Nihewi Kɛ Yihewi​—‘Nyɛɛ Hi Nyɛ Nitsɛmɛ Nyɛ Yi Wami Hemi ɔ He Ní Tsue’

1. Mɛni he je nɛ baptisimi he hia a? (Moo hyɛ foni nɛ ngɛ ní kasemi ɔ sisije ɔ.)

DAA jeha a, a baptisiɔ Baiblo kaseli akpehi abɔ. A kpɛti nihi fuu ji nihi nɛ a yi jeha 13 aloo jeha 20 lolo. A tsɔse a kpɛti ni komɛ ngɛ anɔkuale ɔ mi. Anɛ mo hu o piɛɛ nimli nɛ ɔmɛ a he lo? Ke jã a, lɛɛ o sa yi jemi. Ja a baptisi nɔ ko loko e ma nyɛ maa pee Kristofo no, nɛ e ji nɔ́ ko nɛ e he hia kɛ ha yi wami hemi.​—Mat. 28:19, 20; 1 Pet. 3:21.

2. Mɛni he je nɛ e sɛ nɛ o ye gbeye kaa o maa jɔɔ o he nɔ ha Yehowa?

² E ngɛ mi kaa baptisimi bliɔ blɔ kɛ haa jɔɔmihi fuu mohu lɛɛ, se ní tsumi hu piɛɛ he. Ngɛ mɛni blɔ nɔ? Ngɛ o baptisimi ligbi ɔ nɔ ɔ, a bi mo ke, “Ngɛ Yesu Kristo afɔle sami ɔ nya a, anɛ o pia o he ngɛ yayamihi nɛ o pee ɔmɛ a he, nɛ o jɔɔ o he nɔ ngɔ ha Yehowa kaa o maa pee e suɔmi nya ní lo?” nɛ o ha heto ke, ee. O baptisimi ɔ maa nɔ mi kaa o jɔɔ o he nɔ kɛ ha Yehowa. E ji kita nɛ o kã Yehowa kaa o maa suɔ lɛ, nɛ o kɛ e suɔmi nya ní peemi maa pee nɔ́ titli ngɛ o si himi mi. Enɛ ɔ ji kita nɛ hɛdɔ ngɛ he wawɛɛ. Anɛ e sa nɛ o pia o he kaa o pee jã lo? Dɛbi, e sɛ nɛ o pia o he kulaa. Tɔmi ko be he kulaa kaa o ngɔ o he kɛ ha Yehowa. Mo susu he nɛ o hyɛ! Nihi nɛ a be Yehowa nɔ yemi sisi ɔ ngɛ Satan nɔ yemi sisi. Abosiami sume nɛ o yi nɛ ná wami. Ngɛ anɔkuale mi ɔ, e suɔ kaa o ba piɛɛ e he nɛ nyɛɛ te si kɛ wo Yehowa nɔ yemi ɔ konɛ neneene wami ɔ nɛ bɔ mo.

3. Ke nɔ ko jɔɔ e wami nɔ ha Yehowa a, mɛni jɔɔmihi e náa?

³ O fĩ we Satan se, mohu ɔ, o jɔɔ o he nɔ, nɛ a baptisi mo kaa Kristofo no. Mo susu jɔɔmihi nɛ o ma ná a he nɛ o hyɛ. Amlɔ nɛ ɔ nɛ o jɔɔ o wami nɔ ha Yehowa a, o ma nyɛ ma de kɛ nɔ mi mami ke: ‘Nɛ Yehowa kɛ mi ngɛ nɛ ɔ, i yi gbeye; mɛni adesa ma nyɛ maa pee mi.’ (La 118:6) E ji he blɔ ngua nɛ o ná kaa o fĩ Mawu se, nɛ Mawu hu bua jɔ o he. He blɔ ko be nɛ e kle pe enɛ ɔ.

MO NITSƐ O BLƆ NYA NÍ TSUMI

4, 5. (a) Mɛni he je nɛ nɔ ko he nɔ nɛ e maa jɔɔ ha Yehowa a ji lɛ nitsɛ e blɔ nya ní tsumi ɔ? (b) Mɛni nyagbahi nɛ nihi nɛ a wa, kɛ nihi nɛ a wɛ tsuo kɛ ma nyɛ maa kpe?

