Aḍien Phọ AZihova Emạn Ni Maạr Esi AZizọs

1-2. (a) AZizọs aḍighi eeghe ḍughul aḍio phọ kokiigh bọ nyodị? (b) Ighẹn asipuru kụ edị yira kooḅeghiọn?

IḌIGHI ḍughul aToosdee, Nisan 14, 33 C.E., kobool Zizọs, osoph ooruẹn ongọ, omiinẹ, oḅilhẹ okiigh. Odị r’olhe Eḍien Adulhe Uw-emhoọgh phọ egbatanhaạn bọ r’abutelhedom mọ odị epẹ osoph anyụ phọ, kụ aḅạ ikpo onhụ okparamhị dị esughanham omhạn aḅenhị bidị. Kụ bidị ogbi bọ osoor ude, aZizọs aaḅereghị ni iiḅereghị dị emhạn maạr. Otelhedom mọ aJọn agẹ ni iiḅereghị phọ ipẹ phọ; kụ edi siphẹ Jọn emhụ phọ 17.

² Iiḅereghị phọ aZizọs iḍeenhaan mọ eeghe kụ iiḅaghamhị ghan olhoghi odị mem mọ amuphẹ? Ika kụ idị iiḅereghị phọ ipẹ phọ eḍeenhaan iyaạr dị eḍighi ekpanhạ siphẹ aghuḍum mọ odị? Uguạ, ooḅeghiọn ophanyanhaạn asipuru phọ iphẹn phọ.

“MỊ MAḌIGHI NI DỊ BIDỊ MOLEGHERI ḌIEN PHỌ ANẠ”

3. AZizọs aghaạph eeghe ilọ aḍien phọ aZihova, kụ imạ ghan eeghe? (Jọn 17:6, 26)

³ Siphẹ iiḅereghị phọ odị, aZizọs aḅẹm mọ: “Mị maḍighi ni dị bidị moIegheri ḍien phọ anạ.” Okạr oghaạph, odị aḅẹm iduọn phọ iyạl amem. (Bạl Jọn 17:6, 26.) Iphẹn phọ remạ ghan eeghe? Odị aḅenhị bidị ḍien dị bidị u/legheri ghan ḍughụm? Abumatuạn phọ aZizọs abuọ aJu ni, esi iduọn phọ, bidị olegheri ni mọ aḍien Enhaạn aZihova. Aḍien phọ aḍiphẹ phọ emite ni simuonịr ariisi siphẹ Igẹ Iigbia aHibru phọ. Kụ iḍighi kụ, aZizọs o/tughemhị ghan bidị ilọ aḍien phọ Enhaạn, odị awạ ghan ghụn oḍighi idị bidị kolegheri odọ oye phọ aZihova aru bọ. Odị aḍighi idị awe olhegheri odọ oye phọ aZihova aru bọ, eḅaramaạm bọ rigbiom mọ odị, iiḍighi phọ odị, ḅilhẹ r’araagharạ phọ odị, eten dị onhọn oye ka/tue akaạph.

4-5. (a) Kaạph amaaniọm idị yira kokạr otue olegheri ḍien oye? (b) Eghẹn eten kụ edị abumatuạn phọ aZizọs oru bọ olhegheri ḍien phọ aZihova?

⁴ Oḅẹm mọ oniin okumor oye siphẹ ookpomhoghan phọ anyinha dị oghol mọ David aḍighi oyil arookonhom. Nạ malhegheri ni nyodị esi ibadị asiạ. Kuolọ eniin aḍio, nạ amheel e/moon ekperenhom. Kụ oghiilhom nyinhạ oghimọm otu arookonhom dị okumor oye ookpomhoghan phọ David raḍighi ghan. Kụ odị asighẹ olhegheri iyaạr ilọ arookonhom mọ odị aakonhomom nyinhạ. Nạ ka/ḅilhẹ amiịn onyọ umor phọ opọ phọ enhọn eten ḍughụm? Nạ kamiịn ni! Nạ ka/miịn David idiphọ okumor oye ookpomhoghan bịn, nạ kamiịn kẹn nyodị idiphọ oye arookonhom dị aphẹl ghuḍum anạ.

