IBhayibheli Lishintsha Ukuphila Kwabantu
YINI eyabangela insizwa eyi-Rasta ukuba igunde izinwele zayo ezinde futhi iyeke ukubandlulula abelungu? Yini eyasiza insizwa eyayiyisixhwanguxhwangu neyayiqoqela abathengisi bezidakamizwa imali ukuba ishintshe indlela yayo yokuphila? Zizwele njengoba lezi zinsizwa zilandisa.
“Nganqoba nobandlululo enganginalo ngabelungu.”—HAFENI NGHAMA
UBUDALA: 34
IZWE AZALELWA KULO: IZAMBIA
UMLANDO: WAYEYI-RASTA
UKUPHILA KWAMI: Ngazalelwa ekamu lababaleki eZambia. Umama wayebaleke eNamibia ngesikhathi sezimpi futhi wajoyina i-South West Africa People’s Organization (SWAPO). Le nhlangano yayimelene nombuso waseNingizimu Afrika owawubusa iNamibia ngaleso sikhathi.
Ngemva kokuzalwa, ngahlala iminyaka engu-15 emakamu ababaleki ahlukahlukene. Intsha yasemakamu eSWAPO yayifundiswa izindlela zokuqhubekisela phambili umzabalazo wenkululeko. Safundiswa ezombusazwe nokuzonda abelungu.
Lapho ngineminyaka engu-11, ngafisa ukuba yilungu elikhuthele esontweni lasekamu elaliyinhlanganisela yamaRoma Katolika, amaLuthela, amaSheshi namanye amasonto. Umfundisi engakhuluma naye wathi ngingakwenzi lokho. Kusukela ngaleso sikhathi, angibange ngisakholelwa kuNkulunkulu. Nokho, lapho ngineminyaka engu-15, uthando lwami ngomculo we-reggae nesifiso sami sokuqeda ukuhlushwa kwabantu abamnyama kwangenza ngajoyina iqembu lama-Rasta. Ngaphotha izinwele futhi ngaziyeka zaba zinde, ngabhema nensangu. Ngayeka ukudla inyama futhi ngalwela inkululeko yabantu abamnyama. Kodwa angizange ngikuyeke ukuziphatha okubi noma ukubukela amabhayisikobho anobudlova, ingasaphathwa-ke eyokuthuka inhlamba.
INDLELA IBHAYIBHELI ELAKUSHINTSHA NGAYO UKUPHILA KWAMI: Ngo-1995, lapho ngineminyaka engu-20, ngaqala ukucabangisisa ngalokho engangifuna ukukwenza ngokuphila kwami. Ngangifunda zonke izincwadi zama-Rasta engangizithola. Ezinye zazo zazibhekisela eBhayibhelini, kodwa yayingezwakali indlela ezazichaza ngayo. Ngakho, nganquma ukuzifundela iBhayibheli.
Kamuva, umngane wami, naye owayeyi-Rasta, wanginikeza incwadi yokufunda iBhayibheli enyatheliswa oFakazi BakaJehova. Ngazifundela leyo ncwadi kanye neBhayibheli. Kamuva, ngahlangana noFakazi BakaJehova futhi ngaqhubeka nokutadisha iBhayibheli nabo.
Ngemva kokuzama kanzima, ngakwazi ukuyeka ugwayi nokudakwa. (2 Korinte 7:1) Ngalungisa indlela engangibukeka ngayo, ngagunda izinwele ezinde, ngayeka ukubukela amabhayisikobho obulili nanobudlova futhi ngayeka ukuthuka inhlamba. (Efesu 5:3, 4) Ekugcineni, nganqoba nobandlululo enganginalo ngabelungu. (IzEnzo 10:34, 35) Ukuze ngenze lezi zinguquko kwadingeka ngilahle umculo okhuthaza ubandlululo futhi ngihlukane nabangane bami ababezongibuyisela emuva.
Ngemva kokwenza lezo zinguquko, ngafuna iHholo LoMbuso LoFakazi BakaJehova ngacela ukuhlanganyela nabo, futhi ngafundelwa iBhayibheli. Lapho nginquma ukubhapathizwa njengomunye woFakazi BakaJehova, abasekhaya abazange bajabule. Umama wangitshela ukuthi ngikhethe enye inkolo “yobuKristu” kunokuba ngibe uFakazi kaJehova. Omunye umalume wami, owayeyisikhulu sikahulumeni, wayengigxeka njalo ngesinqumo sami sokuhlanganyela noFakazi.
Nokho, ukufunda ngendlela uJesu ayesebenzelana ngayo nabantu nokusebenzisa iseluleko sakhe kwangisiza ukuba ngikwazi ukubhekana ngokuphumelelayo nokuphikiswa nokuhlekwa. Lapho ngiqhathanisa lokho okushiwo oFakazi nalokho okufundiswa yiBhayibheli, ngafika eziphethweni zokuthi ngangithole inkolo yeqiniso. Ngokwesibonelo, oFakazi balalela umyalo weBhayibheli wokushumayela. (Mathewu 28:19, 20; IzEnzo 15:14) Abalokothi bazigaxe ezindabeni zezombusazwe.—IHubo 146:3, 4; Johane 15:17, 18.
INDLELA ENGIYE NGAZUZA NGAYO: Ukufunda ukuphila ngemithetho yeBhayibheli kuye kwangisiza ngezindlela ezingokoqobo. Ngokwesibonelo, ukuyeka insangu kwangisiza ukuba ngonge imali eningi. Angisenayo inkinga yokuphupha emini ngibone izinto ezingekho; ingqondo yami iphila saka nempilo yami iye yathuthuka.
