Ukufuna Izimpendulo Ezinembile
Ngingayilondoloza kanjani impilo yami?
Yini engingayenza ukuze umkhaya wami ujabule kakhudlwana?
Ngingawanciphisa kanjani amathuba okudilizwa emsebenzini?
INGABE wake wazibuza omunye wale mibuzo? Wazithola yini izimpendulo ezisebenzayo ezasiza ngempela? Unyaka ngamunye, kukhishwa izincwadi ezihlukahlukene ezingaba ngu-2 000 ezinikeza amacebiso kulezi zindaba ezibalulekile nakwezinye. EBrithani nje kuphela, ngonyaka abantu basebenzisa opondo abayizigidi ezingu-80 (amarandi ayizigidi eziyizinkulungwane nekhulu) bethenga izincwadi ezinikeza amacebiso okubhekana nezinselele zokuphila. E-United States, ukuthengiswa kwezincwadi zokuzithuthukisa kungenisa ama-dollar ayizigidi ezingaba ngu-600 (amarandi ayizigidi eziyizinkulungwane ezine namakhulu amane) ngonyaka. Awuwedwa neze ekufuneni amacebiso amahle okubhekana nokuphila kwansuku zonke.
Ekhuluma ngamacebiso atholakala kule ntilibathwa yezincwadi, omunye umlobi wathi: “Izincwadi eziningi ezintsha zimane ziphinda osekulotshiwe kakade.” Yebo, amacebiso amaningi akulezi zincwadi amane nje aphindaphinda ukuhlakanipha okulotshwe kwenye yezincwadi ezindala kunazo zonke. Lena yincwadi esakazwa kabanzi ukuzidlula zonke emhlabeni. Iye yahunyushelwa ezilimini ezingaba ngu-2 400 iphelele noma iyizingxenye. Amakhophi ayo anyathelisiwe emhlabeni wonke angaphezu kwezigidi eziyizinkulungwane ezine namakhulu ayisithupha. Le ncwadi yiBhayibheli.
IBhayibheli lisho ngokucacile: “Yonke imiBhalo iphefumulelwe uNkulunkulu futhi inenzuzo yokufundisa, yokusola, yokuqondisa izinto, yokuyala ekulungeni.” (2 Thimothewu 3:16) Yiqiniso, iBhayibheli alibhalelwanga ukuba yincwadi yokuzithuthukisa. Injongo yalo eyinhloko ukwambula intando kaNkulunkulu ngokuqondene nesintu. Noma kunjalo, iBhayibheli liqukethe lukhulu mayelana nendlela yokubhekana nezinkinga sonke esiba nazo, futhi lithembisa ukuthi labo abalandela isiqondiso salo bayofunda izinto eziyobazuzisa. (Isaya 48:17, 18) Lapho sisetshenziswa, iseluleko salo esisebenzayo siyaphumelela njalo, kungakhathaliseki ubuzwe, amasiko, noma imfundo yomuntu. Kunganjani ufunde isihloko esilandelayo bese uzinqumela ukuthi lokho iBhayibheli elikushoyo ezindabeni ezinjengezempilo, umkhaya nomsebenzi kuyasebenza yini?