Basha—Nizokwenzani Ngokuphila Kwenu?

“Indlela engiqondisa ngayo amagalelo ami ingeyokuba ngingashayi umoya.”—1 KOR. 9:26.

1, 2. Ukuze uphumelele njengoba ukhula, kudingeka ube nani?

UMA uzohamba ngendlela ongayijwayele edabula ehlane, kungase kudingeke uphathe ibalazwe nekhampasi. Ibalazwe lingakusiza ekuboneni ukuthi ukuphi futhi likusize uhlele indlela ozoyithatha. Ikhampasi ingakusiza ukuba ungaduki. Noma kunjalo, ibalazwe nekhampasi ngeke kukusize kangako uma ungazi ukuthi uyaphi. Ukuze ugweme ukuzulazula, kudingeka wazi kahle lapho uya khona.

² Ubhekene nesimo esifanayo njengoba ukhula. Unakho kokubili, ibalazwe nekhampasi ongakwethemba. IBhayibheli liyibalazwe elingakusiza ukuba wazi indlela ongayikhetha. (IzAga 3:5, 6) Uma unembeza wakho uqeqeshwe kahle, ungaba usizo olukhulu ekukugcineni usendleleni efanele. (Roma 2:15) Unembeza ungaba njengekhampasi. Nokho, ukuze ukuphila kwakho kube nempumelelo, kudingeka wazi nokuthi uyaphi. Kudingeka ube nemigomo ecacile neqondile.

3. Iziphi izinzuzo zokuba nemigomo uPawulu akhuluma ngazo kweyoku-1 Korinte 9:26?

³ Umphostoli uPawulu wafingqa izinzuzo zokuzibekela imigomo nokuzama ukuyifinyelela ngala mazwi: “Indlela engigijima ngayo akuyona engaqinisekile; indlela engiqondisa ngayo amagalelo ami ingeyokuba ngingashayi umoya.” (1 Kor. 9:26) Uma unemigomo ungagijima ngokuqiniseka. Maduzane nje, kuzodingeka wenze izinqumo ezinkulu eziphathelene nokukhulekela, umsebenzi, umshado nomkhaya, uma sibala ezimbalwa nje. Ngezinye izikhathi, ungase uzizwe sengathi kumelwe wenze izinqumo ezimweni eziyinkimbinkimbi. Kodwa uma uyihlela kusengaphambili indlela ozokwenza ngayo izinto, usekela izinqumo zakho emaqinisweni nasezimisweni ezitholakala eZwini likaNkulunkulu, ngeke ulingeke ukuba uthathe indlela engalungile.—2 Thim. 4:4, 5.

4, 5. (a) Yini engenzeka uma ungazibekeli imigomo? (b) Kungani izinqumo ozenzayo kufanele ziqondiswe isifiso sokujabulisa uNkulunkulu?

⁴ Uma ungazibekeli imigomo, ontanga yakho nothisha bangase bakuthonyele ekwenzeni lokho bona abacabanga ukuthi kukulungele. Yiqiniso, ngisho noma unemigomo ecacile, abanye basayoyiveza imibono yabo. Lapho ulalela ukusikisela kwabo, zibuze, ‘Ingabe imigomo abayishoyo iyongisiza ukuba ngikhumbule uMdali wami ngisemusha noma ingabe iyongichezukisa ekwenzeni lokho?’—Funda umShumayeli 12:1.

⁵ Kungani izinqumo ozenzayo ekuphileni kufanele ziqondiswe isifiso sokujabulisa uNkulunkulu? Esinye isizathu ukuthi zonke izinto ezinhle sizinikwe uJehova. (Jak. 1:17) Ngempela, wonke umuntu kufanele ambonge uJehova. (IsAm. 4:11) Ikhona yini enye indlela engcono ongabonisa ngayo ukubonga edlula ukukhumbula uJehova lapho uzibekela imigomo? Ake sixoxe ngemigomo okungaba yinzuzo ukuyiphishekela nokuthi yini okumelwe uyenze ukuze uyifinyelele.

