Imibuzo Evela Kubafundi
IBhayibheli alikhulumi ngokwenza i-toast, ngakho kungani oFakazi BakaJehova bekugwema?
Ukwenza i-toast, okuwukuphakamisa izingilazi ezinewayini (noma obunye utshwala) kuwumkhuba osunesikhathi eside futhi owenziwa ezindaweni eziningi, nakuba izindlela zokuwenza zihluka izindawo ngezindawo. Ngezinye izikhathi labo abenza i-toast bashayanisa izingilazi zabo. Ngokuvamile umuntu owenza i-toast ucela noma afisele othile injabulo, impilo enhle, ukuphila isikhathi eside, noma okunye okufana nalokhu. Abanye abahlanganyela kule toast bangase bavume ngamazwi abo noma baphakamise izingilazi zabo bese bephuza kancane iwayini. Kwabaningi lokhu kubonakala kuyisiko noma kuwumkhuba ongenangozi, kodwa kunezizathu ezenza oFakazi BakaJehova bengayenzi i-toast.
Akukhona ukuthi amaKristu awamfiseli othile ukuba athole injabulo noma abe nempilo enhle. Encwadini eyayiya emabandleni, indikimba ebusayo yangekhulu lokuqala yaphetha ngegama elingase lisho ukuthi “mpilonhle.” (IzEnzo 15:29) Bekhuluma namakhosi angabantu, abanye abakhulekeli beqiniso bathi: “Inkosi yami . . . mayiphile kuze kube nini nanini” noma “Inkosi mayiphile kuze kube nini nanini!”—1 AmaKhosi 1:31; Nehemiya 2:3.
Nokho, leli siko lokwenza i-toast lavelaphi? INqabayokulinda yesiNgisi ka-January 1, 1968, yacaphuna i-Encyclopædia Britannica (ka-1910), uMqulu 13, ikhasi 121: “Isiko lokusebenzisa ingilazi yewayini ukuze ufisele abanye ‘impilo enhle’ kungenzeka lisukela emkhubeni wasendulo wenkolo wokuphuza kwenziwa umhlatshelo konkulunkulu nakwabafileyo. Ngezikhathi zokudla amaGreki namaRoma ayethelela onkulunkulu babo utshwala, futhi emadilini emikhosi yawo ayenzela onkulunkulu i-toast enzele nabafileyo.” Le encyclopedia yanezela: “La masiko okwenza imihlatshelo ngotshwala kumelwe ukuba ayelokhu ehlobene eduze nokufisela abanye abantu impilo enhle.”
Ingabe kusenjalo? I-International Handbook on Alcohol and Culture yango-1995 ithi: “Kungenzeka ukuthi [ukwenza i-toast] kuwumkhuba wasendulo ongewona owenkolo lapho onkulunkulu babethelelwa khona uketshezi olungcwele: igazi noma iwayini ukuze umuntu acele okuthile ngomthandazo ofushaniswa ngamazwi athi ‘uphile isikhathi eside’ noma ‘mpilonhle!’”
Yiqiniso, ukuthi into, umklamo noma umkhuba unomsuka noma uyafana nokwakwenziwa endulo enkolweni yamanga akusho ngaso sonke isikhathi ukuthi umkhulekeli weqiniso kufanele awugweme. Cabanga ngehalananda. I-encyclopedia yeBhayibheli edumile ithi: “Kubonakala sengathi ihalananda lalisetshenziswa nanjengophawu olungcwele ezinkolweni zamaqaba.” Noma kunjalo, uNkulunkulu wathi kufakwe intambo yamahalananda emphethweni wengubo yompristi omkhulu, futhi izinsika zethusi zethempeli likaSolomoni zazihlotshiswe ngamahalananda. (Eksodusi 28:33; 2 AmaKhosi 25:17) Ngaphezu kwalokho, kwake kwaba nesikhathi lapho indandatho yomshado yayihlobana nenkolo. Nokho, iningi labantu namuhla alikwazi lokho, licabanga ukuthi indandatho yomshado imane nje iwubufakazi bokuthi umuntu ushadile.
