ISIHLOKO ESISESEMBOZWENI

Iqiniso Nge-Halloween

Ingabe i-Halloween iyagujwa endaweni ohlala kuyo? E-United States naseCanada, i-Halloween yaziwa kabanzi futhi igujwa minyaka yonke ngo-October 31. Nokho, imigubho ye-Halloween iyatholakala nasezingxenyeni eziningi zomhlaba. Kwezinye izindawo kunamaholidi anemikhuba efana neyayo, nakuba ebizwa ngamanye amagama: ukuxhumana nezwe lemimoya okuhlanganisa imimoya yabafileyo, izidalwa zemimoya ezinamandla, abathakathi, ngisho nanodeveli nezingelosi ezingamademoni.—Bheka ibhokisi elithi “Imikhosi Efana Ne-Halloween Emhlabeni Wonke.”

KUNGENZEKA ukuthi wena awukholelwa ezidalweni zomoya ezinamandla angaphezu kwavamile. Ungase ubheke ukuhlanganyela kuyi-Halloween nakweminye imikhosi efana nayo njengendlela nje yokuzijabulisa nefundisa izingane zakho ukuba zibe nomqondo ovulekile. Kodwa, abantu abaningi babheka le mikhosi njengelimazayo ngenxa yalezi zizathu ezilandelayo:

I-Encyclopedia of American Folklore iyachaza: “I-Halloween, ihlobene kakhulu nethemba lokuxhumana nezidalwa zomoya ezinamandla, iningi lazo ezithusayo noma ezisabekayo.” (Bheka ibhokisi elithi “Umlando We-Halloween.”) Kunjalo nangeminye imikhosi eminingi, nayo njenge-Halloween, inomsuka wobuqaba ogxile kakhulu ekukhulekeleni okhokho. Ngisho nanamuhla, abantu emhlabeni kabanzi basebenzisa lezi zinsuku ukuze baxhumane nalokho okuthiwa imimoya yabafileyo.
Nakuba i-Halloween ibibhekwa njengeholidi laseMelika ngokuyinhloko, kunabantu abaningi abayemukelayo emazweni amaningi unyaka ngamunye. Kodwa labo abasanda kuqala ukugubha lo mkhosi, abaqondi ukuthi imifanekiso ye-Halloween, izindlela zokuhlobisa kanye nendlela egujwa ngayo kunomsuka wobuqaba, iningi layo elihlobene nezidalwa zomoya ezinamandla kanye namandla emilingo.—Bheka ibhokisi elithi “Yavelaphi?”
Izinkulungwane zamalungu eWicca, zilandela amasiko amaCeltic asendulo, zisabiza i-Halloween ngegama layo lasendulo elithi i-Samhain futhi ziyibheka njengobusuku obungcwele kakhulu onyakeni. Iphephandaba i-USA Today lacaphuna omunye ozibiza ngomenzi wemilingo ethi: “AmaKristu ‘awakuqapheli lokhu, kodwa agubha iholidi lethu. . . . Siyakuthanda lokho.’”
Imikhosi efana ne-Halloween iyangqubuzana nezimfundiso zeBhayibheli. Liyaxwayisa: “Akumelwe nanini kube khona phakathi kwenu umuntu. . . osho amabika, obhulayo, owenza imilingo noma umthakathi, osebenzisa iziphonso, oxhumana nemimoya noma okhuluma nabafileyo.”—Duteronomi 18:10, 11, The Jerusalem Bible; bheka noLevitikusi 19:31; Galathiya 5:19-21.

Imikhaya ingaba nezikhathi ezimnandi ngaphandle kokuhlanganyela emikhosini eyingozi

Ngokwalokhu osekushiwo, kuwukuhlakanipha ngawe ukwazi ngalo msuka ongemuhle we-Halloween neminye imikhosi efana nayo. Ukukuqonda ngokugcwele lokhu kuyokwenza ube yingxenye yabaningi abangahlanganyeli kula maholidi.

“AmaKristu ‘awakuqapheli lokhu, kodwa agubha iholidi lethu. . . . Siyakuthanda lokho.’”—Iphephandaba i-USA Today, licaphuna ozibiza ngomenzi wemilingo

YAVELAPHI?

