Hlala ‘Uhlanzekile Enhliziyweni’ Kulezi Zikhathi Ezibucayi
“AKEKHO ongaphika ukuthi iSonto linenkinga yobumsulwa namuhla.” Yilokho okwashiwo intatheli engumKatolika uVittorio Messori ngamahlazo obulili amuva abandakanya iSonto LamaRoma Katolika eNtaliyane. “Futhi ayinakuxazululwa ngokuqeda umthetho owenqabela abefundisi ukuba bashade ngoba amacala angamaphesenti angu-80 ahilela ongqingili—amacala obulili obuhlanekezelwe abefundisi abanukubeza amadoda nabafana.”—La Stampa.
Akungabazeki ukuthi ukwanda kobubi kuyisibonakaliso salezi ‘zinsuku zokugcina’ zalesi simiso sezinto. (2 Thim. 3:1-5) Njengoba imibiko yezindaba ibonisa, ukuwohloka kwesimilo okuwumphumela kunethonya elibi hhayi nje kubantu abavamile kodwa nakulabo abazibiza ngokuthi bangabefundisi. Inhliziyo yabo eyonakele nengcolile ibashukumisela ukuba benze izinto ezingamanyala. (Efe. 2:2) Yingakho uJesu axwayisa ngokuthi “enhliziyweni kuvela imicabango emibi, ukubulala, ukuphinga, ubufebe, ukweba, ubufakazi obungamanga, ukuhlambalaza.” (Math. 15:19) Nokho, uJehova uNkulunkulu ufisa ukuba izinceku zakhe zithande “ukuhlanzeka kwenhliziyo.” (IzAga 22:11) Ngakho, umKristu angahlala kanjani enenhliziyo ehlanzekile kulezi zikhathi ezibucayi?
Kusho Ukuthini ‘Ukuhlanzeka Enhliziyweni’?
Igama elithi “inhliziyo” livame ukusetshenziswa ngomqondo ongokomfanekiso eBhayibhelini. Ngokwesinye isichazamazwi seBhayibheli, igama elisetshenziswe eBhayibhelini elithi inhliziyo lisho “ingaphakathi lomuntu” futhi “ngokuyinhloko iwukuphela kwendawo uNkulunkulu ayibhekayo, okukhona kuyo ubuhlobo bomuntu naye obunquma ukuziphatha komuntu.” Inhliziyo imelela lokho esiyikho ngempela ngaphakathi. Njengoba incwadi ecashunwe ngenhla ibonisa, yinhliziyo uJehova ayihlolayo nayazisayo ezincekwini zakhe.—1 Pet. 3:4.
EBhayibhelini, igama elithi “ubumsulwa” nelithi “ukuhlanzeka” angabonisa ukuhlanzeka ngomqondo ovamile. Kodwa la magama ayasebenza nakulokho okusesesimweni sakho semvelo—okungahlanjululiwe, okungangcolisiwe, noma okungonakalisiwe—ngomqondo ongokokuziphatha nongokwenkolo. ENtshumayelweni YaseNtabeni, uJesu wathi: “Bayajabula abahlanzekile enhliziyweni.” Empeleni, wayekhuluma ngalabo abahlanzeke ngaphakathi. (Math. 5:8) Imizwa, izifiso nezisusa zabo kuhlanzekile. Bathanda uJehova ngayo yonke inhliziyo yabo ngobuqotho nangokungazenzisi, beshukunyiswa uthando nokubonga. (Luka 10:27) Nawe ufuna ukuhlanzeka ngalowo mqondo, akunjalo?
Ukuhlala ‘Uhlanzekile Enhliziyweni’ Kuyinselele
Inceku kaJehova akufanele igcine ngokuba ‘nezandla ezimsulwa,’ kodwa kufanele ‘ihlanzeke nasenhliziyweni.’ (IHu. 24:3, 4) Nokho, namuhla kuya kuba nzima ngezinceku zikaNkulunkulu ukuhlala ‘zihlanzekile enhliziyweni.’ USathane nezwe lakhe, kanye nenyama yethu engaphelele, kusicindezela kakhulu ukuze kusidedisele kude noJehova. Ukuze simelane nalezi zingcindezi, kubaluleke kakhulu ukuba sithande “ukuhlanzeka kwenhliziyo” futhi sinamathele kukho. Lokhu kuyosilonda futhi kusisize ukuba siqhubeke singabangane bakaNkulunkulu. Singahlala kanjani sihlanzekile enhliziyweni?
