Thola Ukuqabuleka Ezintweni Ezingokomoya
“Bekani ijoka lami phezu kwenu . . . , nizotholela imiphefumulo yenu ukuqabuleka.”—MATH. 11:29.
1. Iliphi ilungiselelo elenziwa uNkulunkulu eNtabeni yaseSinayi, futhi ngani?
LAPHO kusungulwa isivumelwano soMthetho eNtabeni YaseSinayi, sahlanganisa nelungiselelo leSabatha lamasonto onke. Ngomkhulumeli wakhe, uMose, uJehova wayala isizwe sakwa-Israyeli: “Umsebenzi wakho uyowenza izinsuku eziyisithupha; kodwa ngosuku lwesikhombisa kumelwe uyeke, ukuze inkunzi yakho nembongolo yakho kuphumule nendodana yesigqilakazi sakho kanye nomfokazi bazihlumelele.” (Eks. 23:12) Yebo, uJehova wabacabangela abantu bakhe ababengaphansi koMthetho, wenza ilungiselelo lothando lokuba kube nosuku lokuphumula ukuze “bazihlumelele.”
2. Ama-Israyeli ayezuza kanjani ngokugcina iSabatha?
2 Ingabe iSabatha laliwusuku nje lokuphumula? Cha, laliyingxenye ebaluleke kakhulu yokukhulekela kwama-Israyeli uJehova. Ukugcina iSabatha kwakunikeza izinhloko zemikhaya isikhathi sokufundisa imikhaya yazo ukuba ‘igcine indlela kaJehova ukuba yenze ukulunga.’ (Gen. 18:19) Kwakunikeza nemikhaya nabangane ithuba lokuba ndawonye ukuze bazindle ngezenzo zikaJehova futhi bajabulele ubudlelwane. (Isaya 58:13, 14) Okubaluleke nakakhulu ukuthi iSabatha laliwumfuziselo ongokwesiprofetho wesikhathi lapho kwakuyotholakala khona ukuqabuleka kweqiniso okuyolethwa ukuBusa KukaKristu Kweminyaka Eyinkulungwane. (Roma 8:21) Kuthiwani ngosuku lwethu? AmaKristu eqiniso athanda izindlela zikaJehova angakuthola kuphi futhi kanjani lokho kuqabuleka?
Thola Ukuqabuleka Ngokuhlangana NamaKristu
3. AmaKristu ekhulu lokuqala asekelana kanjani, futhi kwaba namuphi umphumela?
3 Umphostoli uPawulu wachaza ibandla lobuKristu ngokuthi “insika nozime lweqiniso.” (1 Thim. 3:15) AmaKristu okuqala ayethola ukusekelwa ngokukhuthazana nangokwakhana othandweni. (Efe. 4:11, 12, 16) Ngesikhathi ese-Efesu, uPawulu wakhuthazeka ngokuvakashelwa amalungu ebandla laseKorinte. Phawula indlela azizwa ngayo ngalokho kuvakashelwa: “Ngiyajabula ngokuba khona kukaStefana noFortunatu no-Akhayiku, ngoba . . . bawuqabulile umoya wami.” (1 Kor. 16:17, 18) Ngokufanayo, lapho uThithu eyokhonza abazalwane eKorinte, uPawulu wababhalela kamuva: “Nina nonke niye nawuqabula umoya wakhe.” (2 Kor. 7:13) Nanamuhla, oFakazi BakaJehova bathola ukuqabuleka kwangempela ngobudlelwane obakhayo namanye amaKristu.
4. Imihlangano yebandla isiqabula kanjani?
4 Uyazazela nawe ukuthi imihlangano yebandla ingumthombo wenjabulo enkulu. Uma silapho, sithola ‘ukukhuthazana phakathi kwethu, omunye nomunye ngokholo lomunye.’ (Roma 1:12) Abafowethu nodadewethu abangamaKristu ababona nje abantu esibajwayele noma abantu nje esihlangana nabo ngankathi. Bangabangane beqiniso, abantu esibathandayo nesibahloniphayo. Sithola injabulo enkulu nenduduzo ngokuhlangana nabo njalo emihlanganweni.—Filem. 7.
5. Singaba kanjani umthombo wokuqabuleka komunye nomunye emihlanganweni emikhulu nemincane?
5 Omunye umthombo wokuqabuleka yimihlangano yethu yaminyaka yonke emikhulu nemincane. Ngaphezu kokusinika amanzi anika ukuphila eqiniso elivela eZwini likaNkulunkulu, iBhayibheli, le mibuthano emikhulu isinikeza nethuba ‘lokwanuleka’ ebudlelwaneni bethu. (2 Kor. 6:12, 13) Kodwa kumelwe senzenjani uma sinamahloni futhi sikuthola kunzima ukuzihlanganisa nabantu? Enye indlela yokujwayelana nabafowethu nodadewethu iwukusebenza ngokuzithandela emhlanganweni. Ngemva kokusiza emhlanganweni wezizwe, omunye udade wathi: “Ngaphandle komkhaya wami nabangane abambalwa, ababangaki abantu engangibazi kulo mhlangano. Kodwa ukusiza ekuhlanzeni kungenze ngazi abafowethu nodade abaningi! Kwakungeve kumnandi.”
