I-alpenhorn—Umculo Ovela Esihlahleni

SEKUPHELE amakhulu eminyaka ezinye izakhamuzi zasezintabeni zoKhahlamba zaseSwitzerland zilokhu zisebenzisa ithuluzi lokuxhumana elikhethekile—i-alpenhorn. Lingase lingabonakali lisebenziseka kalula—amanye ala macilongo made ngokuphindwe kabili kunabantu abawadlalayo. Noma kunjalo, i-alpenhorn iyaphatheka ngesandla. Ezinye izinhlobo ziyahlukana zibe izingxenye ezimbili ezikwazi ukungena ebhokisini elikahle. Umsindo waleli cilongo ungezwakala kahle nasebangeni elingamakhilomitha ayishumi, unqamule amathafa azungezwe amagquma aphakeme!

Ukwenza I-alpenhorn

Njengoba lwakhiwa ngesihlahla sonwele lwentaba, kuyafaneleka ukuba icilongo i-alpenhorn litholakale ezintabeni ezinhle zoKhahlamba zaseSwitzerland. Imvelo ibangela ukuba izihlahla zonwele ezimila emithambekeni yamagquma zibe nesiqu esigobile.

Ngemva kokukhetha isihlahla, umenzi we-alpenhorn usinqamula kahle sibe yizingxenye ezimbili, abese ezigweda ngeshizolo elikhethekile. Ukwenza lokhu nje kuphela kumthatha amahora angu-80 wonke! Lo mbazi ube esekhuhla ingaphakathi nengaphandle lalesi sihlahla ukuze sibe bushelelezi. Ngemva kwalokho lezi zingxenye ezimbili uzihlanganisa ngengcina, abese ezibopha ziqine ngemicwana yogonothi lwe-birch. Ube esenamathisela isiqwana sokhuni laphaya phansi ukuze leli cilongo lime ngaso uma lidlalwa. Ekugcineni, ngemva kokufaka ingxenye yokulifutha efanele nokuhlobisa umlomo walo omkhulu ngomklamo opendiwe noma oqoshiwe, umbazi ube eseligcoba ngevanisha ukuze lingagqwali.

Indlela Abomdabu Abalisebenzisa Ngayo

Sekuyizizukulwane ngezizukulwane abelusi bezimvu nabezinkomo beshaya icilongo i-alpenhorn bephezulu emadlelweni ukuze bazise imindeni yabo ephansi emathafeni ukuthi “baphephile.” Nokho, ngokuyinhloko babelisebenzisela ukubiza izinkomazi ukuze zizosengwa. Abasengi baseSwitzerland bebelokhu bekholelwa ukuthi umculo omtoti we-alpenhorn wenza izinkomazi zizole lapho zisengwa.

Ebusika, uma izinkomo sezivalelwe ezitebeleni, abelusi abaningi babethatha amacilongo abo bayowadlala edolobheni bese bephiwa imali eyayenezela emholweni wabo. Ngokomlando, icilongo i-alpenhorn liye lasetshenziselwa ngisho nokubizela amadoda empini.

Lidlalwa Kanjani?

Uma ulibuka nje, kungase kubonakale kulula ukulidlala leli cilongo. Ingani phela alinazimbobo, futhi alinazo izinkinobho ezicindezelwayo uma lidlalwa. Into eyinselele ukulawula kahle umoya ongena kulo ukuze kuphume umsindo ofunekayo.

I-alpenhorn ikhipha imisindo ehlukahlukene engu-12 kuphela. Nakuba ingakwazi ukudlala wonke amanothi, kunamanothi aklanyelwa yona, futhi umdlali wayo ongungoti angakwazi ukudlala iminkenenezo enhlobonhlobo ehlabahlosile.

Ababhali bomculo abadumile baye bafaka nomnkenenezo we-alpenhorn ezingomeni zabo zomculo wezinsimbi. Ngokwesibonelo, uLeopold Mozart, ubaba kaWolfgang Amadeus Mozart, wabhala ingoma yakhe ethi “Sinfonia Pastorella” ukuze idlalwe ngezinsimbi nange-corno pastoritio—uhlobo oluthile lwe-alpenhorn. UBrahm wazama ukukhipha umsindo ofana nowe-alpenhorn yaseSwitzerland esebenzisa imitshingo nezinye izinhlobo zamacilongo, uBeethoven yena engomeni yakhe ethi Pastoral, walingisa umsindo ofana nowaleli cilongo ukuze aveze umuzwa wokuba semadlelweni.

Icilongo i-alpenhorn laqala ukubizwa ngaleli gama ezincwadini zaseSwitzerland ngo-1527, encwadini yomlando weSigodlo Sezindela saseSt. Urban. Manje ngemva kweminyaka ecishe ibe ngu-500, umnkenenezo ozolile wecilongo i-alpenhorn usezwakala eziNtabeni eziluhlaza zaseSwitzerland ezihlaba umxhwele.

[Isithombe ekhasini 15]

Ungayihlukanisa i-“alpenhorn” uyiphathe ngesandla