EMHUOGHAẠPH ITUUGHẠ PHỌ 20
AḌUỌR PHỌ 7 Jehovah, Our Strength
AZihova Kaadereghị Ni Nyinhạ
‘Aḍisẹph erolonaạn . . . Odẹ onmạ ighirigiir, Enaạn phọ eḍighi bọ zin oomo iidereghị phọ.’—2 KỌR. 1:3.
EGBON
Raraạr dị yira kotue otuughạ esi ipẹ aZihova aadereghị bọ we aJu phọ orọl bọ epẹ Babilọn.
1. AJu phọ orọl bọ epẹ Babilọn usoman eeghe adọl?
GBIOM olhoghi idị adọl arebenhẹ phọ etir buọ aJu phọ orọl bọ Babilọn. Bidị umhiịn ni mem mọ ophiemhi bọ emhạ phọ abidị. Loor esi ikarạph phọ abidị r’ikarạph aburudẹ aburudẹ phọ abidị, aZihova amheera ni mọ awe aBabilọn osighẹ bidị ogheelhom Babilọn idiphọ arebenhẹ. (2 Chron. 36:15, 16, 20, 21) Dị iikia i/lo, aJu phọ orọl bọ epẹ Babilọn umhoọgh ni eereẹgh oḍighi ibadị araraạr. (Jer. 29:4-7) Ghalhamọ r’iduọn phọ ni, adọl phọ bidị orọl bọ i/ḍighi iniin phọ r’adọl phọ bidị mutọl bọ epẹ Jeruselem. Adọl phọ bidị orọl bọ itir bidị ika? Oniin onyọ abidị aḅẹm mọ: “Siphẹ iigbom ariphiịny phọ aBabilọn kụ edị yoor orologhụ ude. Siphẹ kụ edị yoor omhoghi ghan mem dị yoor ootughiạn bọ Zayọn.” (Ps. 137:1) Awe aJu phọ umhoghi ni iidereghị, kuolọ anhiạn kụ kaadereghị bọ bidị?
2-3. (a) AZihova aḍighinhaan eeghe we aJu phọ orọl bọ epẹ Babilọn? (b) Yira kooḅeghiọn eeghe siẹn emhuoghaạph phọ ephẹn phọ?
2 AZihova kụ “Enaạn phọ eḍighi bọ zin oomo iidereghị.” (2 Kọr. 1:3) Idiphọ Enhaạn ephomhoghiạn, reḅeraạn ghan ni nyodị oodereghị awe lọ oḍuraan otuman nyodị. AZihova alhegheri ni mọ abuniin abuphẹ orọl bọ dọl arebenhẹ epẹ Babilọn kosighẹ ni ilioghọm m’odị kụ oḅilhẹ oḅula esi odị. (Isa. 59:20) Dị epel li 100 asiạ, kụ bidị ogbi bọ oghị adọl arebenhẹ phọ, aZihova angọ ni oyil phọ Aizaya dom, dị edi siphẹ aḍinyạ phọ Aizaya. Atụ eeghe kụ angọ bọ dom mọ? Aizaya agẹ mọ: “Enhaạn ayira eḅẹm mọ, ‘iidereghị we amị, iidereghị bidị!’” (Isa. 40:1) Siphẹ aḍinyạ phọ Aizaya kụ edị aZihova amiteom iidereghị phọ awe aJu phọ orọl bọ dọl arebenhẹ phọ omhoghi bọ.
3 Idiphọ aJu phọ orọl bọ dọl arebenhẹ epẹ Babilọn, yira phọ kẹn romoghi ghan ni iidereghị mem emhạn mem. Siẹn emhuoghaạph phọ ephẹn phọ, yira kooḅeghiọn iraạr areten dị aZihova aadereghị buọ aJu phọ orọl bọ epẹ Babilọn: (1) Odị aguanhaan osạr owilhenhaạn abulọ okiton, (2) odị angọ we phọ odị oḍuomolhoghi, (3) odị alhoghonhaạn bidị ḍighaạgh dị ko/moọgh oghiilhaan. Iduọn yira rooḅeghiọn bọ iraạr phọ areten phọ iphẹn phọ, omhiịn idị aZihova ruudereghị aani ghan iyira eniin phọ eten phọ rodon.
