EMHUOGHAẠPH ITUUGHẠ PHỌ 23
AḌUỌR PHỌ 2 Jehovah Is Your Name
Aḍien Phọ AZihova Emạn Ni Maạr Esi Ayira
Kụ aZihova aḅẹm mọ “‘nyinha kụ abugbaanhaạn amhị.’”—ISA. 43:10.
EGBON
Raraạr dị yira koḍighi kụ oḅaalhamhị ḍien phọ aZihova.
1-2. Ika kụ idị yira olhegheri bọ mọ aḍien phọ aZihova emạn maạr agey esi aZizọs?
AḌIEN phọ aZihova emạn maạr agey esi aZizọs. AZizọs kụ aḍiemhiom oḅaalhamhị aḍien phọ aZihova. Siphẹ emhuoghaạph phọ eten bọ, yira utuughạ ni mọ aZizọs aakolhobian ni omhugh omạ omiteom mọ aḍien phọ aZihova eḅaạl li ḅilhẹ mọ areten phọ odị kụ inhighẹ epelheghiom. (Mạk 14:36; Hib. 10:7-9) Mem dị Itooghị Oniin Oonịr Asiạ phọ esi eekunha, aZizọs kaḅulhemhi ni itooghị Omhạr phọ aḅọgh angọ Odẹ phọ odị, loor esi dị odị rawạ mọ oomo arughuenhian phọ eḍighi elọ aZihova. (1 Kọr. 15:26-28) Oomo araraạr phọ aZizọs aḍighi bọ loor aḍien phọ aZihova eḍeenhaan mọ aḍien phọ aZihova emạn maạr agey esi odị, kụ odị akạr kụ apomhoghiạn nyodị.
2 AZizọs aghol ḍien Odẹ phọ odị kụ aru bọ siẹn ade phọ. (Jọn 5:43; 12:13) Odị aḍighi ni idị awe olhegheri ḍien Odẹ phọ odị. (Jọn 17:6, 26) Odị atughemhị ni we ḍien Odẹ phọ odị kụ aḅilhẹ asighẹ aḍighinhom iiḍaạny. (Jọn 10:25) AZizọs aḅenhị aZihova mọ, “maạr aphamạm bidị iikpọ aḍien phọ anạ.” (Jọn 17:11) Eegholhaan ni siẹn phọ mọ aZizọs amaghamhị ni maạr ḍien phọ aZihova iboom, esi iduọn phọ, ika kụ idị oye dị aḅẹm mọ onọ okạr onyọ amatuạn aKraist ka/legheri bọ aḅilhẹ asighẹ aḍighinhom ḍien Odẹ phọ aZizọs, Zihova?
3. Yira kooḅeghiọn eeghe siẹn emhuoghaạph phọ ephẹn phọ?
3 Idiphọ aKristẹn, yira rokparaghạ ghan odạph igbaranuọm aruwol phọ aZizọs, yira omaghamhị maạr ḍien phọ aZihova idiphọ aZizọs. (1 Pit. 2:21) Siẹn emhuoghaạph phọ ephẹn phọ, yira komiịn ipẹ aZihova angọ bọ ḍien phọ odị buphẹ rokaạph bọ “ooḅi oghaạph omạr phọ k’Enaạn.” (Mat. 24:14) Yira kooḅeghiọn kẹn ipẹ ekpẹ bọ dị aḍien phọ aZihova kemạn maạr esi atorobọ onyọ ayira.
‘AWE OGHAAPHAẠN AḌIEN PHỌ ODỊ’
4. (a) Eeghe iyaạr kụ edị aZizọs aḅenhị bumatuạn phọ odị kụ agbi bọ oḅulha epẹ k’akẹ? (b) Eeghe aḍipuru kụ edị yira kooḅeghiọn?