Imiphi Imigomo Ongazibekela Yona?

6. Imuphi umgomo oyinhloko ongazibekela wona, futhi ngani?

⁶ Njengoba kuboniswe esihlokweni esandulele, umgomo oyinhloko ongazibekela wona uwukuziqinisekisa ukuthi lokho okushiwo iBhayibheli kuyiqiniso. (Roma 12:2; 2 Kor. 13:5) Kungenzeka ukuthi ontanga yakho bakholelwa ekuziphendukeleni kwemvelo noma ezimfundisweni ezihlukahlukene zenkolo yamanga ngoba kukhona ababatshela ukuba bazikholelwe. Nokho, wena ungenza okungcono kunabo ngezinkolelo zakho. Khumbula, uJehova ufuna umkhonze ngengqondo yakho yonke. (Funda uMathewu 22:36, 37.) UBaba wethu osezulwini ufuna ukuba ukholo lwakho ulusekele entweni enobufakazi.—Heb. 11:1.

7, 8. (a) Ukuzibekela miphi imigomo yesikhathi esifushane okuyokusiza ekuqiniseni ukholo lwakho? (b) Uyozizwa kanjani lapho ufinyelela eminye yemigomo yakho yesikhathi esifushane?

⁷ Ukuze uqinise ukholo lwakho, kungani ungazibekeli imigomo ethile yesikhathi esifushane? Omunye wayo kungaba ukuthandaza nsuku zonke. Ukuze ugcine imithandazo yakho ingaphindaphindi futhi ingagwegwesi, ungase ugcine engqondweni noma ubhale phansi okwenzeke phakathi nosuku ongathanda ukukufaka emthandazweni. Kungaba kuhle ukuba ungakhulumi ngezinselele oye wabhekana nazo kuphela kodwa nangezinto ozijabulele. (Fil. 4:6) Omunye umgomo kungaba ukufunda iBhayibheli nsuku zonke. Bewazi yini ukuthi uma ungafunda amakhasi amane ngosuku, ungaliqeda ngonyaka?a IHubo 1:1, 2, lithi: ‘Uyajabula umuntu onjabulo yakhe isemthethweni kaJehova, futhi ofunda umthetho wakhe ngezwi eliphansi imini nobusuku.’

⁸ Umgomo wesithathu wesikhathi esifushane ongazibekela wona ukulungiselela ukuphendula emhlanganweni ngamunye webandla. Ekuqaleni ungase uyifunde impendulo yakho noma umBhalo. Ngokuhamba kwesikhathi ungazibekela umgomo wokuphendula ngamazwi akho. Empeleni, isikhathi ngasinye uphendula, usuke upha uJehova okuthile. (Heb. 13:15) Uma usuyifinyelele eminye yale migomo, ukuqiniseka kwakho kuyokhula njengoba nokwazisa kwakho uJehova kukhula, futhi uyokulungela ukuzibekela imigomo yesikhathi eside.

9. Uma ungakabi ummemezeli woMbuso, imiphi imigomo yesikhathi eside ongazibekela yona?

⁹ Imiphi imigomo yesikhathi eside ongazibekela yona? Uma ungakaqali ukumemezela izindaba ezinhle obala, umgomo wakho wesikhathi eside ungaba ukuba ummemezeli woMbuso. Lapho usuwufinyelele lo mgomo omuhle kangaka, uyolwela ukuphuma njalo nokunikeza izintshumayelo eziphumelelayo, ungavumeli inyanga iphele ungayanga ensimini. Uyolwela nokufunda ukusebenzisa iBhayibheli enkonzweni. Njengoba wenza kanjalo, uyothola ukuthi uyowujabulela ngokwengeziwe umsebenzi wokushumayela. Uyobe sewandisa isikhathi osichitha enkonzweni yendlu ngendlu noma ulwele ngisho nokuqhuba isifundo seBhayibheli. Njengommemezeli ongabhapathiziwe, umgomo ongcono kakhulu osungazibekela wona, ukufanelekela ubhapathizo ube uFakazi kaJehova ozinikezele nobhapathiziwe.

