Lingisa Isibonelo SikaJesu Sokuhlale Elindile
“Hlalani nilindile futhi nithandaze.”—MATH. 26:41.
UNGAPHENDULA KANJANI?
Imithandazo yethu ingabonisa kanjani ukuthi sihlale silindile?
Singabonisa ngaziphi izindlela ukuthi siphapheme enkonzweni yethu?
Kungani kubalulekile ukuba siphaphame lapho silingwa, futhi singakwenza kanjani lokho?
1, 2. (a) Imiphi imibuzo engase iphakame ngokuphathelene nesibonelo sikaJesu sokuhlale elindile? (b) Ingabe isibonelo sikaJesu ophelele singabasiza abantu abanesono? Bonisa.
UNGASE uzibuze: ‘Ingabe ngempela ngingakwazi ukulingisa isibonelo sikaJesu sokuhlale elindile? Phela, uJesu wayephelele! Ngaphezu kwalokho, ngezinye izikhathi wayekwazi ukubona ngokucacile lokho okuzokwenzeka esikhathini esizayo—ngisho kusasele izinkulungwane zeminyaka! Ingabe kwakudingeka ngempela ukuba ahlale elindile?’ (Math. 24:37-39; Heb. 4:15) Ake sixoxe ngaleyo mibuzo kuqala ukuze sibone ukuthi lokhu kubaluleke futhi kuphuthuma kangakanani.
2 Ingabe isibonelo somuntu ophelele singabasiza abantu abanesono? Yebo, ngoba singafunda kumfundisi omuhle nasesibonelweni sakhe. Ngokwesibonelo, ake ucabange ngomuntu ofunda ukuciba. Akakwazi nhlobo ukuciba ngokunembile into okumelwe ayicibe ngomzamo wokuqala, kodwa uyaqhubeka efunda futhi ezama. Ukuze athuthuke, utadisha ngokucophelela isibonelo somfundisi wakhe ongumcibisheli oyingcweti. Umfundi ubukisisa indlela umfundisi wakhe ama ngayo, amisa ngayo izandla nasebenzisa ngayo iminwe yakhe ukuze adonse umnsalo. Kancane kancane le mfunda-makhwelo ifunda ukuthi kufanele iwudonse kangakanani umnsalo; ibheke umoya, futhi iqhubeke izama. Ngokulingisa lokho ekubona kumfundisi wayo, kancane kancane imicibisholo iyasondela kulokho ekucibayo. Ngokufanayo, siyaqhubeka silwela ukuthuthuka njengamaKristu ngokulalela izimfundiso zikaJesu nangokulingisa isibonelo sakhe esiphelele.
3. (a) UJesu wabonisa kanjani ukuthi kwakudingeka ukuba ahlale elindile? (b) Sizoxoxa ngani kulesi sihloko?
3 Nokho, kuthiwani ngokuhlale elindile? Ingabe uJesu wayekudinga ngempela? Eqinisweni, wayekudinga. Ngokwesibonelo, ngobusuku bokugcina bokuphila kwakhe emhlabeni, wanxusa abaphostoli bakhe abathembekile: ‘Lindani kanye nami.’ Wanezela: “Hlalani nilindile futhi nithandaze njalo, ukuze ningangeni esilingweni.” (Math. 26:38, 41) Nakuba ayehlale elindile ukuphila kwakhe konke, wafuna ukuhlale elindile ikakhulukazi ngalawo mahora abucayi futhi eseduze noYise osezulwini ngangokunokwenzeka. Wayazi ukuthi nabalandeli bakhe kwakudingeka baqaphe ngokufanayo—hhayi nje okwaleso sikhathi kodwa nasesikhathini esizayo. Ngakho, ake sixoxe ngokuthi kungani uJesu efuna ukuba sihlale silindile. Ngemva kwalokho sizohlola izindlela ezintathu esingakulingisa ngazo ekuphileni kwethu kwansuku zonke ukuhlala kwakhe elindile.
