Izikhombo Ze-Ncwajana YoMhlangano Wokuphila Nenkonzo
FEBRUARY 6-12
AMAGUGU ASEZWINI LIKANKULUNKULU | ISAYA 47-51
“Ukulalela UJehova Kuletha Izibusiso”
(Isaya 48:17) Yilokhu uJehova akushilo, uMhlengi, oNgcwele ka-Israyeli: “Mina, Jehova, nginguNkulunkulu wakho, Lowo okufundisayo ukuze uzuze, Lowo okubangela ukuba unyathele endleleni okufanele uhambe ngayo.
UJehova Usifundisela Ukuba Sizuze
“Lalela Imiyalo Yami!”
18 Umoya kaJehova usumnike amandla, umprofethi uthi: “INkosi EnguMbusi uJehova ingithumile, yebo umoya wayo. Yilokhu uJehova akushilo, Owakuthenga kabusha, oNgcwele ka-Israyeli: ‘Mina, Jehova, nginguNkulunkulu wakho, Lowo okufundisayo ukuze uzizuzise, Lowo okubangela ukuba unyathele endleleni okufanele uhambe ngayo.’” (Isaya 48:16b, 17) La mazwi othando abonisa ukuthi uJehova uyanakekela kumelwe aqinisekise isizwe sakwa-Israyeli ukuthi uNkulunkulu uzosikhulula eBabiloni. Uyena owasithenga kabusha. (Isaya 54:5) Kuyisifiso sikaJehova esisuka enhliziyweni ukuba ama-Israyeli alungise ubuhlobo bawo naye futhi alalele imiyalo yakhe. Ukukhulekela kweqiniso kusekelwe ekulaleleni izimfundiso zaphezulu. Ama-Israyeli awakwazi ukuhamba endleleni efanele uma engafundiswa ‘indlela okufanele ahambe ngayo.’
(Isaya 48:18) O ukube ubuyoyilalela nokuyilalela imiyalo yami! Khona-ke ukuthula kwakho bekuyoba njengomfula, nokulunga kwakho kube njengamagagasi olwandle.
UJehova Usifundisela Ukuba Sizuze
19 Isifiso sikaJehova sokuba abantu bakhe bagweme inhlekelele, bajabulele ukuphila, sibekwe ngamagama amnandi: “O ukube ubuyoyilalela nokuyilalela imiyalo yami! Khona-ke ukuthula kwakho bekuyoba njengomfula, nokulunga kwakho kube njengamagagasi olwandle.” (Isaya 48:18) Yeka ukunxusa okusuka enhliziyweni koMdali ongumninimandla onke! (Duteronomi 5:29; IHubo 81:13) Esikhundleni sokuya ekuthunjweni, ama-Israyeli angathola ukuthula okungangamanzi ageleza emfuleni. (IHubo 119:165) Izenzo zawo zokulunga zingaba ziningi njengamagagasi olwandle. (Amose 5:24) Njengoba ewakhathalela ngempela, uJehova uyawancenga ama-Israyeli, ngothando ewabonisa indlela okufanele ahambe ngayo. O, ukube nje abeyolalela!
(Isaya 48:19) Inzalo yakho ibiyoba njengesihlabathi, nozalo oluphuma ezibilinini zakho lube njengezinhlayiya zaso. Igama lomuntu belingeke linqunywe noma libhuqwe phambi kwami.”
UJehova Usifundisela Ukuba Sizuze
20 Zibusiso zini ezingatholwa u-Israyeli uma engaphenduka? UJehova uthi: “Inzalo yakho ibiyoba njengesihlabathi, nozalo oluphuma ezibilinini zakho lube njengezinhlayiya zaso. Igama lomuntu belingeke linqunywe noma libhuqwe phambi kwami.” (Isaya 48:19) UJehova ukhumbuza abantu ngesithembiso sakhe esithi inzalo ka-Abrahama iyoba ningi “ngangezinkanyezi zamazulu futhi ibe ngangesihlabathi esisogwini lolwandle.” (Genesise 22:17; 32:12) Kodwa, le nzalo ka-Abrahama ibilokhu ivukela, futhi ayinalo ilungelo lokubona ukufezeka kwalesi sithembiso. Empeleni, umlando wayo ubulokhu umubi kangangokuthi ngokoMthetho kaJehova ngokwakhe, ifanelwe ukuba igama layo linqunywe. (Duteronomi 28:45) Noma kunjalo, uJehova akafisi ukuba abantu bakhe baqothulwe, engafuni nokubalahla ngokuphelele.
21 Izimiso ezikuleli vesi elinamandla ziyasebenza kubakhulekeli bakaJehova namuhla. UJehova unguMthombo wokuphila, futhi wazi kangcono ukudlula noma ubani ukuthi kufanele sikusebenzise kanjani ukuphila kwethu. (IHubo 36:9) Usinikeze iziqondiso ukuze sizuze, hhayi ngenjongo yokusephuca injabulo. AmaKristu eqiniso asabela ngokuba afune ukufundiswa uJehova. (Mika 4:2) Iziqondiso zakhe zivikela ingokomoya lethu nobuhlobo bethu naye, zisilondoloze nasemathonyeni kaSathane onakalisayo. Uma siziqonda izimiso esekelwe kuzo imithetho kaNkulunkulu, siye sibone ukuthi ukusifundisa kukaJehova kuzuzisa thina. Siyaqaphela ukuthi “imiyalo yakhe ayiwona umthwalo osindayo.” Futhi ngeke sinqunywe.—1 Johane 2:17; 5:3.
Ukumba Sifuna Ingcebo Engokomoya
(Isaya 49:6) Wathi: “Bekungeyona neze into encane ukuba ube yinceku yami ukuze uvuse izizwe zikaJakobe futhi ubuyise abalondiweyo baka-Israyeli; mina futhi ngikuniké ukuba ube ngukukhanya kwezizwe, ukuze insindiso yami ifinyelele emkhawulweni womhlaba.”
Amaphuzu Avelele Encwadi Ka-Isaya—II
49:6—Kungayiphi indlela uMesiya ‘engukukhanya kwezizwe,’ nakuba inkonzo yakhe yasemhlabeni ayenza kubantwana bakwa-Israyeli kuphela? Lokhu kungenxa yalokho okwenzeka ngemva kokufa kukaJesu. IBhayibheli libonisa ukuthi u-Isaya 49:6 usebenza kubafundi bakhe. (IzEnzo 13:46, 47) Namuhla, amaKristu agcotshiwe, esizwa isixuku esikhulu sabakhulekeli, akhonza ‘njengokukhanya kwezizwe,’ ngenxa yokuthi akhanyisela abantu ‘kuze kufinyelele emkhawulweni womhlaba.’—Mathewu 24:14; 28:19, 20.
