Ingabe Uyazindela?
Uzindela ukwenzani? Ukugcwalisa ikhadi i-DPA (durable power of attorney) elinikezwa oFakazi ababhapathiziwe. Njengoba ‘ungazi ukuthi ukuphila kwakho kuyoba njani kusasa,’ kubalulekile ukuba unqume kusengaphambili futhi ubonise ngokubhala phansi ukuthi yiziphi izindlela zokwelapha nezinqubo oyozamukela esimweni esiphuthumayo. (Jak. 4:14; IzE. 15:28, 29) Ukuze sikusize kule ndaba, kuye kwakhishwa i-video ethi Transfusion-Alternative Health Care—Meeting Patient Needs and Rights. Yibukele, bese uthandaza futhi uhlaziye lokho okufundile usebenzisa imibuzo engezansi.—Phawula: Ngenxa yokuthi le video ibonisa nezigcawu ezimfushane zabantu abahlinzwayo, abazali kufanele basebenzise ukwahlulela okuhle lapho beyibukela nezingane ezincane.
(1) Kungani abanye emkhakheni wezokwelapha sebekubheka ngelinye iso ukumpontshelwa igazi? (2) Nikeza izibonelo ezintathu zokuhlinza okuyinkimbinkimbi okuye kwenziwa ngaphandle kokumpompela igazi. (3) Bangaki odokotela bezokwelapha nabahlinzayo emhlabeni wonke abazimisele ukwelapha iziguli ngaphandle kokuzimpompela igazi? Kungani bezimisele ukwenza kanjalo? (4) Ucwaningo lwamuva nje ezibhedlela luboniseni ngokusetshenziswa kwegazi? (5) Ziyini izingozi zempilo ezihlobene nokumpontshelwa igazi? (6) Ochwepheshe abaningi baye bafinyelela kusiphi isiphetho mayelana nezinzuzo zezindlela zokwelapha ngaphandle kwegazi? (7) Kubangelwa yini ukuntuleka kwegazi emzimbeni? Kungabekezeleleka ngezinga elingakanani kubantu? Yini engenziwa esimweni esinjalo? (8) Umzimba wesiguli ungakhuthazwa kanjani ukuba ukhiqize amangqamuzana abomvu egazi? (9) Yiziphi izinqubo ezisetshenziswa ekunciphiseni ukopha phakathi nokuhlinza? (10) Ingabe ukwelapha ngaphandle kwegazi kungasebenza ezinganeni ezincane noma kubantu abasesimweni esiphuthumayo esisongela ukuphila? (11) Yisiphi esinye sezimiso eziyisisekelo zokunakekelwa kwempilo okuhle? (12) Kungani kubalulekile ukuba amaKristu enze izinqumo zokwelashwa ngaphandle kwegazi kusengaphambili? Singakwenza kanjani lokhu?
Ukwamukela ezinye zezindlela zokwelapha eziboniswe kule video kuyindaba yomuntu siqu umuntu okufanele azinqumele kuyo ngokuvumelana nonembeza wakhe oqeqeshwe ngeBhayibheli. Ingabe usunqume ngokucacile ukuthi iziphi izindlela zokwelapha nezinqubo okulungele ukuzamukela wena nezingane zakho? Ukuze uthole imininingwane eyengeziwe ngalezi zindaba, bheka “Imibuzo Evela Kubafundi” kuyi-Nqabayokulinda ka-June 15, 2004 neka-October 15, 2000, kanye nesenezelo se-Nkonzo Yethu YoMbuso ka-January 2007 esinesihloko esithi “Kufanele Ngizibheke Kanjani Izingxenyana Zegazi Nezinqubo Zokwelapha Ezihilela Ukusetshenziswa Kwegazi Lami?” (CD-ROM km 11/06). Abantu obakhethe njengabameli bakho bezokwelapha nanoma imaphi amalungu omkhaya angebona oFakazi kufanele baziswe ngokugcwele ngezinqumo zakho.