OKWENZA UJESU AFUNE UKUBA SIHLALE SILINDILE
4. Ukuba nolwazi olulinganiselwe ngekusasa kuhlobene ngani nesidingo sokuhlale silindile?
4 Kafushane, uJesu ufuna sihlale silindile ngenxa yalokho esikwaziyo nalokho esingakwazi. Lapho uJesu esesemhlabeni, ingabe wayazi konke ngekusasa? Cha, ngoba wavuma ngokuthobeka: “Ngokuphathelene nalolo suku nalelo hora akekho owaziyo, nazingelosi zasemazulwini naNdodana, kodwa nguBaba kuphela.” (Math. 24:36) Ngaleso sikhathi, uJesu, ‘iNdodana,’ wayengasazi isikhathi esiqondile sokuphela kwaleli zwe elibi. Kuthiwani ngathi namuhla? Ingabe ulwazi lwethu ngekusasa lulinganiselwe? Yebo kunjalo! Asazi ukuthi uJehova uyoyithumela nini iNdodana yakhe ukuba izobhubhisa lesi simiso sezinto esibi. Ukube besazi, besiyoba khona yini ngempela isidingo sokuhlale silindile? Njengoba uJesu achaza, ukuphela kuyofika ngokushesha nangokuzumayo; yingakho kudingeka ngempela ukuba sihlale silindile.—Funda uMathewu 24:43.
5, 6. (a) Ulwazi lwethu ngekusasa nangezinjongo zikaNkulunkulu lusithinta kanjani isidingo sokuhlale silindile? (b) Kungani ulwazi ngoSathane kufanele lusenze sizimisele ngokwengeziwe ukuhlale silindile?
5 Ngakolunye uhlangothi, uJesu wayazi izinto eziningi ezimangalisayo ngekusasa—amaqiniso iningi labantu ayephila nabo elalingawazi nhlobo. Ulwazi lwethu alusondeli nakancane kolukaJesu, kodwa ngenxa yakhe sazi okuningi ngoMbuso kaNkulunkulu nalokho ozokufeza maduze. Njengoba sibheka indawo esizungezile, kungaba sesikoleni, emsebenzini, noma ensimini, asiboni yini ukuthi iningi labantu lidukuza ebumnyameni obukhulu ngokuphathelene nala maqiniso akhazimulayo? Yilesi-ke esinye isizathu sokuhlale silindile. NjengoJesu, kudingeka sihlale siqaphile, siphaphamele amathuba okuxoxela abanye lokho esikwaziyo ngoMbuso kaNkulunkulu. Ithuba ngalinye liyigugu, futhi asifuni ukudlala ngalo. Ukuphila kwabantu kusengozini!—1 Thim. 4:16.
6 Kunokunye futhi uJesu ayekwazi okwamenza wahlale elindile. Wayazi ukuthi uSathane wayezimisele ukumlinga, ukumshushisa nokwephula ubuqotho bakhe. Leso sitha esinonya sasihlale silinde “esinye isikhathi esikahle” sokuvivinya uJesu. (Luka 4:13) UJesu akakaze ayeke ukuqapha. Wayefuna ukuhlale elungele noma iluphi uvivinyo, kungaba isilingo, ukuphikiswa noma ukushushiswa. Akukhona yini lokho nathi okufanele sikwenze? Siyazi ukuthi uSathane “[unjengengonyama] ebhongayo, efuna engamshwabadela.” Yingakho iZwi likaNkulunkulu linxusa wonke amaKristu: “Hlalani nisangulukile, qaphani.” (1 Pet. 5:8) Nokho, singakwenza kanjani lokhu?
INDLELA YOKUHLALE SILINDILE NGOKUPHATHELENE NOMTHANDAZO
7, 8. Isiphi iseluleko uJesu asinikeza ngokuphathelene nomthandazo, futhi isiphi isibonelo asibeka?
7 IBhayibheli libonisa ukuthi kunokuhlobana okukhulu phakathi kokuqapha ngokomoya, noma ukuhlale ulindile, nomthandazo. (Kol. 4:2; 1 Pet. 4:7) Ngemva nje kokucela abalandeli bakhe ukuba bahlale belindile kanye naye, uJesu wathi: “Hlalani nilindile futhi nithandaze njalo, ukuze ningangeni esilingweni.” (Math. 26:41) Ingabe leso seluleko sasisebenza kuphela kuleso simo esibucayi ababebhekene naso ngaleso sikhathi? Cha, iseluleko sakhe siyisimiso okumelwe siphile ngaso nsuku zonke.
