‘Nyɛɛ Hyɛ Nɛ Hi Nɛ Nɔ Ko Kó Ngɔ Nyɛ Nyɔguɛ’!

1. Kaa bɔ nɛ Kolose Bi 2:4, 8 ɔ tsɔɔ ɔ, mɛni Satan peeɔ konɛ e kɛ ngɔ wɔ nyɔguɛ?

SATAN ngɛ hlae nɛ wa kua Yehowa. Enɛ ɔ he ɔ, e bɔɔ mɔde kaa e ma je wa juɛmi kɛ je Yehowa nɔ konɛ wa ba pee e nyɔguɛhi nɛ waa bu lɛ mohu tue. Jehanɛ hu ɔ, e bɔɔ mɔde kaa e maa ngɔ níhi nɛ wa bua jɔ he ɔ kɛ sisi wɔ konɛ waa pee níhi nɛ e suɔ.​—Kane Kolose Bi 2:4, 8.

2-3. (a) Mɛni he je nɛ e sa nɛ waa bu kɔkɔ bɔmi nɛ ngɛ Kolose Bi 2:8 ɔ tue ɔ? (b) Mɛni he wa ma susu ngɛ ní kasemi nɛ ɔ mi?

² Anɛ Satan ma nyɛ maa sisi wɔ niinɛ lo? Ee, e ma nyɛ! Mo kai kaa tsa pi nihi nɛ a he we yi ɔ nɛ Paulo ngma munyu nɛ ngɛ Kolose Bi 2:8 ɔ kɛ ha. E ngma munyu nɛ ɔ kɛ bɔ Kristofohi nɛ a ngɔ mumi klɔuklɔu ɔ kɛ pɔ mɛ nu ɔ kɔkɔ. (Kol. 1:2, 5) Ke Kristofohi nɛ a hi si ngɛ Paulo be ɔ mi ɔ hia kɔkɔ bɔmi nɛ ɔ, lɛɛ wɔ nɛɛ? Kɔkɔ bɔmi nɛ ɔ he hia wɔ wawɛɛ mwɔnɛ ɔ pe mɛ. (1 Kor. 10:12) Mɛni he je? Ejakaa a fie Satan kɛ je hiɔwe kɛ ba zugba a nɔ, nɛ e ngɛ mɔde bɔe wawɛɛ kaa e maa sisi Mawu sɔmɔli nɛ a yeɔ anɔkuale ɔ. (Kpoj. 12:9, 12, 17) Jehanɛ hu ɔ, ngɛ wa be nɛ ɔ mi ɔ, nimli yayamihi kɛ nɔ sisili ngɛ a hɛ mi yae wawɛɛ “ngɛ yayami peemi mi.”​—2 Tim. 3:1, 13.

³ Ngɛ ní kasemi nɛ ɔ mi ɔ, wa maa na bɔ nɛ Satan bɔɔ mɔde ha kaa e maa ngɔ “yaka sisimi” kɛ puɛ wa juɛmi. Wa maa na e “ga ní tsumi” aloo e “ga tsɔmi” etɛ komɛ hulɔ. (Efe. 6:11, sisi ningma) Kɛkɛ ɔ, ngɛ ní kasemi nɛ nyɛɛ se ɔ mi ɔ, wa maa na bɔ nɛ wa maa pee ha kɛ dla susumi yayahi nɛ eko ɔ, Satan kɛ puɛ wa juɛmi ɔ. Se kekleekle ɔ, nyɛ ha nɛ waa hyɛ bɔ nɛ Satan plɛ kɛ sisi Israel bi ɔmɛ ha benɛ a ya su Si Womi Zugba a nɔ ɔ, kɛ níhi nɛ wa ma nyɛ maa kase ngɛ mi.

SATAN SISI ISRAEL BI ƆMƐ NƐ A YA JA AMAGAHI

4-6. Ngɛ 5 Mose 11:10-15 ɔ nya a, mɛni tsakemi lɛ e he hia nɛ Israel bi ɔmɛ nɛ a pee ngɛ ngmɔ peemi mi benɛ a ya su Si Womi Zugba a nɔ ɔ?

