Kubafundi Balo Magazini

SIYAJABULA ukunazisa ukuthi kusukela kulo magazini, kuzoba noshintsho oluthile ekuhlelweni kwe-Nqabayokulinda. Ngaphambi kokuba sichaze ukuthi uzoba yini umehluko, ake sisho ukuthi yini engeke ishintshe.

Igama lalo magazini elithi INqabayokulinda Ememezela UMbuso KaJehova, ngeke lishintshwe. Ngakho-ke, INqabayokulinda izoqhubeka idumisa uJehova njengoNkulunkulu weqiniso futhi iduduze abafundi bayo ngezindaba ezinhle zoMbuso wakhe. Izihloko ezisemakhasini 5 kuya ku-9 alo magazini zichaza ukuthi uyini lo Mbuso nokuthi uyofika nini. Ngaphezu kwalokho, INqabayokulinda izoqhubeka ikhuthaza ukholo kuJesu Kristu, isekele iqiniso leBhayibheli, futhi ichaze lokho okushiwo izenzakalo zezwe ngokweziprofetho zalo, njengoba ibilokhu yenza amashumi amaningi eminyaka.

Pho, yini-ke ezohluka? Ake sichaze ezinye zezinto ezintsha ezithakazelisayo ezizotholakala kumagazini wangomhla ka-1 enyangeni ngayinye.a

Inyanga ngayinye kuzokuba nezihloko eziningana ezishukumisa ingqondo. Isihloko esithi “Ingabe Bewazi?” sizonikeza imininingwane eyisisekelo yencazelo yokulandisa okukhethiwe kweBhayibheli. Isihloko esithi “Sondela KuNkulunkulu” sizoqokomisa lokho esingakufunda ngoJehova emavesini athile eBhayibheli. Isihloko esithi “Imibuzo Yabafundi Balo Magazini” sizochaza izimpendulo zemibuzo evamile yeBhayibheli. Ngokwesibonelo, abantu abaningi bebelokhu bezibuza, “Ingabe uMbuso kaNkulunkulu usenhliziyweni yakho?” Impendulo uzoyithola ekhasini 13.

Izihloko eziningana eziphuma njalo zihlelelwe ukuzuzisa imikhaya. Isihloko esithi “Izihluthulelo Zenjabulo Yomkhaya,” esizophuma kane ngonyaka, sizochaza izinkinga zangempela imikhaya ebhekana nazo futhi sibonise indlela izimiso zeBhayibheli ezingasiza ngayo ekuxazululeni lezo zinkinga. Isihloko esithi “Fundisa Izingane Zakho,” abazali okufanele basifunde nezingane zabo, sizovela njalo ngemva kwenyanga eyodwa. Sizoshintshana nesithi “Ezentsha Yethu,” esichaza izindlela zokufunda iBhayibheli ezihloselwe intsha.

Kuzokuba nezinye izihloko ezimbalwa ezizophuma kane ngonyaka. Esithi “Lingisa Ukholo Lwabo” sizosikhuthaza ukuba silandele isibonelo sothile ochazwe eBhayibhelini. Ngokwesibonelo, emakhasini 18 kuya ku-21 alo magazini uzofunda ukulandisa okushukumisayo okuphathelene nomprofethi u-Eliya futhi uzwe indlela esingalulingisa ngayo ukholo lwakhe. Esithi “Incwadi Evela . . . ” sizolandisa okuhlangenwe nakho kwezithunywa zevangeli kanye nabanye ezingxenyeni ezihlukene zomhlaba. Esithi “Lokho Esikufunda KuJesu” sizochaza izimfundiso eziyisisekelo zeBhayibheli ngendlela elula.

Siyaqiniseka ukuthi INqabayokulinda izoqhubeka ijabulisa abafundi abahlonipha iBhayibheli nabafuna ukwazi ukuthi ifundisani ngempela le ncwadi. Siyethemba ukuthi lo magazini uzokusiza wanelise ukomela kwakho iqiniso leBhayibheli.

ABANYATHELISI

[Umbhalo waphansi]