(Isaya 50:1) Yilokhu uJehova akushilo: “Pho-ke, iphi incwadi kanyoko yesehlukaniso, engimmukisile? Noma, yimuphi kwengibakweletayo enginithengise kuye? Bhekani! Nithengiswe ngenxa yeziphambeko zenu nonyoko umukiswe ngenxa yezeqo zenu.
it-1-E 643 ¶4-5
Isehlukaniso
Isehlukaniso Esingokomfanekiso. Ubuhlobo bomshado busetshenziswe ngomqondo ongokomfanekiso emiBhalweni. (Isa 54:1, 5, 6; 62:1-6) Kuyabhekiselwa nasesehlukanisweni esingokomfanekiso, noma ekwemukisweni komfazi.—Jer 3:8.
Umbuso wakwaJuda wagumbuqelwa kwabhujiswa neJerusalema ngo-607 B.C.E., abakhileyo ezweni badingiselwa eBhabhiloni. Eminyakeni yangaphambili uJehova wayesho sakuprofetha kumaJuda ayeyobe esekudingisweni ukuthi: “Pho-ke, iphi incwadi kanyoko yesehlukaniso, engimmukisile?” (Isaya 50:1) ‘Unina,’ noma inhlangano yesizwe, wayemukisiwe ngesizathu, hhayi ngoba uJehova ayephule isivumelwano sakhe wafaka isehlukaniso, kodwa ngenxa yezenzo zakhe [unina] zokwephula isivumelwano soMthetho. Kodwa insali yama-Israyeli yaphenduka yathandazela ukuvuselelwa kobuhlobo noJehova obunjengobendoda ezweni labo. UJehova, ngenxa yegama lakhe, wababuyisela abantu bakhe ezweni lakubo njengoba ayethembisile, ngo-537 B.C.E., ekupheleni kweminyaka yencithakalo engu-70.—IHu 137:1-9; bheka esithi UMSHADO.
Ukufundwa KweBhayibheli
(Isaya 51:12-23) “Mina—mina nginguye oniduduzayo. “Ungubani wena ukuba wesabe umuntu ofayo ozokufa, nendodana yomuntu eyokwenziwa ibe njengotshani nje obuluhlaza? 13 Ukuba ukhohlwe uJehova uMenzi wakho, Lowo owelula amazulu futhi obeka isisekelo somhlaba, waze waba nengebhe njalo usuku lonke ngenxa yokufutheka kwalowo okucindezelayo, njengokungathi wayesemi ngomumo ukuba akuchithe? Kuphi ukufutheka kwalowo okucindezelayo? 14 Lowo oqhothé emaketangeni ngokuqinisekile uyokhululwa ngokushesha, ukuze angafi aye egodini futhi ukuze isinkwa sakhe singantuleki. 15 “Kodwa mina, Jehova, nginguNkulunkulu wakho, Onyakazisa ulwandle ukuze amagagasi alo ahlokome. NguJehova wamabutho igama lakhe. 16 Ngizofaka amazwi ami emlonyeni wakho, futhi ngokuqinisekile ngizokusibekela ngethunzi lesandla sami, ukuze ngitshale amazulu ngibeke isisekelo somhlaba, futhi ngisho kulo iZiyoni ukuthi, ‘Uyisizwe sami.’ 17 Zivuse, zivuse, vuka Jerusalema, wena ophuze esandleni sikaJehova indebe yakhe yokufutheka. Usiphuzile, usiminyile isitsha sokuphuza, indebe ebangela ukudiyazela. 18 Kwakungekho neyodwa kuwo wonke amadodana elawazala eyayilihola, futhi kwakungekho neyodwa kuwo wonke amadodana elawakhulisa eyayibamba isandla salo. 19 Lezo zinto ezimbili zazikwehlela. Ubani oyozwelana nawe? Ukuphanga nokwaphuka, indlala nenkemba! Ubani oyokududuza? 20 Amadodana akho abé nesinxi. Alalé ekuqaleni kwazo zonke izitaladi njengezimvu zasendle enetheni, njengalabo abagcwele ukufutheka kukaJehova, ukusola kukaNkulunkulu wakho.” 21 Ngakho-ke, ngicela ulalele lokhu wena wesifazane ohlushwayo nodakiwe, kodwa kungengawayini. 22 Yilokhu ekushilo iNkosi yakho, uJehova, yebo uNkulunkulu wakho, obalwelayo abantu bakhe: “Bheka! Ngiyosusa esandleni sakho indebe ebangela ukudiyazela. Isitsha sokuphuza, indebe yami yokufutheka—awusayophinde usiphuze futhi. 23 Ngizosibeka esandleni salabo abakucasulayo, abathé emphefumulweni wakho, ‘Khothama ukuze seqe, kangangokuba umhlane wakho wawuwenza ube njengomhlabathi, nanjengesitaladi kulabo abeqayo.”
FEBRUARY 13-19
AMAGUGU ASEZWINI LIKANKULUNKULU | ISAYA 52-57
“UKristu Wahlupheka Ngenxa Yethu”
(Isaya 53:3-5) Wadelelwa futhi wagwenywa ngabantu, umuntu ohloselwe ubuhlungu nokuba ajwayelane nokugula. Futhi kwakunjengokungathi usifihlela ubuso. Wadelelwa, futhi sambheka njengongento yalutho. 4 Ngempela yena ngokwakhe wathwala ukugula kwethu; wathwala izinhlungu zethu. Kodwa thina sambheka njengoshaywe ngenhlupho, oshaywe uNkulunkulu nohlushwayo. 5 Kodwa wayehlatshwa ngenxa yeseqo sethu; echotshozwa ngenxa yeziphambeko zethu. Isijeziso esasihloselwe ukuba thina sibe nokuthula sasiphezu kwakhe, futhi ngenxa yamanxeba akhe kubé khona ukuphulukiswa kwethu.