⁴ Akɛnɛ o ji Kristofo no nɛ a baptisi mo he je ɔ, huɛ bɔmi nɛ ngɛ o kɛ Yehowa nyɛ kpɛti ɔ be kaa ‘nyu aloo kane he hiɔ’ nɛ o fɔli maa hi woe ha mo. Ke a ná nɛ a baptisi mo ɔ, e sa nɛ mo nitsɛ o tsu o yi wami hemi ɔ he ní ke ji kaa o ngɛ o fɔli ɔmɛ a sisi po. Mɛni he je nɛ e sa nɛ o kai enɛ ɔ? Ejakaa tsa pi be fɛɛ be nɛ o ma nyɛ maa le haomihi nɛ o kɛ maa kpe hwɔɔ se. Kaa nɔ hyɛmi nɔ́ ɔ, eko ɔ, a baptisi mo ngɛ o jokuɛyo mi, se benɛ o ye jeha 13 kɛ yaa a, o bɔni he numi komɛ nami, nɛ o juami bi hu bɔni o nɔ nyɛmi kaa o pee ní komɛ nɛ sɛ. Yiheyo ko nɛ e yi jeha 20 lolo ɔ tsɔɔ nya ke: “Behi fuu ɔ, ke jokuɛ ɔ wɛ ɔ, tsa pi fɔmi ligbi yemi he keeki nɛ a gbaa ngɛ sukuu nɛ e yi eko ɔ nɛ ma ha nɛ e kua kaa e be Yehowa Odasefo no pee. Se ke e ngɛ wae, nɛ bɔmi nami he akɔnɔ nya bɔni wami ngɛ e mi ɔ, jamɛ a be ɔ nɛ e sa nɛ e ná nɔ mi mami kaa Yehowa mlaa amɛ nɛ e kɛ ma tsu ní ɔ ji nɔ́ nɛ da.”

⁵ Ngɛ anɔkuale mi ɔ, tsa pi nihewi kɛ yihewi pɛ nɛ a kɛ nyagba nɛ ɔmɛ kpeɔ. Nihi nɛ a wa nɛ a baptisi mɛ ɔ hu kɛ a hemi kɛ yemi ɔ he kahi nɛ a hyɛ we blɔ kpeɔ. Eko ɔ, ka nɛ ɔmɛ ma nyɛ maa pee gba si himi mi nyagbahi, hiɔ, aloo ní tsumi mi sanehi. Niinɛ, wa wa jio, wa wɛ jio, wɔ tsuo waa kɛ si fɔfɔɛ komɛ maa kpe nɛ e ma bi nɛ waa ye Yehowa anɔkuale.​—Yak. 1:12-14.

6. (a) Mɛni nɛ Yehowa nɛ o wo lɛ si kaa o maa ye lɛ anɔkuale ngɛ si fɔfɔɛhi tsuo a mi ɔ tsɔɔ? (b) Mɛni o ma nyɛ maa kase ngɛ Filipi Bi 4:11-13 ɔ mi?

⁶ Bɔ nɛ pee nɛ o nyɛ nɛ o ya nɔ nɛ o ye Yehowa anɔkuale ɔ, e sɛ nɛ o hɛ nɛ je nɔ kaa o wo Yehowa si kaa o maa ye lɛ anɔkuale ngɛ si fɔfɔɛhi tsuo a mi. Enɛ ɔ tsɔɔ kaa o wo je mluku ɔ tsuo Nɔ Yelɔ ɔ si kaa o maa ya nɔ ma sɔmɔ lɛ ke o huɛmɛ aloo o fɔli kpa lɛ sɔmɔmi po. (La 27:10) Be fɛɛ be nɛ o kɛ nyagba ko maa kpe ɔ, o ma nyɛ ma bi Yehowa nɛ e ye bua mo konɛ o nyɛ nɛ o hi si ngɛ o he nɔ jɔɔmi ɔ nya.​—Kane Filipi Bi 4:11-13.