R’ONMẠ IGHIRIGIIR, AZIHOVA RASẠR GHAN IKARẠPH AYIRA KUWILHENHAẠN IYIRA
4. Ika kụ edị aZihova aḍeenhaan mọ odị Enhaạn onmạ ighirigiir? (Isaiah 55:7)
4 AZihova kụ “Odẹ onmạ ighirigiir.” (2 Kọr. 1:3) Odị aḍeenhaan eegharạ phọ ephẹn phọ mem mọ odị aguanhaan bọ osạr owilhenhaạn torobọ onyọ aJu dị odi Babilọn kụ akiton. (Bạl Isaiah 55:7.) Odị aḅẹm mọ: “Loor esi ephomhoghiạn oḅạr phọ amhị edi ghan bọ k’agee-pọ, mị kinmạ ni inyinha ighirigiir.” (Isa. 54:8) AZihova kaḍeenhaan onmạ ighirigiir phọ ika? Ghalhamọ r’iduọn awe aJu phọ komiinhọm bọ ni loor ekarạph eḍighinhom iyaạr phọ abidị, aZihova aguanhaan mọ bidị ko/tọl Babilọn k’agee-pọ. Bidị kotọl dọl arebenhẹ phọ esi ekulha amem bịn. (Isa. 40:2) Ikpo onhụ phọ iphẹn phọ ikạr ri eedereghị eḅilhẹ ekparamhị buphẹ okiton bọ siphẹ igbo phọ abidị!
5. Eeghe kụ iḍighi kụ yira okuphom bọ owol opu buọ aJu phọ orọl bọ Babilọn mọ aZihova rasạr ghan ni ikarạph kawilhenhaạn?
5 Eeghe kụ iyaạr ituughạ phọ? AZihova aakolhobian ni osạr owilhenhaạn arebenhẹ phọ odị eten dị ebụgh. Ḍio phọ arodon, yira omoọgh riphigh dị epu ipẹ awe aJu phọ, otuạn omheeraam mọ aZihova akạr rasạr ghan ikarạph kawilhenhaạn. Eeghe kụ iḍighi? Yira onaghanhạn iyaạr phọ eḍighi bọ kụ aZihova rasạr ghan bọ ikarạph kawilhẹ. Ibadị asiạ reten egbi k’amem mọ Aizaya amhiịn bọ imiịn ilọ osạr owilhenhaạn phọ Enhaạn, aZihova arom ni Oọny phọ odị aphomhoghiạn bọ oru isiẹn ade phọ obọ amiteom ekiạ otagharạn oomo awe lọ kokiton. Ekiạ phọ epẹ phọ kụ iyaạr phọ Enhaạn katuạn bọ “agbuurogh ikarạph phọ” ayira. (Iiḍ. 3:19; Isa. 1:18; Efẹ. 1:7) Yira okạr kụ rokumu Enhaạn onmạ ighirigiir!