4 Mem mọ aZizọs kaḅulha bọ k’akẹ, odị aḅenhị ni bumatuạn phọ odị mọ: “Kingọ ni inyina iikpọ mem dị uwaloor iigbia phọ misoorom inyina, kụ nyina igbaanaạn imị, emiigh JeruseIem r’oomo phọ aJudia r’aSameria, kụ esiemi eekuna aḅirini phọ.” (Iiḍ. 1:8) Iphẹn phọ eḍeenhaan mọ ooḅi oghaạph phọ, ko/kaạph oleenye Izrạl bịn. Awe oomo areelhe phọ komoọgh ni eepoogh onhaghạn aani adom mọ r’oḍighi aani abumatuạn aZizọs. (Mat. 28:19, 20) Kuolọ aZizọs aḅẹm mọ: “Kụ nyina igbaanaạn imị.” Iphẹn phọ remạ ghan mọ abumatuạn phọ aZizọs koḅenhị ghan we ilọ aZizọs bịn obobọ kewạ kẹn ni dị bidị kolegheri ḍien phọ aZihova ḍughụm? Ipẹ oghaạph bọ siphẹ Iiḍighi 15 kilhoghonhaạn iyira ḍighaạgh ophagharanhaạn aḍipuru phọ aḍiphẹ phọ.
5. Ika kụ idị abutelhedom mọ r’ikumor awe phọ epẹ Jeruselem oḍeenhaan mọ ewạ ni dị oomo awe kolegheri ḍien phọ aZihova? (Miịn kẹn afoto phọ.)
5 Lhạ phọ 49 C.E., ikumor awe phọ r’abutelhedom mọ epẹ Jeruselem uukpomhoghan ni oghaạph araraạr dị awe areelhe phọ u/ḍunha bọ koḍighi orue oḍighi aani aKristẹn. Mem mọ rokureri bọ raghaạph phọ, aJems oọny onhiin phọ aZizọs aḅẹm mọ: “[APita] maghaạph ni idị Enaạn mephụr ri eeko ruuruen phọ esaḅạr we ogbo abidị oghaaphaạn aḍien phọ odị.” Aḍien anhiạn kụ edị aJems aghaạph ghan bọ aghol siẹn phọ? AJems rakaạph bọ ipẹ oyil phọ Amos aghaạph bọ, odị aḅẹm mọ: ‘Obọ abuerị phọ awe phọ osugha bọ romeera bọ ḍien phọ amị r’oomo areeIhe phọ, owạ aZihova.’ (Iiḍ. 15:14-18) Abumatuạn phọ ko/legheri ilọ aḍien phọ aZihova bịn, kuolọ koḅilhẹ ‘okol bidị ḍien phọ’ aZihova. Iphẹn phọ remạ ghan mọ bidị koḍighi idị abunhọn kolegheri ḍien phọ Enhaạn kụ awe oḅilhẹ olegheriọm bidị idiphọ awe dị omheerạ enye aḍien phọ aḍiphẹ phọ.
Siphẹ aruupuruan phọ aloor phọ repogh bọ ophạm bọ oḅẹl okuron asiạ phọ, bidị uru ni onhaghanhạn mọ oomo aKristẹn omoọgh oghaaphaạn aḍien phọ Enhaạn (Miịn ekpịgh phọ 5)
6-7. (a) AZizọs atụ eeghe kụ aru bọ siẹn ade phọ? (b) Kụ ighẹn inhọn ariphigh dị emhạn maạr kụ ikọm bọ?
6 Emhụ aḍien phọ aZizọs r’aloor remạ ghan mọ “AZihova Kụ Apelieẹny,” kụ aZihova asighẹ ni nyodị rapelhọm buphẹ omhoọgh bọ omheeraam oghị esi odị. AZizọs aru siẹn ade phọ ongọ aghuḍum mọ odị otanyanhạm aḍita. (Mat. 20:28) Ekiạ etagharạn phọ odị aphighirọn bọ mengọ eepoogh we omhoọgh aghuḍum k’agee-pọ.—Jọn 3:16.
