Ingabe Uletha Ukuqabuleka Kwabanye?
ENINGIZIMU yokhahlamba lweziNtaba Ze-Amana kuneNtaba iHermoni, enesiqongo esiphakeme kakhulu esingamamitha angu-2 814 ngaphezu kolwandle. Ingxenye enkulu yonyaka, isiqongo seHermoni sisuke sembozwe iqhwa, futhi lokhu kwenza umhwamuko ofudumele wasebusuku odlula ngaphezu kwaso uphenduke amazolo. Amazolo ehlela ezihlahleni ze-fir nezezithelo ezisemthambekeni nasezivinini ezisezansi. Phakathi nenkathi ende engenazimvula kwa-Israyeli wasendulo, lawo mazolo aqabulayo yiwona ngokuyinhloko ayeletha umswakama ezimileni.
Engomeni ephefumulelwe uNkulunkulu, ubunye obuqabulayo babakhulekeli bakaJehova bufaniswa ‘namazolo aseHermoni ehlela ezintabeni zaseZiyoni.’ (IHubo 133:1, 3) Njengoba nje iNtaba iHermoni ilethela izimila amazolo aqabulayo, nathi singaletha ukuqabuleka kulabo esihlangana nabo. Kanjani?
Isibonelo SikaJesu Esiqabulayo
UJesu Kristu wayenethonya elikhulu kwabanye. Ngisho nokuba naye isikhashana kwakungaqabula kakhulu. Ngokwesibonelo, umlobi weVangeli uMarku uyalandisa: “[UJesu] wabasingatha abantwana wababusisa, ebabeka izandla.” (Marku 10:16) Yeka ukuthi labo bantwana kumelwe ukuba bazizwa beqabuleke kangakanani!
Ngobusuku bakhe bokugcina esemhlabeni njengomuntu, uJesu wageza izinyawo zabafundi bakhe. Ukuthobeka kwakhe kumelwe ukuba kwabathinta izinhliziyo. UJesu wabe esethi kubo: “Nginibekela isibonelo, sokuthi njengoba nje ngenzile kini, nani nenze kanjalo.” (Johane 13:1-17) Yebo, nabo kwakudingeka bathobeke. Nakuba abaphostoli bengazange bakuqonde ngokushesha lokho ayekusho futhi kamuva ngalobo busuku baqala ukuphikisana ngokuthi ubani owayebonakala emkhulu kunabo bonke, uJesu akazange athukuthele. Kunalokho, wabonisana nabo ngesineke. (Luka 22:24-27) Ngisho nalapho “ethukwa, [uJesu] akaphindiselanga ngokuthuka.” Empeleni, “lapho ehlupheka, akasongelanga, kodwa waqhubeka ezibeka kulowo owahlulela ngokulunga.” Isibonelo sikaJesu esiqabulayo sikufanele ukulingiswa.—1 Petru 2:21, 23.
UJesu wathi: “Bekani ijoka lami phezu kwenu nifunde kimi, ngoba nginomoya omnene futhi ngithobekile ngenhliziyo, nizotholela imiphefumulo yenu ukuqabuleka.” (Mathewu 11:29) Cabanga nje ufundiswa uJesu mathupha. Ngemva kokumuzwa efundisa esinagogeni labo, abantu bangakubo bakhexa bathi: “Lo muntu ukuthathephi lokhu kuhlakanipha nale misebenzi yamandla?” (Mathewu 13:54) Ukufunda ngokuphila nenkonzo kaJesu kungasifundisa okuningi mayelana nokuletha ukuqabuleka kwabanye. Ake sihlole indlela uJesu abeka ngayo isibonelo esivelele ngenkulumo eyakhayo nangokuba nesimo sengqondo sokusiza.