6. Eeghe asuọ kụ edị yira komoọgh eḍighi maạr dị yira ogbon onmạ ighirigiir phọ aZihova? (Miịn kẹn afoto phọ.)
6 Ikpo onhụ phọ aZihova edi bọ Isaiah 55:7 ketue ni iidereghị iyira eḍighi maạr dị yira omhoọgh mukum olhoghi. Eeni abuniin ayira okiọm ni ghisigh romoọgh ghan mukum olhoghi loor esi ikarạph dị bidị oḍighi mem dị meten. Iphẹn phọ rekạr ghan kemite mem dị opiomạn phọ ayira akọm iiḅaghamhị ungọ iyira. Ghalhamọ r’iduọn phọ ni, mem dị yira moghaạph ikarạph phọ ayira omiteom, oḅilhẹ oolemhi reten phọ ayira, yira kotue ni okuphom owol mọ aZihova masạr ri uwilhenhaạn iyira. Kụ mem dị aZihova asạr awilhenhaạn, odị raa/tughiạn ghan mun ikarạph phọ. (Poghom Jeremiah 31:34.) Kụ eḍighi maạr dị aZihova raa/tughiạn mun ikarạph phọ ayira, pọ i/kpẹ dị yira kootughiạn ghan. AZihova rapogh ghan odọ phọ oye phọ yira oru bọ nyiidiphọ, k/igbaany asipiomạn ayira. (Ezek. 33:14-16) Kụ moọny amem Odẹ onmạ ighirigiir phọ ayira kasiemhi ni eekunha oomo iiḅaghamhị lọ yira osoman loor esi asipiomạn ayira.
AZihova rapogh ghan raraạr phọ ipẹ yira roḍighi bọ nyiidiphọ, ka/sipiomạn dị yira opiomạn epẹ omhạn (Miịn ekpịgh phọ 6)
7. Eeghe kụ kilhoghonhaạn iyira ḍighaạgh oḅenhị ikumor awe phọ ikarạph dị yira oḍighi kụ robooghị?
7 Yira koḍighi ika eḍighi maạr dị ooruẹn olhoghi ayira ruuḅaghamhị ghan iyira loor esi igbogh ikarạph dị yira oḍighi kụ aaghị? ABaibul phọ uroma iyira mọ oghị owạ olhoghonhaạn aḍighaạgh ikumor awe phọ. (Jems 5:14, 15) Toroboiperolbọ, re/dugh ghan oghaạph omiteom ikarạph lọ oye phọ aḍighi. Kuolọ eḍighi maạr dị yira mokiton, kinyu ni iyira oghị oteẹny ikumor awe phọ. AZihova mamiteom bidị olhoghonhaạn ayira ḍighaạgh, kụ idiphọ aZihova, bidị kuḍeenhaan ni iyira ephomhoghiạn r’onmạ ighirigiir. Miịn idị onmạ ighirigiir phọ aZihova aadereghị onyọ umor dị oghol mọ Arthur,a dị ooruẹn olhoghi phọ aaḅaghamhị ghan. Odị aḅẹm mọ, “dị remạn ni lhạ mị uphogh ghan sifoto aradaḅạ. Kuolọ mị ronhaghạn oniin oghaạph dị ongọ ilọ ooruẹn olhoghi phọ, mị ughaạph ni ikarạph phọ amhị aḅenhị anhịr amhị r’ikumor awe phọ. Mị r’oghaạph oḅenhị bidị bịn olhoghi amhị aphọ. Kuolọ olhoghi amhị eeph ghan ni loor ipẹ mị aḍighi bọ. Ikumor awe phọ uutughianhạm ni imhị mọ aZihova imhị u/ghel. Odị ruliọm ghan iyira loor esi dị odị uphomhoghiạn iyira. Ikpo onhụ iidereghị phọ abidị ikạr kụ etir ekpom amhị kụ ilhoghonhaạn imhị ḍighaạgh oolemhi iitughiạn phọ amhị.” Rodon, Arthur maḍighi okọy eten oomo amem mọ aḅilhẹ raloghonhaạn ḍighaạgh ikumor awe phọ. P’eeghe iidereghị dị yira romoọgh ghan olhegheri mọ aZihova Enhaạn dị raḍeenhaan ghan onmạ ighirigiir mem dị yira okiton!
AZIHOVA RUNGỌ GHAN IYIRA OḌUOMOLHOGHI
8. (a) Eeghe oḍuomolhoghi kụ edị aZihova angọ buọ aJu phọ orọl bọ Babilọn? (b) Odaphạn Isaiah 40:29-31, ika kụ idị oḍuomolhoghi phọ kaloghonhaạn bidị ḍighaạgh?