10, 11. Imiphi imigomo yesikhathi eside intsha ebhapathiziwe engazibekela yona?

¹⁰ Uma kakade usuyinceku kaJehova ebhapathiziwe, nansi eminye imigomo yesikhathi eside ongalwela ukuyifinyelela. Ngezikhathi ezithile ungase uthande ukusiza ibandla ensimini yalo engasetshenzwa njalo. Ungakhetha nokusebenzisa amandla akho nempilo yakho enhle ngokukhonza njengephayona elisizayo noma elivamile. Amashumi ezinkulungwane amaphayona ajabulayo ayokutshela ukuthi ukuba senkonzweni yesikhathi esigcwele kuyindlela engcono kakhulu yokukhumbula uMdali wakho usemusha. Le migomo ungayifinyelela lapho usahlala ekhaya. Ibandla lakini nalo liyozuza uma uyifinyelela leyo migomo.

¹¹ Eminye yemigomo yesikhathi eside ongazibekela yona ingaholela ekubeni usuke ebandleni lakini. Ngokwesibonelo, ungase uhlele ukuyokhonza kwenye indawo noma kwelinye izwe lapho kunendingeko enkulu khona. Ungase uthande ukusiza emsebenzini wokwakha amaHholo OMbuso noma izakhiwo zamagatsha kwamanye amazwe. Ungase ukwazi ngisho nokungenela inkonzo yaseBethel noma ube isithunywa sevangeli. Yiqiniso, umgomo wokuqala obalulekile okuyofanele uwufinyelele ngaphambi kokudlulela emigomweni yesikhathi eside okukhulunywa ngayo lapha, uwukubhapathizwa. Uma ungakabhapathizwa, cabanga ngalokho okuhilelekile ekufinyeleleni lowo mgomo obalulekile ekuphileni kwakho.

Ukufinyelela Umgomo Wokubhapathizwa

12. Abanye babhapathizwa ngaziphi izizathu, futhi kungani zinganele?

¹² Ungayichaza kanjani injongo yokubhapathizwa? Abanye bangase bacabange ukuthi iwukubavikela ekoneni. Abanye bangase babe nomuzwa wokuthi kufanele babhapathizwe ngoba ontanga yabo sebebhapathiziwe. Kungenzeka ukuthi enye intsha ifuna ukujabulisa abazali bayo. Nokho, ubhapathizo alusona isivumelwano esisayinwayo esikuvimbela ekwenzeni izinto enhliziyweni yakho obungathanda ukuzenza; futhi akufanele ubhapathizwe ngoba ucindezelwa abanye. Kufanele ubhapathizwe lapho usukuqonda ngokugcwele ukuthi kusho ukuthini ukuba uFakazi kaJehova futhi usuqiniseka ukuthi ukulungele futhi uzimisele ukuwuthatha lo mthwalo wemfanelo.—UmSh. 5:4, 5.

13. Kungani kufanele ubhapathizwe?

¹³ Esinye isizathu sokuba ubhapathizwe ukuthi uJesu wathuma abalandeli bakhe ukuba ‘benze abafundi, bababhapathize.’ Wabeka isibonelo ngokuba naye abhapathizwe. (Funda uMathewu 28:19, 20; Marku 1:9.) Ngaphezu kwalokho, ubhapathizo luyisinyathelo esibalulekile kulabo abafuna ukusindiswa. Ngemva kokukhuluma ngokwakha kukaNowa umkhumbi owamsindisa nomkhaya wakhe kuZamcolo, umphostoli uPetru wathi: “Lokho okuhambelana nalokhu nakho manje kuyanisindisa, okuwukuthi, ubhapathizo, . . . ngokuvuka kukaJesu Kristu.” (1 Pet. 3:20, 21) Nokho, lokhu akusho ukuthi ubhapathizo lunjengomshuwalense owungenelayo ukuze ukusize uma kwenzeka kugadla inhlekelele. Kunalokho, ubhapathizwa ngoba uthanda uJehova futhi ufuna ukumkhonza ngenhliziyo yakho yonke, umphefumulo, ingqondo namandla.—Marku 12:29, 30.