⁴ Satan sisi Israel bi ɔmɛ nɛ a ya ja amagahi. Mɛni blɔ nɔ e gu kɛ pee jã? E le kaa niye ní he maa hia Israel bi ɔmɛ, lɔ ɔ he ɔ, e ngɔ niye ní kɛ sisi mɛ. Benɛ Israel bi ɔmɛ ya su Si Womi Zugba a nɔ ɔ, e he ba hia nɛ a kase bɔ nɛ a peeɔ ngmɔ ha ngɛ zugba ehe ɔ nɔ. Benɛ Israel bi ɔmɛ ngɛ Egipt ɔ, a náa nyu ngɛ Nilo Pa a mi kɛ pueɔ a ngmɔ níhi a nɔ. Se ngɛ Si Womi Zugba a nɔ ɔ, pa ngua ko be lejɛ ɔ. Lɔ ɔ he ɔ, ngmɔ huli ngɔɔ a hɛ kɛ fɔɔ hiɔmi kɛ bɔ́ nɛ nɛɛ ɔ nɔ. (Kane 5 Mose 11:10-15; Yes. 18:4, 5) Enɛ ɔ he ɔ, e sa nɛ Israel bi ɔmɛ nɛ a kase blɔ kpa nɛ a maa gu nɔ kɛ pee ngmɔ. Se a be lɛ náe gbɔjɔɔ ejakaa a kpɛti nihi hiɛhiɛɛ nɛ a le ngmɔ humi ɔ gbo ngɛ nga a nɔ.

⁵ Yehowa ha nɛ e we bi ɔmɛ nu sisi kaa a si fɔfɔɛ tsake. Lɔ ɔ se ɔ, e bɔ mɛ kɔkɔ ke: ‘Nyɛɛ hyɛ nɛ hi konɛ a ko mlɔɔ nyɛ kɛ je [ye] he kɛ ya ja mawu kpahi, nɛ́ nyɛ sɔmɔ mɛ.’ (5 Mose 11:16, 17) Eko ɔ, e maa pee kaa nɔ́ nɛ kɔkɔ bɔmi nɛ ɔ kɔ we ngmɔ peemi he. Mɛni he je nɛ Yehowa bɔ Israel bi ɔmɛ kɔkɔ ngɛ lakpa mawuhi a jami he be mi nɛ e ngɛ ngmɔ peemi he munyu tue ɔ?

⁶ Yehowa le kaa Israel bi ɔmɛ maa suɔ nɛ a ya kase blɔ komɛ nɛ nihi nɛ a ja we Yehowa nɛ a ngɛ a kasa nya a guɔ nɔ kɛ peeɔ ngmɔ ɔ. Ngɛ anɔkuale mi ɔ, nihi nɛ a bɔle Israel bi ɔmɛ ɔ le ngmɔ peemi kulaa pe mɛ, enɛ ɔ he ɔ, a ma nyɛ maa kase níhi fuu kɛ je a ngɔ konɛ ngmɔ peemi he kó wa ha mɛ. Se oslaa ngɛ he. Kanaan bi ɔmɛ tsuo nɛ a ngmɔ huli ɔmɛ hu piɛɛ he ɔ jaa Baal. A heɔ yeɔ kaa Baal lɛ pee bɔku ɔ, nɛ lɛ nɛ e haa nɛ hiɔmi nɛɔ. Yehowa sume nɛ e we bi ɔmɛ nɛ a he lakpa munyu nɛ ɔmɛ nɛ a ye. Se enɛ ɔ tsuo se ɔ, Israel bi ɔmɛ ya ja Baal si abɔ. (4 Mose 25:3, 5; Many. 2:13; 1 Ma. 18:18) Amlɔ nɛ ɔ, nyɛ ha nɛ waa hyɛ blɔ slɔɔtohi nɛ Satan gu nɔ kɛ ngɔ Israel bi ɔmɛ nyɔguɛ.

