Ke Oslaa Ko Ba

“Sisije ɔ, wa nu he kaa wa hɛ nɔ kami tsuo tã. Nyu ɔ kpata wa nɔ́ fɛɛ nɔ́ hɛ mi.”—Andrew, Sierra Leone.

“Benɛ kɔɔhiɔ nɛ nya wa a fia tã a, wa kpale kɛ ho wa we ɔ mi ya. Nɔ́ ko po piɛ. Wa he mi po. Ye biyo ɔ kpla si nɛ e fo ya hluu.”—David, Virgin Islands.

KE O kɛ oslaa ko kpe hyɛ ɔ, o maa nu nɔ́ nɛ nimli nɛ ɔmɛ de ɔ sisi. E maa pee kaa nɔ́ nɛ nihi kua mo, o maa pee basaa, o maa pee yeyeeye nɛ o be nyɛe maa hwɔ mahe. Nihi babauu nɛ a kɛ si fɔfɔɛ nɛ ɔmɛ eko kpe hyɛ ɔ a kɔni mi jɔ̃, a hao, nɛ a susuɔ kaa nɔ́ ko be hie peemi hu.

Ke oslaa ko ha nɛ o níhi tsuo bɔ mo ɔ, mo hu o ma nyɛ maa nu he kaa o be nyɛe nya dami hu. Eko ɔ, lɔ ɔ po ma ha nɛ o ma bɔ ni susumi kaa o wami he be se nami. Se kɛ̃ ɔ, Baiblo ɔ tsɔɔ kaa se nami ngɛ o wami he, nɛ o ma nyɛ ma ná hɛ nɔ kami kaa hwɔɔ se ɔ, si himi ɔ maa pee kpakpa.

BAIBLO Ɔ MI ANƆKUALE Ɔ HAA WƆ HƐ NƆ KAMI

Fiɛlɔ 7:8 ɔ de ke: “Nyagbe hi pe sisije.” Ke o kɛ oslaa ko kpe nɛ o ngɛ mɔde bɔe konɛ o nyɛ nɛ o da nya a, e maa pee mo kaa hɛ nɔ kami ko be. Se ke o to o tsui si nɛ o bɔ mɔde wawɛɛ ɔ, níhi ma ba hi.

Baiblo ɔ gba kɛ fɔ si kaa be ko maa ba nɛ ‘a be ya fomi, loo kɔmɔ yemi he nue hu.’ (Yesaya 65:19) Munyu nɛ ɔ maa ba mi ke Mawu Matsɛ Yemi ɔ ha nɛ zugba a tsuo pee paradeiso. (La 37:11, 29) Waa kɛ oslaahi be kpee hu. Haomihi kɛ nyagbahi nɛ oslaahi ngɔɔ kɛ baa wa nɔ ɔ tsuo se maa po kɛ maa ya neneene, ejakaa Mawu Ope ɔ wo si kaa: “A be blema ní ɔmɛ kaie hu; hɛ maa je a nɔ pɛsɛpɛsɛ.”—Yesaya 65:17.

Mo susu he nɛ o hyɛ: Bɔlɔ ɔ to blɔ nya kaa e ma ha mo ‘ní kpakpahi nɛ o ngɛ blɔ hyɛe ɔ.’ Lɔ ɔ ji si himi nɛ tue mi jɔmi ngɛ mi ngɛ Mawu nɔ yemi nɛ ye mluku ɔ mi. (Yeremia 29:11) Anɛ anɔkuale nɛ ɔ nɛ o maa le ɔ ma nyɛ ma ha nɛ o si himi nɛ pee kpakpa lo? Sally nɛ wa tu e he munyu kɛ sɛ hlami ɔ de ke: “Ke o susuɔ ní kpakpahi nɛ Mawu Matsɛ Yemi ɔ maa pee kɛ ha wɔ hwɔɔ se ɔ he ɔ, e ma nyɛ maa ye bua mo konɛ o je o juɛmi kɛ je nyagbahi nɛ o kɛ kpe ɔmɛ a nɔ, nɛ e maa ye bua mo konɛ o nyɛ nɛ o da nyagba kpahi a nya.”

Anɛ o bua be he jɔe kaa o maa kase níhi nɛ Mawu Matsɛ Yemi ɔ ma ba pee kɛ ha adesahi hwɔɔ se ɔ a he ní babauu lo? Jã nɛ o maa pee ɔ ma ha nɛ o ná hɛ kɛ nɔ fɔmi kaa ngɛ oslaa nɛ o kɛ kpe ɔ tsuo se ɔ, o ma ná si himi kpakpa amlɔ nɛ ɔ, be mi nɛ o ngɛ hwɔɔ se be nɛ oslaa ko be bae hu ɔ blɔ hyɛe ɔ. Se amlɔ nɛ ɔ, Baiblo ɔ kɛ ga womihi ha nɛ maa ye bua mo konɛ o nyɛ nɛ o da nyagbahi nɛ oslaahi kɛ ba amɛ a nya. Mo susu nɔ hyɛmi níhi bɔɔ komɛ a he nɛ o hyɛ.

Ngmami Nɛ Ɔmɛ Ma Nyɛ Maa Ye Bua

Moo jɔɔ o he bɔ nɛ sa.

“Afani nɔ́ ko bɔbɔyoo nɛ tue mi jɔmi ngɛ he pe nɛ o kɛ o nine enyɔ ma gbo yaka dengme kaa nɔ́ nɛ nɔ ko ngɛ fo tue kɛ ngɛ kɔɔhiɔ se nyɛɛe kɛkɛ.”—Fiɛlɔ 4:6.

Níhi a mi hlali tsɔɔ kaa ke nihi kɛ haomi ko nɛ mi wa kpe ɔ, “a hwɔ we mahe bɔ nɛ sa nɛ lɔ ɔ haa nɛ a peeɔ basaa nɛ a haoɔ wawɛɛ.” Enɛ ɔ he je ɔ, nile ngɛ mi kaa o maa hwɔ mahe nɛ o jɔɔ o he bɔ nɛ sa.

O kɛ nɔ ko nɛ sɛɛ o nyagba a he ní.

“Tsui yemi ha we nɔ bua jɔmi, se munyu kpakpa haa nɔ bua jɔɔ e he.”—Abɛ 12:25.

O kɛ o weku nɔ ko aloo o huɛ ko nɛ o heɔ lɛ yeɔ nɛ sɛɛ nyagba a he ní. Ke a bu mo tue nɛ a le bɔ nɛ e ngɛ mo pee ha a, a ma nyɛ maa wo mo he wami, nɛ jehanɛ se hu a maa ye bua mo hulɔ.a

Mo susu si himi kpakpa nɛ maa ba hwɔɔ se ɔ he.

“Ngɛ [Mawu] si womi ɔ nya a, wa ngɛ hiɔwe ehe kɛ zugba ehe ko blɔ hyɛe, nɛ lɔ ɔmɛ a mi nɛ dami maa hi.”—2 Petro 3:13.

a Ke nɔ ko nuɔ pɔ tɔ he be kɛkɛɛ aloo e peeɔ yeyeeye wawɛɛ ɔ, e maa hi kaa e bi dɔkitahi a yemi kɛ buami.