Ukuthuthukisa Amakhono Ethu Enkonzweni—Ukuba Nomzila Kamagazini

Okwenza Kubaluleke: Abantu abaningi abafunda omagazini bethu abakuthandi ukufunda nathi iBhayibheli. Mhlawumbe bayakujabulela ukuba senkolweni abakuyo noma banomuzwa wokuthi abanaso isikhathi sokufunda. Nokho, njengoba bebafunda njalo omagazini bethu, kungenzeka kwakheke isifiso sokufunda iZwi likaNkulunkulu. (1 Pet. 2:2) Isihloko esithile singase sibathinte inhliziyo noma izimo zabo zingase zishintshe. Ukubahambela njalo, singahlali isikhathi eside kuyobenza bakhululeke futhi kusenze sifunde izinto ezibathakazelisayo nezibakhathazayo. Ngokuhamba kwesikhathi, kungase kuqale isifundo seBhayibheli.

Indlela Yokukwenza:

Inyanga ngayinye, hlela isikhathi ozohambisela ngaso othile omagazini bamuva be-Nqabayokulinda ne-Phaphama! Ungase ubuyele kuye nganoma isiphi isikhathi phakathi nenyanga ukuze umkhuthaze ukuba afunde isihloko esithile kumagazini owamshiyela wona noma umhambisele isipho sangaleyo nyanga. Yigcine kahle imininingwane ngaye.—Bheka INkonzo Yethu YoMbuso ka-January 2014, k. 3.
Kulungiselele ukuhambela ngakunye. Kunokumane ushiye omagazini, xoxa nomninikhaya futhi uzame ukwakha ubungane naye ukuze uhlakulele isithakazelo sakhe.
Phaphamela amathuba okuqala isifundo. Uma othile emzileni wakho ekubuza ngalokho okushiwo iBhayibheli ngesihloko esithile, mphathele incwadi esifundisa ngayo enempendulo futhi nixoxe ngayo. Ngaphambi kokumshiya, phakamisa umbuzo ohambisana nalokho enixoxa ngakho bese nixoxa ngawo ekuhambeleni okulandelayo. Uma njalo uba nezingxoxo ezihleliwe nothile usebenzisa iBhayibheli noma enye yezincwadi esifundisa ngazo, usuke uqhuba isifundo seBhayibheli. Uke wamhambisela yini umninikhaya incwajana ethi Izindaba Ezinhle futhi wambonisa kafushane indlela yokuqhuba isifundo seBhayibheli? Usuke wambonisa i-video ethi Kungani Kufanele Utadishe IBhayibheli? nethi Siqhutshwa Kanjani Isifundo SeBhayibheli? Ngisho noma umuntu ebengenaso isithakazelo ekufundelweni iBhayibheli esikhathini esedlule, izimo ziyashintsha. Kungazuzisa yini ukubuye uzame ukuxoxa naye?

Zama Lokhu Phakathi Nenyanga:

Yenza uhlu lwalabo okungenzeka babe semzileni wakho kamagazini. Bahambisele omagazini bamuva futhi ubatshele ukuthi uzobalethela nabenyanga elandelayo.