Ukuthuthukisa Amakhono Ethu Enkonzweni—⁠Ukufakaza Ensimini Yamabhizinisi

Kungani Kubalulekile: Njengoba abantu abaningi besebenza amahora amaningi, ngokuvamile indlela enhle kakhulu yokubafinyelela ngesigijimi soMbuso iwukufakaza kubo lapho besebenza khona. Ukufakaza ensimini yamabhizinisi kungajabulisa futhi kukhiqize, ngoba akunakwenzeka sifike kungenamuntu futhi izisebenzi zivame ukuba nomusa kulabo ezibabheka njengamakhasimende. Ukuze baphumelele, abamemezeli kumelwe bahlulele kahle futhi babe yisibonelo endleleni abagqoka nabazilungisa ngayo. (2 Kor. 6:3) Ngakho-ke, umbonisi wenkonzo kufanele ahlole ngokucophelela ukuthi amasimu asetshenzwa obani futhi kanjani.

Indlela Yokukwenza:

Lungiselela intshumayelo emfushane. Uma sixoxa nezisebenzi isikhathi eside, singase singalinikezwa ithuba lokuxoxa nazo ngokulandelayo.
Khetha isikhathi sokushumayela lapho kungematasa kakhulu, njengalapho besanda kuvula.
Zama ukuqale ukhulume nophethe. Yiba nobungane. Ungase uthi, “Sixoxa nabantu kafushane ezindaweni abasebenzela kuzo ngoba kunzima ukubathola emakhaya.” Xoxa naye ngeBhayibheli kafushane bese umnika ipheshana, omagazini noma enye incwadi. Ukuze bangasiphambanisi nabantu abadayisayo kuyoba kuhle uma singakhulumi ngelungiselelo lomnikelo ngaphandle kwalapho sibuzwa ukuthi umsebenzi wethu unakekelwa kanjani ngokwezimali.
Uma ophethe enobungane, cela imvume yokuxoxa kafushane nezinye izisebenzi. Kwamanye amabhizinisi kungase kube ngcono ukucela ukushiya izincwadi endlini yokudlela.
Yahlulela kahle futhi uvumelane nezimo. Ngokwesibonelo, uma isisebenzi sikhuluma nomthengi noma simatasa, linda kuze kube yilapho sesiqedile.

Zama Lokhu Phakathi Nenyanga:

Phakathi nokuKhulekela Komkhaya kwenu okulandelayo, prakthizani intshumayelo emfushane eningayisebenzisa uma nisebenza insimu yamabhizinisi.