8 Awe aJu phọ uutughiạn ghan mọ bidị ko/tue mun ni bịn oḅula epẹ emhạ phọ abidị. Bidị ulhoghoma iduọn phọ loor esi dị Iikpọ Itooghị phọ aBabilọn uḍighi we dị u/seere ghan we dị bidị osiphi. (Isa. 14:17) Kuolọ, aZihova angọ ni we phọ odị oḍuomolhoghi. Odị aguanhaan mọ odị kaḅulhemhi ni bidị epẹ ade phọ abidị, kụ iyaạr nyodị ke/kikima. (Isa. 44:26; 55:12) Esi aZihova, aBabilọn akịgh ophugh dị ateẹny oye. (Isa. 40:15) Ophulha oọny ookugh bịn ophugh phọ maḍuạ. Ika kụ edị oguanhaan phọ aZihova kaloghonhaạn ḍighaạgh we phọ odi bọ dọl arebenhẹ phọ? Keedereghị bidị. Kuolọ keḅilhẹ ni eloghonhaạn bidị ḍighaạgh enhọn eten. Aizaya agẹ mọ: “Buphẹ oḍuom bọ olhoghi aZihova koḅilhẹ ni omoọgh inyaạm.” (Bạl Isaiah 40:29-31.) Bidị kokịgh “ruga dị repeẹph epẹ okuaḍio phọ,” loor esi dị oḍuom olhoghi phọ kangọ ni bidị inyaạm.
9. Eeghe kụ iḍighi kụ abuọ aJu phọ okuphom bọ owol mọ aZihova katagharạn ni bidị dọl arebenhẹ?
9 AZihova aḅilhẹ angọ Ju phọ orọl bọ dọl arebenhẹ phọ riphigh otuạn oḍuom olhoghi ruguanhaan phọ odị. Eeghe ariphigh kụ edị odị angọ bọ bidị? Torobọ imiịn dị aZihova aghaạph imhunhughan ni. Esi omaạm, aZihova aghaạph ni mọ awe phọ Assyria kokpạr ri opu ḍioph arughunhughun phọ Izrạl kụ osighẹ bidị okimọm dọl arebenhẹ, kụ ipẹ phọ imite ni. (Isa. 8:4) Bidị umhiịn ni dị awe aBabilọn ophiemhi Jeruselem kụ osighẹ we phọ oghimọm emhạ abidị dọl arebenhẹ. (Isa. 39:5-7) Bidị umhiịn ni mem mọ uw-emhạ phọ aBabilọn abomoghi bọ riḍien Uw-emhạ phọ Zedekiah kụ asighẹ aghimọm Babilọn. (Jer. 39:7; Ezek. 12:12, 13) Oomo araraạr phọ aZihova aghaạph bọ imhunhughan ni. (Isa. 42:9; 46:10) Dị iikia i/lo, iphẹn phọ ikparamhị ni omheeraam mọ abidị mọ aZihova katagharạn ni bidị iduọn odị maguanhaan bọ oḍighi!
10. Eeghe kụ keloghonhaạn ḍighaạgh okparamhị oḍuomolhoghi phọ ayira siẹn asiḍio aruukunha phọ?
10 Yira otuughạ eeghe? Mem dị yira oḅonyonhu ozuan, oḍuomolhoghi phọ ayira katue ni uudereghị iyira aḅilhẹ ulhoghonhaạn iyira ḍighaạgh omhoọgh inyaạm. Yira odi aḅirinhi dị adọl phọ repogh ghan bịn olhoghorị, kụ buphẹ Enhaạn u/pomhoghiạn bọ oḅilhẹ kẹn rusophoghom ghan iyira. Ghalhamọ r’iduọn phọ ni, i/wạ mọ oḅonyonhu ozuan. AZihova mungọ iyira ookiạ oḍuomolhoghi omhoọgh aghuḍum k’agee-pọ, aḅirinhi dị eephọ r’eborọph ketọl. Ewạ mọ ogbon oḍuomolhoghi phọ opọ phọ. Iduọn kụ i/lo, pọ oḍuomolhoghi phọ ayira katue ni agururu idiphọ amem dị oye ameerạ ghisigh aglạs dị aḅuurạ kụ rapogh erugh. Yira koḍighi ika kụ “aglạs phọ aḅaạl,” iduọn phọ pọ, yira kokparamhị oḍuomolhoghi phọ ayira ika? Ewạ dị yira kogbor ghan ootughiạn ipẹ adọl phọ ayira ketọl bọ siphẹ omhoom aḅirinhi phọ. Yira kotue kẹn ni obạl rumhuoghaạph, opogh sividio, oḅilhẹ onaghạn suọr dị eghaạph ilọ oḍuomolhoghi phọ ayira. Kụ mem dị yira rooḅereghị, yira otue ni oḅenhị aZihova raraạr dị yira rogon omhiịn siphẹ omhoom aḅirinhi phọ.