Sesize safezeka isifiso enganginaso kusukela ngisemncane; manje sengiyazi ukuthi ngiphilelani. Okubaluleke kunakho konke ukuthi manje ngizizwa ngisondelene noNkulunkulu.—Jakobe 4:8.
“Sengiyakwazi ukubamba ulaka lwami.”—MARTINO PEDRETTI
UBUDALA: 43
IZWE AZALELWA KULO: I-AUSTRALIA
UMLANDO: WAYENGUMTHENGISI WEZIDAKAMIZWA
UKUPHILA KWAMI: Ngesikhathi ngisemncane sasithutha njalo ekhaya. Sahlala emadolobheni amancane, sabuye sahlala kwelinye idolobha elikhulu. Ngesinye isikhathi ngahlala emishini yabomdabu base-Australia esemaphandleni. Nginezinkumbulo ezimnandi ngesikhathi ngihlala nabazala bami nomalume—sidoba, sizingela, sibaza ama-boomerang (izinduku zokudlala, ukulwa nokuzingela) futhi siqopha nezinye izinto zokhuni.
Ubaba wayengumshayi-sibhakela futhi wangifundisa lo mdlalo ngisemncane, ngakho ngakhula ngiyisixhwanguxhwangu. Ngesikhathi ngiseyibhobhodleyana, ngangiphilela ukuphuza. Mina nabangane bami sasigolomba abantu sifuna nje ukususa impi. Sasilwa nabantu abangaba ngu-20 kuya phezulu ngemimese nangezinduku zokudlala i-baseball.
Imali ngangiyithola ngokuthengisa izidakamizwa nezinto ezintshontshwe izisebenzi zasesikhumulweni semikhumbi. Ngangiqoqela nabathengisi bezidakamizwa imali kubantu ababakweletayo, ngibenze bakhokhe ngokubathusa ngesibhamu. Ngangifuna ukuba umbulali oqashwayo. Isiqubulo sami sasithi, Bulala noma ubulawe.
INDLELA IBHAYIBHELI ELAKUSHINTSHA NGAYO UKUPHILA KWAMI: Ngesikhathi ngikhula ngangike ngezwa ngoFakazi BakaJehova. Lapho ngisanda kuhlanganisa iminyaka engu-20, ngikhumbula ngibuza umama ukuthi bakhona yini oFakazi abaziyo. Ngemva kwezinsuku ezimbili, kwafika uDixon onguFakazi ezosishumayeza. Ngemva kokuxoxaxoxa, wangimemela emhlanganweni woFakazi BakaJehova futhi manje sengineminyaka engaphezu kwengu-20 ngihlanganyela kuyo. OFakazi bakwazi ukuphendula yonke imibuzo enganginayo besebenzisa iBhayibheli.
Kwangijabulisa ukwazi ukuthi uJehova unesithakazelo kubantu ngabanye, ngisho nabantu abangamhloniphi. (2 Petru 3:9) Ngafunda ukuthi unguBaba onothando ozonginakekela, ngisho nalapho kungekho onendaba nami. Kwangikhulula nokwazi ukuthi wayezongixolela izono zami uma ngishiya izindlela zami ezimbi. UmBhalo wabase-Efesu 4:22-24 waba nethonya elikhulu kimi. Wangikhuthaza ukuba ‘ngilahle ubuntu obudala ngigqoke obusha obadalwa ngokwentando kaNkulunkulu.’
Kwaba umshikashika ukushintsha indlela yami yokuphila. Ngangingazithinti izidakamizwa kusukela ngoMsombuluko kuze kube uLwesine, kodwa ngempelasonto, lapho nginabangane bami, ngangehluleka ukuzibamba. Ngabona ukuthi kwakudingeka ngihlukane nabo ukuze ngihlanze ukuphila kwami, ngakho ngathuthela kwesinye isifunda. Abanye abangane bami bacela ukungiphelezela futhi ngavuma. Phakathi nalolo hambo, baqala ukubhema insangu nami bathi mangiyibheme. Ngabatshela ukuthi angisabhemi futhi sahlukana emngceleni, babuyela emuva. Kamuva ngezwa ukuthi ngemva kwesikhashana sihlukene, baphanga ibhange behlome ngezibhamu.
INDLELA ENGIYE NGAZUZA NGAYO: Ngemva nje kokuhlukana nalabo bangane bami, kwaba lula ukwenza izinguquko okwakudingeka ngizenze ekuphileni kwami. Ngo-1989, ngabhapathizwa njengomunye woFakazi. Ngemva kokubhapathizwa, udadewethu omncane, umama kanye nobaba nabo bahlanganyela nami ekukhonzeni uJehova.
Sengineminyaka engu-17 ngishadile futhi nginezingane ezintathu ezinhle. Sengiyakwazi ukubamba ulaka lwami, ngisho nalapho umuntu engichukuluza. Ngifunde nokuthanda abantu bazo zonke ‘izizwe, izinhlanga nezilimi.’ (IsAmbulo 7:9) Ngizibonele ngawami ukuthi la mazwi kaJesu ayiqiniso: “Uma nihlala ezwini lami, ningabafundi bami ngempela, niyolazi iqiniso, futhi iqiniso liyonikhulula.”—Johane 8:31, 32.
[Amazwi acashunwe esihlokweni ekhasini 19]
Ukuze ngenze izinguquko kwadingeka ngilahle umculo okhuthaza ubandlululo
[Amazwi acashunwe esihlokweni ekhasini 20]
Mina nabangane bami sasigolomba abantu sifuna nje ukususa impi. Sasilwa nabantu abangaba ngu-20 kuya phezulu ngemimese nangezinduku zokudlala i-baseball.