8 UJesu wasibekela isibonelo esihle kakhulu sokuthandaza. Uzokhumbula ukuthi wake wachitha ubusuku bonke ethandaza kuYise. Ake sizame ukusibona ngeso lengqondo leso simo. (Funda uLuka 6:12, 13.) Kusentwasahlobo, cishe eduze komzana waseKapernawume oziphilisa ngokudoba, umuzi uJesu ayehlala kuwo lapho ekuleso sifunda. Njengoba kuhlwa, uJesu ukhuphukela kwenye yezintaba ezibheke oLwandle LwaseGalile. Sekuqala ukuhwalala futhi kungenzeka ukuthi ubona ukulokoza kwezibani zamafutha ezansi eKapernawume nakweminye imizana eseduze. Nokho, lapho uJesu ekhuluma noJehova, ugxila emthandazweni wakhe. Kudlula imizuzu kanjalo namahora. Akakhathazeki ngezibani ezilokhu zicima ngasinye ngasinye laphaya ezansi noma ngenyanga ehamba esibhakabhakeni noma ngezilwane zasebusuku ezidla ehlozini. Cishe umthandazo wakhe ugxila esinqumweni esikhulu abhekene naso—sokukhetha abaphostoli abangu-12. Singambona ngeso lengqondo uJesu egxilile etshela uYise zonke izinto azicabangayo nezimkhathazayo ngomfundi ngamunye njengoba enxusa ngobuqotho isiqondiso nokuhlakanipha.
9. Yini esingayifunda esibonelweni sikaJesu sokuthandaza ubusuku bonke?
9 Singafundani esibonelweni sikaJesu? Ukuthi kumelwe sichithe amahora amaningi sithandaza? Cha, ngoba ngomusa wavuma ngokuphathelene nabalandeli bakhe: “Yebo, umoya uyalangazela, kodwa inyama ibuthakathaka.” (Math. 26:41) Noma kunjalo, singamlingisa uJesu. Ngokwesibonelo, ingabe siyakhuluma noBaba wethu osezulwini ngaphambi kokwenza noma isiphi isinqumo esingathinta ingokomoya lethu, lemikhaya yethu noma lesikholwa nabo? Ingabe siyababeka emithandazweni yethu abafowethu nodadewethu esikholwa nabo? Ingabe sithandaza ngokusuka enhliziyweni kunokuba siphindaphinde amagama afanayo? Phawula nokuthi uJesu wayekwazisa ukusondelana nokuxoxa ngasese noYise. Kuleli zwe lanamuhla elimatasa, kulula kakhulu ukuba sibe matasa ngeminako yokuphila size sikhohlwe izinto ezibaluleke kakhulu. Uma sizinika isikhathi esanele sokuthandaza ngokujulile ngasese, siyoqapha ngokwengeziwe ngokomoya. (Math. 6:6, 7) Siyosondela kakhulu kuJehova, sifisa ukuqinisa ubuhlobo bethu naye nokugwema noma yini engase ibenze bube buthaka.—IHu. 25:14.
INDLELA YOKUHLALE SILINDILE EMSEBENZINI WOKUSHUMAYELA
10. Isiphi isibonelo esisibonisa indlela uJesu ayehlale ewaphaphamele ngayo amathuba okunikeza ubufakazi?
10 UJesu wayephapheme emsebenzini uJehova ayemnike wona. Kungase kube nemisebenzi evumela ingqondo yesisebenzi ukuba izulazule futhi kungabi nemiphumela emibi. Nokho, imisebenzi eminingi idinga ukugxila nokuphaphama, futhi ngokuqinisekile nenkonzo yobuKristu injalo. UJesu wayehlale ephapheme emsebenzini wakhe, ebheke amathuba okuxoxela abanye izindaba ezinhle. Ngokwesibonelo, lapho yena nabafundi bakhe befika emzaneni waseSikhari ngemva kohambo olude lwasekuseni, abafundi bahamba bayothenga ukudla. UJesu wasala eduze komthombo ukuze aphumule, kodwa wahlala ephapheme futhi walibona ithuba lokufakaza. Kweza owesifazane waseSamariya ezokukha amanzi. UJesu wayengakhetha ukuthatha isihlwathi. Wayengacabanga ngezizathu zokuba angaxoxi naye. Nokho, waqala ukuxoxa nalona wesifazane, futhi wanikeza ubufakazi obunamandla obathinta ukuphila kwabaningi kulowo mzana. (Joh. 4:4-26, 39-42) Singasilingisa yini ngokuseduze isibonelo sikaJesu sokuhlale elindile, mhlawumbe ngokulwela ukuwaphaphamela kakhudlwana amathuba okuhlanganyela izindaba ezinhle nabantu esihlangana nabo nsuku zonke?