7. Mɛni nɛ “gbeye yemi kɛ he domi blibliibli” nɛ o kɛ ma tsu o yi wami hemi ɔ he ní ɔ tsɔɔ?

⁷ Yehowa suɔ nɛ o pee e huɛ. Se e ma bi nɛ o mia o hɛ mi loko o ma nyɛ maa ya nɔ maa pee Yehowa huɛ, nɛ o tsu o yi wami hemi ɔ he ní. Ngɛ anɔkuale mi ɔ, Filipi Bi 2:12 ɔ de ke: “Nyɛɛ kɛ gbeye yemi kɛ he domi blibliibli nɛ hi nyɛ nitsɛmɛ nyɛ yi wami hemi ɔ he ní tsue.” Munyu nɛ ɔmɛ tsɔɔ kaa e sa nɛ o susu blɔ nɔ nɛ o maa gu kɛ baa huɛ bɔmi nɛ ngɛ o kɛ Yehowa nyɛ kpɛti ɔ yi, kɛ bɔ nɛ o ma plɛ kɛ ye lɛ anɔkuale ngɛ kahi tsuo nɛ o kɛ maa kpe ɔ mi ɔ he. Ke o he o he ye tsɔ ɔ, e ma nyɛ maa ngɔ nyagba kɛ ba. Nihi nɛ a kɛ jehahi fuu sɔmɔ Mawu ɔ po a kpɛti ni komɛ je anɔkuale ɔ mi. Enɛ ɔ he ɔ, mɛni o ma nyɛ maa pee konɛ o nyɛ nɛ o tsu mo nitsɛ o yi wami hemi ɔ he ní?

BAIBLO KASEMI HE HIA

8. Mɛni e sa kaa waa pee ke wa ngɛ ní kasee ngɛ wa dɛ he, nɛ mɛni he je nɛ e he hia?

⁸ Wa ma nyɛ maa gu blɔ enyɔ nɔ nɛ waa kɛ Yehowa nɛ bɔ huɛ. Blɔ nɛ ɔmɛ ji Mawu tue nɛ wa maa bu, kɛ ní nɛ waa kɛ lɛ maa sɛɛ. Baiblo ɔ nɛ wa kasee ɔ ji blɔ titli nɛ tsɔɔ kaa wa ngɛ Yehowa tue bue. Baiblo ɔ, kɛ Baiblo kasemi womihi nɛ wa maa kane nɛ wa ma pue wa yi mi tɛ ngɛ he ɔ piɛɛ he. Be mi nɛ o ngɛ jã pee ɔ, mo kai kaa Baiblo ɔ kasemi be kaa sukuu ní kasemi. Ko ha nɛ e pee kaa sukuu no nɛ e ngɛ ní kasee nɛ e kɛ ma ya ngma ka. Ní kasemi nɛ se nami ngɛ he ji kaa o maa bɔ mɔde kaa o ma pue o yi mi tɛ ngɛ nɔ́ nɛ o ngɛ kasee ɔ he, konɛ o yɔse Yehowa su kpahi. Enɛ ɔ maa ye bua mo nɛ o maa hɛ kɛ su Yehowa he, nɛ lɛ hu e maa hɛ kɛ su o he.​—Yak. 4:8.