BLƆ ETƐ NƐ SATAN GU NƆ KƐ NGƆ ISRAEL BI ƆMƐ NYƆGUƐ

7. Mɛni hemi kɛ yemi he ka nɛ Israel bi ɔmɛ kɛ kpe benɛ a ya su Si Womi Zugba a nɔ ɔ?

⁷ Ngmɔ hulɔ fɛɛ ngmɔ hulɔ suɔ nɛ hiɔmi nɛ nɛ kɛ pue e ngmɔ níhi a nɔ. Enɛ ɔ he ɔ, Satan da Israel bi ɔmɛ a hiami nɔ́ nɛ ɔ nɔ kɛ sisi mɛ. Enɛ ɔ ji kekleekle blɔ nɛ Satan gu nɔ kɛ sisi mɛ. Daa jeha a, ke e piɛ bɔɔ nɛ April nyɔhiɔ ɔ ma gbo kɛ ya sɛ September mi ɔ, hiɔmi bɔɔ pɛ lɛ nɛɔ ngɛ Si Womi Zugba a nɔ. Hiɔmi nɛ nɛɔ kɛ jeɔ October mi ɔ lɛ yeɔ bua mɛ titli nɛ a ngmɔ níhi peeɔ kpakpa, nɛ a náa a nya mi ngma. Satan sisi Israel bi ɔmɛ kaa loko a ngmɔ ní ɔmɛ maa pee kpakpa a, ja a kɛ a he wo mahi nɛ a ja we Yehowa nɛ a bɔle mɛ ɔ a kusumihi a mi. Ma nɛ ɔmɛ heɔ yeɔ kaa ja a pee kusumi komɛ kɛ ha a mawu ɔmɛ loko hiɔmi maa nɛ ha mɛ. Israel bi ɔmɛ a ti nihi nɛ a be hemi kɛ yemi ngɛ Yehowa mi ɔ ya susu kaa ke a pee we kusumi nɛ ɔmɛ ha Baal ɔ, sapu maa ba, nɛ hwɔ maa ye mɛ, enɛ ɔ he ɔ, a ya ja Baal.

8. Mɛni ji blɔ enyɔne nɛ Satan gu nɔ kɛ sisi Israel bi ɔmɛ? Moo tsɔɔ nya.

⁸ Nɔ́ nɛ ji enyɔ ɔ, Satan sisi Israel bi ɔmɛ nɛ a ngɔ a he kɛ wo ajuama bɔmi mi. Ke mahi nɛ a ja we Yehowa a ngɛ a mawu ɔmɛ jae ɔ, a ngɔɔ a he kɛ woɔ je mi bami yaya slɔɔtohi a mi. Kaa nɔ hyɛmi nɔ́ ɔ, yihi kɛ nyumuhi poɔ tuutuu ngɛ Baal jami he ɔmɛ. Jehanɛ hu ɔ, Baal jali ɔmɛ nɛ tɔmi ko kulaa ngɛ nyumu kɛ nyumu aloo yo kɛ yo a bɔmi nami kɛ bɔmi nami kpahi tsuo nɛ sɛ a he. (5 Mose 23:17, 18; 1 Ma. 14:24) Wɔ jali nɛ ɔmɛ heɔ yeɔ kaa kusumi nɛ ɔmɛ nɛ a peeɔ ɔ woɔ a mawu ɔmɛ he wami nɛ a haa nɛ a ngmɔ níhi baa saminya. Israel bi fuu a bua ya jɔ wɔ jali nɛ ɔmɛ a kusumihi nɛ ajuama bɔmi ngɛ mi ɔ a he, nɛ lɔ ɔ ha nɛ a sisi mɛ, nɛ a ya ja lakpa mawuhi. Se ngɛ anɔkuale mi ɔ, Satan ngɔ mɛ nyɔguɛ.