INceku KaJehova—‘Yahlatshwa Ngenxa Yeseqo Sethu’
‘Yadelelwa Futhi Yabhekwa Njengengento Yalutho’
3 Funda u-Isaya 53:3. Ake ucabange ukuthi kumelwe ukuba kwakuhilelani ngeNdodana kaNkulunkulu ezelwe yodwa ukudela injabulo yokukhonza eceleni kukaYise, ize emhlabeni izonikela ngokuphila kwayo njengomhlatshelo wokusindisa isintu esonweni nasekufeni! (Fil. 2:5-8) Umhlatshelo wayo, owawufuziselwa imihlatshelo yezilwane eyayenziwa ngaphansi koMthetho KaMose, waba indlela yangempela yokuthethelelwa kwezono. (Heb. 10:1-4) Kwakungafanele yini le ndodana yamukelwe futhi idunyiswe, okungenani ngamaJuda ayelindele ukufika kukaMesiya othenjisiwe? (Joh. 6:14) Kwakufanele, kodwa amaJuda ‘amdelela’ uKristu futhi “ambheka njengongento yalutho,” njengoba u-Isaya ayebikezele. Umphostoli uJohane wabhala: “Wafika kubo, kodwa abantu bakubo abazange bamamukele.” (Joh. 1:11) Umphostoli uPetru watshela amaJuda: “UNkulunkulu wokhokho bethu, uyikhazimulisile iNceku yakhe, uJesu, leyo nina, enayinikela futhi nayiphika phambi kukaPilatu, lapho esenqume ukuyikhulula. Yebo, namphika lowo ongcwele nolungileyo.”—IzE 3:13, 14.
4 U-Isaya waprofetha nokuthi uJesu wayehloselwe ukuba “ajwayelane nokugula.” Ngokuqinisekile, phakathi nenkonzo yakhe uJesu wayekhathala ngezinye izikhathi, kodwa akukho okubonisa ukuthi wagula. (Joh. 4:6) Nokho, wababona abantu ayebashumayeza ababegula. Waba nesihawu ngabo futhi waphulukisa abaningi. (Marku 1:32-34) Ngakho, uJesu wagcwalisa isiprofetho esithi: “Ngempela yena ngokwakhe wathwala ukugula kwethu; wathwala izinhlungu zethu.”—Isaya 53:4a; Math. 8:16, 17.
Yabhekwa ‘Njengeshaywe UNkulunkulu’
5 Funda u-Isaya 53:4b. Abantu abaningi ababephila ngesikhathi sikaJesu abazange basiqonde isizathu sokuhlupheka nokufa kwakhe. Babekholelwa ukuthi uNkulunkulu wayemjezisa, njengokungathi wayemshaya ngenhlupho yesifo esenyanyekayo. (Math. 27:38-44) AmaJuda amangalela uJesu ngokuthi uyahlambalaza. (Marku 14:61-64; Joh. 10:33) Yebo, uJesu wayengesona isoni noma umhlambalazi. Kodwa ngenxa yokuthi wayemthanda kakhulu uYise, kona kanye nje ukuthi wayezofa emangalelwe ngokuhlambalaza kumelwe ukuba kwanezela ebuhlungwini abuzwa njengeNceku kaJehova. Noma kunjalo, wayezimisele ukuzithoba entandweni kaJehova.—Math. 26:39.
(Isaya 53:7, 8) Wayecindezelwe kanzima, futhi wayevuma ukuba ahlushwe; nokho wayengawuvuli umlomo wakhe. Wayelethwa ngokungathi yimvu ekuhlatshweni; futhi njengemvukazi eye yaba yisimungulu phambi kwabagundi bayo, naye wayengawuvuli umlomo wakhe. 8 Ngenxa yokuvinjelwa nokwahlulelwa wasuswa; ubani oyozikhathaza ngisho nangemininingwane yesizukulwane sakhe? Ngoba wahlukaniswa nezwe labaphilayo. Wathola lo mvimbo ngenxa yeseqo sabantu bakithi.
INceku KaJehova—‘Yahlatshwa Ngenxa Yeseqo Sethu’
‘Yalethwa Ngokungathi Yimvu Ekuhlatshweni’
10 Funda u-Isaya 53:7, 8. Lapho uJohane uMbhapathizi ebona uJesu eza, wamemeza: “Bhekani, iWundlu likaNkulunkulu elisusa isono sezwe!” (Joh. 1:29) Lapho ebiza uJesu ngeWundlu, kungenzeka ukuthi uJohane wayecabanga ngamazwi ka-Isaya: “Wayelethwa ngokungathi yimvu ekuhlatshweni.” (Isaya 53:7) U-Isaya waprofetha: “Umphefumulo wakhe wawuthululela ekufeni uqobo.” (Isaya 53:12) Kuyathakazelisa ukuthi ngobusuku amisa ngabo iSikhumbuzo sokufa kwakhe, uJesu wanika abaphostoli bakhe abathembekile abangu-11 indebe yewayini wayesethi: “Lokhu kusho ‘igazi’ lami ‘lesivumelwano,’ elizothululwa ngenxa yabaningi ngenjongo yokuthethelelwa kwezono.”—Math. 26:28.
(Isaya 53:11, 12) Ngenxa yenkathazo yomphefumulo wakhe uyobona, uyokwaneliswa. Ngolwazi lwakhe olungileyo, inceku yami, uyokwenza abantu abaningi babe nokuma okulungile; futhi uyothwala iziphambeko zabo. 12 Ngaleso sizathu ngizomabela isabelo phakathi kwabaningi, futhi uyohlukanisa impango kanye nabanamandla, ngenxa yokuthi umphefumulo wakhe wawuthululela ekufeni uqobo, futhi wabalwa kanye nezeqamthetho; yena ngokwakhe wathwala isono sabantu abaningi, futhi walamulela izeqamthetho.
INceku KaJehova—‘Yahlatshwa Ngenxa Yeseqo Sethu’
INceku ‘Yenza Abaningi Babe Nokuma Okulungile’
13 Funda u-Isaya 53:11, 12. Ekhuluma ngeNceku yakhe ekhethiweyo, uJehova wathi: “Olungileyo, inceku yami, uyokwenza abantu abaningi babe nokuma okulungile.” Kanjani? Ingxenye yokugcina yevesi 12 isisiza ukuba sithole impendulo. ‘Futhi iNceku yalamulela izeqamthetho.’ Yonke inzalo ka-Adamu izalwa iyizoni, “izeqamthetho,” ngakho ithola “inkokhelo yesono,” ewukufa. (Roma 5:12; 6:23) Umuntu oyisoni kudingeka abuyisane noJehova. Isahluko 53 sesiprofetho sika-Isaya siyichaza kahle indlela uJesu “alamulela” ngayo isintu esinesono lapho sithi: “Isijeziso esasihloselwe ukuba thina sibe nokuthula sasiphezu kwakhe, futhi ngenxa yamanxeba akhe kubé khona ukuphulukiswa kwethu.”—Isaya 53:5.
Ukumba Sifuna Ingcebo Engokomoya
(Isaya 54:1) “Khamuluka ngenjabulo, wena wesifazane oyinyumba ongazalanga! Yenama ngokukhamuluka kwenjabulo futhi umpongoloze, wena ongazange ube nezinhlungu zokubeletha, ngoba abantwana bowesifazane olahliwe baningi kunabantwana bonomyeni,” kusho uJehova.
