ISIHLOKO ESISESEMBOZWENI | INDLELA YOKULAWULA IZEJWAYEZI ZAKHO
2 Lawula Indawo Ekuzungezile
Unqume ukudla ngendlela enempilo kakhudlwana, kodwa amehlo akho awavumi ukusuka esitsheni sika-ice cream.
Unqume ukuyeka ukubhema, kodwa umngane wakho—owaziyo ukuthi uzama ukuyeka ukubhema—ukunika ugwayi.
Ubuhlele ukujima namuhla, kodwa ukubheka izicathulo zakho zokugijima kukodwa nje kubukeka kuwumsebenzi omkhulu!
Zifana ngani lezi zimo? Kuye kwatholakala ukuthi indawo esizungezile—izimo esizifaka kuzo nabantu esizihlanganisa nabo—inegalelo ekuphumeleleni kwethu ekubeni nezejwayezi ezinhle nasekulahleni ezimbi.
ISIMISO SEBHAYIBHELI: “Unokuqonda lowo oboné inhlekelele wabe esecasha, kodwa abangenalwazi baye badlula ngakuyo futhi kumelwe bakhokhe.”—IzAga 22:3.
IBhayibheli lisicebisa ukuba sihlele kusengaphambili. Ngokwenza kanjalo, singazigwema ngokucophelela izimo ezingasiphazamisa emigomweni yethu futhi sikwazi ukuzibeka ezimweni eziyosisiza kuyo. (2 Thimothewu 2:22) Ngamafuphi, kuwukuhlakanipha ukulawula indawo esizungezile.
Kwenze kube nzima ukwenza lokho ongakufuni, kube lula ukwenza lokho okufunayo
ONGAKWENZA
Kwenze kube nzima ukwenza lokho ongakufuni. Ngokwesibonelo, uma uzama ukuyeka ukudla okungenamsoco, gwema ukuba nokudla okunjalo endlini. Ngaleyo ndlela, lapho kufika isilingo, ukusivumela kuyodinga umzamo owengeziwe kunokusigwema.
Kwenze kube lula ukwenza lokho okufunayo. Ngokwesibonelo, uma uhlele ukujima ekuseni, beka izingubo zakho zokujima eduze kombhede ngayizolo ebusuku. Uma kuba lula ukuqala, cishe uyokwazi ukuqhubeka.
Khetha abangane bakho ngokucophelela. Sithambekele ekulingiseni abantu esizihlanganisa nabo. (1 Korinte 15:33) Ngakho nciphisa isikhathi osichitha nabantu abakhuthaza izejwayezi ozama ukuziyeka, uthole abazokukhuthaza kwezinhle.