Kit me Konyo Jo ma Pud Pe Gitwero Kwano Buk me Baibul Pwonyo
1. Tika dano ducu biye kwano buk me Baibul Pwonyo? Tit kong.
1 Me wek ngat moni odok lawor Jehovah, myero kong oniang gin ma Baibul pwonyo. Ento, jo mogo gitye i dini mapat ki pa Lakricitayo dok pe gitero Baibul calo Lok pa Lubanga. Mukene pe giye i kom Lubanga kulu dok pe giworo Baibul. Bukke ango ma tye me kony bot jo ma kong gikwero kwano buk me Baibul Pwonyo? Tam ma kimiyo kany jenge i kom lok pa lutit kwena ma gia ki i lobe 20 mapatpat.
2. Ka ngat mo owacci pe eye i kom Lubanga, ngo ma omyero watem niang iye, dok pingo?
2 Jo ma Pe Giye i kom Lubanga: Ka ngat mo owacci pe eye i kom Lubanga, bedo ber ka watemo niang tyen lok me niyene. Gwok nyo en ye ni kwo ocakke pire kene? En mono orwenyo niyene i kom Lubanga pi tim me ngolo kop alenga nyo tim goba ma dong opong i dini-ni? En mono a ki i lobo ka ma pe gitye agonya me nyuto niye i kom Lubanga? Romo bedo ni en pe kwero matwal ni Lubanga tye, ento pe winyo ni ye i kom Lubanga pire tek. Pol pa lutit kwena ginongo ni penyo ni, “Dong ibedo ki tam meno pi kare ma rom mene?” tugo cwiny dano meno me tite. Winy lokke labongo ngolone. Ka waniang ngo mumiyo ngat meno pe ye i kom Lubanga, ci wabingeyo kit me dok i lokke kacel ki bukke ma watwero miyone.—Car. 18:13.
3. Watwero nyuto woro pi dano kacel ki twerone me yero gin ma en ye iye nining?
3 Ka watye ka dok i lok pa dano meno, myero wagwokke pe me weko en winyo calo watye ka cayo tamme. Tam man oa ki i lobo Amerika: “Pire tek mada ni wawor twero pa dano me yero gin ma en ye iye. Ma ka tute me loyo pyem, bedo ber ka wapenyo lapeny ma miyo gilwodo lok dok gimoko tamgi pigi kengi.” I nge winyo lok pa rwod ot, laneno me adwol moni pol kare dok iye ki lapeny man ni, “Tika dong ibedo ki tam ma kit man?”
4. Watwero konyo dano me dini pa Budda nining?
4 Lok ma kwako Lubanga obedo gin manyen bot pol pa dano me dini pa Budda. Lutit kwena mogo me Britain gitiyo ki brocuwa me Lasting Peace and Happiness—How to Find Them me miyo caden bot dano ma kit meno. I nge nyamo lok me yabone, ginyamo bute ma wiye tye ni “Tika Tye Lacwec ma Rwomme Lamal Loyo?” ki bute ma wacci “Buk ma Miyo Tira ki Mot Bot Dano Ducu.” I ngeye, giromo nyuto buk me Baibul Pwonyo kun giwaco ki rwod ot ni, “Kadi bed pe iye i kom Lubanga, kwano Baibul pire tek pien tye ki tira mapol ma konyo.” Painia acel ma i Amerika ma tiyo i wang tic ma kiloko iye leb China owacci: “Jo mapol i wang ticwa gimaro kwan mada. Pi meno, pol kare i nge nongo bukkewa gikwano woko liweng ma peya wadwogo. Ento pe giniang lok me kwano Baibul. Pi meno, amaro miyogi brocuwa me Kwena Maber i lim mukwongo pien coc ma iye cuko cwiny dano me nyamo lok.” Laneno me adwol pa jo ma giloko leb China i Amerika owacci itwero nyuto buk me Baibul Pwonyo i lim mukwongo. Ento, bedo ber ka icako ki kwano dul me 2, ma loko i kom Baibul, me kaka cako ki dul me 1, ma nyamo lok i kom Lubanga.
5. Diyo cwiny pire tek pingo?
5 Dongo niye i kom Lubanga tero kare, mumiyo diyo cwiny pire tek. I acakki, lok ma wanyamo ki ngat moni pe twero cuko cwinye me ye i kom Lacwec. Ento i nge kare mo en oromo ye, nyo twero wacci eniang pingo ngat moni twero ye.