‘Isenzakalo Esingumfanekiso’ Esibalulekile Kithi
Obani-ke abafanekiselwa “owesifazane okhululekile” uSara nendodana yakhe, u-Isaka? UPawulu wabonisa ukuthi uSara, ‘owesifazane oyinyumba,’ wayefanekisela umfazi kaNkulunkulu, ingxenye yenhlangano yakhe esezulwini. Lona wesifazane wasezulwini wayeyinyumba ngoba ngaphambi kokuba uJesu eze wayengenabo “abantwana” abagcotshwe ngomoya emhlabeni. (Galathiya 4:27; Isaya 54:1-6) Nokho, ngePhentekoste lika-33 C.E., kwathululwa umoya ongcwele phezu kweqembu lamadoda nabesifazane ababe sebezalwa kabusha njengabantwana balona wesifazane wasezulwini. Abantwana abazalwa yile nhlangano babe sebemukelwa njengamadodana kaNkulunkulu okutholwa futhi baba izindlalifa ezikanye noJesu Kristu ngaphansi kwesivumelwano esisha. (Roma 8:15-17) Omunye walaba bantwana, umphostoli uPawulu, wayengabhala: “IJerusalema eliphezulu likhululekile, futhi lingumama wethu.”—Galathiya 4:26.
(Isaya 57:15) Ngoba yilokhu Lowo oPhakeme futhi Omkhulu, ohlala kuze kube phakade ogama lakhe lingcwele, akushilo: “Ngihlala endaweni ephakeme nasendaweni engcwele, futhi ngihlala nalowo ochotshoziwe onomoya othobekile, ukuze ngivuselele umoya wabathobekileyo futhi ngivuselele inhliziyo yabachotshozwayo.
Hlakulela Ukuthobeka Kwangempela
Isibonelo Sokuthobeka Esikhulu Kunazo Zonke
3 UJehova mkhulu futhi uphakeme ngokungaphenyeki. Noma kunjalo, “amehlo akhe aqalaza kuwo wonke umhlaba ukuze abonise amandla akhe ngenxa yalabo abanhliziyo yabo iphelele kuye.” (2 IziKronike 16:9) Yini uJehova ayenzayo lapho ethola abakhulekeli abaphansi abachotshozwe izinhlupheko ezihlukahlukene? Ngomqondo othile, ‘uhlala’ nabo ngomoya wakhe ongcwele ‘ukuze avuselele umoya wabathobekileyo futhi avuselele inhliziyo yabachotshozwayo.’ (Isaya 57:15) Ngenxa yalokho, abakhulekeli bakhe abavuselelekile babe sebekwazi ukuphinde bamkhonze ngokujabula. Yeka ukuthobeka kukaNkulunkulu!
Ukufundwa KweBhayibheli
(Isaya 57:1-11) Olungileyo ushabalele, kodwa akekho okufaka enhliziyweni. Abantu abanomusa wothando babuthelwa kwabafileyo, kuyilapho kungekho muntu oqondayo ukuthi kungenxa yenhlekelele ukuthi olungileyo ubuthiwe wasuswa. 2 Ungena ekuthuleni; bayaphumula emibhedeni yabo, ngamunye ohamba aqonde. 3 “Kepha nina, sondelani lapha, nina madodana owesifazane oyisangoma, inzalo yomuntu ophingayo neyowesifazane ofebayo: 4 Ngubani lona enizijabulisa ngaye? Ngubani lona eniqhubeka nimvulela umlomo kakhulu, eniqhubeka nimkhiphela ulimi? Anibona yini abantwana beseqo, inzalo yamanga, 5 labo abavusa inkanuko phakathi kwemithi emikhulu, ngaphansi kwayo yonke imithi ekhephuzelayo, ababulala abantwana ezigodini zezifufula ngaphansi kwemifantu yamadwala? 6 “Isabelo sakho sasikanye namatshe abushelelezi asesigodini sesifufula. Wona—wona ayeyinkatho yakho. Ngaphezu kwalokho, uye wawathululela umnikelo wokuphuzwayo, wanikela isipho. Ingabe kufanele ngiziduduze ngalezi zinto? 7 Ubeka umbhede wakho entabeni ende nephakeme. Yilapho futhi wenyukela khona uyonikela umhlatshelo. 8 Wamisa isikhumbuzo sakho ngemva komnyango nensika yomnyango. Ngoba wasuka kimi wazembula futhi wenyuka; wenza umbhede wakho waba banzi. Wazenzela isivumelwano nabo. Wathanda umbhede kanye nabo. Wabona isitho sowesilisa. 9 Wehlela kuMeleki namafutha, waqhubeka uwenza abe maningi amafutha akho okugcoba. Waqhubeka uthumela izithunywa zakho kude, waze wehlisela izindaba eShiyoli. 10 Uye wakhandleka ngobuningi bezindlela zakho. Awuzange uthi, ‘Akusizi!’ Utholé ukuvuselelwa kwamandla akho. Yingakho ungazange ugule. 11 “Ubani lona oye wakwethusa futhi wamesaba, waze waqamba amanga? Kodwa akumina obumkhumbula. Awufakanga lutho enhliziyweni. Ngangingathule yini futhi ngifihla izindaba? Ngakho wawungangesabi ngisho nami.
FEBRUARY 20-26
AMAGUGU ASEZWINI LIKANKULUNKULU | ISAYA 58-62
“Memezela Unyaka Wokuthakazelelwa NguJehova”
(Isaya 61:1, 2) Umoya weNkosi EnguMbusi uJehova uphezu kwami, ngenxa yokuthi uJehova ungigcobile ukuba ngitshele abamnene izindaba ezinhle. Ungithumé ukuba ngibophe abanhliziyo zaphukileyo, ukuba ngimemezele inkululeko kulabo abathunjiwe nokuvulwa kakhulu kwamehlo ngisho naseziboshweni; 2 ukuba ngimemezele unyaka wokuthakazelelwa nguJehova nosuku lwempindiselo kaNkulunkulu wethu; ukuba ngiduduze bonke abalilayo;
Ukulunga Kuyahluma EZiyoni
“Unyaka wokuthakazelelwa nguJehova”
4 U-Isaya uyabhala: “Umoya weNkosi EnguMbusi uJehova uphezu kwami, ngenxa yokuthi uJehova ungigcobile ukuba ngitshele abanobuvi izindaba ezinhle. Ungithumé ukuba ngibophe abanhliziyo zaphukileyo, ukuba ngimemezele inkululeko kulabo abathunjiwe nokuvulwa kakhulu kwamehlo ngisho naseziboshweni.” (Isaya 61:1) Ubani lo othunywa ukuba amemezele izindaba ezinhle? Cishe ekuqaleni ngu-Isaya, ophefumulelwa uNkulunkulu ukuba alobele izithunjwa eziseBabiloni izindaba ezinhle. Nokho, uJesu wakhuluma ngokugcwaliseka okubaluleke kakhulu lapho ethi amazwi ka-Isaya asebenza kuye. (Luka 4:16-21) Yebo, uJesu wathunyelwa ukuba atshele abanobuvi izindaba ezinhle, futhi ukuze enze lokhu, wagcotshwa ngomoya ongcwele ngesikhathi ebhapathizwa.—Mathewu 3:16, 17.
