Yenza Okuhle Udunyiswe!
1 “Banokuthula engingakaze ngikubone kwabanye abantu.” “Kuyajabulisa ukuba naleli qembu.” Lokhu ukuphawula okuhle phakathi kokuningi okuye kwamukelwa kubantu abayizibukeli ngemva kwemihlangano yesigodi yanyakenye, okugcizelela idumela elihle esinalo njengenhlangano. (IzAga 27:2; 1 Kor. 4:9) Ekugcineni, udumo olunjalo luya kuJehova. (Math. 5:16) Phambi kwethu kunelinye ithuba elihle lokudumisa uNkulunkulu kulo nyaka eMhlanganweni Wesigodi ‘Wabafundisi Bezwi LikaNkulunkulu.’
2 Unyaka ngamunye sikhunjuzwa ngomusa ngokuqondene nendlela efanele yokuziphatha emhlanganweni. Ngani? Ngoba njengoba isimo sengqondo, ukugqoka nokuziphatha kwezwe kuqhubeka kuwohloka, asifuni ukulilandela. Asifuni ukungcolisa idumela lethu elihle. (Efe. 2:2; 4:17) Ngakho masikhumbule lezi zixwayiso ezilandelayo.
3 Yenza Okuhle—Emahhotela, Ezindaweni Zamakharaveni, Noma Ezindlini Eziqashwayo: Saziwa njengabantu abathembekile. (Heb. 13:18) Ngakho-ke, akufanele singathembeki ngokuba nabantu abangaphezu kwesibabhalisile lapho sihlala khona. Akufanele siphekele khona uma kungavunyelwe. Omunye umphathi waphawula ukuthi wakwazi ukwehlisela oFakazi BakaJehova izindleko zekamelo ngalinye ngoba abakaze bamntshontshele amathawula. Uyazi ukuthi indawo yakhe iyonakekelwa kahle. Ngokuqinisekile ngeke sithathe “izikhumbuzo.” Kunalokho, uma kuyisiko lendawo, siyoshiya isipho esifanele sokubonisa ukwazisa kwethu ngempatho enhle esiyitholile. Ngaso sonke isikhathi siyozibekezelela futhi singazicasuli izisebenzi.
4 Ababukele bahlabeka umxhwele uma bebona abantwana bethu beziphethe ngesizotha nangenhlonipho. (Efe. 6:1, 2) Bazali, sicela ninakekele izingane zenu ukuze zingabi yisiphazamiso kwabanye, ngisho nalapho zisebenzisa indawo yokubhukuda noma ezinye izindawo zokuzijabulisa. Sonke kufanele sigweme ukushaya iminyango noma ukubanga umsindo, ikakhulukazi ebusuku.
5 Singenza okuhle ngokucabangela izivakashi ezingebona oFakazi ezisebenzisa indawo efanayo. Akufanele ukuthatha ukudla kwasehhotela njengomphako. Singalokothi sibe nomuzwa wokuthi ayisithinti imithetho yendawo esilala kuyo.
6 Yenza Okuhle—Enkundleni Yomhlangano: Kuye kwaphawuleka ukuthi abanye bayenqaba ukubambisana nabalindi emhlanganweni, baze ngisho bakhulume nabo ngendlela engebona ubuKristu. Ngenxa yokwehluleka ukulandela iziyalezo zabazalwane nangokupaka lapho kungavunyelwe khona, abanye baye bathola izimoto zabo zingasekho sezidonsiwe. Ngokuqinisekile, isimo sengqondo sokuzicabangela asimenzi umuntu abe umenzi wokuhle, futhi asimdumisi uJehova uNkulunkulu. Ngakho masibe nothando, sibekezele futhi sibambisane nabanye.—Gal. 5:22, 23, 25.
7 Lapho amasango enkundla yomhlangano evulwa ngo-7:00 ekuseni, abanye abazalwane nodade baye babonakale begijima futhi besunduza abanye ukuze bathole izindawo “ezingcono.” Abanye baye balimala ngenxa yalolu hlobo lokuziphatha. Njengoba kuye kwasikiselwa ukuba siphathe ukudla kwasemini okulula, akufanelekile ukudeka amatafula endaweni yokupaka sibe nedili lokudla. Lokhu kunganikeza umbono wamapikiniki avame emidlalweni.
8 Yenza Okuhle—Ngendlela Ogqoka Futhi Uzilungise Ngayo: Ngemva komunye wemihlangano yesigodi yangonyaka odlule, umhleli wephephandaba elikhulu ledolobhakazi elithile wabhala: “Ngaphezu kwanoma yini enye, kwakuwukuziphatha koFakazi ngokwabo okwakuhlaba umxhwele. Yeka ukuthi kwakuqabula kanjani ukubona abantu abaningi kangaka beziphethe ngendlela ehloniphekile. Igqoké ezikanokusho, imikhaya engamakhulu ngamakhulu imelele izizwe nezinhlanga ezihlukahlukene yayithutheleka ngokuthula ingena enkundleni. Ukuziphatha kwayo kwakuhluke kakhulu kulokho kwezixuku eziningi ezisebenzisa le nkundla. Eqinisweni, oFakazi bahluke kakhulu emaqenjini amaningi. Sekuyinto evame kakhulu ukubona ukuziphatha okungenanhlonipho emphakathini. . . . Ngempela, liyaqabula iqembu loFakazi.” Sengathi singelokothe sivumele ukugqoka kwethu nokuzilungisa noma ukuziphatha kwethu kuphazamise nanganoma iyiphi indlela esimweni esingokomoya somhlangano.—Fil. 1:10; 1 Thim. 2:9, 10.
9 Yenza Okuhle—Lapho Kubhapathizwa Khona: Abazobhapathizwa bayofuna ukubheka lesi senzakalo ngesizotha esikhulu. Ukugqoka izingubo zokungena emanzini ezifanelekayo kuyobonisa ukwazisa ngobungcwele balesi senzakalo. Kuyokuba okunenzuzo kakhulu uma abaqhuba izifundo zeBhayibheli bengabukeza nalabo ababafundelayo “Imibuzo Evela Kubafundi” kuyi-Nqabayokulinda ka-April 1, 1995, ngaphambi kokuya emhlanganweni.
10 Ukuziphatha kwethu okuhle kokuhlonipha uNkulunkulu kufakazela izinkolelo zethu zobuKristu futhi kwenze kube lula ngabanezinhliziyo eziqotho ukuba balibone iqiniso. Ngakho-ke, ‘masiqhubeke senza okuhle’ sidunyiswe ngesikhathi siseMhlanganweni Wesigodi ‘Wabafundisi Bezwi LikaNkulunkulu.’—Roma 13:3.