⁵ Iniin phọ kẹn, abumatuạn phọ aZizọs molhegheri ni ḍien phọ aZihova. Kuolọ aḍien phọ aZihova imhạn ni maạr iboom esi abumatuạn phọ mem mọ aZizọs alhoghonhaạn bọ bidị ḍighaạgh okuamhị olhegheri aZihova. Uḍighi ika kụ yira oḅẹm bọ iduọn phọ? Loor esi dị aZizọs akạr kụ aaghironhaan raagharạ phọ aZihova esi iiḍighi r’ikpo onhụ. Abutelhedom mọ ukạr kụ “olegheri” aZihova mem mọ bidị onhaghanhạn bọ eten itughemhị phọ aZizọs kụ oḅilhẹ omhiịn eten phọ odị azoọm ghan bọ we.—Jọn 14:9; 17:3.

“AḌIEN PHỌ ANẠ NẠ UNGỌ BỌ IMỊ”

6. Eghẹn eten kụ edị aZihova angọ bọ ḍien phọ Odị Zizọs? (Jọn 17:11, 12)

⁶ AZizọs aaḅereghinhaạn bumatuạn phọ odị kụ aḅenhị Odẹ phọ odị mọ: “Maạr aphamạm bidị iikpọ aḍien phọ anạ nạ ungọ bọ imị.” (Bạl Jọn 17:11, 12.) Iphẹn phọ remạ ghan mọ koḅilhẹ omạgh ghan Zizọs mọ aZihova ḍughụm? Eeye. Lọgh elhegh mọ aZizọs aḅẹm ni siphẹ iiḅereghị phọ mọ “aḍien phọ anạ.” Esi iduọn phọ, aḍien phọ aZihova i/ḍighi ḍien aZizọs. Kuolọ remạ ghan eeghe iduọn aZizọs aḅẹm bọ mọ aZihova mangọ nyinọ ḍien phọ odị? Eḅẹl phọ, aZizọs kụ amheerạ enye aZihova aḅilhẹ aghaạph ghan ilọ odị. Odị aru r’iikpọ aḍien Odẹ phọ odị kụ aḅilhẹ asighẹ aḍighinhom iiḍaạny. (Jọn 5:43; 10:25) Omhunhenhiom iyạl, aḍien phọ aZizọs remạ ghan mọ “AZihova Kụ Apelieẹny.” Ii, emhụ aḍien phọ aZizọs eḅarạm ni ḍien phọ aZihova.

7. Uḍighi ika kụ aZizọs katue bọ ameerạ akaaphanhaạn iyaạr aZihova? Ngọ eḍeenhaan.

⁷ Ooḅeghiọn eniin eḍeenhaan pidị yira orue onhaghanhạn ipẹ aZizọs amheerạ bọ enye aZihova aḅilhẹ aghaạph ghan ilọ odị. Uw-emhạ dị ratooghị atue ni atom dom oye oghị enhọn ekpisi omheerạ enye odị oghaạph iyaạr dị odị amhoọgh oḅenhị awe phọ. Awe phọ konaghan ni oḅilhẹ osighẹ ipẹ oye phọ rakaạph bọ, dị eḅilhẹ eghịgh mudị uw-emhạ phọ r’aloor kụ aru aghaạph aḅenhị bidị. Iniin phọ kẹn, aZizọs amheerạ enye aZihova kụ aghaạph ghan aḅenhị we phọ r’iikpọ aḍien phọ aZihova, loor esi dị aZihova kụ arom nyodị.—Mat. 21:9; Luk 13:35.

8. Kụ aZizọs agbi bọ oru isiẹn ade phọ, ika kụ idị aḍien phọ aZihova erọl bọ r’aZizọs? (Exodus 23:20, 21)

⁸ AZizọs kụ Ekpo Onhụ phọ, odị akumuan idiphọ oye dị asighẹ ghan ikpo onhụ r’iromhoghiom ḍighaạgh aZihova aghị aghaạph aḅenhị ruukpaạny ḅilhẹ r’awe. (Jọn 1:1-3) Eeni aZizọs kụ ookpaạny phọ aZihova arom bọ oḍiemhiom awe phọ Izrạl mem eḍuạ phọ abidị. Mem mọ aZihova raḅenhị bọ we phọ Izrạl mọ onhaghanhạn ookpaạny phọ, odị aḅẹm mọ: “Loor esi dị aḍien amhị edi r’odị.”a (Bạl Exodus 23:20, 21.) Aḍien phọ aZihova irọl r’aZizọs, loor esi dị odị ameerạ enye aZihova kụ odị kẹn kụ aḍia idiphọ oye dị amheremhị aḅilhẹ aḅaalhamhị ḍien phọ aZihova.