(Isaya 61:3, 4) Ukuba ngabele abalilela iZiyoni, ukuba ngibanike umnqwazo esikhundleni somlotha, amafutha okwethaba esikhundleni sokulila, isiphuku sendumiso esikhundleni somoya odangele; bayobizwa ngokuthi imithi emikhulu yokulunga, okutshalwe nguJehova, ukuze enziwe abe muhle. 4 Bayokwakha kabusha izindawo osekukade zabhuqwa; bayovusa ngisho nezindawo ezenziwe incithakalo zezikhathi zangaphambili, futhi ngokuqinisekile bayoyenza ibe misha imizi ebhuqiwe, izindawo ezenziwe incithakalo izizukulwane ngezizukulwane.
Ukulunga Kuyahluma EZiyoni
13 Kusukela ngePhentekoste lika-33 C.E. kuqhubeke, uNkulunkulu watshala “imithi emikhulu yokulunga” efanayo—amaKristu agcotshiwe anesibindi—endaweni engokomoya yesizwe sakhe esisha, “u-Israyeli kaNkulunkulu.” (Galathiya 6:16) Emakhulwini eminyaka edlule, le “mithi” yandile yaba ngu-144 000, yathela izithelo zokulunga zokwenza uJehova uNkulunkulu abe muhle, noma zokumkhazimulisa. (IsAmbulo 14:3) Abokugcina bale “mithi” eyizizemazema baye bachuma kusukela ngo-1919, lapho uJehova evuselela abaseleyo baka-Israyeli kaNkulunkulu esimweni sabo sokungasebenzi okwesikhashana. Ngokubanika amathantala amanzi angokomoya, uJehova uye wenza kwaba nehlathi lemithi elungile, ethela izithelo.—Isaya 27:6.
14 Eqokomisa umsebenzi wale “mithi,” u-Isaya uyaqhubeka: “Bayokwakha kabusha izindawo osekukade zabhuqwa; bayovusa ngisho nezindawo ezenziwe incithakalo zezikhathi zangaphambili, futhi ngokuqinisekile bayoyenza kabusha imizi ebhuqiwe, izindawo ezenziwe incithakalo izizukulwane ngezizukulwane.” (Isaya 61:4) Ngomyalo wenkosi yasePheresiya uKoresi, amaJuda athembekile abuya eBabiloni akha kabusha iJerusalema nethempeli lalo, elase linesikhathi eside licekelwe phansi. Imisebenzi yokubuyisela yayizokwenzeka naseminyakeni engemva kuka-33 C.E. no-1919.
15 Ngo-33 C.E., ukuboshwa kukaJesu, ukuqulwa kwecala nokufa kwakhe kwabadabukisa kakhulu abafundi bakaJesu. (Mathewu 26:31) Kodwa, lapho efika kubo ngemva kokuvuswa kwakhe, umbono wabo washintsha. Futhi kwathi kungathululwa umoya ongcwele phezu kwabo, baba matasa nomsebenzi wokushumayela izindaba ezinhle, “kokubili eJerusalema nakulo lonke iJudiya neSamariya nasezingxenyeni eziqhele kakhulu zomhlaba.” (IzEnzo 1:8) Ngokwenza kanjalo baqala ukubuyisela ukukhulekela okumsulwa. Ngendlela efanayo, kusukela ngo-1919 kuqhubeke uJesu Kristu wenza ukuba insali yabafowabo abagcotshiwe yakhe kabusha “izindawo ezenziwe incithakalo izizukulwane ngezizukulwane.” Kwase kudlule amakhulu eminyaka abefundisi beLobukholwa behlulekile ukunika abantu ulwazi ngoJehova, esikhundleni salo babefundisa amasiko abantu nezimfundiso ezingasekelwe emiBhalweni. Emabandleni awo, amaKristu agcotshiwe ayeka yonke imikhuba eyayinindwe inkolo yamanga ukuze ukubuyiselwa kokukhulekela kweqiniso kuqhubekele phambili. Futhi aqala umkhankaso wokufakaza omkhulu kunayo yonke eyake yaba khona emhlabeni.—Marku 13:10.
(Isaya 61:5, 6) “Empeleni izihambi ziyosukuma zeluse imihlambi yenu, nabezinye izizwe bayoba abalimi benu nabagcini-zivini benu. 6 Kepha nina, niyobizwa ngokuthi ningabapristi bakaJehova; kuyothiwa niyizikhonzi zikaNkulunkulu wethu. Niyodla umnotho wezizwe; futhi niyokhuluma ngani ngokwenu ninokwesasa nisenkazimulweni yazo.
“Izakhamuzi Zesikhashana” Zinobunye Ekukhulekeleni Kweqiniso
5 Ngakolunye uhlangothi, omunye angase abhekisele esahlukweni 61 sencwadi ka-Isaya, enesiprofetho esigcwaliseka ebandleni lobuKristu. Ivesi 6 laleso sahluko likhuluma ngalabo abayokhonza ‘njengabapristi bakaJehova.’ Nokho, ivesi 5 likhuluma ‘ngabezinye izizwe’ ababeyobambisana futhi basebenze ndawonye nalabo “bapristi.” Kufanele sikuqonde kanjani lokhu?
6 Siqonda ukuthi labo “bapristi bakaJehova” bangamaKristu agcotshiwe anesabelo “ovukweni lokuqala” futhi ayoba “ngabapristi bakaNkulunkulu nabakaKristu, babuse njengamakhosi kanye naye iminyaka eyinkulungwane.” (IsAm. 20:6) Ngaphezu kwalokho, kunamaKristu amaningi aqotho anethemba lasemhlabeni. Nakuba lawa maKristu esebenza futhi enobudlelwane obuseduze nalabo abayokhonza ezulwini, ngomqondo ongokomfanekiso, angabantu bezinye izizwe. Ayakujabulela ukusekela nokusebenza kanye ‘nabapristi bakaJehova,’ njengokungathi akhonza ‘njengabalimi nabagcini-zivini.’ Yebo, asiza ekuhlakuleleni izithelo zomoya ezikhazimulisa uNkulunkulu, ekunakekeleni nasekubutheni abantu. Ngempela, abagcotshiweyo ‘nabezinye izimvu’ bathola abantu abaqotho abafisa ukukhonza uNkulunkulu phakade bese bebalusa ngothando.—Joh. 10:16.