9. Mɛni Baiblo kasemi níhi nɛ ye bua mo ngɛ o dɛ he ní kasemi mi?

⁹ Yehowa asafo ɔ ha wɔ níhi fuu nɛ maa ye bua wɔ konɛ wa ní kasemi nɛ nu tso. Kaa nɔ hyɛmi nɔ́ ɔ, “Bible Study Activities” nɛ ngɛ “Teenagers” blɔ he ɔ ngɛ jw.org ɔ ma nyɛ maa ye bua wɔ konɛ waa kase ní kɛ je níhi nɛ ya nɔ blema nɛ a ngma ngɛ Baiblo ɔ mi ɔ mi. Jehanɛ hu ɔ, ke o ya jw.org ɔ, o maa na ní kasemi he blɔ tsɔɔmihi nɛ kɔɔ “Mɛni Tutuutu Ji Baiblo ɔ Tsɔɔmi?” womi ɔ he. E ma nyɛ maa ye bua mo konɛ o hemi kɛ yemi ɔ mi nɛ wa. Baiblo kasemi ní nɛ ɔmɛ maa ye bua mo konɛ o nyɛ nɛ o tsɔɔ nihi o hemi kɛ yemi ɔ he ní. Wa ma nyɛ maa na ní kpahi hu nɛ maa ye bua wɔ konɛ wa nyɛ nɛ waa kase Baiblo ɔ. O maa na ga womi komɛ ngɛ munyu nɛ ji, “Young People Ask . . . How Can I Make Bible Reading Enjoyable?” nɛ je kpo ngɛ April 2009 Awake! ɔ mi ɔ mi. Loko o ma nyɛ ma tsu mo nitsɛ o yi wami hemi he ní ɔ, jã o kaseɔ ní nɛ o pueɔ o yi mi tɛ wawɛɛ ngɛ nɔ́ nɛ o kaseɔ ɔ he.​—Kane La 119:105.

SƆLEMI HE HIA

10. Mɛni he je nɛ e he hia nɛ Kristofo no nɛ a baptisi lɛ ɔ nɛ sɔle ɔ?

¹⁰ Dɛ he ní kasemi ji blɔ nɛ wa guɔ nɔ kɛ buɔ Yehowa tue, nɛ sɔlemi ji blɔ nɛ wa guɔ nɔ nɛ waa kɛ lɛ sɛɛɔ ní. E sɛ nɛ Kristofo no nɛ e na sɔlemi kaa nɔ́ ko nɛ a peeɔ kɛkɛ, aloo nɔ́ ko nɛ ma ha nɛ níhi nɛ ya nɔ ha lɛ saminya ngɛ e si himi mi. Mohu ɔ, sɔlemi ji ní sɛɛmi nitsɛnitsɛ nɛ yaa nɔ ngɛ waa kɛ wa Bɔlɔ ɔ wa kpɛti. Yehowa suɔ nɛ e nu o gbi. (Kane Filipi Bi 4:6.) Ke o kɛ nyagbahi ngɛ kpee ɔ, ga womihi nɛ nile ngɛ mi nɛ Baiblo ɔ kɛ ha ji kaa ‘moo ngɔ o haomi ɔmɛ kɛ ha Yehowa.’ (La 55:22) Anɛ o heɔ munyu nɛ ɔ yeɔ lo? Nyɛmimɛ ayɔhi abɔ ma nyɛ ma de kɛ nɔ mi mami kaa a kɛ ga womi nɛ ɔ tsu ní nɛ e ye bua mɛ wawɛɛ. Mo hu e ma nyɛ maa ye bua mo!

11. Mɛni he je nɛ e sa nɛ o na Yehowa si be fɛɛ be ɔ?

¹¹ Tsa pi be nɛ wa ngɛ nɔ́ ko hlae pɛ nɛ e sa nɛ waa sɔle ha Yehowa. Baiblo ɔ de ke: “Nyɛɛ pee nyɛ he nihi nɛ a le sina.” (Kol. 3:15) Be komɛ ɔ, wa nyagba amɛ haa nɛ wa hɛ jeɔ jɔɔmihi nɛ Yehowa jɔɔ wɔ ɔmɛ a nɔ. Ke e hí kulaa a, daa ligbi ɔ, o ma nyɛ ma kadi níhi etɛ nɛ Yehowa pee ha mo nɛ o ma nyɛ maa na lɛ si ngɛ he. Moo sɔle kɛ na Yehowa si ngɛ jamɛ a jɔɔmi ɔmɛ a he. Jokuɛ yiheyo ko nɛ a tsɛɛ lɛ ke Abigail nɛ a baptisi lɛ benɛ e ye jeha 12 ɔ de ke: “I nuɔ he kaa Yehowa ji nɔ nɛ e sa kaa waa na lɛ si pe nɔ fɛɛ nɔ ngɛ je mluku ɔ mi. Be fɛɛ be nɛ wa ma ná he blɔ ɔ, e sa nɛ waa na lɛ si ngɛ nike níhi nɛ e kɛ haa wɔ ɔ he.” Be komɛ ɔ, Abigail biɔ e he ke: “Ke i te si hwɔɔ, nɛ níhi nɛ i na Yehowa si ngɛ he mwɔnɛ ɔ nɔuu lɛ ngɛ ɔ, anɛ lɔ ɔ tsɔɔ kaa Yehowa jɔɔ we mi kɛ nɔ́ ehe ko lo?”a

BƆ NƐ MO NITSƐ O NÍHI A SI KPAMI MAA YE BUA MO HA

12, 13. Mɛni he je nɛ e sa kaa o susu ní kpakpahi nɛ Yehowa pee ha mo ɔ he ɔ?

