Ukubhekana Nobuhlungu Bokungathembeki Komngane Womshado

UMARGARITA nomyeni wakhe uRaúl, base bekhonze uJehova ndawonye njengezikhonzi zesikhathi esigcwele iminyaka eminingi.a Kodwa ngemva nje kokuzalwa kwengane yabo yokuqala, uRaúl waqala ukuhlehla kuJehova. Wagcina eseziphatha kabi futhi wasuswa ebandleni lobuKristu. UMargarita uthi: “Lapho kwenzeka konke lokhu, ngangithi ngizofa. Akwenza kwangephula inhliziyo futhi ngangingazi nokuthi ngenzeni.”

Umyeni kaJane wamphula inhliziyo ngendlela ehlukile ngemva nje kokuba beshadile. Waqala ukumhlukumeza ngokomzimba. UJane uthi: “Mhla eqala ukungishaya ngenqindi, ngashaqeka, ngajabha futhi ngaphoxeka. Wacela ukuba ngimxolele, kodwa kwaba umkhuba wakhe ukungishaya axolise. Ngangicabanga ukuthi kuyisibopho sami njengomKristu ukuba ngimthethelele njalo futhi ngikhohlwe. Ngangicabanga nokuthi kuyoba ukungathembeki ukutshela abanye ngisho nabadala bebandla ngale nkinga yethu. Lo mkhuba wokuhlukunyezwa nokuthethelela waqhubeka iminyaka. Phakathi naleso sikhathi, ngangicabanga ukuthi kumelwe ukuba kukhona engangingakwenza ukuze umyeni wami angithande. Lapho ekugcineni engishiya nendodakazi yethu, ngaba nomuzwa wokuthi umendo wawungehlulile nokuthi ngangehlulekile ukusho noma ukwenza okwanele okwakuyolondoloza umshado wethu.”

NjengoMargarita noJane, kungenzeka ukuthi uhlukumezekile ngokomzwelo, awunamali futhi ucindezelekile ngokomoya ngenxa yokuthi umyeni wakho akazange athembeke kuwe. Noma kungenzeka ukuthi ungumyeni okhathazekile nobhekene nobunzima ngoba umkakho engazange athembeke. Yiqiniso, njengoba iBhayibheli labikezela, siphila ‘ezikhathini ezibucayi okunzima ukubhekana nazo.’ Lesi siprofetho sibonisa ukuthi “ezinsukwini zokugcina” imikhaya yayiyohlaselwa, lungabikho nhlobo uthando kweminingi. Abanye babeyothi bakhonza uNkulunkulu kodwa bebe benza okuphambene. (2 Thim. 3:1-5) Lezi zinkinga ziyawathinta namaKristu eqiniso; ngakho, yini engakusiza ukuze ubhekane nobuhlungu bokungathembeki komuntu oshade naye?

Zibheke Ngendlela UJehova Akubheka Ngayo

Ekuqaleni, ungase ukuthole kunzima ukukholelwa ukuthi umuntu omthandayo angakuzwisa ubuhlungu ngale ndlela. Ungase uqale ngisho nokuzibeka icala ngesono sakhe.

Nokho, khumbula ukuthi ngisho nomuntu ophelele uJesu wakhashelwa umuntu ayemethemba futhi emthanda. UJesu wakhetha abaphostoli ayezosondelana kakhulu nabo, ngemva kokuthandaza isikhathi eside. Lapho ebakhetha laba abangu-12, bonke babeyizinceku zikaJehova ezithembekile. Ngakho, ngokuqinisekile uJesu waba lusizi kakhulu lapho uJuda ‘ephenduka imbuka.’ (Luka 6:12-16) Nokho, uJehova akazange abeke uJesu icala ngezenzo zikaJuda.

Yiqiniso, okwamanje akekho umngane womshado ophelele. Bobabili abangane bomshado bayowenza amaphutha. Umhubi ophefumulelwe wayeqinisile lapho ethi: “O Jah, ukube ububheka iziphambeko, Jehova ubani obengama?” (IHu. 130:3) Bobabili kufanele balingise uJehova, bangakunaki ukushiyeka komunye nomunye.—1 Pet. 4:8.

Nokho, “ngamunye wethu uyozilandisela kuNkulunkulu.” (Roma 14:12) Uma umngane womshado eseqala umkhuba wokukuhlukumeza ngamazwi noma ngezenzo, nguye onecala noyolandisa kuJehova. UJehova uyabulahla ubudlova nenkulumo echaphayo, ngakho asikaze sibe khona isizathu sokuphatha umngane womshado ngendlela engenaluthando nengenanhlonipho kanjalo. (IHu. 11:5; Efe. 5:33; Kol. 3:6-8) Empeleni, uma umKristu ebonisa isifuthefuthe sentukuthelo ngokuphindaphindiwe futhi engaphenduki, kumelwe asuswe ebandleni lobuKristu. (Gal. 5:19-21; 2 Joh. 9, 10) Umngane womshado akufanele azizwe enecala ngokusibika kubadala leso senzo esingqubuzana nezimiso zobuKristu. Ngokuqinisekile, uJehova uyazwelana nezisulu zokuphathwa kabi ngaleyo ndlela.