6. Iyiphi enye indlela esingathola ngayo ukuqabuleka lapho siseholidini?
6 Ama-Israyeli ayenemikhosi emithathu ngonyaka eyayiba seJerusalema ayevame ukuyokhulekela kuyo. (Eks. 34:23) Ngokuvamile lokhu kwakuhilela ukushiya amasimu nezitolo nokuhamba ngezinyawo emigwaqweni ewubhuqu izinsuku eziningi. Noma kunjalo, ukuya ethempelini kwakuphumela ‘ekujabuleni okukhulu’ njengoba labo abakhona “babedumisa uJehova.” (2 IziKr. 30:21) Eziningi zezinceku zikaJehova namuhla nazo zithola ukuthi ukuhamba nemikhaya yazo zivakashele eBethel, izakhiwo zegatsha loFakazi BakaJehova eziseduze, kuzilethela injabulo enkulu. Ingabe ningakwenza lokho lapho nihlela iholidi lomkhaya elilandelayo?
7. (a) Imibuthano yokuzijabulisa ingaba kanjani ezuzisayo? (b) Yini engenza umbuthano ube owakhayo noyohlale ukhumbuleka?
7 Ukuba nemibuthano yokuzijabulisa nomndeni nabangane nakho kungakhuthaza. Inkosi ehlakaniphile uSolomoni yathi: “Akukho lutho olungcono kumuntu kunokuba adle futhi aphuze, abangele umphefumulo wakhe ubone okuhle ngenxa yomsebenzi wakhe onzima.” (UmSh. 2:24) Imibuthano yokuzijabulisa ayigcini ngokuqabula umphefumulo kuphela, kodwa iqinisa nesibopho sothando phakathi kwethu namanye amaKristu njengoba sithola ithuba lokwazana kangcono nawo. Kungcono ukugcina imibuthano yokuzijabulisa imincane futhi siqiniseke ukuthi iqondiswa kahle, ikakhulukazi uma kuzoba khona utshwala, ukuze ibe eyakhayo neyohlale ikhumbuleka.
Inkonzo Iyasiqabula
8, 9. (a) Bonisa umahluko phakathi kwesigijimi sikaJesu nesababhali nabaFarisi. (b) Sizuza kanjani ngokuhlanganyela amaqiniso eBhayibheli nabanye?
8 UJesu wayeyishisekela inkonzo futhi wakhuthaza abafundi bakhe ukuba nabo benze okufanayo. Lokhu kubonakala emazwini akhe: “Ukuvuna kukhulu, kodwa izisebenzi zimbalwa. Ngakho-ke, ncengani iNkosi yokuvuna ukuba ithumele izisebenzi ekuvuneni kwayo.” (Math. 9:37, 38) Isigijimi esafundiswa uJesu sasiqabula ngempela; ‘siyizindaba ezinhle.’ (Math. 4:23; 24:14) Lokhu kwakuhluke kakhulu emithethweni enzima abaFarisi ababeyibekele abantu.—Funda uMathewu 23:4, 23, 24.
9 Lapho sihlanganyela isigijimi soMbuso nabanye, siyabaqabula ngokomoya futhi ngesikhathi esifanayo sigxilisa amaqiniso eBhayibheli ayigugu ezingqondweni nasezinhliziyweni zethu. Umhubi washo kufanele: “Dumisani uJah, ngoba kuhle ukuhubela uNkulunkulu wethu; ngoba kumnandi.” (IHu. 147:1) Ungakwazi yini ukwandisa injabulo yakho oyithola ngokudumisa uJehova komakhelwane bakho?
10. Ingabe impumelelo yethu enkonzweni inqunywa indlela abantu abasabela ngayo? Chaza.
10 Yiqiniso, kwezinye izindawo abantu basabela kangcono ezindabeni ezinhle kunakwezinye. (Funda izEnzo 18:1, 5-8.) Uma uhlala endaweni lapho abantu bengasabeli kahle khona esigijimini soMbuso, zama ukugxila kokuhle okufezayo enkonzweni. Khumbula ukuthi imizamo yakho eqhubekayo yokumemezela igama likaJehova ayilona ize. (1 Kor. 15:58) Ngaphezu kwalokho, ukuphumelela kwethu enkonzweni akunqunywa indlela abantu abasabela ngayo ezindabeni ezinhle. Singaqiniseka ukuthi uJehova uyoqinisekisa ukuthi abantu abanenhliziyo enhle bayalithola ithuba lokuzwa isigijimi soMbuso.—Joh. 6:44.
