ISIFUNDO 2

Ukukhuluma Ngendlela Engokwemvelo

2 Korinte 2:17

OKUFANELE UKWENZE: Khuluma ngendlela engokwemvelo eveza ukuthi uzizwa kanjani ngezilaleli zakho nangendaba oxoxa ngayo.

Thandaza futhi ulungiselele kahle. Cela ukuba uJehova akusize ungagxili kuwe kodwa ugxile emyalezweni okumelwe uwudlulise. Wazi kahle amaphuzu ayinhloko ofuna ukuwadlulisa. Khuluma ngamazwi akho, ungamane nje ufunde okubhaliwe.

Uma kukhona ozokufunda eBhayibhelini noma kwenye incwadi, kuprakthize kahle ukuze ungabambeki lapho ufunda. Uma kunabantu abacashuniwe, funda lokho abakushoyo ngomuzwa ofanele, ungabi nehaba.
Khuluma ngokusuka enhliziyweni. Cabanga ngokuthi kungani izilaleli zakho zidinga ukukuzwa lokho ozokusho. Gxila kuzo. Uma wenza kanjalo indlela oma ngayo, ukunyakaza komzimba wakho nokubukeka kobuso bakho, kuzobonisa ubungane nemfudumalo.

Ukwenza ngendlela engokwemvelo akusho ukunganaki. Nikeza indaba yakho isizotha esiyifanele ngokukhuluma ngokucacile nangokuhlonipha imithetho yolimi.
Zibheke izilaleli zakho. Bheka izilaleli emehlweni uma lokho kwamukelekile kubantu okhuluma nabo. Lapho ukhuluma, bheka umuntu ngamunye ezilalelini zakho kunokumane uzijeqeze.