Lapho umngane womshado ephinga, akoni umngane wakhe ongenacala kuphela kodwa wona noJehova. (Math. 19:4-9; Heb. 13:4) Uma umngane ongenacala ebezama ukuphila ngezimiso zeBhayibheli, akufanele azizwe enecala ngesono sokungathembeki kwesiphingi.

Khumbula ukuthi uJehova uyayazi indlela ozizwa ngayo. Uzichaza njengomyeni nomnikazi wesizwe sakwa-Israyeli, futhi iZwi lakhe linamavesi amaningi athinta inhliziyo abonisa ubuhlungu abuzwa ngenxa yezenzo zokuphinga ngokomoya zaleso sizwe. (Isaya 54:5, 6; Jer. 3:1, 6-10) Qiniseka ukuthi uJehova uyazibona izinyembezi zakho uma umngane wakho womshado eye wangathembeka ngandlela-thile. (Mal. 2:13, 14) Uyazi ukuthi uyidinga kangakanani induduzo nesikhuthazo.

Indlela uJehova Anikeza Ngayo Induduzo

Enye indlela uJehova anikeza ngayo induduzo yibandla lobuKristu. UJane wakuthola lokho kusekelwa. Uyakhumbula: “Sahanjelwa umbonisi wesifunda lapho umoya wami uphansi impela. Wayazi ukuthi ngangicindezeleke kangakanani njengoba umyeni wami ayefake isahlukaniso. Wazinika isikhathi sokungisiza ukuba ngicabange ngemiBhalo enjengeyoku-1 Korinte 7:15. La mavesi namazwi akhe omusa adambisa umuzwa wecala enganginawo futhi anginika ukuthula kwengqondo kwezinga elithile.”b

UMargarita, okukhulunywe ngaye ekuqaleni, naye wafunda ukuthi uJehova unikeza usizo olungokoqobo ngebandla lobuKristu. Uthi: “Lapho kuba sobala ukuthi umyeni wami wayengaphenduki, ngathatha izingane zami ngathuthela kwelinye idolobha. Ngafike ngaqasha indlu enamakamelo amabili. Ngakusasa, ngigajwe ukudabuka, kwangqongqoza umuntu lapho ngisakhipha izimpahla ezikhwameni. Ngacabanga ukuthi umnikazi wendawo engangiqashe kuyo futhi owayehlala eduze kwethu. Ngamangala ukuthola ukuthi kwakungudade owafundela umama futhi wasiza nawo wonke umkhaya wakithi ukuba uthole iqiniso. Kwayena wayengalindele ukungithola lapho, wayeze ukuzofundela umnikazi wendawo. Angikwazanga ukuzibamba lapho ngimbona. Ngamtshela yonke into futhi sakhala sobabili. Wahlela ngokushesha ukuba siye emhlanganweni webandla ngalo lelo langa. Ibandla lasamukela, futhi abadala benza amalungiselelo okungisiza ukuba nginakekele izidingo zomkhaya wami ezingokomoya.”

Indlela Abanye Abangasiza Ngayo

Ngempela, amalungu ebandla lobuKristu anganikeza usizo olungokoqobo ngezindlela eziningi. Ngokwesibonelo, manje uMargarita kwase kudingeka athole umsebenzi. Omunye umkhaya ebandleni wazicelela ukunakekela izingane zakhe uma kudingeka lapho ziphuma esikoleni.

UMargarita uthi: “Usizo engilwazisa nakakhulu yilapho abafowethu nodade becela ukuhamba nathi enkonzweni yasensimini.” Ngokunikeza usizo olunjalo olungokoqobo, amalungu ebandla asiza ‘ekuthwalisaneni imithwalo yomunye nomunye’ futhi ngokwenzenjalo agcwalisa “umthetho kaKristu.”—Gal. 6:2.

Labo abahlupheka ngenxa yezono zabanye balwazisa ngempela usizo olunjengalolu. UMonique, owalahlwa umyeni wakhe, emshiya nesikweletu esingamaRandi angu-110- 000 ekhadini lokuthenga ngesikweletu nezingane ezine, uthi: “Abafowethu nodadewethu abangokomoya bangibonisa uthando olukhulu. Angazi ukuthi ngangiyoba yini ngaphandle kwabo. Nginomuzwa wokuthi uJehova unginike abafowethu abahle kakhulu abaye bazidela ngenxa yezingane zami. Ngiye ngajabulela ukubona izingane zami ziba abantu abavuthiwe ngokomoya ngenxa yalolo sizo. Uma ngidinga iseluleko, abadala babengisiza. Uma ngidinga umuntu engizokhuluma naye, babengilalela.”—Marku 10:29, 30.