7 Kuolọ eeghe kụ iḍighi kụ omhạr awe omhoghi bọ pelieẹny? Aloor esi ipẹ emite bọ siphẹ oghoony phọ Iden. Idiphọ oghaạph bọ siphẹ emhuoghaạph phọ eten bọ, oḅẹl odẹ r’onhiin phọ ayira, Adạm r’Iv, ugbagharạn ni aZihova bịn oroph eepoogh orọl k’agee-pọ. (Gen. 3:6, 24) Toroboiperolbọ, iyaạr dị emhạn maạr epu ophẹl omhạr awe irọl li. ASetan agbaạm okpẹ ḍien phọ aZihova. (Gen. 3:4, 5) Esi iduọn phọ, ophẹl anmụny phọ Adạm r’Iv eḅarạm ni oḅaalhamhị aḍien phọ aZihova. Loor iduọn aZizọs amheerạ bọ enye aZihova r’aḍien phọ odị, odị aḍighi ni ibadị araraạr omhiịn mọ oḅaalhamhị ni ḍien phọ aZihova.
Ika kụ idị oye dị aḅẹm mọ onọ okạr onyọ amatuạn aKraist ka/legheri bọ aḅilhẹ asighẹ aḍighinhom ḍien Odẹ phọ aZizọs, Zihova?
8. Eeghe iyaạr kụ edị ewạ dị oomo abuphẹ omheeraam bọ Zizọs kolọgh elhegh?
8 Oomo abuphẹ omhoọgh bọ omheeraam oghị esi aZizọs mughumọ abuọ aJu obobọ abuọ areelhe phọ kemoghi ni mọ olhegheri zin apelieẹny phọ, Zihova, aḍighi bọ Odẹ phọ aZizọs. (Jọn 17:3) Idiphọ aZizọs, kokol li bidị ogbaạm ḍien phọ aZihova. Kewạ kẹn dị bidị kolọgh elhegh idị emhạn maạr oḅaalhamhị aḍien phọ aZihova. Kụ apelieẹny phọ abidị akpasị esi iphẹn phọ. (Iiḍ. 2:21, 22) Loor iduọn phọ, kemoghi ni mọ oomo abumatuạn phọ aZizọs otuughạ ilọ aZihova r’aZizọs. Iikia i/lo, aZizọs akureri bọ iiḅereghị phọ odị ogẹ bọ siphẹ Jọn 17 r’ikpo onhụ phọ eḅẹm bọ mọ: “Mị maḍighi ni dị bidị moIegheri ḍien phọ anạ, kụ mị kaḍighi ni akiọm ghisigh, obọ ephomoghiạn phọ epẹ nạ uphomoghiạn bọ imị eroIạn aani bidị, mị aḅiIẹ kẹn aroIạn aani bidị.”—Jọn 17:26.
“NYINHA ABUGBAANHAẠN AMHỊ”
9. Ika kụ idị yira koḍeenhaan mọ aḍien phọ aZihova emạn ni maạr esi ayira?
9 R’iphẹn yira mooḅeghiọn bọ, eegholhaan ni mọ orue oḍighi abumatuạn aZizọs, yira koḅaalhamhị aani ḍien phọ aZihova. (Mat. 6:9, 10) Omhiịn ḍien phọ aZihova idiphọ aḍien dị epelheghiom oomo inhọn asiḍien. Iphẹn phọ emoghi ni oḍighi iyaạr omiteom. Kuolọ ika kụ edị yira kotue bọ opinomaam aani bin oḅaalhamhị aḍien phọ aZihova kụ oḅilhẹ omạ oḍeenhaan mọ ipẹ aSetan aghaạph bọ ilọ aZihova okpẹ ni?
10. Isaiah emhụ phọ 42 kụ esi emhụ phọ 44 ekaạph ilọ eeghe iyaạr? (Isaiah 43:9; 44:7-9) (Miịn kẹn afoto phọ.)
10 Okaạph ni siphẹ Isaiah emhụ phọ 42 kụ esi emhụ phọ 44 ilọ araraạr dị yira kotue oḍighi oḅaalhamhị aani aḍien phọ aZihova. Ariisi aBaibul phọ ipẹ phọ ekaạph emaaniọm eten dị eghịgh mudị aZihova asighẹ buphẹ roo/ḅereghị bọ nyodị akimọm otu iiruẹn mọ bidị omạ oḍeenhaan mughumọ arumhụgh phọ abidị igey ni. Idiphọ romoọgh ghan bọ bugbaanhaạn otu iiruẹn, aZihova rapuru ghan mughumọ oye odi ni dị katue ameerạ amạ amiteom mọ arumhụgh phọ abidị igey ni. Kuolọ r’oniin onyọ abidị o/rue!—Bạl Isaiah 43:9; 44:7-9.