14. Kungani abanye bengase bazindele ukubhapathizwa, kodwa yini ongaqiniseka ngakho?

¹⁴ Abanye bangase bazindele ukubhapathizwa ngoba benovalo lokuthi hleze basuswe ekuhlanganyeleni kamuva. Ingabe nawe unalolo valo? Empeleni, uvalo olunjalo lungakuzuzisa. Kungasho ukuthi uyawuqonda umthwalo wemfanelo ongathí sina ohambisana nokuba omunye woFakazi BakaJehova. Ingabe sikhona esinye isizathu? Mhlawumbe awukaqiniseki ngokuthi ukuphila ngezindinganiso zikaNkulunkulu kuyindlela engcono kakhulu yokuphila. Uma kunjalo, ukucabanga ngemiphumela etholwa yilabo abangazinaki izindinganiso zeBhayibheli kungakusiza ukuba wenze isinqumo. Ngakolunye uhlangothi, kungenzeka ukuthi uyazithanda izindinganiso zikaNkulunkulu kodwa awuzethembi ukuthi ungakwazi ukuphila ngazo. Empeleni, lokho kungaba uphawu oluhle, ngoba kubonisa ukuthi uthobekile. Kakade, iBhayibheli lithi zonke izinhliziyo zabantu abangaphelele ziyakhohlisa. (Jer. 17:9) Kodwa ungaphumelela uma uqhubeka ‘uqaphile ngokuvumelana nezwi likaNkulunkulu.’ (Funda iHubo 119:9.) Kungakhathaliseki ukuthi unaziphi izizathu zokuzindela ukubhapathizwa, kudingeka ukuxazulule lokho okukwenza uzindele nokukukhathazayo.b

15, 16. Ungabona kanjani ukuthi usukulungele ukubhapathizwa?

¹⁵ Ngakho, ungabona kanjani ukuthi usukulungele ukubhapathizwa? Enye indlela iwukuzibuza le mibuzo: ‘Ingabe ngiyakwazi ukuchazela abanye izimfundiso zeBhayibheli eziyisisekelo? Ngiyaya yini enkonzweni ngisho nalapho abazali bami bengayi? Ingabe ngilwela ukuba khona kuyo yonke imihlangano yobuKristu? Ingabe ngiyazikhumbula izenzakalo ezithile lapho ngamelana khona nokucindezela kontanga? Ngingaqhubeka yini ngikhonza uJehova ngisho noma abazali nabangane bami bengayeka? Ingabe ngiye ngathandaza ngobuhlobo bami noNkulunkulu? Sengizinikezele yini ngokungagodli kuJehova ngomthandazo?’

¹⁶ Ubhapathizo luyisinyathelo esikushintshayo ukuphila okungafanele sithathwe kalula. Ingabe uvuthwe ngokwanele ukuba ucabangisise ngalesi sinyathelo? Ukuvuthwa akusho nje ukubeka izinkulumo ezimnandi endaweni yesikhulumi noma ukunikeza izimpendulo ezihlaba umxhwele emhlanganweni. Kusho ukukwazi ukwenza izinqumo ezibonisa ukuthi uyaziqonda izimiso zeBhayibheli. (Funda amaHebheru 5:14.) Uma usufinyelele lelo zinga ekuphileni kwakho, usulindelwe ilungelo elikhulu kunawo wonke—lokukhonza uJehova ngenhliziyo yakho yonke futhi uphile ngendlela ebonisa ukuthi uzinikezele ngempela kuye.