Kuthiwani ngokusebenzisa iwayini emikhosini yenkolo? Ngokwesibonelo, ngesinye isikhathi amadoda aseShekemi akhulekela uBhali ‘angena endlini kankulunkulu wawo adla aphuza aqalekisa u-Abhimeleki’ indodana kaGideyoni. (AbaHluleli 9:22-28) Ucabanga ukuthi umkhulekeli kaJehova othembekile wayengahlanganyela kulokho kuphuza, mhlawumbe aze acele amandla konkulunkulu ukuze aqalekise u-Abhimeleki? Echaza isikhathi lapho ama-Israyeli amaningi ayehlubuka kuJehova, u-Amose wathi: “Uzelula . . . eceleni kwawo wonke ama-altare; futhi uphuza iwayini lalabo abahlawulisiwe endlini yonkulunkulu bakhe.” (Amose 2:8) Ingabe abakhulekeli beqiniso babengahlanganyela kulo mkhosi, kungakhathaliseki ukuthi lelo wayini lalithelelwa onkulunkulu noma laliphuzwa nje? (Jeremiya 7:18) Noma ingabe umkhulekeli weqiniso wayengaphakamisa ingilazi yewayini bese ecela ukuba onkulunkulu bathonye ikusasa lothile noma balibusise?
Kuyathakazelisa ukuthi ngezinye izikhathi abakhulekeli bakaJehova babephakamisa izandla futhi bacele ukuba kwenzeke okuhle. Babephakamisela izandla zabo kuNkulunkulu weqiniso. Siyafunda: “USolomoni wama phambi kwe-altare likaJehova . . . futhi welulela izintende zezandla zakhe emazulwini; waqhubeka wathi: ‘O Jehova Nkulunkulu ka-Israyeli, akekho uNkulunkulu onjengawe . . . futhi kwangathi wena ngokwakho ungezwa usendaweni yakho yokuhlala, emazulwini, uzwe futhi uthethelele.’” (1 AmaKhosi 8:22, 23, 30) Ngokufanayo, “u-Ezra wamtusa uJehova . . . bonke abantu baphendula bathi, ‘Amen! Amen!’ bephakamisa izandla zabo. Khona-ke bakhothama bawa ngobuso kuJehova.” (Nehemiya 8:6; 1 Thimothewu 2:8) Kusobala ukuthi laba bantu abaqotho babengaphakamiseli izandla zabo ezulwini ukuze bacele isibusiso kunkulunkulu othile wenhlanhla.—Isaya 65:11.
Abantu abaningi namuhla abenza i-toast bangase bangacabangi ukuthi bacela impendulo noma isibusiso kunkulunkulu othile, kodwa futhi ngeke bakwazi ukuchaza isizathu sokuba baphakamise izingilazi zabo. Noma kunjalo, iqiniso lokuthi abayicabangisisi le ndaba alisona isizathu sokuba amaKristu eqiniso azizwe enesibopho sokulingisa imikhuba yabo.
Kuyaziwa nakwezinye izinto ukuthi oFakazi BakaJehova bayayigwema imikhuba eyenziwa iningi labantu. Ngokwesibonelo, abantu abaningi benza okuthile ezimpawini zesizwe, noma amafulege; lokhu abakwenzayo abakubheki njengokukhulekela. AmaKristu eqiniso awaphikisani nalokho abakwenzayo, kodwa awahlanganyeli kukho. Lapho bazi ukuthi lowo mkhosi uyoba nini, oFakazi abaningi baye benza ngokuhlakanipha ukuze bangabacasuli abanye. Kuzo zonke izimo, bazimisele ukuba bangenzi izimpawu ezibonisa ukushisekela izwe labo, ezingqubuzana neBhayibheli. (Eksodusi 20:4, 5; 1 Johane 5:21) Abaningi namuhla bangase bangabheki ukwenza i-toast njengokuhlobene nenkolo. Noma kunjalo, kunezizathu ezizwakalayo zokuba amaKristu angahlanganyeli ekwenzeni i-toast, enomsuka wenkolo futhi namanje engase ibhekwe njengokucela isibusiso ‘ezulwini,’ njengokungathi afuna usizo emandleni angaphezu kwawomuntu.—Eksodusi 23:2.