Ibadị areten edi ni dị yira kotue ongọ ogbaanhaạn mọ aZihova kụ egey Enhaạn phọ (Miịn siikpịgh phọ 10-11)
11. Eeghe iyaạr kụ edị aZihova agbeelhom aḅenhị we phọ odị siphẹ Isaiah 43:10-12?
11 Bạl Isaiah 43:10-12. AZihova aḅenhị we phọ odị mọ: “Nyinha abugbaanhaạn amhị, . . . kụ mị Enhaạn.” AZihova apuru bidị mọ: “Ipel imhị, enhọn Enhaạn edi ni ḍughụm?” (Isa. 44:8) Yira omoọgh aani eepoogh ophagharanhaạn aḍipuru phọ aḍiphẹ phọ. Yira koḍeenhaan esi ikpo onhụ r’iḍighinhom araraạr mọ aZihova bịn kụ egey Enhaạn phọ. Mọ aḍien phọ odị bịn kụ ipelheghiom oomo inhọn asiḍien. Eten aghuḍum mọ ayira eḍeenhaan kẹn mọ yira okạr opomoghiạn aZihova ḅilhẹ oḅạr nyodị etigheri iiḅaghamhị dị aSetan kasighẹ uruom iyira. Yira oḍighi iduọn phọ, pọ yira ropinom aani bin oḅaalhamhị aḍien phọ aZihova.
12. Ika kụ idị imiịn phọ ogẹ bọ siẹn Isaiah 40:3, 5 emhunhughan?
12 Mem dị yira obakị ḍien phọ aZihova obobọ omạ oḍeenhaan we odọ oye phọ odị aru bọ, pọ yira rotuughaạny ghan Zizọs. Isaiah aghaạph kẹn ilọ oye dị katu kụ “akoghoronhaạn [obobọ, “aakolhobian,” igẹ dị edi ude.] eten phọ aZihova.” (Isa. 40:3) Imiịn phọ iphẹn phọ imhunhughan ika? AJọn oḍiiyeom muụm mọ aakolhobianhaan ni eten phọ Zizọs, opọ aru bọ r’aḍien phọ aZihova aḅilhẹ aghaạph ilọ aḍien phọ aZihova. (Mat. 3:3; Mạk 1:2-4; Luk 3:3-6) Iniin phọ imiịn phọ ekaạph kẹn mọ: “Eegu phọ aZihova kogananamhi ni.” (Isa. 40:5) Iphẹn phọ imite ika? Mem mọ aZizọs aru bọ siẹn ade phọ, odị amheerạ ni enye aZihova eten dị emhunhughan kụ aḍighi raraạr dị eḅilhẹ eghịgh mudị aZihova r’aloor kụ aru siẹn ade phọ.—Jọn 12:45.
13. Ika kụ edị yira kotue otuughaạny eḍeenhaan phọ aZizọs?
13 Idiphọ aZizọs, yira abugbaanhaạn aZihova. Yira romeera ghan ḍien phọ aZihova koḅilhẹ oḅenhị torobọ oye dị yira oteẹny ilọ iikiạ iiḍighi phọ odị. Orue okuamhị oḍighi iphẹn phọ, pọ yira omoọgh oḅenhị aani awe ilọ oomo ipẹ aZizọs aḍighi bọ oḅaalhamhị aḍien phọ aZihova. (Iiḍ. 1:8) Oye o/lho dị angọ ogbaanhaạn ilọ aZihova apu Zizọs Kraist, kụ yira rotuughaạny aani eḍeenhaan phọ odị. (Ogan. 1:5) Kuolọ ika kụ edị yira koḍeenhaan mọ aḍien phọ aZihova emạn ni maạr esi atorobọ onyọ ayira?