Ukumba Sifuna Ingcebo Engokomoya
(Isaya 60:17) Esikhundleni sethusi ngiyoletha igolide, esikhundleni sensimbi ngiyoletha isiliva, esikhundleni sokhuni, ithusi, futhi esikhundleni samatshe, insimbi; ngiyomisa ukuthula kube ababonisi bakho nokulunga kube ngababi bemisebenzi yakho.
Sebenzela Ukuhlobisa Ipharadesi Elingokomoya
14 Abaningi asebekhulile emabandleni esikuwo baye bazibona izinguquko eziye zenza ingxenye esemhlabeni yenhlangano kaNkulunkulu yaba yinhle ngokwengeziwe. Bakhumbula isikhathi lapho emabandleni kwakunenceku yebandla, hhayi indikimba yabadala, lapho emazweni ahlukahlukene kwakunenceku yegatsha, hhayi iKomiti Yegatsha, noma lapho iziqondiso zazikhishwa umongameli we-Watch Tower Society, hhayi iNdikimba Ebusayo YoFakazi BakaJehova. Nakuba bonke laba bazalwane babenabasizi abathembekile, ngokuyinhloko umthwalo wemfanelo wokwenza izinqumo emabandleni, emahhovisi amagatsha nasendlunkulu yomhlaba wonke wawusemahlombe omuntu oyedwa. Ngemva kuka-1970, kwenziwa izinguquko ukuze umthwalo wemfanelo wokwenza izinqumo usingathwe amaqembu abadala, hhayi umuntu oyedwa.
15 Kungani lezi zinguquko ziye zayizuzisa inhlangano? Kungenxa yokuthi zazisekelwe ekuqondweni okucace kakhudlwana kwemiBhalo. Kunokuba kube ngumuntu oyedwa owenza zonke izinqumo, inhlangano iyazuza ezimfanelweni ezinhle zabo bonke abadala, noma ‘izipho ezingabantu,’ ezivela kuJehova.—Efesu 4:8; IzAga 24:6.
16 Cabanga ngezinye zezinguquko zamuva ezenziwe ezincwadini zethu. Siyakujabulela ukuhambisa izincwadi eziwusizo nezikhangayo enkonzweni yethu. Cabanga nangendlela esisebenzisa ngayo ubuchwepheshe bamuva ekushumayeleni izindaba ezinhle. Ngokwesibonelo, ingosi ethi jw.org ifinyelela abantu abaningi ngokwengeziwe ukuze bathole usizo abaludinga ngempela. Zonke lezi zinguquko zenza sibone ukukhathalela okujulile nothando uJehova analo ngabantu.
17 Siyayazisa nenguquko eyenziwe emihlanganweni yethu ukuze sibe nesikhathi sokukhulekela komkhaya noma sesifundo somuntu siqu. Siyalwazisa noshintsho olwenziwe emihlanganweni yethu yesifunda neyesigodi. Ibonakala ithuthukiswa unyaka ngamunye! Siyabonga nangokuqeqeshwa esikuthola ezikoleni zethu zeBhayibheli eziningi. Kusobala kuzo zonke lezi zinguquko ukuthi uJehova uqondisa inhlangano yakhe nokuthi uyaqhubeka enza ipharadesi elingokomoya libe lihle nangokwengeziwe!
(Isaya 61:8, 9) Ngoba, mina Jehova, ngithanda ubulungisa, ngizonda ukuphanga kanye nokungalungi. Ngiyobanika inkokhelo yabo ngeqiniso, futhi ngiyokwenza nabo isivumelwano esimi kuze kube nini nanini. 9 Inzalo yabo empeleni iyokwaziwa ngisho naphakathi kwezizwe, nozalo lwabo phakathi kwamaqembu abantu. Bonke abababonayo bayobazi, ukuthi bayinzalo uJehova ayibusisile.”
Amaphuzu Avelele Encwadi Ka-Isaya—II
Izimpendulo Zemibuzo YemiBhalo:
61:8, 9—Siyini “isivumelwano esimi kuze kube nini nanini,” futhi ingobani “inzalo”? Lesi isivumelwano esisha uJehova aye wasenza namaKristu agcotshiwe. “Inzalo” ‘ingezinye izimvu’—izigidi ezisabela esigijimini sawo.—Johane 10:16.
Ukufundwa KweBhayibheli
(Isaya 62:1-12) Ngenxa yeZiyoni ngeke ngithule, nangenxa yeJerusalema ngeke ngihlale ngithule kuze kuphume ukulunga kwalo njengokukhanya, nensindiso yalo njengobhaqa oluvuthayo. 2 “Ngokuqinisekile izizwe ziyokubona ukulunga kwakho, wena wesifazane, nawo wonke amakhosi abone inkazimulo yakho. Empeleni uyobizwa ngegama elisha, eliyoshiwo yiwo kanye umlomo kaJehova. 3 Uyoba ngumqhele omuhle esandleni sikaJehova, nomshuqulo wobukhosi entendeni yesandla sikaNkulunkulu wakho. 4 Ngeke kusathiwa ungowesifazane oshiywe ngokuphelele; nezwe lakho ngeke kusathiwa liyincithakalo; kodwa wena uyobizwa ngokuthi unguNjabulo Yami Ikuye, nezwe lakho ngokuthi Othathwe Njengomfazi. Ngoba uJehova uyobe ejabule ngawe, futhi izwe lakho liyothathwa njengomfazi. 5 Ngoba njengoba nje insizwa ithatha intombi ukuba ibe ngumkayo, amadodana akho ayokuthatha ube ngumfazi wawo. Futhi uNkulunkulu wakho uyokwethaba ngawe ngokwethaba komkhwenyana ngomakoti. 6 O Jerusalema, ngimise abalindi phezu kwezindonga zakho. Usuku lonke nobusuku bonke, njalo, mabangathuli. “Nina enikhuluma ngoJehova, maningathuli, 7 futhi ningathuli ngaye aze alimise ngokuqinile, yebo, aze alimise iJerusalema njengendumiso emhlabeni.” 8 UJehova ufungé ngesandla sakhe sokunene nangengalo yakhe enamandla wathi: “Ngeke ngisanika izitha zakho okusanhlamvu kwakho ukuba kube ngukudla kwazo, futhi abezinye izizwe ngeke besaliphuza iwayini lakho elisha, olikhandlekele. 9 Kodwa kuyodliwa yibo kanye abakubuthayo, futhi ngokuqinisekile bayomdumisa uJehova, nabo abaliqoqayo yibo kanye abayoliphuzela emagcekeni ami angcwele.” 10 Phumani, phumani ngamasango. Lungiselani abantu indlela. Nqwabelanisani, nqwabelanisani umgwaqo omkhulu. Susani amatshe kuwo. Phakamiselani izizwe isibonakaliso. 11 Bhekani! UJehova ngokwakhe wenze ukuba kuzwakale nasemajukujukwini omhlaba. “Thanini endodakazini yaseZiyoni, ‘Bheka! Insindiso yakho iyeza. Bheka! Umvuzo awunikezayo uwuphethe, nenkokhelo ayikhokhayo iphambi kwakhe.’” 12 Futhi abantu bayobabiza ngokuthi abantu abangcwele, abahlengwe nguJehova; wena uyobizwa ngokuthi Ofuniweyo, uMuzi Ongashiywanga Ngokuphelele.
