“Uye Walondoloza Umbono Oqondile”
● UCamila unenkinga yokuntuleka kwegazi emzimbeni, ukuphazamiseka kwezinzwa nenkinga yokungakhuli. Ngenxa yalokho, lapho eneminyaka engu-8 wayengamasentimitha angu-75 nje kuphela ubude. Abazali bakhe abangoFakazi BakaJehova banquma ukuya naye emhlanganweni ophathelene nezokwelapha owawusehholo lendawo edolobheni lakubo e-Argentina. Bahlala ezihlalweni ezingaphambili futhi kwakunabantu abangu-500 kulo mbuthano.
Phakathi nokufundisa kwaso, isikhulumi esingudokotela sakhomba uCamila sathi uyisibonelo sengane ebonakala inempilo enhle. Engazi ngeminyaka nangezinkinga zempilo zale ntombazane, wabuza: “Uneminyaka emingaki lo mntwana?”
“Eyisishiyagalombili,” kusho unina uMarisa.
“Ingabe uqonde ukuthi izinyanga eziyisishiyagalombili?” kuphendula udokotela.
“Cha, iminyaka eyisishiyagalombili,” kuqinisekisa uMarisa.
Emangele, lo dokotela wabiza unina kaCamila ukuba eze nendodakazi yakhe esiteji ukuze ambuze eminye imibuzo. Ngemva kokuba uMarisa echaze ukuxilonga odokotela abakwenza kuCamila nemizamo yabo yokumelapha, lo dokotela wathi: “Abanye omama bayakhala lapho izingane zabo zinomkhuhlane. Kodwa ngemva kweminyaka eyisikhombisa yokwelashwa nangemva kokuba sewenze konke ongamenzela kona uCamila, uye walondoloza umbono oqondile. Ukwenze kanjani lokho?”
Esabela kulo mbuzo onomusa, uMarisa watshela izilaleli ngethemba lakhe elisekelwe eBhayibhelini lomhlaba omusha onokulunga lapho kungeke kusaba khona noma ikuphi ukugula, ukuhlupheka ngisho nokufa imbala. (Isaya 33:24; IsAmbulo 21:3, 4) Ekuphetheni, uMarisa wachaza ubuzalwane bomhlaba wonke obuphakathi koFakazi BakaJehova futhi wachaza nangendlela uthando lwabo ngomunye nomunye olubasiza ngayo ukuba bakhuthazelele izilingo nobunye ubunzima ababhekana nabo ekuphileni.—Johane 13:35.
Ekupheleni kwalo mhlangano, owesifazane othile weza kuye wamcela ukuba amchazele okwengeziwe ngamaphuzu ayekhulume ngawo. Enelukuluku lokwazi, lona wesifazane wamukela isifundo seBhayibheli sasekhaya oFakazi BakaJehova emhlabeni wonke abasiqhubela abantu abafuna ngobuqotho ukuqonda iBhayibheli nenjongo kaNkulunkulu ngesintu.
[Isithombe ekhasini 25]
UCamila oneminyaka eyisishiyagalombili kanye nonina, uMarisa