UkuKhulekela Komkhaya Kuyaqabula
11. Imuphi umthwalo wemfanelo uJehova awunikeze abazali, futhi bangawufeza kanjani?
11 Abazali abesaba uNkulunkulu banomthwalo wemfanelo wokufundisa izingane zabo ngoJehova nezindlela zakhe. (Dut. 11:18, 19) Uma ungumzali, uyasibeka yini isikhathi sokufundisa izingane zakho ngoBaba wethu osezulwini onothando? UJehova uye walungiselela intilibathwa yokudla okungokomoya okunempilo ngezincwadi, omagazini, ama-video nangezinto eziqoshiwe ukuze akusize ufeze lo mthwalo wemfanelo obalulekile futhi wanelise izidingo zomkhaya wakho.
12, 13. (a) Imikhaya ingazuza kanjani elungiselelweni lokuKhulekela Komkhaya kwakusihlwa? (b) Abazali bangaqiniseka kanjani ukuthi ukukhulekela komkhaya kuwumthombo wokuqabuleka?
12 Ngaphezu kwalokho, isigaba senceku ethembekile neqondayo senze ilungiselelo lokuba kube nobusuku bokuKhulekela Komkhaya. Lobu ubusuku obubekelwe eceleni isonto ngalinye ukuze kuqhutshwe isifundo seBhayibheli somkhaya. Abaningi bathi leli lungiselelo libenze basondelana futhi liqinise ubuhlobo babo noJehova. Kodwa abazali bangaqiniseka kanjani ukuthi ukukhulekela komkhaya kuba umthombo wokuqabuleka ngokomoya?
13 Isikhathi sokuKhulekela Komkhaya akufanele sibe isikhathi esibandayo futhi esingakhululekile. Kakade, sikhonza ‘uNkulunkulu ojabulayo,’ futhi ufuna sijabule lapho simkhulekela. (1 Thim. 1:11; Fil. 4:4) Ukuba nobunye ubusuku bokuxoxa ngamagugu angokomoya aseBhayibhelini kuyisibusiso sangempela. Abazali bangazishintshashintsha izindlela zabo zokufundisa, basebenzise ikhono lokucabanga nelokusungula. Ngokwesibonelo, omunye umkhaya wanikeza indodana yawo, uBrandon, eneminyaka eyishumi ithuba lokunikeza inkulumo eyicwaningile enesihloko esithi “Kungani UJehova Asebenzisa Inyoka Ukuba Imelele uSathane?” Le ndaba ibilokhu imhlupha uBrandon ngoba uyazithanda izinyoka futhi kwakungamphathi kahle ukuthi zihlotshaniswa noSathane. Eminye imikhaya idlala amadrama eBhayibheli ngezinye izikhathi, ilungu ngalinye lilingise othile oseBhayibhelini, lifunde ingxenye yakhe, noma lilingise leso senzakalo. Lezi zindlela zokufundisa akukhona nje ukuthi ziyajabulisa kodwa zingenza nezingane zakho zihileleke, kangangokuthi izimiso zeBhayibheli zingathinta izinhliziyo zazo.a
Gwema Izinto Ezingakusinda
14, 15. (a) Ukucindezeleka nokungabi nakulondeka kuye kwanda kanjani kulezi zinsuku zokugcina? (b) Iyiphi enye ingcindezi esingase sibhekane nayo?
14 Ukucindezeleka nokungalondeki kuye kwanda kulezi zinsuku zokugcina zalesi simiso sezinto esibi. Ukungabi khona kwemisebenzi nobunye ubunzima bezomnotho kuthinta izigidi zabantu. Ngisho nalabo abasebenzayo bavame ukuba nomuzwa wokuthi imali abayiholayo bayifaka ezikhwameni ezivuzayo, okwenza umkhaya uthole okuncane. (Qhathanisa noHagayi 1:4-6.) Abezombusazwe nabanye abaholi babonakala bengenamandla njengoba bezama ukulwa nobuphekula nezinye izimbangela zobubi. Abaningi bahlushwa izinkinga zokungapheleli kwabo.—IHu. 38:4.
15 Izinkinga nezingcindezi ezibangelwa isimiso sezinto sikaSathane ziyawathinta namaKristu eqiniso. (1 Joh. 5:19) Kwezinye izimo, abafundi bakaKristu bangase babhekane nenye ingcindezi njengoba belwela ukuhlala bethembekile kuJehova. UJesu wathi: “Uma beye bashushisa mina, bayonishushisa nani.” (Joh. 15:20) Nokho, ngisho noma ‘sishushiswa,’ “asishiywa dengwane.” (2 Kor. 4:9) Kungani kunjalo?