9. Ngɛ Hosea 2:16, 17 ɔ nya a, ngɛ mɛni blɔ nɔ nɛ Satan ha nɛ Israel bi ɔmɛ a hɛ je Yehowa nɔ?

⁹ Mɛni ji blɔ etɛne nɛ Satan gu nɔ kɛ sisi Israel bi ɔmɛ? E je Israel bi ɔmɛ a juɛmi kɛ je Yehowa nɔ. Ngɛ gbalɔ Yeremia be ɔ mi ɔ, Yehowa tsɔɔ kaa lakpa gbali ɔmɛ ha nɛ e we bi ɔmɛ a hɛ je e biɛ ɔ nɔ, “nɛ a ya sɔmɔ Baal.” (Yer. 23:27) Mawu we bi ɔmɛ kpa Yehowa biɛ ɔ tsɛmi, nɛ a bɔni lɛ tsɛmi ke Baal. Baal sisi ji “Huno” aloo “Nyɔmtsɛ.” Enɛ ɔ ma ha nɛ e maa ye ha Israel bi ɔmɛ kaa a maa le slɔɔto nɛ ngɛ Yehowa kɛ Baal a kpɛti, nɛ lɔ ɔ ma ha nɛ a maa ngɔ kusumihi nɛ a peeɔ ngɛ Baal jami mi ɔ kɛ ya futu Yehowa jami.​—Kane Hosea 2:16, 17 kɛ sisi ningma.

BLƆHI NƐ SATAN GUƆ NƆ KƐ SISIƆ NIHI MWƆNƐ Ɔ

10. Mɛni blɔhi a nɔ Satan guɔ kɛ sisiɔ nihi mwɔnɛ ɔ?

¹⁰ Blɔhi nɛ Satan gu nɔ kɛ sisi Israel bi ɔmɛ ɔ nɔuu nɛ e guɔ nɔ kɛ sisiɔ nihi mwɔnɛ ɔ. E daa adesahi a hiami níhi a nɔ kɛ sisiɔ mɛ. E haa nɛ nihi naa ajuama bɔmi kaa nɔ́ ko nɛ tɔmi be he. Jehanɛ hu ɔ, e jeɔ nihi a juɛmi kɛ jeɔ Yehowa nɔ. Nyɛ ha nɛ wa susu nyagbe nɔ́ ɔ he kekle.

11. Mɛni blɔ nɔ Satan gu kɛ je nihi a juɛmi kɛ je Yehowa nɔ?

¹¹ Satan jeɔ nihi a juɛmi kɛ jeɔ Yehowa nɔ. Ngɛ Yesu bɔfo ɔmɛ a gbenɔ se ɔ, Kristofohi nɛ a kua hemi kɛ yemi ɔ bɔni lakpa tsɔɔmihi tsɔɔmi. (Níts. 20:29, 30; 2 Tɛs. 2:3) Hemi kɛ yemi kuali nɛ ɔmɛ bɔni nihi a juɛmi jemi ngɛ anɔkuale Mawu ɔ nɔ. Kaa nɔ hyɛmi nɔ́ ɔ, a je Mawu biɛ ɔ kɛ je a Baiblo ɔmɛ a mi, nɛ a kɛ sablai nɛ ji “Nyɔmtsɛ” kɛ ekpa komɛ da nane mi. Akɛnɛ a je Mawu biɛ ɔ nitsɛ kɛ je Baiblo ɔ mi nɛ a kɛ “Nyɔmtsɛ” da nane mi he je ɔ, e ha nɛ e yeɔ ha nihi nɛ a kaneɔ Baiblo ɔ kaa a maa le slɔɔto nɛ ngɛ Yehowa kɛ “nyɔmtsɛmɛ” kpahi nɛ Baiblo ɔ tu a he munyu ɔ a kpɛti. (1 Kor. 8:5) A kɛ sablai nɛ ji “Nyɔmtsɛ” ɔ tsɛɔ Yehowa kɛ Yesu tsuo. Enɛ ɔ he ɔ, e yeɔ ha nihi kaa a maa le slɔɔto nɛ ngɛ Yehowa kɛ e Bi ɔ a kpɛti. (Yoh. 17:3) Slɔɔto nɛ ngɛ Yehowa kɛ Yesu a kpɛti nɛ nihi li ɔ lɛ ngɔ Triniti tsɔɔmi nɛ be Mawu Munyu ɔ mi ɔ kɛ ba a nɛ. Enɛ ɔ ha nɛ nihi susuɔ kaa nɔ ko be nyɛe maa le Mawu. Munyu nɛ ɔ ji lakpa!​—Níts. 17:27.

