodwa wena zikuthinta kanjani izinkathi zonyaka? Ingabe ukubuya kwehlobo eliqabulayo kuyakujabulisa lapho ubona izihlahla nezimbali ziqhakaza? Uzizwa kanjani ngobusuku obucwathile basehlobo? Ingabe uyakujabulela ukushaya komoya omnandi wasekwindla nemibukiso emihle yamaqabunga ashintsha imibala? Ingabe kuyakuqabula ukubona amahlathi ambozwe iqhwa.

Zilethwa yini izinkathi zonyaka? Ngamafuphi, zilethwa ukutsheka komhlaba. Umhlaba ujikeleza utsheke ngama-degree angu-23,5 uma uqhathaniswa nomzila ozungeza kuwo ilanga. Ukube umhlaba awutshekile, bezingeke zibe khona izinkathi zonyaka. Isimo sezulu besiyohlale sifana ngaso sonke isikhathi. Lokho bekuyophazamisa izimila nomjikelezo wesivuno.

Endleleni ezihamba kahle ngayo izinkathi zonyaka, umuntu angabona ukuthi kunesandla soMdali. Ekhuluma noJehova uNkulunkulu, umhubi washo la mazwi kufanele: “Nguwe owamisa yonke imingcele yomhlaba; ihlobo nobusika—kwenziwa nguwe ngokwakho.”—IHubo 74:17.a

Ngokwesibukeli esisemhlabeni, izindikimba zasezulwini ziyizimpawu ezingenaphutha zezinkathi zonyaka. Lapho edala isimiso sethu sonozungezilanga, uNkulunkulu wayala: “Makube khona izinkanyiso emkhathini wamazulu . . . , kumelwe zibe izibonakaliso futhi zihlukanise izinkathi nezinsuku neminyaka.” (Genesise 1:14) Phakathi nonyaka, umhlaba ufika ezindaweni ezimbili emzileni wawo lapho ilanga lihlaba ngokuqondile ngezikhathi zasemini enkabazwe. Lokhu kubizwa ngothi i-equinox, futhi emazweni amaningi kuwuphawu lokuqala kwentwasahlobo nekwindla. Ngesikhathi se-equinox, ubude bemini nobobusuku bucishe bulingane emhlabeni wonke.

Ukuba khona kwezinkathi zonyaka nokuqala kwazo akuhileli nje ukuhamba kwenyanga nomhlaba kuphela. Izinkathi zonyaka nesimo sezulu konke kuxhumene, kwakha isimiso esiyinkimbinkimbi esisekela ukuphila. Betshela abantu ababehlala e-Asia Minor—abaningi babo ababejwayelene nezolimo nokukhiqiza ukudla—umphostoli ongumKristu uPawulu, nomngane wakhe uBarnaba, bathi nguNkulunkulu “[o]ninika izimvula ezivela ezulwini nezinkathi ezinezithelo, egcwalisa izinhliziyo zenu ngokudla nangokwenama okukhulu.”—IzEnzo 14:14-17.

Inqubo emangalisayo ye-photosynthesis isekela izimila ezisezweni nohlaza oluntanta olwandle. Ngenxa yalokhu, insongensonge yokudla (food chain) ekhona manje nezinto eziningi eziphilayo ezihlukahlukene, kusabela ngezindlela eziyinkimbinkimbi esimweni sezulu. UPawulu wakhuluma ngoJehova kufanele njengokunguye obangela konke lokhu, ethi: “Umhlabathi ophuza imvula eyehlela kaningi phezu kwawo, nalowo obe usubavezela izimila ezifanelekile labo futhi olinyelwa bona, uthola isibusiso esivela kuNkulunkulu njengembuyiselo.”—Hebheru 6:7.

Igama elithi “isibusiso” liba nencazelo entsha uma uthi ukuzindla ngalokho okwenzeka ezindaweni lapho intwasahlobo iletha khona amazinga akahle okushisa, izinsuku ezinde, ukukhanya kwelanga okwengeziwe nezimvula ezinhle. Izimbali ziyaqhakaza nezinambuzane ziyaphuma ezindaweni ebezikhosele kuzo ebusika, zilungele ukuletha impova ezilimweni. Izinyoni, njenge-blue jay oyibona lapha, zigcwalisa ihlathi ngemibala nangomculo, nendawo imane iphile. Ukuphila kuyavuseleleka, nezinto eziphilayo ziqhubeka nomjikelezo wazo wokuphila—ukuzalwa, ukuvuselelwa, nokukhula. (IsiHlabelelo SeziHlabelelo 2:12, 13) Lokhu kuba isiqalo esiholela esivunweni ngasekupheleni kwehlobo noma ekwindla.—Eksodusi 23:16.

Imisebenzi kaJehova ibonakala ngokuyisimangaliso endleleni awumisa ngayo umhlaba, esinika imini nobusuku, izinkathi zonyaka, nezikhathi zokutshala nezokuvuna. Siyaqiniseka ukuthi ihlobo lizolandela ubusika. Empeleni, nguNkulunkulu owathembisa: “Zonke izinsuku umhlaba uqhubeka ukhona, ukuhlwanyela imbewu nokuvuna, amakhaza nokushisa, ihlobo nobusika, imini nobusuku, akusoze kwakhawuka.”—Genesise 8:22.

[Umbhalo waphansi]

[Ibhokisi/Izithombe ekhasini 9]

Isiphuphutheki Esibalulekile Ekuphileni

Kuyo yonke iminyaka edlule, inyanga ibilokhu ibashukumisa abantu futhi ibamangaza. Nokho, uyaqaphela yini ukuthi inyanga ithonya izinkathi zonyaka? Ukuba khona kwenyanga kuyasiza ekulawuleni ukutsheka komhlaba. Umlobi wesayensi u-Andrew Hill uthi: “[Lokhu] kunendima ebalulekile ekwakheni izimo ezingasekela ukuphila eMhlabeni.” Ukube besingekho isiphuphutheki esikhulu semvelo esilawula ukutsheka komhlaba wethu, amazinga okushisa abezophakama futhi cishe ukuphila bekungeke kube khona. Ngakho, iqembu lezazi zezinkanyezi laphetha: “Umuntu angabheka iNyanga njengelawula isimo sezulu eMhlabeni.”—IHubo 104:19.

[Umthombo]

Moon: U.S. Fish & Wildlife Service, Washington, D.C./Bart O’Gara

[Isithombe ekhasini 9]

Amakamela, eNyakatho ye-Afrika naseNhlonhlweni Yase-Arabia