16. Yini engasisiza ukuba sihlale sijabule?
16 UJesu wathi: “Wozani kimi, nina nonke enikhandlekayo nenisindwayo, ngizonenza niqabuleke.” (Math. 11:28) Sizibeka ezandleni zikaJehova ngokubonisa ukholo olugcwele elungiselelweni lesihlengo sikaKristu. Ngale ndlela, sithola “amandla angaphezu kwavamile.” (2 Kor. 4:7) “Umsizi,” umoya ongcwele kaNkulunkulu, uluqinisa kakhulu ukholo lwethu ukuze singagcini ngokukhuthazelela uvivinyo nezinsizi esibhekana nazo kodwa futhi sihlale sijabule.—Joh. 14:26; Jak. 1:2-4.
17, 18. (a) Imuphi umoya okudingeka siwuqaphe? (b) Kungaba namuphi umphumela ukunaka kakhulu izinjabulo zezwe?
17 Namuhla, amaKristu eqiniso kudingeka aqaphe ukuba angathonywa ngokweqile umoya waleli zwe elihlanyiswa injabulo. (Funda eyabase-Efesu 2:2-5.) Ngaphandle kwalokho, singase sibanjwe “isifiso senyama nesifiso samehlo nokugabisa ngalokho umuntu aziphilisa ngakho.” (1 Joh. 2:16) Noma singase ngephutha sikholelwe ukuthi ukuvumela isifiso senyama kungase kusilethele ukuqabuleka. (Roma 8:6) Ngokwesibonelo, abanye baye baphendukela ekusebenziseni kabi izidakamizwa notshwala, ezithombeni zobulili ezingcolile, emidlalweni eyingozi noma ezintweni ezingafanele ngoba bezama ukuzijabulisa. “Amaqhinga” kaSathane ahloselwe ukudukisa abantu ngokubanikeza umuzwa ohlanekezelwe wokuqabuleka.—Efe. 6:11.
18 Yiqiniso, akukho lutho olungalungile ngokudla, ukuphuza nokuhlanganyela ekuzijabuliseni okunempilo uma kwenziwa ngesilinganiso esifanele. Nokho, asizivumeli lezo zinto ukuba kube izona ezisemqoka ekuphileni kwethu. Kubalulekile ukuba silinganisele futhi sizithibe ikakhulu uma sicabangela izikhathi esiphila kuzo. Iminako yethu siqu ingasisinda kangangokuba sibe “abangasebenzi noma abangatheli ngokuqondene nolwazi olunembile ngeNkosi yethu uJesu Kristu.”—2 Pet. 1:8.
19, 20. Singakuthola kanjani ukuqabuleka kwangempela?
19 Lapho sivumelanisa ukucabanga kwethu nezimiso zikaJehova, siyaqaphela ukuthi noma iziphi izinjabulo zaleli zwe zingezesikhashana. UMose wakuqaphela lokhu, nathi siyakubona. (Heb. 11:25) Iqiniso liwukuthi ukuqabuleka kwangempela okuletha umuzwa ojulile nohlala njalo wenjabulo nokwaneliseka, kutholakala ngokwenza intando kaBaba wethu osezulwini.—Math. 5:6.
20 Kwangathi singaqhubeka sithola ukuqabuleka ezintweni ezingokomoya. Ngokwenza kanjalo, ‘silahla ukungamhloniphi uNkulunkulu nezifiso zezwe kuyilapho silindele ithemba elijabulisayo nokubonakaliswa okukhazimulayo kukaNkulunkulu omkhulu nokoMsindisi wethu, uKristu Jesu.’ (Thithu 2:12, 13) Ngakho masizimisele ukuhlale singaphansi kwejoka likaJesu ngokuzithoba egunyeni nasekuqondiseni kwakhe. Uma senza kanjalo siyothola injabulo nokuqabuleka kwangempela!
[Umbhalo waphansi]
a Ukuze uthole ukwaziswa okwengeziwe kwendlela ongenza ngayo isifundo somkhaya sithakazelise futhi sibe esifundisayo, bheka INkonzo Yethu YoMbuso ka-December 1990, ikhasi 1.
Ungaphendula Kanjani?
• Abantu bakaJehova bakuthola kanjani ukuqabuleka namuhla?
• Inkonzo isiqabula kanjani thina nalabo esikhuluma nabo?
• Yini izinhloko zemikhaya ezingayenza ukuze ziqiniseke ukuthi ukukhulekela komkhaya kuyaqabula?
• Iziphi izinto ezisisindayo ngokomoya?
[Izithombe ekhasini 26]
Lapho samukela ijoka likaJesu sithola izinto eziningi ezisenza siqabuleke