Khuluma Ngendlela Eyakhayo Njalo
Kulula kakhulu ukubhidliza isakhiwo kunokwakha esisha. Leso simiso sokubhidliza nokwakha siyasebenza nasenkulumweni yethu. Njengabantu abangaphelele, sonke sinamaphutha. INkosi uSolomoni yathi: “Akekho umuntu olungileyo emhlabeni oqhubeka enza okuhle futhi angoni.” (UmShumayeli 7:20) Kulula ukubona amaphutha omunye umuntu bese simgxeka ngamazwi ahlabayo. (IHubo 64:2-4) Ngakolunye uhlangothi, ukugcina inkulumo yethu yakha kudinga ikhono.
UJesu wasebenzisa ulimi lwakhe ukuze akhe abanye. Wabaqabula ngokomoya ngokumemezela izindaba ezinhle zoMbuso kubo. (Luka 8:1) UJesu waqabula nalabo ababa abafundi bakhe ngokubachazela ngoYise osezulwini. (Mathewu 11:25-27) Shono abantu babedonsekela kuJesu!
Ngokuphambene, ababhali nabaFarisi babengazicabangeli izidingo zabanye. UJesu wathi: “Bathanda indawo evelele kunazo zonke ezidlweni zakusihlwa nezihlalo ezingaphambili emasinagogeni.” (Mathewu 23:6) Empeleni, babebabukela phansi abantu abavamile, bethi: “Lesi sixuku esingawazi uMthetho singabantu abaqalekisiwe.” (Johane 7:49) Isimo sengqondo esinjalo sasingakulethi neze ukuqabuleka!
Esikushoyo ngokuvamile kuveza lokho esiyikho ngaphakathi nendlela esibabheka ngayo abanye. UJesu wathi: “Umuntu omuhle ukhipha okuhle engcebweni enhle yenhliziyo yakhe, kodwa umuntu omubi ukhipha okubi engcebweni yakhe embi; ngoba umlomo wakhe ukhuluma ngokuchichima kwenhliziyo.” (Luka 6:45) Yini-ke esingayenza ukuze siqiniseke ukuthi esikushoyo kuyabaqabula abanye?
Okokuqala, singama kancane sicabange ngaphambi kokuba sikhulume. IzAga 15:28 zithi: “Inhliziyo yolungileyo iyazindla ukuze iphendule.” Lokho kuzindla akudingeki ukuba kuthathe isikhathi eside. Ngokucabanga kancane nje kusengaphambili, ngokuvamile singabona ukuthi esikushoyo kuzobaphatha kanjani abanye. Singazibuza: ‘Ingabe lokho engizokusho kubonisa uthando? Kuyiqiniso yini, noma kumane kuyinzwabethi? Ingabe “kuyizwi” elishiwo “ngesikhathi salo esifanele”? Ingabe kuzobaqabula futhi kubakhe labo engizokusho kubo?’ (IzAga 15:23) Uma siphetha ngokuthi esikucabangayo akwakhi noma akusona isikhathi esifanele sokukusho, masenze umzamo oqotho wokukugwema. Akungcono yini ukuba esikhundleni sako sizame ukusho okuthile okwakhayo nokufanelekayo? Ukuphahluka ‘kunjengokuhlaba kwenkemba,’ kanti amazwi akhayo ‘angukuphulukisa.’—IzAga 12:18.
Okunye okusizayo ukugxila kulokho okwenza esikholwa nabo babe yigugu kuNkulunkulu. UJesu wathi: “Akekho umuntu ongeza kimi ngaphandle kokuba uBaba ongithumileyo emdonsa.” (Johane 6:44) UJehova ubona izimfanelo ezinhle encekwini yakhe ngayinye ethembekile—ngisho nakulezo okungenzeka sinomuzwa wokuthi zingabantu okunzima ukusebenzelana nabo. Ngokwenza umzamo wokubona izimfanelo ezinhle kuzo, siyoba nesizathu sokukhuluma kahle ngazo.