11, 12. (a) UJesu wasabela kanjani kulabo ababefuna ukumphazamisa emsebenzini wakhe? (b) Ikuphi ukulinganisela uJesu akubonisa ngomsebenzi wakhe?
11 Ngezinye izikhathi, abantu abanezinhloso ezinhle babefuna ukuphazamisa uJesu emsebenzini wakhe. EKapernawume izixuku zashukunyiswa kakhulu izimangaliso zikaJesu zokuphulukisa kangangokuthi zafuna ukumgcina lapho. Lokho kuyaqondakala. Nokho, umsebenzi kaJesu kwakuwukushumayela kuzo zonke ‘izimvu ezilahlekile zendlu ka-Israyeli,’ hhayi nje ezomuzi owodwa. (Math. 15:24) Ngakho watshela labo bantu: “Nakweminye imizi kumelwe ngishumayele izindaba ezinhle zombuso kaNkulunkulu, ngoba yilokhu engathunyelwa kona.” (Luka 4:40-44) Kusobala ukuthi uJesu wagxilisa ukuphila kwakhe enkonzweni yakhe. Akavumelanga lutho ukuba lumphazamise.
12 Ingabe uJesu wayegxile emsebenzini wakhe kangangokuthi wayeshiseka ngokweqile noma ezincisha injabulo? Ingabe wayegxile kakhulu enkonzweni yakhe kangangokuthi wayengazinaki izidingo ezingokoqobo zemikhaya? Cha, wabeka isibonelo esiphelele sokulinganisela. Wayekujabulela ukuphila nezikhathi ezimnandi nabangane bakhe. Wayeyazisa imikhaya, ezwelana kakhulu nayo ezidingweni nasezinkingeni zayo futhi wabonisa obala ukuthi uyazithanda izingane.—Funda uMarku 10:13-16.
13. Singasilingisa kanjani isibonelo sikaJesu sokuhlale elindile nesokulinganisela emsebenzini wokushumayela ngoMbuso?
13 Njengoba silingisa isibonelo sikaJesu sokuhlale elindile, singakuhlakulela kanjani ukulinganisela okufanayo? Asilivumeli leli zwe ukuba lisiphazamise emsebenzini wethu. Ngisho nabangane nezihlobo ezinezinhloso ezinhle bangase basinxuse ukuba sinciphise ijubane enkonzweni yethu noma siphishekele lokho abakubheka njengokuphila okuvamile. Nokho, uma silingisa uJesu, inkonzo yethu siyibheka njengokungathi iwukudla. (Joh. 4:34) Umsebenzi wethu uyasondla ngokomoya futhi uyasijabulisa. Noma kunjalo, asifuni neze ukuba abeqisayo, sibonise umoya wokuzibona silungile noma wokuzincisha injabulo. NjengoJesu, sifuna ukuba izinceku ezijabulayo nezilinganiselayo “zikaNkulunkulu ojabulayo.”—1 Thim. 1:11.
INDLELA YOKUHLALE SILINDILE LAPHO SIVIVINYWA
14. Ngezikhathi zobunzima, ikuphi ukuthambekela okudingeka simelane nakho, futhi ngani?
14 Njengoba sibonile, ezinye zezikhuthazo zikaJesu eziphuthuma kakhulu zokuhlale silindile wazisho lapho esebunzimeni obukhulu. (Funda uMarku 14:37.) Lapho sibhekene nobunzima, isibonelo sakhe sisidinga kakhulu kunanini ngaphambili. Lapho besebunzimeni, abaningi bathambekele ekukhohlweni iqiniso elibalulekile, elibaluleke kangangokuthi incwadi yezAga ikhuluma ngalo kabili: “Kukhona indlela eqondile phambi komuntu, kodwa ukuphela kwayo kamuva kuyizindlela zokufa.” (IzAga 14:12; 16:25) Uma sithembela ekucabangeni kwethu, ikakhulukazi lapho sibhekene nezinkinga ezingathi sína, cishe siyozifaka thina engozini nalabo esibathandayo.