¹² Matsɛ David nɛ e hi si blema nɛ Yehowa je lɛ ngɛ kahi fuu a mi ɔ tu munyu nɛ ɔ ngɛ la ko nɛ e po ɔ mi. E de ke: ‘Nyɛɛ ka Yehowa nɛ nyɛɛ hyɛ, nɛ nyɛ maa na kaa e hi. A gbaa nɔ nɛ ngɔɔ e hɛ kɛ fɔɔ e nɔ ɔ.’ (La 34:8) Ngmami nɛ ɔ tsɔɔ bɔ nɛ nɔ ko níhi a si kpami yeɔ bua lɛ nitsɛ ha. Ke o kane Baiblo ɔ, kɛ wa womi ɔmɛ, nɛ o ya asafo mi kpehi ɔ, o nuɔ nihi nɛ Mawu ye bua mɛ a níhi a si kpamihi fuu. Se ke o ngɛ wae ngɛ Mawu jami mi ɔ, e sa nɛ o nyɛ nɛ o na bɔ nɛ Yehowa nitsɛ ye bua mo ngɛ o si himi mi ha. Mɛni níhi a si kpami o ná nɛ tsɔɔ kaa Yehowa peeɔ mo kpakpa?

¹³ Kristofohi tsuo na Yehowa kpakpa peemi ɔ ngɛ blɔ kake ko nɔ. Lɔ ɔ ji gblami nɛ Mawu gbla wɔ kɛ ba e kɛ e Bi ɔ ngɔ ɔ. Yesu de ke: “Adesa ko be nyɛe maa ba ye ngɔ kaa ja Tsɛ ɔ, nɔ nɛ e tsɔ mi ɔ gbla lɛ.” (Yoh. 6:44) Anɛ o naa munyu nɛ ɔmɛ kaa a kɔɔ o he lo? Eko ɔ, niheyo ko aloo yiheyo ko ma de ke, ‘Yehowa gbla ye fɔli ɔmɛ, se imi lɛɛ, i nyɛɛ ye fɔli ɔmɛ a se.’ Benɛ o jɔɔ o he nɔ ha Yehowa nɛ a baptisi mo ɔ, o kɛ Yehowa ba ná huɛ bɔmi ko nɛ ngɛ slɔɔto. Amlɔ nɛ ɔ lɛɛ, Yehowa le mo nitsɛnitsɛ. Baiblo ɔ wo si ke: “Ke nɔ ko suɔ Mawu ɔ, Mawu hu le jamɛ a nɔ ɔ.” (1 Kor. 8:3) Be fɛɛ be ɔ, moo bɔ mɔde nɛ o tsɔɔ kaa o bua jɔ he blɔ nɛ o ngɛ kaa Yehowa sɔmɔlɔ ngɛ e we asafo ɔ mi ɔ he.

14, 15. Ngɛ mɛni blɔ nɔ nɛ fiɛɛmi ní tsumi ɔ ma nyɛ maa ye bua mo konɛ o hemi kɛ yemi ɔ mi nɛ wa?

¹⁴ Blɔ kpa nɛ o ma nyɛ maa gu nɔ kɛ na Yehowa kpakpa peemi ɔ ji kaa o maa tsɔɔ nihi o hemi kɛ yemi ɔ he ní. O ma nyɛ maa pee jã be mi nɛ o ngɛ fiɛɛmi tso mi kɛ be mi nɛ o ngɛ sukuu. E yeɔ ha ni komɛ kaa a maa fiɛɛ ha a juami bi ngɛ sukuu. Eko ɔ, o le nɔ́ he je. Behi fuu ɔ, a susuɔ bɔ nɛ a sukuu bi ɔmɛ maa pee a ní ha a he. E he wɛ tsɔ kaa o maa fiɛɛ ha o sukuu no kake, se ke a he hiɛ ɔ, e be gbɔjɔɔ. Mɛni ma nyɛ maa ye bua mo?