11. Eeghe kụ ilhoghonhaạn ḍighaạgh oniin onyọ umaranhi dị amhoọgh egbagarạ ezẹgh oḅilhẹ omhoọgh inyaạm?
11 Ooḅeghiọn idị oḍuomolhoghi phọ ayira aadereghị aḅilhẹ akparamhị onyọ umaranhi dị oghol mọ Joy, dị amhoọgh egbagarạ e/moon. Odị aḅẹm mọ: “Mem dị mị aḅonyonhu azuan, mị raḅenhị ghan ni aZihova ipẹ mị alhoghoma bọ, kụ mị alegheri ni mọ odị ranaghanhạn ghan ni ipẹ mị alhoghoma bọ. Loor esi dị aZihova rungọ ghan ni imhị iikpọ phọ odị.” (2 Kọr. 4:7) AJoy aḅilhẹ kẹn raatughiạn ghan ipẹ aghuḍum mọ odị katọl bọ siphẹ omhoom aḅirinhi phọ, siphẹ “oye ka/tọl mun bọ dị kaḅẹm mọ: ‘Mị u/moon.’” (Isa. 33:24) Eḍighi maạr dị yira oḅenhị ghan aZihova ipẹ yira olhoghoma bọ, kụ oḅilhẹ ghan ogbon oḍuomolhoghi phọ ayira, yira koḅilhẹ ni omoọgh inyaạm.
12. Eeghe ariphigh kụ edị yira omhoọgh otuạn oḍuom olhoghi ruguanhaan phọ aZihova? (Miịn kẹn afoto phọ.)
12 Idiphọ aZihova alhoghonhaạn bọ ḍighaạgh Ju phọ omhoọgh ibadị ariphigh oḍuomolhoghi ruguanhaan phọ odị, kụ edị odị muḍighinhaan aani iyira. Tuutughiạn ilọ imiịn phọ remunughan bọ ḍio phọ arodon. Esi omaạm, yira momhiịn dị iikpọ itooghị phọ Anglo-America eḍighi itooghị dị “agạ ekpạr, agạ eyoghoyoghọ.” (Dan. 2:42, 43) Yira oḅilhẹ kẹn ni ronaghạn dị ade repiigha yogh, ḅilhẹ yira ropinomaam aani ghan bin oghaạph oghaạph iiḅi iinhaghạn phọ siẹn “oomo aḅirini phọ.” (Mat. 24:7, 14) Imiịn phọ iphẹn phọ yira omhiịn bọ dị remunughan r’inhọn rekparamhị ghan omheeraam mọ ayira mọ aruguanhaan phọ aZihova ipẹ k”emhunughan bọ kemunughan ni.
Imiịn phọ remunughan bọ ḍio phọ arodon, ingọ iyira riphigh otuạn oḍuom olhoghi mọ aruguanhaan phọ aZihova kemunughan ni (Miịn ekpịgh phọ 12)
AZIHOVA RULHOGHONHAẠN GHAN IYIRA ḌIGHAẠGH PIDỊ YIRA KO/MOỌGH OGHIILHAAN
13. (a) Eeghe ipaanhaạn kụ edị abuọ aJu phọ kosoman mem mọ kotagharạn bọ bidị? (b) Odaphạn ipẹ edi bọ Isaiah 41:10-13, ika kụ idị aZihova aadereghị Ju phọ orọl bọ dọl arebenhẹ?