17. Yini eyokusiza ukuba unqobe izinselele ongase ubhekane nazo ngemva kokubhapathizwa?

¹⁷ Ngemva nje kokubhapathizwa, ungase uzizwe unentshiseko eyengeziwe yokukhonza uNkulunkulu. Nokho, kungakabiphi ungase ubhekane nezinselele eziyovivinya ukholo namandla akho okukhuthazela. (2 Thim. 3:12) Ungabi nomuzwa wokuthi kudingeka ubhekane nalezi zinselele wedwa. Cela iseluleko kubazali bakho. Xoxa nabantu abavuthiwe ebandleni ukuze bakusize. Hlakulela ubungane nalabo abayokusekela. Ungalokothi ukhohlwe ukuthi uJehova uyakukhathalela futhi uyokunika amandla owadingayo ukuze ubhekane nanoma isiphi isimo esingase sivele.—1 Pet. 5:6, 7.

Ungayifinyelela Kanjani Imigomo Yakho?

18, 19. Ungazuza kanjani ngokuhlola izinto eziza kuqala kuwe?

¹⁸ Naphezu kwezinhloso zakho ezinhle, ingabe ubona sengathi awunaso isikhathi esanele sokwenza okufunayo noma okudingeka ukwenze? Uma kunjalo, kufanele uhlole ukuthi yini eza kuqala kuwe. Ake sithi ufaka amatshe amakhulu amaningana ebhakedeni bese uthela isihlabathi phezulu lize ligcwale. Liyogcwala amatshe nesihlabathi. Thulula leso sihlabathi namatshe ungakulahli bese manje uqala ngokufaka isihlabathi ugcine ngamatshe ebhakedeni. Amatshe ngeke esanela. Kungani? Kungenxa yokuthi usuqale ngokufaka isihlabathi.

¹⁹ Nawe ubhekene nenselele efanayo lapho uhlela indlela osebenzisa ngayo isikhathi sakho. Uma izinto ezinjengokuzijabulisa ziza kuqala ekuphileni kwakho, uyohlale uzibona ungenaso nhlobo isikhathi sezinto ezinkulu njengesokwenza izinto ezingokomoya. Kodwa uma usebenzisa iseluleko seBhayibheli ‘sokuba uqiniseke ngezinto ezibaluleke kakhulu,’ uyothola ukuthi uba nesikhathi sezinto ezingokomoya nesokuzijabulisa.—Fil. 1:10.

20. Uma ufikelwa ukukhathazeka noma ukungabaza njengoba ulwela ukufinyelela imigomo yakho, yini okufanele uyenze?

²⁰ Njengoba ulwela ukufinyelela imigomo yakho, ehlanganisa nokubhapathizwa, ngezinye izikhathi ungase ufikelwe ukukhathazeka noma ukungabaza. Lapho lokho kwenzeka, “phonsa umthwalo wakho phezu kukaJehova, yena uyokusekela.” (IHu. 55:22) Okwamanje, unethuba lokuhlanganyela emsebenzini ojabulisa nobaluleke kunayo yonke emlandweni wesintu, umsebenzi wokushumayela nokufundisa owenziwa emhlabeni wonke. (IzE. 1:8) Ungakhetha ukuba isibukeli futhi ubuke abanye benza lo msebenzi. Noma nawe ungahlanganyela kuwo. Ungazigodli ekunikeleni ngamakhono akho ekuthuthukiseni izithakazelo zoMbuso. Ngeke uzisole ngokukhonza “uMdali wakho ezinsukwini zobusha bakho.”—UmSh. 12:1, New International Version.

[Imibhalo yaphansi]

Ungaphendula Kanjani?

• Kungani kufanele uzibekele imigomo?

• Imiphi eminye yemigomo okuzuzisayo ukuyifinyelela?

• Yini ehilelekile ekufinyeleleni umgomo wokubhapathizwa?

• Ukuhlola izinto eziza kuqala kungakusiza kanjani ukuba ufinyelele imigomo yakho?

[Isithombe ekhasini 13]

Unawo yini umgomo wokufunda iBhayibheli nsuku zonke?

[Isithombe ekhasini 15]

Yini eyokusiza ukuba ufinyelele umgomo wokubhapathizwa?

[Isithombe ekhasini 16]

Isiphi isifundo osithola kulo mfanekiso?