¹⁵ Kekleekle ɔ, e sa nɛ o ná nɔ mi mami kaa nɔ́ nɛ o heɔ yeɔ ji anɔkuale. Anɛ ní kasemi ní nɛ ɔmɛ ngɛ jw.org ngɛ o je gbi mi lo? Ke o li lolo ɔ, moo to o tsui si nɛ o hla. A pee ní nɛ ɔmɛ konɛ a ye bua mo nɛ o pue o yi mi tɛ ngɛ níhi nɛ o he ye, nɔ́ he je nɛ o heɔ yeɔ, kɛ bɔ nɛ o ma plɛ kɛ tsɔɔ o hemi kɛ yemi ɔ mi kɛ tsɔɔ ní kpahi ɔ he. Ke o ná nɔ mi mami nɛ mi wa, nɛ o dla o he saminya a, lɔ ɔ maa ye bua mo konɛ o ye Yehowa biɛ ɔ he odase.​—Yer. 20:8, 9.

16. Mɛni maa ye bua mo konɛ o ko ye gbeye kaa o kɛ nihi maa sɛɛ o hemi kɛ yemi ɔ he ní?

¹⁶ Ke o dla o he kaa mɛni po ɔ, eko ɔ, e he maa wa ha mo kaa o kɛ nihi maa sɛɛ o hemi kɛ yemi ɔ he ní. Yiheyo ko nɛ e ye jeha 18 nɛ a baptisi lɛ benɛ e ye jeha 13 ɔ de ke, “I le níhi nɛ i heɔ yeɔ, se be komɛ ɔ, e yeɔ ha mi kaa i kɛ nihi maa sɛɛ he ní.” Mɛni e peeɔ ngɛ nyagba nɛ ɔ he? E de ke: “I bɔɔ mɔde kaa ma je huɛ bɔmi su kpo. Ye sukuu bi ɔmɛ sɛɛɔ níhi nɛ a peeɔ ɔmɛ a he ní faa, lɔ ɔ he ɔ, e sa nɛ imi hu ma pee jã nɔuu. Enɛ ɔ he ɔ, i deɔ nɔ́ ko kaa, ‘Lingmi nɛ i kɛ nɔ ko ngɛ Baiblo ɔ he ní sɛɛe ɔ, . . . ’ Kɛkɛ ɔ, i kɛ ye munyu ɔ tsa nɔ. E ngɛ mi kaa sisije ɔ, tsa pi Baiblo ɔ nitsɛ he munyu nɛ i tuɔ mohu lɛɛ, se behi fuu ɔ, a kpɛti nihi fuu suɔ nɛ a maa le nɔ́ nɛ i peeɔ ke i kɛ nihi ngɛ Baiblo ɔ kasee. Be komɛ ɔ, a biɔ mi sanehi ngɛ he. I pɔɔ fiɛɛmi ngɛ blɔ nɛ ɔ nɔ, nɛ i na kaa e ngɛ mi ye buae wawɛɛ. Be fɛɛ be nɛ ma pee jã a, ye bua jɔɔ wawɛɛ!”