“ODẸ, KUENI NI ḌIEN PHỌ ANẠ”

9. Aḍien phọ aZihova imhạn ika maạr esi aZizọs? Gbạ.

⁹ Idiphọ yira mooḅeghiọn bọ, aḍien phọ aZihova imhạn ni maạr esi aZizọs ghalhamọ r’amem mọ odị k”oru bọ siẹn ade phọ. Mem mọ odị arọl bọ siẹn ade phọ, iiḍighi phọ odị iḍeenhaan ni idị aḍien phọ aZihova emhạn maạr esi odị! Mem mọ arukumuan phọ odị resi bọ eekunha siẹn ade phọ, amem irọl li dị aZizọs alhọm Odẹ phọ odị mọ: “Odẹ, kueni ni ḍien phọ anạ.” Egina amem bịn Odẹ phọ odị aphagharanhaạn r’eḍọgh oomhaạny aḅenhị mọ: “Mị maghueni ni ḍien phọ amị kụ mị kaḅiIẹ kẹn ni akueni.”—Jọn 12:28.

10-11. (a) Ika kụ idị aZizọs aghuenhi bọ ḍien phọ aZihova? (Miịn kẹn afoto phọ.) (b) Uḍighi ika kụ emhoghi bọ oḅaalhamhị aḍien phọ aZihova?

¹⁰ AZizọs r’aloor bịn aghuenhi aani ni ḍien Odẹ phọ odị. Ika? Eniin eten dị odị aḍighi iduọn phọ pọ oḅenhị aani awe imạ araagharạ phọ r’iḍighinhom araraạr phọ aZihova. Odị aḅilhẹ ni aḍighi inhọn araraạr oghuenhi aḍien Odẹ phọ odị. Esi omaạm, iwạ mọ aZizọs aḅaalhamhị ḍien Odẹ phọ odị aḅilhẹ aḍeenhaan we odọ oye dị Odẹ phọ odị aru. AZizọs aḍeenhaan ni idị iphẹn phọ emhạn maạr mem mọ odị atughemhị bọ iiḅereghị Odẹ phọ budaphạm mọ odị. Odị aḅẹm mọ: “Odẹ phọ ayoor odi bọ k’akẹ phọ, eegu eroIonaạn ḍien phọ anạ.”—Mat. 6:9.

¹¹ Eeghe kụ iḍighi kụ ewạ bọ dị kolọgh eegu oḅilhẹ oḅaalhamhị ḍien phọ aZihova? Loor esi dị, siphẹ oghoony phọ Iden aSetan Eru phọ agbạ okpẹ aphuẹ ḍien phọ aZihova Enhaạn phọ ḅilhẹ r’odọ oye phọ odị aru bọ. ASetan aḅẹm mọ aZihova ogbaạm okpẹ ḅilhẹ mọ rabooghinhaạn ghan Adạm r’Iv imạ araraạr. (Gen. 3:1-5) Iphẹn phọ eḍeenhaan kẹn mọ aSetan raḅẹm ghan mọ aZihova ra/ḍighi raraạr elhiom eten. Asiagbạ okpẹ phọ aSetan iphẹn phọ repuẹ ghan ḍien phọ aZihova, loor esi dị awe otue ni ootughiạn mọ aZihova k/egey Enhaạn. Siḍio phọ aJob, aSetan aḅẹm kẹn mọ awe otuạn raraạr dị bidị komoọgh ḍighaạgh aZihova kụ rooḅereghị bọ nyodị. Mọ oye katue ni atuạn iiḅaghamhị dị odị asoman abilhẹ ooḅereghị aZihova, loor esi dị mọ oye o/lho dị akạr aphomhoghiạn aZihova. (Job 1:9-11; 2:4) Olhegheri mughumọ aZihova obobọ aSetan kụ ogbaạm okpẹ phọ kemoghi ni mem.

“MỊ ASIGHẸ GHUḌUM MỌ AMỊ KỤ ANGỌ”