FEBRUARY 27–MARCH 5
AMAGUGU ASEZWINI LIKANKULUNKULU | ISAYA 63-66
“Amazulu Amasha Nomhlaba Omusha Kuyoletha Injabulo Enkulu”
(Isaya 65:17) Ngoba bhekani ngidala amazulu amasha nomhlaba omusha; izinto zangaphambili ngeke zikhunjulwe, futhi ngeke zifike enhliziyweni.
‘Jabulani Kuze Kube Phakade Ngalokho Engikudalayo’
23 Incwadi yesAmbulo ichaza umbono owabonwa umphostoli uJohane wosuku lukaJehova oluzayo, okuyosuswa ngalo lesi simiso sezinto. Ngemva kwalokho, uSathane uyophonswa kwalasha. (IsAmbulo 19:11–20:3) Ngemva kwaleyo ncazelo, uJohane uphinda amazwi ka-Isaya angokwesiprofetho, ebhala: “Ngabona izulu elisha nomhlaba omusha.” Amavesi alandelayo alandisa ngalo mbono okhazimulayo akhuluma ngesikhathi uJehova uNkulunkulu ayozishintsha kakhulu ngaso izimo zalo mhlaba zibe ngcono. (IsAmbulo 21:1, 3-5) Ngokusobala, isithembiso sika-Isaya ‘samazulu amasha nomhlaba omusha’ siyogcwaliseka ngokumangalisayo emhlabeni omusha kaNkulunkulu! Ngaphansi kwamazulu amasha awuhulumeni, umphakathi omusha wasemhlabeni uyojabulela ipharadesi elingokomoya nelingokwenyama. Siyaduduza ngempela isithembiso esithi “izinto zangaphambili [ukugula, ukuhlupheka nosizi oluningi abantu ababhekene nalo] ngeke zikhunjulwe, futhi ngeke zifike enhliziyweni.” Noma yini esingayikhumbula ngaleso sikhathi ngeke isiphathe kabi noma isizwise ubuhlungu obujulile obucindezela izinhliziyo zabantu abaningi manje.
(Isaya 65:18, 19) Kodwa yethabani, nijabule kuze kube phakade ngalokho engikudalayo. Ngoba bhekani ngidala iJerusalema libe yisizathu sokujabula nabantu balo babe yisizathu sokwethaba. 19 Ngiyojabula ngeJerusalema ngethabe ngabantu bami; ngeke kusazwakala kulo umsindo wokulila noma umsindo wokukhala okulusizi.”
‘Jabulani Kuze Kube Phakade Ngalokho Engikudalayo’
25 Nanamuhla uJehova wenza iJerusalema libe “isizathu sokujabula.” Kanjani? Njengoba sesibonile, amazulu amasha aba khona ngo-1914 ayogcina enababusi abangu-144 000 abayobusa ngokubambisana, babe uhulumeni wasezulwini. Babizwa ngokwesiprofetho ngokuthi “iJerusalema Elisha.” (IsAmbulo 21:2) UNkulunkulu usho ngokuqondene neJerusalema Elisha ukuthi: “Ngidala iJerusalema libe yisizathu sokujabula nabantu balo babe yisizathu sokwethaba.” UNkulunkulu uyolethela isintu esilalelayo izibusiso eziningi, esebenzisa iJerusalema Elisha. Ngeke uphinde uzwakale umsindo wokulila noma wokukhala okulusizi, ngoba uJehova uyokwanelisa “izicelo zenhliziyo [yethu].”—IHubo 37:3, 4.
(Isaya 65:21-23) Ngokuqinisekile bayokwakha izindlu bahlale kuzo; nakanjani bayotshala izivini badle izithelo zazo. 22 Ngeke bakhe kuhlale omunye; ngeke batshale kudle omunye. Ngoba izinsuku zabantu bami ziyoba njengezinsuku zomuthi; nomsebenzi wezandla zabo abakhethiweyo bami bayowusebenzisa ngokugcwele. 23 Ngeke bakhandlekele ize, noma bazalele ukuhlupheka; ngoba bayinzalo yababusisiweyo bakaJehova, nozalo lwabo kanye nabo.
Ukuthula Kweminyaka Eyinkulungwane Nangalé Kwayo!
‘BAYOKWAKHA IZINDLU FUTHI BATSHALE IZIVINI’
4 Ubani ongeke athande ukuba nomuzi othi yena, indawo lapho yena nomkhaya wakhe bengazizwa khona bephephile futhi belondekile? Nokho, kuyinkinga enkulu ezweni namuhla ukutholakala kwezindlu ezifanelekayo. Abantu banqwabelene emadolobheni aminyene. Abaningi bahlala emijondolo. Ukuba nezindlu ezithi bona kuyohlale kuyiphupho nje.
5 Ngaphansi kokubusa koMbuso, isifiso sawo wonke umuntu sokuba nomuzi siyofezeka, ngoba kwaprofethwa ngo-Isaya: “Ngokuqinisekile bayokwakha izindlu bahlale kuzo; nakanjani bayotshala izivini badle izithelo zazo.” (Isaya 65:21) Nokho, ngeke kugcine ngokuba abantu babe nemizi. Ingani kwamanje abanye banemizi ethi bona, abambalwa baze ngisho banezithabathaba zemizi noma izindlu zikanokusho. Kodwa bahlale bekhathazekile ngokuthi bangase balahlekelwe yileyo mizi ngenxa yokuwohloka komnotho noma ukuthi bangase bagqekezelwe noma kwenzeke okubi kakhulu kunalokho. Yeka indlela zonke izinto eziyokwehluka ngayo ngaphansi koMbuso! Umprofethi uMika waloba: “Bayohlala, kube yilowo nalowo phansi komvini wakhe naphansi komkhiwane wakhe, ngeke kube khona obenza bathuthumele.”—Mika 4:4.