12. Mɛni nɛ lakpa jami haa nɛ nihi peeɔ, nɛ kaa bɔ nɛ Roma Bi 1:28-31 ɔ tsɔɔ ɔ, mɛni je mi kɛ ba?

¹² Satan sisiɔ nihi nɛ a ngɔɔ a he kɛ woɔ ajuama bɔmi mi. Ngɛ blema Israel ɔ, Satan gu lakpa jami nɔ kɛ ha nɛ nihi ngɔ a he kɛ wo ajuama bɔmi mi. Mwɔnɛ ɔ hu ɔ, e peeɔ jã nɔuu. Nihi nɛ a ngɛ lakpa jami mi ɔ nɛ́ tɔmi ko ngɛ je mi bami yaya he, nɛ a woɔ nihi he wami, nɛ a kɛ a he woɔ mi. Enɛ ɔ he ɔ, nihi babauu nɛ a deɔ ke a ngɛ Mawu jae ɔ kua je mi bami he mlaahi nɛ Mawu wo ɔ. Ngɛ sɛ womi nɛ bɔfo Paulo ngma kɛ ya ha Roma bi ɔmɛ ɔ mi ɔ, e tsɔɔ nɔ́ nɛ je jã peemi mi kɛ ba. (Kane Roma Bi 1:28-31.) Ajuama bɔmi, nɛ́ nyumu kɛ nyumu aloo yo kɛ yo a bɔmi nami piɛɛ he ɔ piɛɛ “níhi nɛ sɛ” ɔmɛ a he. (Rom. 1:24-27, 32; Kpoj. 2:20) E he hia wawɛɛ kaa waa kɛ blɔ tsɔɔmihi nɛ ngɛ Baiblo ɔ mi ɔ ma tsu ní.

13. Mɛni ji blɔ kpa ko nɛ Satan guɔ nɔ kɛ sisiɔ nihi?

¹³ Satan daa adesahi a hiami níhi a nɔ kɛ sisiɔ mɛ. Wɔ tsuo wa suɔ kaa wa maa kase ní tsumi ko konɛ wa nyɛ nɛ waa hyɛ wɔ nitsɛmɛ wa he kɛ wa wekuhi. (1 Tim. 5:8) Behi fuu ɔ, loko wa ma nyɛ maa pee jã a, ja wa ya sukuu nɛ wa kase ní wawɛɛ. Se e sa nɛ waa hyɛ saminya. Ngɛ mahi fuu a nɔ ɔ, tsa pi níhi nɛ ma ha nɛ nɔ ko ma ná ní tsumi pɛ nɛ a tsɔɔ. A tsɔɔ je mi nile hulɔ. Tsɔɔmi nɛ ɔmɛ haa nɛ sukuu bi ɔmɛ he we yi kaa Mawu ngɛ, nɛ a bui Baiblo ɔ hulɔ. A tsɔɔ sukuu bi kaa ní leli tsuo heɔ bilemi tsɔɔmi ɔ yeɔ. (Rom. 1:21-23) Se tsɔɔmi nɛ ɔmɛ teɔ si kɛ woɔ “Mawu juɛmi ɔ.”​—1 Kor. 1:19-21; 3:18-20.

14. Mɛni suhi nɛ je mi nile haa nɛ nihi náa?

¹⁴ Je mi nile teɔ si kɛ woɔ Yehowa mlaa amɛ. E ha we nɛ nihi nɛ a ná Mawu mumi ɔ yiblii ɔ, mohu ɔ, a diɔ “he lo ɔ ní tsumi ɔmɛ” a se. (Gal. 5:19-23) Nile nɛ ɔ haa nɛ nihi woɔ a he nɔ, nɛ lɔ ɔ ha nɛ a “suɔ mɛ nitsɛmɛ a he.” (2 Tim. 3:2-4) Je ɔ su nɛ ɔmɛ kɛ su kpakpa nɛ ji he si bami nɛ Mawu suɔ nɛ e sɔmɔli nɛ a ná a kɔ we. (2 Sam. 22:28) Kristofohi komɛ nɛ a ya yunivɛsiti ɔ ya kplɛɛ je ɔ susumi ɔ nɔ mohu pe Mawu susumi ɔ. Nyɛ ha nɛ waa hyɛ nyagba ko nɛ ma nyɛ maa ba ke wa kua kɔkɔ bɔmi nɛ kɔɔ yunivɛsiti yami he ɔ.

15-16. Mɛni o kase ngɛ nyɛmiyo ɔ níhi a si kpami ɔ mi?