12. AZizọs aakolhobian oḍighi eeghe loor ephomhoghiạn phọ odị amhoọgh bọ esi aḍien phọ aZihova?

¹² Loor ephomhoghiạn phọ odị amhoọgh bọ aghị esi aZihova, aZizọs aḍighi ni oomo idị odị katue oḅaalhamhị aḍien phọ aZihova. Odị aḅẹm mọ, “mị asighẹ ghuḍum mọ amị kụ angọ.” (Jọn 10:17, 18) Ii, odị aakolhobian ni omhugh loor aḍien phọ aZihova.b Abuḅẹl awe phọ omhunhughan bọ Adạm r’Iv, ugheel li aZihova kụ oḍighan Setan. AZizọs o/ghịgh bidị, odị aakolhobian ghụn oru isiẹn ade phọ oḍeenhaan mọ odị akạr kụ apomoghiạn aZihova. Odị aḍighi iduọn phọ esi onhaghanhạn ghan Odẹ phọ odị esi atorobọ iyaạr. (Hib. 4:15; 5:7-10) Odị aphạm ni omheeraam mọ odị asi k’eekunha phọ, kụ amhugh ḍuugh egbo. (Hib. 12:2) Eten phọ ephẹn phọ kụ edị odị aḍeenhaan bọ ephomhoghiạn phọ odị amhoọgh bọ aghị esi aZihova r’aḍien phọ aZihova.

13. Eeghe kụ iḍighi kụ ogina aZizọs aḍighi bọ oye dị kakạr atue amạ amiteom mọ aSetan ogbaạm okpẹ? (Miịn kẹn afoto phọ.)

¹³ Eten aghuḍum mọ aZizọs ikạr kụ eḍeenhaan dị iikia i/lo mọ aSetan kụ ogbaạm okpẹ! (Jọn 8:44) AZizọs kụ oye dị alhegheri ilọ aZihova apu torobọ oye dị marọl ghan siẹn ade phọ obobọ epẹ k’akẹ phọ. Esi iduọn phọ, eḍighi maạr dị ipẹ aSetan agbạ bọ ilọ aZihova eru ni inẹ, aZizọs mulegheri ni. AZizọs anyaaghiạn ghụn oḅaalhamhị aḍien phọ aZihova. Ghalhamọ r’amem mọ eghịgh bọ mudị aZihova mawilẹ nyodị, bịn aZizọs aakolhobian ni omhugh kparipẹ rowilhẹ aZihova.—Mat. 27:46.c

“MỊ UMADẠN NI OḌIGHI PHỌ NẠ UNGỌ BỌ IMỊ”

14. Ika kụ idị aZihova asẹph bọ dọl oḅạr phọ aZizọs?

¹⁴ Siphẹ iiḅereghị phọ aZizọs aaḅereghị bọ ḍughul phọ eḅaạl kokiigh bọ nyodị, odị aḅẹm mọ: “mị umadạn ni oḍighi phọ nạ ungọ bọ imị.” Odị akuphom ni owol mọ aZihova kasẹph ni nyinọ loor iduọn odị aḅạr bọ nyodị. (Jọn 17:4, 5) Kụ aZihova akạr kụ asẹph nyodị. AZihova o/wilhẹ nyodị siphẹ oḍi phọ. (Iid. 2:23, 24) AZihova aḅeton ni nyodị kụ angọ dọl dị epelheghiom epẹ k’akẹ. (Fil. 2:8, 9) Kụ ekureriom mọ, aZizọs amhiigh otooghị idiphọ Uw-emhạ Omhạr phọ k’Enhaạn. Omhạr phọ opọ phọ kaḍighi eeghe? Ophagharanhaạn phọ odi siphẹ ophoriphọ apakirị iiḅereghị Odẹ phọ eḅẹm bọ mọ: “Omạr phọ anạ aru ni! Oḍighi aani ipẹ nạ rawạ bọ siẹn ade phọ, idiphọ roḍighi bọ k’akẹ phọ.”—Mat. 6:10.

15. Eeghe kụ edị aZizọs kaḅilhẹ aḍighi?

¹⁵ Dị i/kẹl mun ghisigh, aZizọs kabian mulhọgh ḍien phọ aZihova kụ apiemhi bukarạph awe mem eghạm mọ Amagedọn. (Ogan. 16:14, 16; 19:11-16) Kụ ipẹ reten, aZizọs kasiph ni Setan atoph alọgh “ooni,” dị ka/tue mun aḍighi iyaạr we. (Ogan. 20:1-3) Mem Itooghị Oniin Oonịr Asiạ phọ aKraist, odị kaḅulhemhi eephọ siẹn ade phọ kụ aḅilhẹ aḍighi idị awe komunughan. Odị kaḅerion buphẹ momhuughu bọ, atenhe de phọ Paradaịs, bịn ogbi phọ aZihova amunughan siẹn ade phọ!—Ogan. 21:1-4.

