Abamemezeli BoMbuso Bayabika
Ukufuna Abafanelekayo Emaphandleni Akude Ase-Australia
SEKUPHELE iminyaka engu-12 oFakazi bengafiki ezindaweni ezithile ezicezile zase-Australia. Ngakho oFakazi BakaJehova eDarwin, inhloko-dolobha yeNorthern Territory, bahlela umkhankaso omkhulu wezinsuku ezingu-9 wokuyofuna abafanelekayo.—Mathewu 10:11.
Abazalwane bawuhlela kahle lo mkhankaso kusasele izinyanga ezingu-12, benza namabalazwe endawo engamakhilomitha-skwele angu-800 000—indawo engangeNew Zealand iphindwe kathathu. Ukuze ubone ukuthi iceze kangakanani le ndawo engudedangendlale, ngokuvamile emapulazini ezinkomo umgwaqo osuka emgwaqweni omkhulu uya emzini womuntu ungamakhilomitha angu-30! Ngaphezu kwalokho, amanye amapulazi aqhelelene ngamakhilomitha angu-300 noma ngaphezulu.
OFakazi abangu-145 bahlanganyela ngokuzithandela kulo mkhankaso. Abanye basuka eTasmania, indawo ekude kakhulu. Abanye bafika ngezimoto ezingamakhwela-ntaba bezihlinzeke ngezinto zokukhempa, izinto ababengazisebenzisa uma ezinye ziphela noma zifa, nophethilomu. Abanye bafaka imithwalo yabo ezinqoleni ezidonswa izimoto. Ngaphezu kwalokho, kwaqashwa amabhasi amabili ahlalisa abantu abangu-22 ukuze kugibele labo abangenawo amakhwela-ntaba. Ababehamba ngamabhasi bagxila ekushumayezeni abantu abahlala emadolobheni amancane atholakala emasimini athile.
Ngaphambi kokusuka, abazalwane bahlela ukuba kube nezinkulumo nemiboniso njengeziqondiso zendlela yokushumayela izindaba ezinhle kule nsimu engajwayelekile. Ngokwesibonelo, ukuze umuntu aphumelele lapho eshumayeza umphakathi waboMdabu base-Australia, ngokuvamile kufanele alandele inkambiso ethile futhi awazi amasiko abo. Kwaxoxwa nangezindlela zokukhathalela imvelo ezazizosiza ekuvikeleni izilwane zasendle.
Kwaba nokuhlangenwe nakho okuningi okuhle kakhulu. Ngokwesibonelo, kwenye indawo ehlala abantu boMdabu base-Australia, abazalwane bahlela ukuba kube nenkulumo yeningi esekelwe eBhayibhelini. Owesifazane ophethe emphakathini wabazisa yena ngokwakhe abantu ngale nkulumo. Ngemva kwalokho, ababekhona enkulumweni bahanjiselwa izincwadi ezingu-5 nezincwajana ezingu-41. Kwenye indawo oFakazi baxoxa nomunye umuntu woMdabu. WayeneBhayibheli lakhe imbala, i-King James Version, kodwa laliguge liphelile. Lapho oFakazi bembuza ukuthi uyalazi yini igama likaNkulunkulu wavuma, wabe esethatha ibhantshi lakhe wakhipha umagazini omdala we-Nqabayokulinda. Wafunda leyo Nqabayokulinda ecaphuna umBhalo kaMarku 12:30, othi: “Kumelwe uthande uJehova uNkulunkulu wakho ngayo yonke inhliziyo yakho.” Wathi, “Angive ngiwuthanda lo mBhalo.” Ngemva kokuba oFakazi bexoxe kabanzi naye ngeBhayibheli, lo mlisa wazitholela iBhayibheli elisha nezinye izincwadi ezisekelwe eBhayibhelini.
Eduze kweGulf of Carpentaria induna yepulazi lezinkomo elingamahektare angu-400 000 yabonisa isithakazelo esigijimini soMbuso. Lapho iboniswa incwadi ethi INcwadi Yami Yezindaba ZeBhayibheli nethi Ulwazi Oluholela Ekuphileni Okumi Phakade,a yabuza ukuthi babeziphethe yini izincwadi ngolimi lwesiKriol. Kwakumangaza lokhu ngoba nakuba aboMdabu base-Australia abaningi besikhuluma isiKriol, bambalwa kakhulu abasifundayo. Kamuva oFakazi bathola ukuthi zonke izisebenzi ezingu-50 zakulelo pulazi ziyakwazi ukufunda isiKriol. Le nduna yajabula ukuzitholela izincwadi zeBhayibheli zesiKriol, futhi yakhululeka ukunika oFakazi inombolo yayo yocingo ukuze baxhumane nayo.
Phakathi nalowo mkhankaso omkhulu wezinsuku ezingu-9, kwahanjiswa amaBhayibheli angu-120, izincwadi ezingu-770, omagazini abangu-705, nezincwajana ezingu-1 965. Ngaphezu kwalokho, kwenziwa izimpindelo ezingu-720 kwaqalwa nezifundo zeBhayibheli ezingu-215.
Ngempela, kwagcina kwenziwe okuthile ngokulamba okungokomoya kwabantu abaningi abafanelekayo abahlala ezingxenyeni eziningi ezithé chithi saka kulo dedangendlale wendawo.—Mathewu 5:6.
[Umbhalo waphansi]
a Zinyatheliswa oFakazi BakaJehova.
[Ibalazwe ekhasini 30]
(Ukuze ubone ukuthi indaba ihlelwe kanjani, bheka encwadini)
AUSTRALIA
NORTHERN TERRITORY
Darwin
Gulf of Carpentaria
Sydney
TASMANIA