¹⁵ Nyɛmiyo ko nɛ e ngɛ sɔmɔe kaa daa blɔ gbalɔ jeha 15 kɛ se ji nɛ ɔ de ke: “E ngɛ mi kaa a baptisi mi kaa Odasefo no, nɛ i kane, nɛ i nu nyagbahi fuu nɛ ngɛ yunivɛsiti yami he mohu lɛɛ, se i kɛ kɔkɔ bɔmi ɔ tsu we ní. I susu kaa ga womi nɛ ɔ kɔ we ye he.” Mɛni nyagbahi e kɛ kpe? E de ke: “I ngɔ ye be fuu kɛ kase ní, nɛ lɔ ɔ ha nɛ i ná we be nɛ ma kɛ sɔle kɛ ha Yehowa kaa bɔ nɛ i peeɔ sa a. Jehanɛ hu ɔ, i ná we be nɛ i kɛ nihi maa sɛɛ Mawu he ní. Nɛ pɔtɔtɔɛ he je ɔ, i nyɛ we nɛ i dlaa ye he kɛ haa asafo mi kpehi. Se benɛ i ba yɔse kaa yunivɛsiti ɔ nɛ i ngɛ yae ɔ ngɛ i kɛ Yehowa wa kpɛti puɛe ɔ, i ma ye juɛmi nya si kaa ma kpa sukuu ɔ. Nɛ i pee jã.”

¹⁶ Yunivɛsiti ɔ nɛ nyɛmiyo ɔ ya a ha nɛ e susumi tsake. Ngɛ mɛni blɔ nɔ? E de ke: “E ngɛ mi zo pee po kaa ma de. Tsɔsemi nɛ i ná ngɛ sukuu ɔ ha nɛ i ngɔɔ ye juɛmi kɛ maa nihi a gbɔjɔmihi a nɔ, titli nyɛmimɛ nɛ a ngɛ asafo ɔ mi ɔ. E ha nɛ i naa mɛ kaa a bɔɛ a he mɔde, nɛ lɔ ɔ he ɔ, i kɛ mɛ bɔɛ. E he mi be fuu loko i nyɛ ngmɛɛ susumi nɛ ɔmɛ a he. Níhi a si kpami nɛ i ná nɛ ɔ ha nɛ i na kaa ke waa kɛ kɔkɔ bɔmi nɛ wa hiɔwe Tsɛ ɔ haa wɔ kɛ guɔ e we asafo ɔ nɔ ɔ tsu we ní ɔ, e maa ye wɔ nitsɛmɛ awi. Yehowa le mi pe bɔ nɛ i le imi nitsɛ ye he ɔ. E dɔ mi kaa i bui Yehowa tue kɛ ji sisije!”

17. (a) Mɛni nɛ e sa nɛ waa mwɔ wa yi mi kpɔ kaa wa maa pee? (b) Mɛni he wa ma susu ngɛ ní kasemi nɛ nyɛɛ se ɔ mi?

¹⁷ Moo fia o pɛɛ si kaa o be hae nɛ Satan je ɔ nɛ ngɔ “je mi nile kɛ yaka sisimi” kɛ ngɔ mo nyɔguɛ. Ko ha nɛ Satan nɛ sisi mo kɔkɔɔkɔ. (1 Kor. 3:18; 2 Kor. 2:11) Koo ngmɛ Satan blɔ nɛ e je o juɛmi kɛ je Yehowa nɔ. Ngɔɔ je mi bami he mlaahi nɛ Yehowa wo ɔ kɛ tsu ní. Jehanɛ hu ɔ, ko ha nɛ Satan nɛ sisi mo nɛ o kua Yehowa ga womi ɔmɛ. Se ke o yɔse kaa je ɔ juɛmi ɔ ná o nɔ he wami ɔ, mɛni e sa kaa o pee? Ní kasemi nɛ nyɛɛ se ɔ maa tsɔɔ wɔ bɔ nɛ Mawu Munyu ɔ ma nyɛ maa ye bua wɔ ha konɛ wa nyɛ nɛ wa kua susumihi kɛ ní peepeehi nɛ a “du si wawɛɛ ɔmɛ.”​—2 Kor. 10:4, 5.