Hambisa Omagazini Ngawo Wonke Amathuba
1 Eminyakeni engaphezu kwekhulu, INqabayokulinda ibilokhu ilwela iqiniso loMbuso. Ngobuciko isebenzisa iZwi likaNkulunkulu njengenkemba edabula amaphutha nedalula izimfundiso zenkolo ezingamanga. Umagazini ongumngane wayo iPhaphama! nawo umelela iqiniso. Kubantu abathambekele ekulungeni, ingase ivuse isithakazelo sabo ekwazisweni okungokomBhalo okujulile okutholakala kwezinye izincwadi zeNhlangano. Yini esingayenza ukuze sishiye labomagazini ezandleni zabantu abengeziwe?
2 Isinyathelo sokuqala siwukwazi okuqukethwe omagazini. Lokhu kusho ukubafunda ngokushesha lapho bemukelwa bese kukhulunywa ngalezozihloko nabanye ebandleni. Lokhu kuyosisiza ekubahambiseni ngentshiseko labomagazini kwabanye nasekulondolozeni umbono oqondile ngokuqondene nokubaluleka kwabo.
3 Isinyathelo esilandelayo siwukubekela eceleni isikhathi isonto ngalinye sokuhambisa omagazini kwabanye. Yenza lokhu kube ingxenye yesimiso sakho somsebenzi sasikhathi sonke. Ingabe uwaphaphamele amanye amathuba okuhambisa omagazini?
KHULUMA NABANTU
4 Lapho usemsebenzini kamagazini wendlu ngendlu, ungase uthole ukuthi abantu abaningi abekho ekhaya. Kodwa ungakhuluma nabantu lapho ubathola khona. Yiya kubantu njengoba behamba emgwaqweni. Khuluma nalabo abahlezi ezimotweni, abasebenza egcekeni, abalindele izinto zokuhamba zomphakathi, njalonjalo. Bhekisela esihlokweni esikhethekile nasephuzwini elithakazelisayo. Sebenzisa izithombe nemifanekiso emihle ukuze uvuse isithakazelo sabo. Khuluma nabantu ngendlela efudumele, enobungane, eqondile, futhi wethule ngobuqotho amaphuzu aqinisekile owathole lapho ufunda omagazini.
AMANYE AMATHUBA
5 Lokhu kusikisela kungaba usizo nasekusebenzeni insimu yamabhizinisi. Sebenzisa amathuba lapho osomabhizinisi bengaxiniwe ngabathengi. Abamemezeli abaningi bakuthola kulula ukuhambisa omagazini ensimini yamabhizinisi kunasemsebenzini ovamile wendlu ngendlu.
6 Ingabe uye wazama ukuqalisa umzila kamagazini? Lapho uhambisa omagazini emakhaya noma ezindaweni zamabhizinisi, kwenze kwaziwe ukuthi ubungakujabulela ukubuya emasontweni amabili nomagazini abalandelayo. Kungakumangalisa ukuthola ukuthi bangaki abayolijabulela lelilungiselelo lokubalethela mathupha. Futhi, khumbula ukuthi isikhathi ngasinye lapho uphindela futhi ukhuluma nalowomuntu noma umhambisela izincwadi, ungabika impindelo.
7 Ungase ufune amanye amathuba okuhambisa omagazini, njengokufakaza kusihlwa, ukukhuluma nezihlobo, ukwenza izimpindelo, noma lapho uhamba noma uthenga. Ukusebenzisa konke lokhu kusikisela kungase kube yindlela yokusiza abaningi ukuba babe abafundi basikhathi sonke bezincwadi zethu zeBhayibheli futhi ekugcineni babe abadumisi bakaJehova.