15. Isiphi isilingo inhloko yomkhaya engase ibhekane naso kulezi zikhathi ezinzima ngokomnotho?
15 Ngokwesibonelo, inhloko yomkhaya ingase icindezeleke kakhulu lapho yondla “abakubo.” (1 Thim. 5:8) Ingase ilingeke ukwamukela umsebenzi oyenza iphuthe kaningi emihlanganweni yobuKristu, ingabe isahola ekukhulekeleni komkhaya, noma ingahlanganyeli enkonzweni. Uma incike ekucabangeni kwayo kuphela, leyo nkambo ingabonakala ithetheleleka futhi iqondile. Nokho, lokho kungayenza igule ngokomoya noma ife. Yeka ukuthi kungcono kanjani ukulalela iseluleko esisencwadini yezAga 3:5, 6! USolomoni wathi: “Thembela kuJehova ngayo yonke inhliziyo yakho, ungenciki kokwakho ukuqonda. Mqaphele kuzo zonke izindlela zakho, yena uyokwenza izindlela zakho ziqonde.”
16. (a) Isiphi isibonelo esabekwa uJesu sokwethembela ekuhlakanipheni kukaJehova hhayi kokwakhe? (b) Izinhloko zemikhaya eziningi zisilingisa kanjani isibonelo sikaJesu sokuthembela kuJehova ezikhathini ezinzima?
16 Lapho uJesu evivinywa, wenqaba ngokuqinile ukuncika kokwakhe ukuqonda. Cabanga nje! Umuntu ohlakaniphe kunabo bonke owake waphila emhlabeni wakhetha ukungenciki kokwakhe ukuhlakanipha lapho ephendula. Ngokwesibonelo, lapho uSathane emlinga, ngokuphindaphindiwe wathi: “Kulotshiwe.” (Math. 4:4, 7, 10) Wancika ekuhlakanipheni kukaYise ukuze amelane nesilingo, ebonisa ukuthobeka uSathane akuzondayo nakuntula ngokuphelele. Ingabe nathi senza okufanayo? Inhloko yomkhaya elingisa uJesu ngokuhlale ilindile ivumela iZwi likaNkulunkulu liyiqondise, ikakhulu ngezikhathi zobunzima. Yilokho kanye izinkulungwane zezinhloko zemikhaya ezikwenzayo emhlabeni wonke. Zinamathela ekubekeni uMbuso kaNkulunkulu nokukhulekela okuhlanzekile kuqala ekuphileni ngisho nangaphambi kwezidingo zezinto ezibonakalayo. Ngaleyo ndlela, ziyinakekela kahle kakhulu imikhaya yazo. UJehova usabela ngokubusisa imizamo yazo yokuyondla, njengoba nje iZwi lakhe lithembisa.—Math. 6:33.
17. Yini ekushukumisela ukuba ulingise isibonelo sikaJesu sokuhlale elindile?
17 Ngokungangabazeki, uJesu wasibekela isibonelo esingcono kakhulu sokuhlale elindile. Isibonelo sakhe siyasebenza, siyazuzisa futhi sisindisa ngisho nokuphila. Khumbula, uSathane ufisa ukukulolozela ukuze ulale ngokomoya, ube buthaka okholweni, ukhulekele uNkulunkulu ngokugcina icala futhi uyekethise ebuqothweni bakho. (1 Thes. 5:6) Ungamvumeli aphumelele! Hlale ulindile njengoba kwenza uJesu—uphapheme emithandazweni yakho, enkonzweni yakho nalapho ubhekana novivinyo. Ngokulandela leyo nkambo, uyoba nokuphila okucebile, okujabulisayo nokwanelisayo ngisho kwamanje njengoba selisishonela lesi simiso sezinto esifayo. Ukuhlale ulindile kuyoqinisekisa nokuthi lapho iNkosi yakho ifika izobhubhisa lesi simiso, iyokuthola uphapheme, ukhuthele futhi wenza intando kaYise osezulwini. Yeka ukuthi uJehova uyokujabulela kanjani ukukuvuza ngenkambo yakho yokwethembeka!—IsAm. 16:15.
[Isithombe ekhasini 6]
UJesu washumayeza owesifazane emthonjeni. Imaphi amathuba okushumayela owacingayo nsuku zonke?
[Isithombe ekhasini 7]
Ukunakekela inhlalakahle engokomoya yomkhaya wakho kubonisa ukuthi uhlale ulindile