Siza Abanye
UJesu wayeluqonda kahle usizi lwabacindezelwe. Empeleni, “lapho ebona izixuku wafikelwa isihawu ngazo, ngoba zaziphundlekile futhi zihlakazekile njengezimvu ezingenamalusi.” (Mathewu 9:36) Kodwa uJesu wenza okungaphezu kokubona isimo sazo esidabukisayo; wenza okuthile ukuze azisize. Wazimema: “Wozani kimi, nina nonke enikhandlekayo nenisindwayo, ngizonenza niqabuleke.” Wanikeza nalesi siqinisekiso: “Ijoka lami ngelomusa nomthwalo wami ulula.”—Mathewu 11:28, 30.
Namuhla siphila ‘ezikhathini ezibucayi okunzima ukubhekana nazo.’ (2 Thimothewu 3:1) Abantu abaningi bazizwa becindezelwe “izinkathazo zalesi simiso sezinto.” (Mathewu 13:22) Abanye basindwa izimo ezicindezelayo zomuntu siqu. (1 Thesalonika 5:14) Singabalethela kanjani ukuqabuleka labo abakudingayo? NjengoKristu, singabasiza ngokunciphisa umthwalo wabo.
Abanye abantu baye bafune ukudambisa ukucindezeleka kwabo ngokukhuluma nabanye ngezinkinga zabo. Uma abantu abadangele beza kithi befuna usizo, ingabe siyazinika isikhathi sokubalalelisisa? Ukuba isilaleli esinobubele kudinga ukuzikhuza. Kuhilela ukuhlale sigxile kulokho omunye umuntu akushoyo, kunokucabanga ngokuthi sizomphendula kanjani noma ngokuthi inkinga yakhe ingaxazululwa kanjani. Ngokulalelisisa, simbheke emehlweni futhi simamatheke lapho kufaneleka, sibonisa ukuthi siyakhathalela.
Ebandleni lobuKristu, maningi amathuba okukhuthaza esikholwa nabo. Ngokwesibonelo, lapho sisemihlanganweni eHholo LoMbuso, singabheka labo abashikashikana nezinkinga zempilo. Ngezinye izikhathi kudingeka nje imizuzu embalwa ngaphambi noma ngemva komhlangano ukuze sibakhe ngamazwi akhuthazayo. Singase siphawule nalabo abangekho eSifundweni Sencwadi Sebandla esikuso. Mhlawumbe singabathinta ngocingo futhi sibonise isithakazelo sethu enhlalakahleni yabo noma sibasize.—Filipi 2:4.
Abadala abangamaKristu banomthwalo wemfanelo osindayo ebandleni. Singenza lukhulu ukuze sinciphise umthwalo wabo ngokubambisana nabo nangokuzifeza ngokuthobeka noma iziphi izabelo esingase sizithole. IZwi likaNkulunkulu liyasinxusa: “Lalelani abaholayo phakathi kwenu futhi nizithobe, ngoba baqapha imiphefumulo yenu njengabayolandisa; ukuze lokhu bakwenze ngenjabulo hhayi ngokububula, ngoba lokhu bekuyonilimaza.” (Hebheru 13:17) Ngokubonisa umoya ovumayo, singaba abaqabulayo kulabo ‘abengamela ngendlela enhle.’—1 Thimothewu 5:17.
Chichima Amazwi Akhayo Nezenzo Eziwusizo
Amazolo aqabulayo akhiwa izinkulungwane zamaconsi amancane amanzi ehla kancane, kungabonakali ukuthi avelaphi. Ngokufanayo, mancane amathuba okuba isenzo esisodwa esihle silethele abanye ukuqabuleka njengoba kungenza ukubonisa kwethu izimfanelo ezinjengezikaKristu njalo.
Umphostoli uPawulu wabhala: “Othandweni lobuzalwane thandanani omunye nomunye. Ekubonisaneni udumo nihole.” (Roma 12:10) Masisisebenzise iseluleko sakhe. Ngamazwi nangezenzo, kwangathi singaletha ukuqabuleka ngempela kwabanye.
[Izithombe ekhasini 16]
Amazolo eNtaba iHermoni aletha umswakama oqabulayo ezimileni
[Isithombe ekhasini 17]
Isilaleli esinobubele siyabaqabula abanye