16. Aghuḍum katọl ika mem dị Itooghị Oniin Oonịr Asiạ phọ esi eekunha?

¹⁶ Eeghe kụ kemite mem dị Itooghị Oonịr Asiạ phọ esi eekunha? Awe ko/ḍighi ghan mun ikarạph, e/munhughan ke/tọl mun. Awe ko/lọm ghan mun osạr owilhenhaạn ikarạph dị eego esi ekiạ etagharạn phọ, ḅilhẹ yira ko/moghi mun dị aZizọs kaḍighi Ogbogh Opinyọn rikiạ ayira kụ yira ogbi omhoọgh asiya r’aZihova. ‘Kopiemhi ni mulhọgh ḍien phọ asughanham bọ omạn, ḍuugh ḍiphẹ eego bọ esi Adạm.’ Iiḍi phọ kepokoro ni. Koḅerion ni buphẹ momhuughu bọ. Torobọ oye siẹn ade phọ kamunughan ni.—1 Kọr. 15:25, 26.

17-18. (a) Eeghe kụ kemite mem dị Itooghị Oniin Oonịr Asiạ phọ esi eekunha? (b) AZizọs kaḍighi eeghe mem dị eekunha Itooghị Oniin Oonịr Asiạ phọ odị reteẹny? (1 Korịnt 15:24, 28) (Miịn kẹn afoto phọ.)

¹⁷ Eeghe kụ keḅilhẹ emite mem eekunha Itooghị Oniin Oonịr Asiạ phọ? Mem mọ amuphẹ phọ, iyaạr dị egbatanhaạn iboom kemite ni. Oghaạph phọ agbolhomaam bọ ilọ oḅaalhamhị aḍien phọ aZihova kasi ni eekunha. Ika? Siphẹ oghoony phọ Iden, aSetan aḅẹm mọ aZihova ogbaạm okpẹ ḅilhẹ mọ ra/tooghiọm r’ephomhoghiạn kangọ omhạr awe. Emhiigh k’amem mọ amuphẹ phọ, abuphẹ rokumu bọ aZihova mokạr kụ oḍeenhaan mọ eten itooghị phọ aZihova kụ inhighẹ epelheghiom. Esi iduọn phọ, mem dị Itooghị Oniin Oonịr Asiạ phọ esi eekunha, aḍien phọ aZihova keḅaạl li emadạn. AZihova kakạr kụ aḍeenhaan eten dị iikia ke/tọl mọ onọ Odẹ ephomhoghiạn dị odi k’akẹ.

¹⁸ Mem dị Itooghị Oniin Oonịr Asiạ phọ esi eekunha, torobọ oye kalegheri ni mọ oomo ipẹ aSetan agbạ bọ ilọ aZihova okpẹ ni bịn. AZizọs kaḍighi eeghe mem dị eekunha Itooghị Oniin Oonịr Asiạ phọ odị reteẹny? Odị katuughaạny aani eḍeenhaan phọ aSetan bịn agbagharạn aZihova ḍughụm? Eeye! (Bạl 1 Korịnt 15:24, 28.) AZizọs kaḅọgh itooghị phọ alọgh ḍighaạgh Odẹ phọ odị. Odị r’aloor kasooromhi aani loor angọ Itooghị phọ aZihova. Dị u/kịgh Setan, aZizọs kaa/kpukiạn oḅọgh oomo araraạr oḅulhemhi ongọ aZihova, loor esi dị odị apomhoghiạn aZihova.

19. Aḍien phọ aZihova emạn maạr esi aZizọs esi k’iḍighen?

¹⁹ Oomo araraạr phọ yira mooḅeghiọn bọ memạ emiteom iyaạr phọ eḍighi bọ kụ aZihova amheera bọ ongọ aḍien phọ odị Zizọs! AZizọs akạr kụ ameerạ enye Odẹ phọ odị eten dị emhunhughan. Oomo araraạr phọ odị aḍighi bọ ikạr kụ eḍeenhaan odọ Enhaạn phọ aZihova aru bọ. Kuolọ, aḍien phọ aZihova emạn maạr esi aZizọs esi k’iḍighen? Esi odị aḍien phọ aZihova kụ imhạn maạr epu torobọ iyaạr. Odị aakolhobian ni otuạn aḍien phọ aZihova omhugh, kụ aakolhobian kẹn oḅọgh oomo araraạr oḅulhemhi ongọ aZihova mem dị Itooghị Oniin Oonịr Asiạ phọ odị esi eekunha. Ika kụ idị yira kotuughaạny eḍeenhaan phọ aZizọs? Yira kooḅeghiọn ophagharanhaạn aḍipuru phọ aḍiphẹ phọ emhuoghaạph phọ etum bọ siẹn.