Sondela KuNkulunkulu
Induduzo Kwabaphuke Izinhliziyo
‘UJEHOVA akasoze angithanda.’ Washo kanjalo owesifazane othile ongumKristu oye wahlushwa ukucindezeleka cishe ukuphila kwakhe konke. Wayenomuzwa wokuthi uJehova ukude naye. Ingabe ngempela uJehova ukude nabakhulekeli bakhe okungenzeka bacindezelekile? Impendulo eduduzayo itholakala emazwini aphefumulelwe omhubi uDavide alotshwe kumaHubo 34:18.
UDavide wayazi ukuthi ukucindezeleka okukhulu kungaba namuphi umphumela kumkhulekeli othembekile kaJehova. Lapho esemusha, waba ngumbaleki, ezingelwa uSawule, inkosi enomona eyayizimisele ukumbulala. UDavide wacasha endaweni ayecabanga ukuthi uSawule wayengasoze amfuna kuyo—emzini wesitha eGati, ezweni lamaFilisti. Kodwa ngemva kokuba sebembonile, wasinda ngokulambisa ngokuthi azishaye ongaphilile engqondweni. UDavide wakhazimulisa uNkulunkulu ngokumsindisa, futhi wayecabanga ngalesi senzakalo ngesikhathi ebhala iHubo 34.
Ingabe uDavide wayekholelwa ukuthi uNkulunkulu ukude nalabo okuthi ngokucindezeleka badumale noma bazizwe bengakufanelekele ukuba abanake? UDavide uyabhala: “UJehova useduze nalabo abaphukile enhliziyweni; futhi uyabasindisa abanomoya ochobozekile.” (Ivesi 18) Ake sibone ukuthi la mazwi ayiletha kanjani induduzo nethemba.
“UJehova useduze.” Enye incwadi ithi la mazwi “ayindlela yokuthi iNkosi iqaphile, futhi ihlale ikulungele ukusiza nokusindisa abantu bayo.” Kuyaqinisa ukwazi ukuthi uJehova uyabaqapha abantu bakhe. Uyazibona izimo ababhekene nazo kulezi “zikhathi ezibucayi,” futhi uyayazi imizwa yabo ejulile.—2 Thimothewu 3:1; IzEnzo 17:27.
“Labo abaphukile enhliziyweni.” Kwamanye amasiko, “inhliziyo ephukile” ibhekisela esimweni lapho umuntu ethanda othile kodwa yena engamthandi. Kodwa esinye isazi sithi amazwi omhubi abhekisela “ekudabukeni nasosizini oluvamile.” Yebo, ngezinye izikhathi ngisho nabakhulekeli abathembekile bakaNkulunkulu bangabhekana nobunzima obukhulu obuphula inhliziyo.
“Abanomoya ochobozekile.” Abantu abadumazekile bangase bazibone bengelutho futhi bangase balahlekelwe ithemba okwesikhashana. Incwadi yabahumushi beBhayibheli ithi la mazwi angase ahunyushwe ngokuthi “labo abangenakho okuhle ababheke phambili kukho.”
UJehova usabela kanjani kulabo “abaphukile enhliziyweni” ‘nabanomoya ochobozekile’? Ingabe uyaziqhelelanisa nabo, ababheke njengabangalufanelekele uthando nokunaka kwakhe? Cha, kodwa njengomzali onothando ogona futhi aduduze ingane yakhe ephatheke kabi, uJehova useduze nabakhulekeli bakhe abakhalela usizo. Uzimisele ukududuza izinhliziyo zabo eziphukile nokuthoba umoya wabo ochobozekile. Angabanikeza ukuhlakanipha namandla abawadingayo ukuze babhekane ngokuphumelelayo nanoma yiluphi uvivinyo olungase lubehlele.—2 Korinte 4:7; Jakobe 1:5.
Zitholele ukuthi ungasondela kanjani kuJehova. Lo Nkulunkulu onesihawu uyathembisa: “Ngihlala nalowo ochotshoziwe onomoya othobekile, ukuze ngivuselele umoya wabathobekileyo futhi ngivuselele inhliziyo yabachotshozwayo.”—Isaya 57:15.
Izahluko zeBhayibheli ongazifunda ngo-June