**Imvelaphi Yeminye Imigubho Ye-Halloween Nemifanekiso**

IMIMOYA ENCELA IGAZI LABANTU, ABANTU ABAGUQUKA BABE IZIMPUNGUSHE, ABENZI BEMILINGO, IMIKHOVU: Lezi zidalwa kudala zihlotshaniswa nezwe lemimoya emibi.

USWIDI: AmaCeltic asendulo ayezama ukushweleza emimoyeni emibi ngoswidi. Kamuva, isonto lakhuthaza abantu ababegubha lo mkhosi ukuba baye endlini ngendlu ngosuku olwandulela i-Halloween, bacele ukudla ukuze bathandazele abafileyo bakulowo muzi. Ekugcineni, leli siko laba yisu noma indlela okuqhutshwa ngayo i-Halloween.

INDLELA YOKUGQOKA: AmaCeltic ayefaka izifihla-buso ezisabekayo ukuze imimoya emibi idideke icabange ukuthi bayimimoya bese ibayeka ingabenzi lutho. Kancane kancane, isonto lahlanganisa la masiko obuqaba namadili Ayo Yonke Imiphefumulo Kanye Nabo Bonke Osanta. Kamuva, abagubhi balo mkhosi bangena indlu ngendlu begqoke izevatho zosanta, ezezingelosi nezodeveli.

AMATHANGA: Kwakuhlotshiswa ngotheniphu ogwediwe (turnip), ofakwe amakhandlela avuthayo ngaphakathi ukuze kuxoshwe imimoya emibi. Kwabanye, amakhandlela angaphakathi kukatheniphu ayemelela imimoya ebambeke esihlanzweni. Kamuva, kwasetshenziswa kakhulu amathanga agwediwe.

UMLANDO WE-HALLOWEEN

NGEKHULU LESIHLANU B.C.E.

AmaCeltic agubha umkhosi we-Samhain ekupheleni kuka-October, okuyisikhathi akholelwa ukuthi izipoki namademoni kuchitha isikhathi esiningi kuzulazula emhlabeni kunangezinye izikhathi.

NGEKHULU LOKUQALA C.E.

AmaRoma anqoba amaCeltic abese ethatha isiko le-Samhain lemikhosi edumisa imimoya.

NGEKHULU LESIKHOMBISA C.E.

UPapa Boniface IV kuthiwa wasungula umkhosi waminyaka yonke woSuku Lwabo Bonke OSanta ukuze kuhlonishwe abafel’ ukholo.a

NGEKHULU LESHUMI NANYE C.E.

Usuku lwesibili ku-November lumiswa njengoSuku Lwayo Yonke Imimoya ukuze kukhunjulwe asebafa. Imigubho yoSuku Lwabo Bonke OSanta neyoSuku Lwayo Yonke Imimoya, ibizwa ngokuthi i-Hallowtide.

NGEKHULU LE-18 C.E.

Igama laleli holidi, i-Hallowe’en (Ubusuku Be-Hallow) livela selibhalwe ngokuthi i-Halloween.

NGEKHULU LE-19 C.E.

Izinkulungwane zabantu ezisuka e-Ireland zithuthela e-United States, zifika namasiko azo e-Halloween, okuthi ngokuhamba kwesikhathi, ahlanganiswe namanye amasiko afanayo aseBrithani naseJalimane kuhlanganise nawase-Afrika nezinye izingxenye zomhlaba.

NGEKHULU LAMA-20 C.E.

I-Halloween iba yiholidi elithandwayo kulo lonke izwe lase-United States.

NGEKHULU LAMA-21 C.E.

Isithakazelo nge-Halloween siyakhula emkhakheni wabezentengiselwano abenza izigidigidi zamarandi.

a Elithi Hallow igama elidala elisho “usanta”. I-All Hallows’ Day, (eyaziwa nangokuthi uSuku Lwabo Bonke OSanta) iyiholidi lokuhlonipha osanta asebafa. Ubusuku obandulela i-All Hallows’ Day babubizwa ngokuthi yi-All Hallow Even, kamuva lwafushaniswa ngokuthi i-Halloween.