ARETEN DỊ YIRA KOḌEENHAAN IDỊ AḌIEN PHỌ AZIHOVA EMHẠN MAẠR ESI AYIRA
14. Idiphọ oghaạph bọ siẹn Psalm 105:3, yira rologhoma ghan ika ilọ aḍien phọ aZihova?
14 Yira robagaam ghan ḍien phọ aZihova. (Bạl Psalm 105:3.) Reḅaạl ghan olhoghi aZihova agey mem dị odị amhiịn dị yira robagaam ḍien phọ odị. (Jer. 9:23, 24; 1 Kọr. 1:31; 2 Kọr. 10:17) Yira osighẹ idiphọ eboom eepoogh oghuenhi aani r’obakị aḍien phọ aZihova. R’amem r’amem ku/kiilhom umugholoor oḅenhị awe dị r’ayira roḍighi ghan oḍighi, buọ ekụ ayira, bumatuman ayira, ḅilhẹ r’abunhọn mọ yira Abugbaanhaạn AZihova! Eru phọ rawạ mọ yira owilhẹ oghaạph oḅenhị abunhọn ilọ aḍien phọ aZihova. (Jer. 11:21; Ogan. 12:17) Okạr oghaạph, aSetan r’otul phọ odị rowạ ghan dị awe kobulha ḍien phọ aZihova. (Jer. 23:26, 27) Kuolọ, loor iduọn yira ophomhoghiạn bọ ḍien phọ aZihova, yira rowạ ghan ni ooseeny odị oomo aḍio.—Ps. 5:11; 89:16.
15. Remạ ghan eeghe omhạgh ghan aḍien phọ aZihova?
15 Yira rokiọm ghan ghisigh komhạgh ḍien phọ aZihova. (Joel 2:32; Rom 10:13, 14) Omhạgh ghan aḍien phọ aZihova epelhom ni olhegheri aḍien phọ odị r’osighẹ oḍighinhom. Eḅaramaạm olhegheri odị idiphọ Enhaạn dị edi ghan, oḍuom odị olhoghi, ḅilhẹ r’owạ ghan olhoghonhaạn aḍighaạgh r’iiḅakiọm odị. (Ps. 20:7; 99:6; 116:4; 145:18) Eḅaramaạm kẹn ni ogbeelhom aḍien phọ odị, raagharạ phọ odị, ḅilhẹ r’olhoghonhaạn abunhọn ḍighaạgh onmia pidị bidị omoọgh kuuḅi aghisigh aZihova.—Isa. 12:4; Iiḍ. 2:21, 38.
16. Ika kụ idị yira koḍeenhaan mọ aSetan ogbaạm okpẹ?
16 Yira ookolhobian omhiinhọm loor aḍien phọ aZihova. (Jems 5:10, 11) Yira orue ni oḅạr aZihova mem dị yira romiinhọm, pọ yira roḍeenhaan ghan mọ aSetan ogbaạm okpẹ. Siḍio phọ aJob, aSetan aghaạph ni idị i/tu inẹ ilọ abuphẹ rokumu bọ aZihova. Odị aḅẹm mọ: “Oye katue ni aḅọgh oomo araraạr dị odị amhoọgh angọ orọl aani r’ighuḍum.” (Job 2:4) ASetan aḅẹm mọ awe rokumu ghan aZihova mem lọ araraạr enhighẹ bịn, kụ mọ bidị kobilhẹ ni aZihova eḍighi maạr dị bidị osoman ḍikparamhinheẹn. Ebenhẹ phọ Enhaạn Job aḍeenhaan ni mọ iphẹn phọ okpẹ ni. Iniin phọ kẹn, yira omoọgh aani eepoogh omạ oḍeenhaan mọ torobọ iiḅaghamhị dị aSetan urophom iyira, yira ko/bilhẹ aZihova. Yira okuphom ni owol mọ aZihova kuphogh ni iyira loor aḍien phọ odị.—Jọn 17:11.