13 Ghalhamọ r’iduọn aZihova aadereghị bọ Ju phọ orọl bọ dọl arebenhẹ phọ esi ongọ abidị omạ oḍuomolhoghi, odị alhegheri ni mọ bidị kosoman ni ipaanhaạn mem mọ kotagharạn bọ bidị. AZihova aghaạph ni mọ tutụ bidị koḍuạ Babilọn oye kamite ni dị kazuoghom reelhe phọ etuman bọ Babilọn r’aBabilọn phọ r’aloor. (Isa. 41:2-5) Kewạ ni dị awe aJu phọ kokiilhaan ḍughụm? Ibadị asiạ epẹ omhạn, aZihova aadereghị ni we phọ odị esi oḅẹm mọ: “Ke/kiilhaan, mị odi ni r’anyinha. Kaa/ḅaghamhiạn loor, idị eḍighi bọ mị kụ Enhaạn anyinha.” (Bạl Isaiah 41:10-13.) Eeghe kụ iḍighi kụ aZihova aḅẹm bọ mọ “mị kụ Enhaạn anyinha”? Ikpo onhụ phọ iphẹn phọ i/ḍighi ilọ ootughianhạm awe aJu phọ mọ ooḅereghị nyodị. Awe aJu phọ olegheri ni iphẹn phọ. Kparipẹ ghụn, odị aatughianhạm ghan bidị mọ odị odi ni r’abidị.—Ps. 118:6.
14. Eeghe kụ enhọn iyaạr dị aZihova aḍighi pidị awe aJu phọ ko/moọgh oghiilhaan?
14 AZihova aḅilhẹ ni alhoghonhaạn ḍighaạgh we aJu phọ dị bidị ko/moọgh oghiilhaan esi ootughianhạm abidị ilọ igbogh iikpọ r’olhegheri iyaạr phọ odị. Odị aḅenhị bidị ophogh asikẹ phọ r’araanhaạn phọ edi bọ. Odị aḅenhị bidị mọ odị kụ alhẹm raanhaạn phọ, kụ mọ odị alegheri kẹn ni ḍien atorobọ eenhaạn. (Isa. 40:25-28) Kụ eḍighi maạr dị aZihova alhegheri ni torobọ aḍien eenhaạn pọ odị kalegheri kẹn ni ḍien atorobọ ebenhẹ odị! Eḍighi maạr dị aZihova amhoọgh ni iikpọ olhẹm araanhaạn phọ, pọ odị amoọgh kẹn ni iikpọ olhoghonhaạn aḍighaạgh we phọ odị. Ii okạr agey, awe aJu phọ orọl bọ dọl arebenhẹ phọ u/moọgh iyaạr otuạn oghiilhaan.
15. Enhaạn alhoghonhaạn ika ḍighaạgh we aJu phọ olhegheri ilọ oḍighi mem dị meteẹny mem mọ kotagharạn bọ bidị?
15 AZihova aḅilhẹ ni aḅenhị we phọ raraạr dị bidị koḍighi mem dị eteẹny mem mọ kotagharạn bọ bidị. Dị eego esi oyil phọ Aizaya, Enhaạn aḅenhị ni we phọ odị mọ: “Iḍiku iloghi aruutu anyina, eghughiom siloor anyinha. Ibooghiạn moọny ekulha amem tutụ oghạgh olhoghi phọ amhị aagbenyenụ.” (Isa. 26:20) Eeni awe aJu phọ udaphạn ni iromhoghiom mọ iphẹn phọ mem mọ Uw-emhạ phọ Cyrus azuom bọ Babilọn. Oye olọ aGreek dị agbạ ghan iphirigba aḅẹm mọ, mem mọ aCyrus aḍigh bọ Babilọn, angọ ni itọ we eghạm mọ odị ozẹ awe lọ bidị omhiịn eten.” Gbiom olhoghi oghiilhaan dị arọl ilhoghi awe phọ orọl bọ Babilọn! Kuolọ u/zẹ aani we aJu phọ loor esi iduọn bidị onhaghanhạn bọ itọ phọ aZihova.
