IZWE LIGCWELE IZIYALUYALU

2 | Vikela Imali Nezinto Onazo

OKWENZA KUBALULEKE

Abantu abaningi bayapatanisa nsuku zonke ukuze bathole izinto abazidingayo. Ngokudabukisayo, iziyaluyalu ezigcwele izwe zingenza lokhu kube nzima nakakhulu. Kungani?

Lapho kuneziyaluyalu, umphakathi ungase udonse kanzima—kube nzima ukuthola ukudla nendawo yokuhlala.
Izinhlekelele zingenza abantu baphelelwe umsebenzi noma bahole imali encane.
Izinhlekelele zingalimaza noma ziqede amabhizinisi abantu, imizi yabo noma ezinye izinto abanazo. Lokhu kwenza ukuba abantu abaningi bahlupheke.

Okufanele Ukwazi

Uma uyisebenzisa ngokuhlakanipha imali yakho, uyokulungela kangcono ukubhekana nesikhathi esinzima.
Imali ayihlale ikhona; umholo, imali oyibekile nezinto onazo kungaphelelwa amandla lapho umnotho uwohloka.
Kunezinto ongeke uzithenge ngemali, njengenjabulo nomndeni onobunye.

Ongakwenza Manje

IBhayibheli lithi: “Uma sinokudla nezingubo zokugqoka, siyokwaneliswa yilezi zinto.”—1 Thimothewu 6:8.

Ukwaneliseka kuhlanganisa ukunciphisa izinto esizifunayo nokwaneliseka lapho izinto esizidingayo sizithola. Lokhu kubaluleke kakhulu uma incane imali esinayo.

Kungaze kudingeke ushintshe indlela ophila ngayo ukuze waneliseke. Uma uhlale uthenga izinto ongenayo imali yokuzithenga uyoba nezinkinga ezinkulu zezimali.

UNGAZIVIKELA KANJANI?—Izinto Ezingakusiza

Phakathi nezikhathi zeziyaluyalu, vikela imali yakho nezinto onazo ngokwenza lezi zinto

NCIPHISA IZINDLEKO

Nciphisa izindleko

Ungathengi ngokungenasidingo izinto zasendlini nezingubo zokugqoka. Zibuze: ‘Ngingakwazi yini ukuphila ngaphandle kokuba nemoto? Ngingayitshala yini imifino?’
Ngaphambi kokuthenga okuthile, zibuze: ‘Ngiyakudinga yini ngempela? Nginayo yini imali yokukuthenga?’
Bhalisela usizo oluvela kuhulumeni uma lukhona.

“Sahlala phansi njengomndeni ukuze sibheke indlela esiphila ngayo. Sanciphisa imali esiyichitha kwezokuzijabulisa. Sazama ukuthenga ukudla okungabizi kakhulu.”—UGift.

HLELA UKUTHI UZOYISEBENZISA KANJANI IMALI

Hlela ukuthi uzoyisebenzisa kanjani imali

IBhayibheli lithi: “Ngokuqinisekile amacebo okhuthele amenza aphumelele, kodwa bonke abanamawala ngokuqinisekile bazifaka ekuhluphekeni.” (IzAga 21:5) Ukuhlela ukuthi uzoyisebenzisa kanjani imali kungakusiza ungasebenzisi imali engaphezu komholo wakho.

Okokuqala, bhala phansi ukuthi uzoba namalini uma kuphela inyanga.
Okwesibili, bhala phansi izindleko zenyanga ngayinye bese uhlola ngokucophelela ukuthi kukhona yini ongakulungisa.
Yibe usuqhathanisa imali oyitholayo nezindleko zakho. Uma uqaphela ukuthi awunayo imali eyanele, nciphisa izindleko ngokungazithengi izinto ongazidingi ngempela.

“Inyanga ngayinye, sibhala phansi imali engenayo kanye nezindleko esinazo. Sizama ukuba nemali yezimo eziphuthumayo neyezinto esingase sizidinge esikhathini esizayo. Lokhu kusisiza ukuba singakhathazeki kakhulu ngoba sisuke sesihlelile ukuthi sizoyisebenzisa kanjani imali esiyitholayo.”—UCarlos.

GWEMA IZIKWELETU / YONGA IMALI

Gwema izikweletu / yonga imali

Zama ukunciphisa izikweletu. Uma kungenzeka, kugweme ngokuphelele ukuba nesikweletu. Zama ukubeka imali ukuze uthenge okudingayo.
Beka imali nyanga-zonke yezinto ohlela ukuzenza neyezinto ezingase zenzeke kungalindelekile.

SEBENZA KANZIMA / ZAMA UKUNGALAHLEKELWA UMSEBENZI

IBhayibheli lithi: “Kukhona inzuzo kuzo zonke izinhlobo zomsebenzi onzima.”—IzAga 14:23.

Sebenza kanzima / zama ukungalahlekelwa umsebenzi

Yiba nombono ofanele ngomsebenzi owenzayo. Kungenzeka umsebenzi owenzayo akuwona lowo owawuwufisa kodwa uyakunika imali.
Zimisele ukuba isisebenzi esikhuthele nesethenjwayo. Lokhu kungakusiza ungalahlekelwa umsebenzi noma uwuthole kalula omunye umsebenzi esikhathini esizayo.

“Ngenza noma yimuphi umsebenzi engiwutholayo ngisho noma ngingawuthandi noma ungiholela imali encane kunaleyo ebengingalindela ukuyihola. Ngithembekile futhi ngiwenza kahle umsebenzi njengokungathi ngiwenzela mina, ngenza umsebenzi osezingeni eliphezulu.”—UDmitriy.

Ongakwenza uma ufuna umsebenzi . . .

Thatha isinyathelo kuqala. Fesa ezinkampanini ngisho noma zingashongo ukuthi ziyaqasha. Tshela abangani namalungu omndeni ukuthi ufuna umsebenzi.
Zivumelanise nezimo. Mancane amathuba okuthola umsebenzi oyikho konke okufunayo.