KumaHebheru 3:12, sithola lesi sixwayiso: “Qaphelani, bazalwane, funa kukhule komunye wenu inhliziyo embi entula ukholo ngokuhlehla kuNkulunkulu ophilayo.” Ngeke sihlale ‘sihlanzekile enhliziyweni’ uma siba nenhliziyo “entula ukholo.” Imiphi imibono eye yasakazwa uSathane uDeveli ukuze acekele phansi ukholo kuNkulunkulu? Lena ihlanganisa inkolelo yokuziphendukela kwemvelo, inkolelo yokuthi ayikho indinganiso yokulungile nokungalungile kanye nokungabaza ukuthi imiBhalo Engcwele iphefumulelwe uNkulunkulu. Akumelwe sithonywe ukucabanga okunjalo okuyingozi. (Kol. 2:8) Izikhali eziyinhloko esingazivikela ngazo kulokhu kuhlaselwa ukufunda iBhayibheli nsuku zonke nokuzindla ngokujulile. Ulwazi olunembile ngeZwi likaNkulunkulu luyokhulisa uthando lwethu ngoJehova nokwazisa kwethu indlela asebenzelana ngayo nabantu. Kudingeka sibe nalolo thando nokwazisa ukuze senqabe ukucabanga okungamanga futhi sigcine ukholo lwethu kuJehova luqinile, kanjalo sihlale sihlanzekile enhliziyweni.—1 Thim. 1:3-5.
Lapho Sibhekene Nezifiso Zenyama
Enye indlela esingase sihlaselwe ngayo lapho sizama ukuhlala ‘sihlanzekile enhliziyweni’ ihilela izifiso zenyama nezezinto ezibonakalayo. (1 Joh. 2:15, 16) Ukuthanda imali noma isifiso sokuqongelela ingcebo nezinto ezibonakalayo kungonakalisa inhliziyo, kuholele umKristu ukuba enze izinto ezingqubuzana nentando kaNkulunkulu. Abambalwa baye bangathembeka emsebenzini, bakhohlisa abanye, noma baze bantshontsha imali noma ezinye izinto okungezona ezabo.—1 Thim. 6:9, 10.
Ngakolunye uhlangothi, uma sihlakulela ukwesaba ukudumaza uJehova, ukuthanda ubulungisa futhi sizimisele ukuhlala sinonembeza omuhle, sibonisa ukuthi sithanda “ukuhlanzeka kwenhliziyo.” Lolo thando luyosishukumisela ukuba siqhubeke ‘siziphatha ngokwethembeka ezintweni zonke.’ (Heb. 13:18) Lapho senza okulungile, ukwethembeka kunganikeza ubufakazi obuhle. U-Emilio, uFakazi waseNtaliyane ongumshayeli enkampanini ethutha umphakathi, wathola isikhwama semali esasinama-Euro angu-470 (R5 100). Asebenza nabo bamangala lapho esidlulisela kumphathi wakhe, owabe esethozisela umnikazi waso. Abanye kulabo asebenza nabo bahlabeka umxhwele ngalesi senzo kangangokuthi baba nesithakazelo eBhayibhelini futhi baqala ukufundelwa. Ngenxa yalokho, abantu abangu-7 abavela emikhayeni emibili baye bamukela iqiniso. Yebo, ukwethembeka okusuka enhliziyweni ehlanzekile kungashukumisela abanye ukuba badumise uNkulunkulu.—Thithu 2:10.
Enye into engangcolisa inhliziyo yomKristu umbono osontekile nongcolile ngobulili. Ukubheka kweningi labantu ubuhlobo bobulili ngaphambi komshado, ukuphinga nobungqingili njengento evamile kungonakalisa inhliziyo yomKristu. Umuntu oziphethe kabi ngokobulili angase ngobuzenzisi aphile ukuphila okumbaxa-mbili, afihle isono sakhe. Ukwenza kanjalo ngeke neze kubonise ukuba ‘nenhliziyo ehlanzekile.’
