Kungani Kufanele Ufunde IBhayibheli?

Ingabe wake wazibuza imibuzo enjenga le? Uma kunjalo, awuwedwa. Emhlabeni wonke abantu bazibuza imibuzo ebaluleke kakhulu ekuphileni. Ungakwazi yini ukuthola izimpendulo?

Izigidi zabantu zingaphendula ngokuthi, “Yebo!” Kungani? Kungoba ziye zathola izimpendulo ezanelisayo zemibuzo yazo eBhayibhelini. Ungathanda yini ukwazi lokho okushiwo yiBhayibheli? Uma kunjalo, ungase uthande ukufundelwa iBhayibheli mahhala oFakazi BakaJehova.a

Kuyiqiniso ukuthi lapho kudingeka bahlole lokho okushiwo iBhayibheli abanye abantu bathi: “Ngimatasa kakhulu.” “Linzima.” “Angifuni ukuzibopha.” Nokho abanye banombono ohlukile. Bayavuma ukufundelwa iBhayibheli. Nazi izibonelo ezimbalwa:

• “Ngaya esontweni lamaKatolika nakwelamaProthestani, ngaya ethempelini lamaSikh, ngaya esikhungweni sezindela ezingamaBuddha futhi ngafundela ubufundisi enyuvesi. Nokho, angizitholanga izimpendulo zemibuzo yami eminingi ngoNkulunkulu. Kwabe sekufika omunye woFakazi BakaJehova emzini wami. Nganeliswe izimpendulo zakhe ezisekelwe eBhayibhelini, ngavuma ukuba angifundele iBhayibheli.”—UGill, eNgilandi.

• “Nganginemibuzo eminingi ngokuphila, kodwa izimpendulo engazithola kumfundisi wami azinganelisanga. Nokho, omunye woFakazi BakaJehova wayiphendula imibuzo yami esebenzisa iBhayibheli kuphela. Lapho engibuza ukuthi ngingathanda yini ukufunda okwengeziwe, ngavumela phezulu.”—UKoffi, eBenin.

• “Ngangifuna ukwazi ukuthi kwenzekani lapho umuntu efa. Ngangikholelwa ukuthi abafileyo bangabalimaza abaphilayo, kodwa ngangifuna ukwazi ukuthi iBhayibheli lithini ngale ndaba. Ngakho ngaqala ukufunda iBhayibheli nomngane owayenguFakazi.”—UJosé, eBrazil.

• “Ngazama ukufunda iBhayibheli kodwa ngangingaliqondi. Kwase kufika oFakazi BakaJehova futhi bangichazela ngokucacile iziprofetho zeBhayibheli eziningana. Ngangifuna ukubona ukuthi yini enye engangingayifunda.”—UDennize, eMexico.

• “Ngangizibuza ukuthi kazi uNkulunkulu uyangikhathalela ngempela yini. Ngakho nganquma ukuthandaza kuNkulunkulu weBhayibheli. Ngosuku olulandelayo oFakazi bangqongqoza emzini wami futhi ngavuma ukufunda nabo iBhayibheli.”—U-Anju, eNepal.

Lokhu okushiwo yilaba bantu kusikhumbuza amazwi kaJesu athi: “Bayajabula abaqaphela isidingo sabo esingokomoya.” (Mathewu 5:3) Yebo, abantu bazalwa benesidingo sokwazi uNkulunkulu. UNkulunkulu kuphela ongakwazi ukugcwalisa leso sidingo futhi ngeZwi lakhe iBhayibheli uyakwenza lokho.

Siqhutshwa kanjani isifundo seBhayibheli? Singakuzuzisa kanjani? Le mibuzo izophendulwa esihlokweni esilandelayo.