Imibuzo Evela Kubafundi

UmKristu kufanele akubheke kanjani ukuzingela nokudoba?

IBhayibheli alikulahli ukuzingela noma ukudoba. (Duteronomi 14:4, 5, 9, 20; Mathewu 17:27; Johane 21:6) Noma kunjalo, amaKristu azingelayo noma adobayo kudingeka acabangele izimiso ezithile ezingokomBhalo.

UNkulunkulu wavumela uNowa nenzalo yakhe ukuba bahlabe izilwane bazidle, uma nje zazophisiwe ngaphambi kokuba zidliwe. (Genesise 9:3, 4) Lo myalo wawugcizelela ukuthi ukuphila kwesilwane kwakufanele kuhlonishwe njengokuvela kuNkulunkulu. Ngakho, amaKristu awazibulali izilwane ukuze nje azijabulise noma njengomdlalo, ngendlela ebonisa ukungakuhloniphi ukuphila.—IzAga 12:10.

Kunesinye isici esihilela isimo sethu sengqondo. Abaphostoli ababengabadobi kungenzeka babejabula ngokubamba izinhlanzi eziningi. Kodwa akukho okubonisa ukuthi babeqhosha ngamakhono abo okudoba noma okuzingela noma ukuthi babedoba noma bazingele ukuze bancintisane nabanye, babonise ukuthi bangamadoda, noma ukuze bajatshuliswe ukujaha isilwane, ukulwa naso noma ukusibulala.—IHubo 11:5; Galathiya 5:26.

Ngakho, singase sizibuze: ‘Ingabe ngiyisibonelo ekuboniseni inhlonipho ngombono kaJehova ngokuphila? Ingabe ngihlale ngicabanga futhi ngixoxa ngokuzingela noma ngokudoba? Ingabe indlela engiphila ngayo ibonisa ukuthi ngikukhonzile ukuzingela, noma ibonisa ukuthi ngiyisikhonzi sikaNkulunkulu? Ingabe ukuzingela noma ukudoba kungihlanganisa kakhulu nabangakholwa noma kungenza ngingawunaki umkhaya wami?’—Luka 6:45.

Abanye abazingela noma badobe ngenjongo yokuthola ukudla bangase babe nomuzwa wokuthi kuyafaneleka ukudebeselela izinto ezingokomoya phakathi nenkathi yokuzingela noma yokudoba. Nokho, sibonisa ukholo nokwethembela kuNkulunkulu lapho singavumeli lutho luze kuqala kunezithakazelo zakhe. (Mathewu 6:33) Ngaphezu kwalokho, amaKristu alalela yonke imithetho “kaKhesari” mayelana nokuzingela nokudoba, kungakhathaliseki ukuthi amagunya ayayiphoqelela noma cha.—Mathewu 22:21; Roma 13:1.

Ukuze bavumelane nombono kaJehova ngokuzingela nokudoba, abanye kungase kudingeke balungise ukucabanga kwabo maqondana nezindinganiso zakhe. (Efesu 4:22-24) Ngakolunye uhlangothi, kudingeka sihloniphe izinqumo zabanye ezisekelwe kunembeza. Kule ndaba siyafaneleka lesi seluleko somphostoli uPawulu: “Masingabe sisahlulelana, kodwa kunalokho yenzani lokhu kube yisinqumo senu, ukuba ningabeki isikhubekiso phambi komfowenu.” (Roma 14:13) Ukubonisa lolo thando olungenabugovu nenhlonipho kuyothuthukisa ukuthula ebandleni futhi kuyamjabulisa uMenzi wethu, uMthombo wakho konke ukuphila.—1 Korinte 8:13.a

[Umbhalo waphansi]