17. Odaphạn 1 Pita 2:12, eghẹn enhọn eten kụ edị yira kotue osighẹ rughuenhian otuom ḍien phọ aZihova?
17 Yira olọgh eegu ḍien phọ aZihova. (Prov. 30:9; Jer. 7:8-11) Loor iduọn yira omheerạ bọ enye aZihova ḅilhẹ awe ulhegheriom bọ iyira idiphọ Abugbaanhaạn AZihova, araraạr phọ ipẹ yira roḍighi bọ ketue ni eefolhomhi obobọ ekuenhi ḍien phọ odị. (Bạl 1 Pita 2:12.) Loor esi iduọn phọ, oḍighi oomo ipẹ yira kotue bọ omhiịn mọ ikpo onhụ phọ ayira r’iḍighinhom araraạr phọ ayira ekuenhi ni aZihova. Yira oḍighi iduọn phọ, pọ yira kosighẹ ni rughuenhian otuom ḍien phọ aZihova ghalhamọ r’iduọn yira u/munughan bọ.
18. Eghẹn enhọn eten kụ edị yira kotue oḍeenhaan mọ aḍien phọ aZihova emạn ni maạr esi ayira? (Miịn kẹn igẹ dị edi ude.)
18 Aḍien phọ aZihova emạn maạr esi ayira epu ḍigey aḍien ḍiọ ayira. (Ps. 138:2) Eeghe kụ iḍighi kụ emhạn bọ maạr? Loor esi dị, ephomhoghiạn phọ yira omhoọgh bọ oghị esi aḍien phọ aZihova ketue ni epuẹ ḍigey aḍien ayira ghisigh awe.a Esi omaạm, aZizọs aakolhobian ni omhugh aḍuugh umugholoor loor emhụ aḍien phọ aZihova, kụ ogbạ mọ odị osoroghuom iilhogh, kụ oghiigh nyodị. Ipẹ awe ogbạ bọ oḅạm emhụ odị i/siphe nyodị umugholoor obobọ ii/ḅaghamhị nyodị. (Hib. 12:2-4) Odị agbon ghụn oḍighi ogbi phọ aZihova.—Mat. 26:39.
19. Nạ aloghoma ika ilọ aḍien phọ aZihova, kụ eeghe kụ iḍighi?
19 Yira robagaam ni ḍien phọ aZihova. Kụ eḍighi kẹn ni eghuan iduọn ughol bọ iyira mọ Abugbaanhaạn AZihova. Loor iduọn phọ, yira ookolhobian ni ophamhanhạm aḍien phọ odị ghalhamọ awe uphogh ni iyira osooromhi. Aḍien phọ aZihova kụ imhạn maạr esi ayira epu ḍigey aḍien ḍiọ ayira. Esi iduọn phọ, oghị ghisigh ooseeny ghan ḍien phọ aZihova, ghalhamọ aSetan anyạ ni osophoghom ayira. Yira oḍighi ghan iduọn phọ, pọ yira roḍeenhaan ghan mọ aḍien phọ aZihova kụ imhạn maạr esi ayira epu torobọ iyaạr, idiphọ emhạn bọ maạr esi aZizọs Kraist.
AḌUỌR PHỌ 10 Praise Jehovah Our God!
a Ghalhamọ r’aJob bịn iiḅaghamhị ni mem mọ iraạr phọ arighirị phọ odị rogbạ bọ ropuẹ ḍien phọ odị. Eḅẹl amem mọ anmụny phọ aJob omhugh bọ ḅilhẹ odị aroph bọ oomo aruphua phọ odị, “aJob o/ḍighi ikarạph ḅilhẹ o/ghaạph mọ Enhaạn maḍighi iyaạr dị i/nighẹ.” (Job 1:22; 2:10) Kuolọ, mem mọ arighirị phọ odị ogbạ bọ oḅạm emhụ odị m’onọ aJob maḍighi ikarạph, egina amem bịn aJob amhiigh oḅạ “ikarạph ikpo onhụ.” Odị agbon oghaạph onhighemhị aḍien phọ odị kparipẹ r’oghuenhi aḍien phọ aZihova.—Job 6:3; 13:4, 5; 32:2; 34:5.