16. Uḍighi ika kụ i/wạ bọ dị yira kokiilhaan raraạr dị kemite mem igbogh iiḅaghamhị phọ? (Miịn kẹn afoto phọ.)
16 Yira otuughạ eeghe? Moọny amem, igbogh iiḅaghamhị phọ kemiigh ni kụ araraạr keloghorị ni epu idị merọl ghan. Mem dị igbogh iiḅaghamhị phọ emhiigh awe ko/legheri ilọ oḍighi, kụ komoọgh kẹn ni oghiilhaan. Kuolọ awe phọ aZihova ko/moọgh oghiilhaan. Yira olegheri ni mọ aZihova kụ Enhaạn ayira. Kụ yira kokpọ ni oḅio, idị eḍighi bọ amem mọ kuphẹl bọ iyira meebeẹph. (Luk 21:28) Yira kokiọm ni ghisigh oḍuom aZihova olhoghi ghalhamọ r’amem mọ ookpomhoghan areelhe phọ kuzuom bọ iyira. AZihova kasighẹ ni ruukpaạny phọ odị ughophom iyira kụ aḅilhẹ ungọ iyira iromhoghiom dị kiphẹl iyira. K’eego ika kụ yira oteẹny bọ iromhoghiom mọ? Yira k”olhegheri. Toroboiperolbọ, eeni iromhoghiom mọ ipẹ phọ kiteẹny iyira dị eego esi arookpomhoghan phọ. Eeni arookpomhoghan phọ kụ keḍighi “ilhoghi aruutu” phọ yira kokiil bọ oḍigh omhoọgh oghoph. Yira kookolhobian ika kụ okoriom ipẹ kemite bọ ghisigh? Ewạ dị yira koḍuraan otuman bumor r’abumaranhi phọ ayira, onaghanhạn ghan torobọ iiḅakiọm dị ookpomhoghan phọ ongọ kụ oḅilhẹ okuphom owol mọ aZihova kụ raḍiemhiom ookpomhoghan phọ.—Hib. 10:24, 25; 13:17.
Ootughiạn ghan ilọ iikpọ phọ aZihova ḅilhẹ r’inyaạm mọ odị amhoọgh bọ ophẹl ayira kilhoghonhaạn iyira ḍighaạgh dị yira ko/moọgh oghiilhaan mem igbogh iiḅaghamhị phọ (Miịn ekpịgh phọ 16)b
17. Ika kụ idị nạ katue amoọgh iidereghị ḍighaạgh aZihova?
17 Ghalhamọ r’iduọn araraạr ekparanhaạn bọ ni we aJu phọ orọl bọ dọl arebenhẹ epẹ Babilọn, aZihova angọ ni bidị iidereghị phọ bidị omhoghi bọ. Kụ odị kẹn kuḍighinhaan ni iyira iniin phọ. Esi iduọn phọ, etigheri raraạr dị kemite epẹ ghisigh, oghiọm ni ghisigh oḍuom olhoghi mọ aZihova kuudereghị ni iyira. Moọgh omheeraam mọ aZihova rasạr ghan ni kawilhenhaạn rebenhẹ phọ odị ḅilhẹ aphomhoghiạn ni nyinhạ. Miịn mọ nạ akiọm ni ghisigh rakparamhị oḍuomolhoghi phọ anạ. Ḅilhẹ ka/bulha mọ, loor iduọn aZihova kụ aḍighi bọ Enhaạn anạ, nạ o/mhoọgh iyaạr otuạn oghiilhaan.
AḌUỌR PHỌ 3 Our Strength, Our Hope, Our Confidence
a Monme iniin asiḍien.
b ILỌ AFOTO: Ebạm egu abumor r’abumaranhi dị ookpomhoghan. Bidị oḍuom olhoghi iikpọ phọ aZihova ḅilhẹ r’inyaạm mọ odị oghoph awe phọ odị odi bọ siẹn ade phọ.