Ukumba Sifuna Ingcebo Engokomoya
(Isaya 63:5) Ngaqhubeka ngibhekile, kodwa kwakungekho msizi; ngaqala ukubonakala ngimangele, kodwa kwakungekho osekelayo. Ngakho ingalo yami yanginikeza insindiso, nokufutheka kwami yikho okwangisekela.
Amaphuzu Avelele Encwadi Ka-Isaya—II
63:5—Intukuthelo kaNkulunkulu imsekela kanjani? Intukuthelo kaNkulunkulu iwumzwelo olawulekayo—uthukuthela ngendlela elungile. Intukuthelo yakhe imsekela futhi imshukumise ukuba akhiphe izahlulelo zakhe ezilungile.
(Isaya 64:8) O Jehova, wena unguBaba wethu. Thina siwubumba, wena unguMbumbi wethu; thina sonke siwumsebenzi wesandla sakho.
Vumela Isiyalo SikaJehova Sikubumbe
INDLELA UMBUMBI ASEBENZISA NGAYO IGUNYA LAKHE
3 Lapho ichaza igunya likaJehova phezu kwezizwe nabantu ngabanye ngendlela engokomfanekiso, incwadi ka-Isaya 64:8 ithi: “O Jehova, wena unguBaba wethu. Thina siwubumba, wena unguMbumbi wethu; thina sonke siwumsebenzi wesandla sakho.” Umbumbi unegunya eligcwele lokubumba ubumba lube uhlobo lwesitsha asifunayo. Ubumba alunagunya kule ndaba. Kunjalo ngomuntu noNkulunkulu. Umuntu akanalo igunya lokuphikisana noNkulunkulu njengoba nobumba lungenalo ezandleni zombumbi olubumbayo.—Funda uJeremiah 18:1-6.
4 UJehova wabonisa ngo-Israyeli wasendulo ukuthi uyakwazi ukwenza lokho umbumbi akwenzayo ngobumba. Kodwa kunomahluko ophawulekayo. Umbumbi angenza noma isiphi isitsha angase asenze ngesigaxa sobumba. Ingabe uJehova ubabumba ngokuthanda kwakhe abantu noma izizwe, enze abanye babe bahle futhi abanye babe babi? Impendulo yeBhayibheli ingucha. UJehova unikeze abantu isipho esiyigugu kakhulu—inkululeko yokuzikhethela. Akalisebenzisi igunya lakhe njengoMbusi wendawo yonke ngendlela esinyathelayo lesi sipho. Abantu kumelwe bazikhethele ukubunjwa uMdali, uJehova.—Funda uJeremiah 18:7-10.
5 Kwenzekani uma abantu beba nenkani benqabe ukubunjwa uMbumbi Omkhulu? Ube eselisebenzisa kanjani igunya lakhe njengoNkulunkulu? Cabanga ngalokho okwenzekayo obumbeni uma lungakufanelekeli ukusetshenziselwa injongo ethile. Umbumbi angenza ngalo olunye uhlobo lwesitsha noma amane alulahle! Nokho, ngokuvamile iphutha lisuke likumbumbi uma ubumba lungasebenziseki. Akunjalo neze ngoMbumbi wethu. (Dut. 32:4) Lapho umuntu engavumeli uJehova ambumbe, iphutha lisuke likulowo muntu. UJehova usebenzisa igunya lakhe njengombumbi kubantu ngokushintsha indlela asebenzelana ngayo nabo kuxhomeke endleleni abasabela ngayo. Labo abasabela ngokufanele balolongwa ngendlela ebazuzisayo. Ngokwesibonelo, amaKristu agcotshiwe ‘ayizitsha zesihe’ eziye zabunjwa zaba ‘izitsha zokusetshenziswa okunodumo.’ Ngakolunye uhlangothi, labo ababa nenkani bamelane noNkulunkulu bagcina ‘beyizitsha zolaka ezenziwe zafanelekela ukubhujiswa.’—Roma 9:19-23.
Ukufundwa KweBhayibheli
(Isaya 63:1-10) Ubani lona ovela kwa-Edomi, ogqoke izingubo ezinemibala exhophayo zaseBhozira, lona onodumo ngezembatho zakhe, omasha ngokuchichima kwamandla akhe? “Yimi, engikhuluma ngokulunga, engivame ngamandla ukuze ngisindise.” 2 Kungani izembatho zakho zibomvu, nezingubo zakho zinjengezalowo onyathela isikhamo sewayini? 3 “Umkhombe wewayini ngiwunyathelé ngedwa, kungekho muntu kanye nami ovela ezizweni. Ngaqhubeka ngizinyathela ngentukuthelo yami, ngaqhubeka ngizinyathela ngokufutheka kwami. Futhi igazi lazo elalitshaza lalilokhu lichaphazela izingubo zami, ngizingcolisé zonke izembatho zami. 4 Ngoba usuku lwempindiselo lusenhliziyweni yami, futhi kufike wona kanye unyaka wabahlengiweyo bami. 5 Ngaqhubeka ngibhekile, kodwa kwakungekho msizi; ngaqala ukubonakala ngimangele, kodwa kwakungekho osekelayo. Ngakho ingalo yami yanginikeza insindiso, nokufutheka kwami yikho okwangisekela. 6 Ngaqhubeka nginyathela izizwe ngentukuthelo yami, ngazenza zadakwa ngokufutheka kwami futhi ngalehlisela emhlabeni igazi lazo elalitshaza.” 7 Ngizokhuluma ngomusa wothando kaJehova, ngezindumiso zikaJehova, ngokuvumelana nakho konke lokho uJehova akwenzile kithi, yebo ngobuhle obuchichimayo abenzele indlu ka-Israyeli ngokwesihe sakhe nangokuvumelana nokuchichima komusa wakhe wothando. 8 Waqhubeka wathi: “Ngokuqinisekile bangabantu bami, amadodana angeke azibonakalise engathembekile.” Ngakho waba uMsindisi kubo. 9 Phakathi nakho konke ukucindezeleka kwabo wayecindezelekile naye. Isithunywa sakhe siqu sabasindisa. Ngothando lwakhe nangobubele bakhe wabahlenga, wabaphakamisa wabathwala zonke izinsuku zakudala. 10 Kodwa bona badlubulunda futhi benza umoya wakhe ongcwele waphatheka kabuhlungu. Manje washintsha waba yisitha sabo; yena ngokwakhe walwa nabo.