Kit me Tic ki Brocuwa me Jo Mene ma Gitye ka Timo Miti pa Jehovah i Kare-ni?
Brocuwa Manyen ma Kiyubo me Konyo Lutino Kwan me Baibul me Ngeyo Dul pa Jehovah
1. Tyen lok adek mene mumiyo kicoyo brocuwa me Miti pa Jehovah?
1 In mono dong icako tic ki brocuwa manyen me Jo Mene ma Gitye ka Timo Miti pa Jehovah i Kare-ni? Tyen lok me brocuwa man obedo me konyo lutino kwanwa me (1) ngeyo jo ma wabedo, (2) niang ticwa, ki (3) neno kit ma dulwa tye kwede. Brocuwa me Miti pa Jehovah tye ki pwony i pot karatac acel acel, dok yot me nyamone ki latin kwanni kun itwero tero dakika abic me o apar keken i nge kwanwu me cabit ducu.
2. Tit kong kit ma kiyubo kwede brocuwa man, dok itit jami mogo ma tye iye.
2 Kit ma Kiyubo Kwede: Brocuwa man kipoko iye i bute adek, dok bute acel acel nyamo lok ma kiryeyogi malo-ni i kom dul pa Jehovah. Wi pwony acel acel me pwony 28 magi tye calo lapeny, dok wi lok matino ma kicoyogi ki coc ma kikwoto miyo lagam me lapeny meno. Cal ma kimako ki i lobe makato 50 kiketogi kacel ki nying lobe i ka ngetgi, me nyuto kit ma ticwa-ni kwako kwede wi lobo ducu. Pwony mogo gitye ki bok ma wiye tye ni “Nong Ngec Mukene,” ma miyo tam ma itwero cuko cwiny latin kwanni me keto i tic.
3. Watwero tic ki brocuwa me Miti pa Jehovah nining?
3 Kit ma Itwero Tic Kwede: Cak ki nyuto lapeny ma en aye wi pwony ma wubikwano. Ci dong ka wutye ka kwan kacel, lok tutwalle i kom wi lok matino ma kicoyo ki coc ma kikwoto-ni. I agikkine, wunyam lapeny me poyo wic ma tye piny i pot karatac meno. Wuromo kong kwano lokke ducu ka dong wunyamo nyo wuromo nyamone paragraf ki paragraf. Ti ki ryeko i yero ginacoya ma myero wukwan. Wi pe owil me lok i kom cal kacel ki bok me “Nong Ngec Mukene.” Pol kare bedo ber ka kikwano pwony ducu kikore. Ento ka mitte, wutye agonya me cito atir i pwony moni ma pire tek loyo pi cawa moni. Me labolle, ka gure me adwol nyo me distrik tye cok, wutwero cito atir i pwony me namba 11.
4. Pingo i yom me nongo brocuwa manyen man?
4 Ka wakwano Baibul ki ngat moni, nongo watye ka konye me ngeyo Wonwa ma i polo. Ento myero bene wapwonye lok i kom dul pa Jehovah. (Car. 6:20) Iwa yom mada me nongo brocuwa man manyen-ni ma weko miyo ngec i kom dulwa bedo yot!