6. Ngo mumiyo jo mukene gipe ki miti i kom Baibul?
6 Jo ma Gipe ki Miti nyo Gen i kom Baibul: Pol kare, ngat ma ye ni Lubanga tye, nongo peke ki miti i lok me Baibul pien pe ye ni obedo Lok pa Lubanga. Romo bedo ni en tye i lobo me dini mapat ki pa Lukricitayo dok tamo ni Baibul obedo buk pa Lukricitayo ata-ni. Nyo gwok bedo i lobo ka ma pol pa dano giwacci gin Lukricitayo ento nen ki woko keken, ci en tamo ni Baibul konye pe bote. Waromo konyo jo ma kit meno me dongo miti i kom Baibul wek guye me kwanone kun gitiyo ki buk me Baibul Pwonyo nining?
7. Yo maber ango ma watwero tic kwede me dongo miti pa dano i kom Baibul?
7 Jang gang kal me lobo Grik ocoyo ni: “Yo maber loyo me konyo jo ma gipe ki miti i kom Baibul aye me yabo Baibul kun inyuto botgi ngo ma tye iye. Lutit kwena mapol gunongo ni lok me Baibul gudo cwiny ngat moni i yo matut loyo gin mo keken ma dano adana twero waccigi. (Ibru. 4:12) Neno nying Lubanga i Baibul okonyo jo mapol me dongo miti me ngiyone matut.” Jang gang kal me lobo India ocoyo ni: “Lok ada i kom kwo ki to gudo cwiny jo mapol me dini Hindu, cikke pa Baibul i kom lobo ma apokapoka pe iye bene gudo cwinygi.” Lok i kom peko ma gudo dano me wang ticwu miyo bot lutit kwena kare me nyuto gin ma Baibul wacci Ker pa Lubanga bitimone me cobo peko meno.
8. Ngo ma waromo wacone bot jo ma gitye ki neno marac i kom Baibul pi kit pa Lukricitayo ata-ni?
8 Ka ngat moni tye ki neno marac i kom Baibul pi kit pa Lukricitayo ata-ni, wek en onge ni Lukricitayo ata-ni gurwenyo pwony me Baibul woko. Jang gang kal me lobo India ocoyo ni: “I kare mukene, omyero wakony dano me niang ni dini pa Lukricitayo ata-ni pe gilubo lok me Baibul.” Guwacci pol kare jo me dini me Hindu gimaro nyamo bute me 4 me brocuwa me What Is the Purpose of Life? How Can You Find It?, ma tito kit ma dini magi gutemme kwede me balo ki rwenyo Lok pa Lubanga woko. Painia mo i lobo Brazil penyo dano ni: “Pingo pe imed ngecci i kom lok ma i Baibul? Jo mapol gitye ka timo man labongo paro pi dini ma gia ki iye. Itwero bedo ki ur i kom jami ma ipwonyo.”
9. Pingo pe omyero wail cingwa woko ka ngat moni pe kong onyutu miti i kom Baibul?
9 Jehovah neno cwiny ngat acel acel. (1 Cam. 16:7; Car. 21:2) En tye ka ywayo jo ma cwinygi atir i woro me ada. (Jon 6:44) Pol pa jo ma kit meno pud peya gipwonyogi lok i kom Lubanga nyo gingeyo lok me Baibul manok keken. Pwonywa miyo botgi kare me ‘larre ki ngeyo lok me ada.’ (1 Tem. 2:4) Pi meno, ka jo mukene pe kong gunyutu miti i kom Baibul, pe iil cingi woko! Ti ki bukkewa mukene ma nonge i leb me wang ticwu me dongo mitigi. Lacen, ibibedo ki kare me cako kwano Baibul kwede ki buk ma pire tek loyo, ma en aye buk me Baibul Mono Ada Pwonyo Gin Ango?
[Bok i pot karatac 4]
Ka rwod ot owacci pe eye i kom Lubanga, itwero tic ki tam magi:
• Penye ni: “Dong ibedo ki tam meno pi kare ma rom mene?” wek iniang tyen lokke.
• Ka en lubo dini pa Budda, ti ki brocuwa me Lasting Peace and Happiness—How to Find Them, pot karatac 9-12.
• Ka en ye ni kwo ocakke pire kene, iromo tic ki jami magi:
Pwony ma katti kare ki kare i Awake! ma wiye tye ni “Kiyubo Mono Ayuba?”