Nokho, umngane onothando uyokwazi ukubona lapho kungadingeki ukuba axoxe ngokuhlangenwe nakho okubuhlungu komunye. (UmSh. 3:7) UMargarita uthi: “Kaningi ngangikujabulela ukuxoxa nodade basebandleni lami elisha ngomsebenzi wokushumayela, izifundo zethu nangezingane zethu—nanganoma yini enye ngaphandle kwezinkinga zami. Ngiyakwazisa ukuthi bangisiza ukuba ngikhohlwe osekwadlula futhi ngiqale ukuphila okusha.”

Melana Nesifiso Sokuziphindiselela

Ngezinye izikhathi, ungase ungazibeki icala ngokuziphatha komngane wakho womshado kodwa kungase kukucasule ukuthi uhlupheka nje kungenxa yezono zakhe. Uma ukuvumela lokhu ukuba kukhule, kungakwenza buthaka ukuzimisela kwakho ukuhlale uthembekile kuJehova. Ngokwesibonelo, ungase ulingeke ukuba ufune izindlela zokuziphindiselela kumngane womshado ongathembekanga.

Uma usunaleyo mizwa, ungacabanga ngesibonelo sikaJoshuwa noKalebi. La madoda athembekile afaka ukuphila kwawo engozini eyohlola iZwe Lesithembiso. Ezinye izinhloli azibanga nokholo futhi zenza abantu ukuba bafulathele uJehova. Amanye ama-Israyeli aze afuna ukukhanda uJoshuwa noKalebi ngamatshe lapho bezama ukukhuthaza isizwe ukuba sihlale sithembekile. (Num. 13:25–14:10) Ngenxa yezenzo zama-Israyeli, uJoshuwa noKalebi baphoqeleka ukuba bazulazule ehlane iminyaka engu-40, yize bona babengenaphutha.

Cishe uJoshuwa noKalebi badumala, nokho abazange bavumele izono zabafowabo zibenze bafukamele intukuthelo. Bagxila ekulondolozeni ingokomoya labo. Lapho iminyaka engu-40 abayichitha ehlane iphela, bona kanye namaLevi abazange bafe lapho leso sizukulwane sifa futhi bavunyelwa ukuba bangene eZweni Lesithembiso.—Num. 14:28-30; Josh. 14:6-12.

Okwenziwe umngane wakho womshado ongathembekile kungakuzwisa ubuhlungu isikhathi eside impela. Umshado ungase uphele, kodwa wena ungaqhubeka uzwa ubuhlungu ngokomzwelo futhi unezinkinga ezingokwezimali kamuva. Nokho, kunokuba uvumele imicabango emibi ifiphaze ukucabanga kwakho, khumbula ukuthi uJehova wazi indlela engcono kakhulu yokujezisa labo abazephula ngamabomu izindinganiso zakhe, njengoba nje ama-Israyeli angenalukholo akubona ehlane.—Heb. 10:30, 31; 13:4.

Ungaphumelela!

Kunokuvumela imicabango emibi ikusinde, yondla ingqondo yakho ngemicabango kaJehova. UJane uthi: “Ukulalela amakhasethi e-Nqabayokulinda ne-Phaphama! kwakungisiza ukuba ngibhekane nosizi lwami. Imihlangano nayo yayingiqinisa kakhulu. Ukuhlanganyela ngokugcwele emihlanganweni kwakungisiza ukuba ngingagxili ezinkingeni zami. Nomsebenzi wokushumayela wawungisiza ngendlela efanayo. Lapho ngisiza abanye ukuba bakhe ukholo lwabo kuJehova, ngangiqinisa nolwami. Ukunakekela abantu engibafundelayo kwangisiza ukuba ngigxilise ingqondo yami ezintweni ezibaluleke kakhudlwana.”

UMonique, okukhulunywe ngaye ekuqaleni, uthi: “Ukuba khona njalo emihlanganweni yebandla nokuya enkonzweni yasensimini kaningi ngangokunokwenzeka kwangisiza ukuba ngikhuthazele. Njengomkhaya, siye sasondelana kakhulu saphinde sasondelana nebandla. Ubunzima engabhekana nabo bungenze ngabona lapho ngibuthaka khona. Ngiye ngavivinywa, kodwa ngosizo lukaJehova ngiyaphumelela.”

Nawe ungaphumelela lapho ubhekene novivinyo. Naphezu kobuhlungu obubangelwa ukungathembeki komuntu oshade naye, lwela ukusebenzisa iseluleko sikaPawulu esiphefumulelwe: “Masingayeki ukwenza okuhle, ngoba ngenkathi efanele siyovuna uma singakhathali.”—Gal. 6:9.

[Imibhalo yaphansi]

[Isithombe ekhasini 31]

Abangane bomshado abalahliwe bayabazisa labo ababasizayo enkonzweni yasensimini