UGabriele wabhapathizwa lapho eneminyaka engu-15 ubudala futhi ngemva nje kwalokho waba iphayona. Nokho, kamuva waqala ukuchitha isikhathi nabangane ababi kuma-nightclub. (IHu. 26:4) Waqala ngaleyo ndlela ukuphila kokuziphatha okubi nokobuzenzisi, ngakho kwadingeka asuswe ekuhlanganyeleni. Leso siyalo esivela kuJehova samenza wacabanga ngokujulile. UGabriele uyakhumbula: “Ngaqala ukwenza zonke izinto ngaphambili engangizithatha kalula. Ngafunda iBhayibheli nsuku zonke, ngizama ukukuqonda ngempela lokho uJehova ayekusho, futhi ngatadisha ngokucophelela izincwadi zobuKristu. Ngayibona indlela isifundo somuntu siqu esingazuzisa nesinganelisa ngayo nokuthi ukufunda iBhayibheli nomthandazo oqotho kungasinika amandla angakanani.” Lokhu kwasiza uGabriele ukuba ayeke ukuziphatha kwakhe okubi futhi avuselele ubuhlobo bakhe noJehova.
Manje uGabriele usephindele ezinhlwini zamaphayona futhi usekhonza nomkakhe. Okwenzeke kuye kufakazela indlela ukutadisha iBhayibheli nezincwadi ezilungiselelwa “inceku ethembekileyo neqondayo” okungasiza ngayo umuntu ukuba abe nenhliziyo ehlanzekile futhi enqabe ukuziphatha okubi.—Math. 24:45; IHu. 143:10.
Ukulondoloza “Ukuhlanzeka Kwenhliziyo” Lapho Sivivinywa
Ezinye zezinceku zikaNkulunkulu ziye zacindezelwa abaphikisi, ubunzima bezomnotho nokuphathwa isifo esisongela impilo. Ngezinye izikhathi, nezinhliziyo zazo ziye zalimala. Ngisho neNkosi uDavide yabhekana nalokhu: “Umoya wami ufikelwa isinxi ngaphakathi kimi; ngaphakathi kimi inhliziyo yami izibonakalisa indikindiki.” (IHu. 143:4) Yini eyayisiza ukuba inqobe lezo ziqubu? UDavide wakhumbula lokho uNkulunkulu akwenzela izinceku zaKhe nendlela amkhulula ngayo. Wazindla ngalokho uJehova ayekwenzile ngenxa yegama laKhe. Wazindla ngemisebenzi kaNkulunkulu. (IHu. 143:5) Ngokufanayo, ukuzindla ngoMdali wethu nangakho konke aye wakwenza naqhubeka esenzela khona kuyosisiza ngisho nalapho sivivinywa.
Lapho othile esonile noma sinomuzwa wokuthi soniwe, singase sithukuthele. Ukuqhubeka sicabanga ngalokho okwenzekile kungasenza sibe nombono omubi ngabafowethu. Singase sigcine sesingasabakhulumisi, sizihlukanise futhi singabi nandaba nabanye. Nokho, ingabe ukusabela ngaleyo ndlela kuyavumelana nesifiso sethu sokuba ‘nenhliziyo ehlanzekile’? Ngokusobala, injongo yokuba nalesi simo senhliziyo ihilela ukusebenzelana kwethu nabafowethu abangamaKristu nendlela esibaphatha ngayo.
Ezweni eliya licwila emanyaleni nasekuziphatheni okubi, thina njengamaKristu eqiniso sihlukile ngoba sithanda “ukuhlanzeka kwenhliziyo.” Njengoba ukwenza intando kaNkulunkulu kusilethela ukuthula kwangaphakathi, lokhu kuba nomthelela omuhle ekuphileni kwethu. Ngaphezu kwakho konke, sinobuhlobo obuhle noMdali wethu, uJehova uNkulunkulu, othanda labo “abahlanzekile enhliziyweni.” (IHu. 73:1) Yebo, njengoba uJesu athembisa, singabalwa phakathi kwalabo abayojabula ngoba “bayobona uNkulunkulu,” lapho ethatha isinyathelo ngenxa yalabo abathanda “ukuhlanzeka kwenhliziyo.”—Math. 5:8.