17. Ngɛ mɛni blɔ nɔ nɛ bɔ nɛ o peeɔ o ní ngɛ o hemi kɛ yemi ɔ he ha a maa ye bua mo konɛ o kɛ nihi nɛ sɛɛ he ní?

¹⁷ Ke o jeɔ bumi kpo kɛ haa nihi, nɛ o bua jɔɔ a he ɔ, lɔ ɔ ma nyɛ ma ha nɛ a bu mo tue. Yiheyo ko nɛ a tsɛɛ lɛ ke Olivia nɛ e ye jeha 17 nɛ a baptisi lɛ benɛ e yi jeha 13 ɔ de ke: “Be fɛɛ be ɔ, i yeɔ gbeye kaa ke i kɛ nihi ngɛ Baiblo ɔ he ní sɛɛe ɔ, a ma susu kaa i peeɔ ye he dalɔ tsɔ.” Kɛkɛ nɛ e bɔni níhi a he susumi ngɛ blɔ kpa nɔ. Olivia ha we nɛ susumi nɛ ɔ nɛ e ná e nɔ he wami, mohu ɔ, e de ke: “Nihewi kɛ yihewi fuu li Yehowa Odasefohi a he nɔ́ ko. Wɔ pɛ ji Odasefohi nɛ a le. Enɛ ɔ he ɔ, bɔ nɛ wa peeɔ wa ní ha a maa tsɔɔ kaa a maa bu wɔ tue aloo a be wɔ tue bue. Ke wa gboɔ zo, wa yeɔ gbeye, aloo e yeɔ ha wɔ kaa waa kɛ nihi maa sɛɛ wa hemi kɛ yemi ɔ he ní, aloo ke wa he kpokpoɔ be mi nɛ waa kɛ mɛ ngɛ wa hemi kɛ yemi ɔ he ní sɛɛe hu nɛɛ? Ke e ba jã a, a maa na kaa wa be nɔ mi mami ngɛ nɔ́ nɛ wa ngɛ dee ɔ he. Akɛnɛ wa ná we kã he je ɔ, eko ɔ, a kɛ bua jɔmi be nɔ́ nɛ wa ngɛ dee ɔ nɔ kplɛɛe. Se ke waa kɛ kã kɛ bua jɔmi tu wa hemi kɛ yemi ɔ he munyu kaa bɔ nɛ waa kɛ nihi sɛɛɔ ní kpahi a he ní faa a, atsinyɛ jemi ko be he kaa a maa bu wɔ tue.”

NYƐƐ HI NYƐ NITSƐMƐ NYƐ YI WAMI HEMI Ɔ HE NÍ TSUE

18. Mɛni o maa pee konɛ o nyɛ nɛ o tsu o yi wami hemi ɔ he ní?

¹⁸ Wa ba na kaa o yi wami hemi ɔ he ní nɛ mo nitsɛ o ma tsu ɔ he hia wawɛɛ. Ní komɛ nɛ maa ye bua mo konɛ o pee jã ji Mawu Munyu ɔ nɛ o maa kane nɛ o pue o yi mi tɛ ngɛ he, sɔlemi nɛ o maa sɔle ha Yehowa, kɛ jɔɔmihi nɛ Yehowa jɔɔ mo nɛ o ma susu he. Ke o pee ní nɛ ɔmɛ ɔ, e maa ye bua mo nɛ nɔ mi mami nɛ o ngɛ kaa Yehowa ji o huɛ ɔ mi maa wa wawɛɛ. Jehanɛ hu ɔ, lɔ ɔ ma ha nɛ o kɛ nihi maa sɛɛ o hemi kɛ yemi ɔ he ní faa.​—Kane La 73:28.

19. Mɛni he je nɛ se nami ngɛ he kaa o maa tsu mo nitsɛ o yi mi wami hemi ɔ he ní ɔ?

¹⁹ Yesu de ke: “Ke nɔ ko suɔ kaa e maa nyɛɛ ye se ɔ, e kua e he, nɛ e wo e sɛumi tso ɔ, nɛ e ya nɔ nɛ e nyɛɛ ye se.” (Mat. 16:24) Ngɛ anɔkuale mi ɔ, Yesu kaselɔ nɛ o maa pee ɔ biɔ nɛ o jɔɔ o he nɔ ha Yehowa nɛ o ha nɛ a baptisi mo. Se kɛ̃ ɔ, lɔ ɔ bliɔ blɔ nɛ o náa jɔɔmihi fuu amlɔ nɛ ɔ, nɛ ngɛ Mawu je ehe ɔ mi hu ɔ, o ma ná neneene wami. Ke jã a, lɛɛ e sa nɛ o bɔ mɔde nɛ o ya nɔ nɛ o tsu mo nitsɛ o yi mi wami hemi ɔ he ní!