Vidio me The Wonders of Creation Reveal God’s Glory
Brocuwa me A Satisfying Life—How to Attain It, bute me 4; Was Life Created?; ki The Origin of Life—Five Questions Worth Asking
• Ka en orwenyo niye i kom Lubanga pi tim me ngolo kop alenga ki deno can, jami magi twero bedo me kony:
Buk me Is There a Creator Who Cares About You?, dul me 10
Brocuwa me Lubanga Tika Ada Paro Piwa?, bute me 6, ki brocuwa me What Is the Purpose of Life?, bute me 6
• Cak tic ki buk me Baibul Pwonyo cutcut ka rwod ot oye ni Lubanga tye ada. Romo bedo ber me cakone ki dul me 2 nyo pwony mo mukene mupore pi rwod ot.
[Bok i pot karatac 5]
Ka rwod ot pe ye i kom Baibul, itwero tic ki tam magi:
• Wunyam kacel dul me 17 ki 18 me buk me Life—How Did It Get Here? By Evolution or by Creation?
• Pi jo me dini Hindu, ti ki brocuwa me Why Should We Worship God in Love and Truth?
• Pi jo me dini pa Lujudaya, ti ki brocuwa me Will There Ever Be a World Without War?, pot karatac 3-11.
• Wunyam kacel ber pa lubo pwony me Baibul. Jami ma itwero tic kwede me nyuto ki ngat moni ni pwony me Baibul tye me kony aye:
Pwony ma katti kare ki kare i Awake! ma wiye tye ni “Kony pi Jo me Ot”
Vidio me The Bible—Its Power in Your Life
Brocuwa me Kwena Maber Mua ki Bot Lubanga!, pwony me 9 ki 11; A Book for All People, pot karatac 22-26; ki A Satisfying Life—How to Attain It, bute me 2
Pi jo ma lubo dini pa Budda, ti ki brocuwa me The Pathway to Peace and Happiness, pot karatac 3-7.
Pi Luicilam, ti ki brocuwa me Real Faith—Your Key to a Happy Life, bute me 3.
Ka watye ka tito kwena i kabedo ma danone gidag Baibul, bedo ber ka pe watito ka ma pwony me ryeko meno oa ki iye wang ma dong wacito kunnu tyen mapol.
• Tit kit ma lok pa lunebi me Baibul dong ocobbe kwede. Jami ma itwero tic kwede aye:
Vidio me The Bible—Accurate History, Reliable Prophecy
Brocuwa me A Book for All People, pot karatac 27-29
• Cak tic ki buk me Baibul Pwonyo cutcut ka ngat meno openyo gin ma Baibul pwonyo i kom jami mogo.
[Bok i pot karatac 6]
Ka rwod ot owacci: “An pe aye i kom Lubanga,” iromo wacci:
• “Atwero kong titi wiye wiye ngo mumiyo an atye ki niye i kom Lacwec?” Ci inywak lok kacel kwede ki i buk me Reasoning, pot karatac 84-86, nyo iket yub me kelo bote bukwa acel mo ma inongo kwanone mit.
• “Ento ka ada Lubanga tye, mono imito ni kite obed nining?” Pol kare rwod ot dok iye ni etwero nyikke cok ki Lubanga ma lamar, langol kop atir, lakica, dok ma pe poko kin dano. Nyutte ki i Baibul ni magi kikome aye kit pa Lubanga. (Oromo bedo ni twere me tic ki dul me 1 i buk me Baibul Pwonyo, cakke i paragraf 6.)
Ka rwod ot owacci: “An pe aye i kom Baibul,” iromo wacci:
• “Tye jo mapol ma gitye ki tam acel-lu. Mogo gitamo ni lok me Baibul pe rwatte ki cayan nyo ni cik me Baibul pe kette i tic. Kong iwacca, tika dong inongo kare me kwano Baibul? [Mine kare wek ogam. Ci inyutte lok ma tye i acakki me pot karatac 3 me brocuwa me A Book for All People, dok imine brocuwa.] Jo mapol gicayo Baibul pien dini mapatpat ginyweno lok ma iye. Ka imito, i nino mukene watwero nyamo labol acel ki i pot karatac 4 ki 5.”
• “Tye jo mapol ma gitye ki tam acel-lu. Aromo nyutti gin mo ma ogudo cwinya ki i Baibul? [Kwan Yubu 26:7 nyo Icaya 40:22, ma ginyuto ni lok me Baibul rwatte ki lok me cayan.] Baibul bene tye ki pwony mabeco ma konyo jo me odi. Ka imito, i nino mukene atwero nyutti labol acel.”
• “Apwoyo tita tammi. Ka ada Lubanga ocoyo buk mo pi dano, lok ango ma itamo ni twero bedo iye?” Ci inyutte Ginacoya mo ma rwatte ki lagamme.